WOO EENA DÄN HAUSS ÄWAKOMEN KAUN

1 | Kjeenen Unjascheet manke Menschen moaken

Waut de Schreft sajcht:

“Gott [moakt] manke Menschen kjeen Unjascheet; oba ut aule Velkja . . . [nemt hee dee aun], dee am ferchten un doonen waut rajcht es” (APOSTELJESCHICHT 10:34-35).

Waut daut bediet:

Jehovaa Gott deit ons nich doano rechten, von waut von Launt ooda Rauss wie sent. Uk nich no onse Hutkalia no ooda woo wie daut haben. Enne Städ daut kjikjt hee no daut, waut werkjlich wichtich es: woo wie ennalich sent. De Schreft sajcht: “Een Mensch sitt woo eena von buten lat; oba de HAR kjikjt no daut Hoat” (1. Samuel 16:7).

Waut eena doonen kaun:

Wie kjennen Gott nodoonen un kjeenen Unjascheet moaken manke Menschen, wan wie uk nich weeten, waut aundre em Hoat haben. Kjikj nich bloos doano, woo eene Grupp Menschen daut haft, oba woo jieda Mensch oppoat es. Wan du daut enwoascht, daut du veleicht schlajcht äwa aundre denkjst – biejlikj soone, waut von een aundret Launt ooda Rauss sent – dan bät to Gott, daut hee die halpt, aundasch to feelen (Psalm 139:23-24). Wan du Jehova iernstlich no de Krauft frajchst, nich eenen Unjascheet to moaken, dan kaust du die secha sennen, daut hee no dien Jebäd horcht un die halpen woat (1. Petrus 3:12).

a Jehova, ooda Jahwe, es Gott sien Nomen (Amos 9:6, JHF).

“Noch kjeenmol ea haud ekj mie met eenen witten Mensch en Fräd toop dol jesat. Un nu haud ekj mau rajcht eene Moltiet met dän toop en sien Hus. Nu wia ekj Poat von eene jeistliche Famielje von oppe gaunze Welt.” (TITUS)

Läwesjeschicht: TITUS

kunn dän Hauss äwakomen

Titus wia vestalt äwa soone Jesazen, waut eenen Unjascheet muaken manke Raussen. Un hee stunt sikj met soone Baund toop, waut krakjt soo feelden. Hee sajcht: “Wie jinjen no soone Städen, wua se dunkle Menschen nich wullen. Biejlikj soo aus Hotels ooda Sup-Hiesa, bloos toom seenen eenen Feit auntorechten.” Waut am bat doa brocht, wia Hauss. Hee sajcht uk: “Wan ekj met wäm em Jestried kjeem – aus Maun ooda Fru –, wia ekj emma de ieeschta, waut dee aunfunk to vekjielen.”

Aus Titus de Bibel studieed met Jehova siene Zeijen, funk hee aun to endren. Waut hee en de Schreft läsd, veendat sien denkjen. Besonda daut Vespräakjen von de niee Welt, wua doa “kjeen Doot ooda Trua ooda Hielen ooda Weedoag mea sennen” woat, jinkj am sea to Hoaten (Openboarunk 21:3-4).

Aum Aunfank wia Titus daut sea schwoa, dän Hauss en sikj to äwakomen. Hee sajcht: “Mie wia daut sea schwoa, mien denkjen un Benämen to endren.” Oba am holp daut, waut Aposteljeschicht 10:34-35 lieet, daut Gott manke Menschen kjeenen Unjascheet moakt.

Waut kjeem doabie rut? Titus sajcht: “Ekj wia mie secha, daut Jehova siene Zeijen dän rajchten Gloowen hauden, wiels ekj sach, daut dee Leew unjarenaunda hauden, endoont von waut vonne Rauss ooda Hutkalia de wieren. Mau rajcht ea ekj jedeept wia, kroagd een witta Brooda von de Vesaumlunk mie no sien Hus to eene Moltiet. Ekj kunn daut nich jleewen. Noch kjeenmol ea haud ekj mie met eenen witten Mensch en Fräd toop dol jesat. Un nu haud ekj mau rajcht eene Moltiet met dän toop en sien Hus. Nu wia ekj Poat von eene jeistliche Famielje von oppe gaunze Welt.”