Bu die em jeisteljen wada opp

JIEDA Joa woaren een deel wieetvolle Schop en de Christenvesaumlunk wada oppjenomen. Stal die väa, waut vonne groote Freid daut em Himmel jeft, wan doa wäa trigjkjemt! (Luk. 15:7, 10). Wan du trigjekomen best, dan kaust du die secha sennen, daut Jesus un de Enjel un Jehova selfst sikj sea freien, daut du wada fa de Woarheit ensteist. Wan du wada Frint woascht met Jehova, kaun daut sennen, daut du woascht Schwierichkjeiten haben. Waut vonne kjennen daut sennen, un waut kaun die halpen?

WAUT VONNE SCHWIERICHKJEITEN KAUN DAUT JÄWEN?

Väle von onse Breeda un Sestren feelen sikj mootloos, nodäm daut dee trigj no de Vesaumlunk jekomen sent. Veleicht jeit dee daut soo aus dän Kjennich David. Nodäm daut Jehova am vejäft haud, säd hee: “Miene Sinden haben mie to hoolen jekjräajen” (Psa. 40:13; 65:4). Eenjemol kaun eena sikj noch joarenlank schämen ooda schlajcht feelen. Isabelle,a waut äwa 20 Joa utjeschloten wia, säd: “Ekj kunn daut meist nich jleewen, daut Jehova mie vejäwen kunn.” Wan du die mootloos feelst, kaun daut leicht sennen, daut du wada em Gloowen schwak woascht (Spr. 24:10, NW). Lot daut nich bat doa komen!

Aundre beduaren, aus see woaren emstaunt sennen, aul daut notokomen, waut doa needich es, daut see wada kjennen Frind woaren met Jehova. Nodäm daut Antoine wada oppjenomen wort, säd hee: “Mie späad sikj soo, ekj haud väl vejäten, waut ekj ea jedonen un jelieet haud, aus ekj Jehova noch deend.” Eenje jeit daut soo, un doawäajen doonen dee nich soo väl fa Jehova, aus dee wudden doonen kjennen.

Daut es een bät soo, aus wan eenem sien Hus en eenen grooten Storm sea beschädicht es. Eena feelt sikj schia äwafoddat, wan eena doaraun denkjt, woo väl Tiet un Krauft daut kosten woat, daut wada foadich to moaken. Krakjt soo brukt daut uk väl schwoare Oabeit, daut du wada kaust Frint woaren met Jehova. Oba du best nich auleen.

Jehova sajcht to ons: “Komt emol toop . . . un well wie daut derch räden” (Jes. 1:18). Du hast die aul sea aunjestrenjt, diene Sinden met Jehova goottomoaken. Jehova räakjent die sea väl, daut du daut jedonen hast. Doaderch hast du am de Jeläajenheit jejäft to bewiesen, daut de Soton een Läajna es (Spr. 27:11).

Wiels du dit jedonen hast, best du Jehova noda jekomen un hee vesprakjt, daut hee die uk noda komen woat (Jak. 4:8). Daut es scheen, daut du wada Poat von de Vesaumlunk best, oba du motst noch mea doonen. Diene Leew fa Jehova, waut dien Voda un Frint es, mott noch jrata woaren. Woo es daut mäajlich?

NEMM DIE WAUT VÄA, WAUT DU VOLBRINJEN KAUST

Nemm die waut goodet väa. Secha weetst du noch väl von Jehova un von daut, waut hee vesproaken haft. Oba du motst wada goode jeistelje Jewanheiten kjrieen, biejlikj pinkjlich prädjen, no de Toopkomes wanken un met diene Breeda toop sennen. See wie mol, waut du die noch väanämen kaust.

Bäd foaken to Jehova. Dien himlischa Voda weet, daut daut bäden fa die schwoa sennen kaun, wan du die aul fa eene lenjre Tiet schuldich feelst (Reem. 8:26). Doo wieda aunhoolent bäden un saj Jehova, daut du werkjlich west sien Frint sennen (Reem. 12:12). Andrej sajcht: “Ekj feeld mie sea schuldich un schämd mie. Oba jiedatsmol, wan ekj jebät haud, feeld ekj mie wada bäta un haud ennalich Fräd.” Un wan du nich weetst, waut du bäden saust, dan kjikj no dän Kjennich David siene Jebäda, waut en Psalm 51 un 65 stonen.

Studia räajelmässich de Schreft. Dit woat die halpen em Gloowen stoakja to woaren un diene Leew fa Jehova woat jrata woaren (Psa. 19:8-12). Felipe sajcht: “Wiels ekj nich räajelmässich de Bibel läsen un studieren deed, wort ekj em Gloowen schwak un muak Jehova truarich. Un wiels ekj nich noch eemol dänselwjen Fäla moaken wull, sach ekj doano, daut ekj nu räajelmässich de Schreft studieed.” Du kaust daut uk doonen. Wan du nich weetst, waut du studieren saust, dan kaust du eenen erfoarnen Frint no Rot froagen.

Moak die diene Breeda un Sestren wada to Frind. Eenje, waut wada trigj no de Vesaumlunk komen, haben Angst, daut aundre schlajcht von an denkjen woaren. Larissa sajcht: “Ekj schämd mie sea. Ekj haud daut Jefeel, daut ekj miene Breeda un Sestren aunjeschmäat haud. Met dise Jefeelen must ekj lang kjamfen.” Du kaust die secha sennen, daut de Eltestasch un aundre erfoarne Breeda un Sestren die halpen wellen, daut du wada kaust Frint woaren met Jehova. (See dän Kausten “Waut kjennen de Eltestasch doonen?”) Dee freien sikj, daut du trigjekomen best, un wellen, daut du schaftich best! (Spr. 17:17).

Waut kaust du doonen, daut du die wada Poat von de Vesaumlunk feelst? Sie pinkjlich bie de Toopkomes un doo met diene Breeda un Sestren toop prädjen. Woo kaun die daut halpen? Felix sajcht: “De Vesaumlunk luad doano, daut ekj wada trigjkjeem. Dee neemen mie leeftolich opp. Aule holpen mie, daut ekj mie enne Vesaumlunk wada tus feeld, un holpen mie to vestonen, daut Jehova mie vejäft haud un daut ekj am wieda deenen kunn.” (See dän Kausten “Waut kaust du doonen?”)

JEFF NICH OPP!

Wan du dienen Gloowen aun Jehova wada oppbust, dan woat de Soton wieda proowen, die met Storms, ooda Trubbels, mootloos to moaken (Luk. 4:13). Moak die nu doaropp reed, doaderch daut du met Jehova jratre Frind woascht.

Jehova sajcht von siene Schop: “Ekj woa dee, dee sikj velieren, wada sieekjen, un dee dee sikj vebeislen trigjbrinjen. Dee waut Wunden haben, woa ekj vebinjen, un de schwake stoakj moaken” (Hes. 34:16). Jehova haft aul väle jeholpen wada trigjtokomen. Du kaust die secha sennen, daut hee die uk halpen well, am emma noda to komen.

Waut kjennen de Eltestasch doonen?

De Eltestasch kjennen soone sea halpen, waut wada oppjenomen sent, daut dee wada kjennen Frind woaren met Jehova. See wie mol, waut dee fa dee doonen kjennen.

Moakt dee Moot. De Apostel Paulus wist, daut eena, waut een Leetsennen haud, leicht bat doa komen kunn, “daut sien truarich sennen am . . . too sea doldrekjt” (2. Kor. 2:7). Daut kaun sennen, daut dee sikj sea schämt un mootloos es. Paulus rod de Vesaumlunk too: “Vejäft un treest am”. Soone, waut wada oppjenomen sent, fält daut to weeten, daut Jehova un äare Gloowesbreeda an väl räakjnen. Wan de Eltestasch an foaken lowen, woat dee daut halpen, sikj nich soo leicht mootloos to feelen.

Bät met dee toop. “Daut Jebäd von eenem jerajchten kaun väl utrechten” (Jak. 5:16). Larissa, von dee wie ea aul räden, sajcht: “Ekj vetald de Eltestasch von mienen Twiewel un von miene Angst. Dan kunn ekj vestonen, daut de Eltestasch nich doll wieren äwa mie. Dee wullen mie halpen, daut ekj wada kunn met Jehova Frind woaren.” Theo sajcht: “De Eltestasch äare Jebäda weesen mie, daut Jehova mie väl räakjend un daut hee bie mie no daut goode kjikjt un nich bloos no daut schlajchte.”

Siet Frind met dee. Soone, waut trigj no Jehova jekomen sent, fält daut sea needich aun Frind en de Vesaumlunk. Justin, waut een Eltesta es, sajcht: “Nutz jieda Jeläajenheit ut, om met dee toop to prädjen un vejät nich, dee to besieekjen. Un besonda needich es daut, dee äa Frint to sennen!” Een aundra Eltesta, waut Henry heet, sajcht: “Wan de aundre von de Vesaumlunk daut seenen, daut de Eltestasch met dee Frind sent, waut trigjekomen sent, dan woaren dee dautselwje doonen.”

Halpt dee to studieren. Een erfoarna Frint kaun eenen, waut trigjekomen es, halpen wada goot to studieren. Een Eltesta, waut Darko heet, sajcht: “Ekj jleich daut, aundre to vetalen, waut ekj biem studieren jefungen hab, un wies dee, woo sea ekj daut studieren jleich. Ekj beräd mie uk met dee, jewesset toop to studieren.” Clayton, een aundra Eltesta, sajcht: “Ekj rod dee too, sikj biblische Biespels to unjastonen, waut biejlikj soont beläft haben aus see.”

Siet goode Hoads fa dee. Soone, waut wada oppjenomen sent, haben daut beläft, daut de Eltestasch Rechta sent. Oba nu es daut besonda needich, daut dee späaren, daut dee uk Hoads sent (Jer. 23:4, JHF). Siet reed, dee tootohorchen un to lowen. Rät foaken met dee. Kjikjt mol, woo een Eltesta, waut Marcus heet, Hoadbesuchs moakt: “Wie wiesen dee waut ut de Schreft, lowen dee un sajen dee, daut wie un uk Jehova brow met an sent, daut see sikj soo aunstrenjen trigjtokomen. Un jiedatsmol, wan wie dee besocht haben, beräd wie ons aul eenen Dach fa daut näakjste Mol.”

a De Nomes hab wie hia jeendat.