WOO EENA DÄN HAUSS ÄWAKOMEN KAUN

2 | Sikj nich aufrajchnen

Waut de Schreft sajcht:

“Tolt . . . nich met schlajchtet trigj. . . . Doot aules waut jie kjennen, wan daut mäajlich es, met aule Menschen Fräd to haben. Doot niemols Rach eewen, . . . wiels daut steit jeschräwen: ‘Rach eewen es miene Sach. Ekj woa trigjtolen, sajcht de Har.’” (REEMA 12:17-19).

Waut daut bediet:

Wan ons wäa waut aundeit, es daut gaunz jeweenlich, daut eena en sikj doll woat. Oba Gott well nich haben, daut wie ons aufrajchnen. Hee well leewa, daut wie jeduldich bliewen, wiels hee vesprakjt ons, hee woat met aul daut ojjerajchte een Enj moaken (Psalm 37:7, 10).

Waut eena doonen kaun:

Met dän Hauss kaun daut bloos oaja woaren, wan onvolkomne Menschen sikj aufrajchnen. Wan die wäa waut aunjedonen ooda die beleidicht haft, doo dän nich trigjtolen. Proow die to beoabeiden un ruich to bliewen. Eenjemol es daut bäta, doa eefach von to vejäten (Spricha 19:11). Oba daut jeft uk Loagen, wua daut veleicht goot es, daut auntomalden. Biejlikj kaun daut sennen, daut die wäa waut aunjedonen haft un du best die eenich, daut bie de Poliezen ooda sestwua auntomalden.

Sikj aufrajchnen moakt aules bloos noch oaja

Waut, wan daut nich jeit frädlich to räajlen? Waut, wan du aul aules jedonen hast, daut opp dise Wajch oppem kloaren to brinjen? Doo die nich aufrajchnen, wiels daut moakt aules bloos noch oaja. Doo dän Hauss leewa seenen to äwakomen. Du kaust gaunz doaropp vetruen, daut Gott dän Trubbel leesen woat. “Velot die opp am, un dee woat daut goot moaken” (Psalm 37:3-5).

Läwesjeschicht: ADRIÁN

hieed opp met sikj aufrajchnen

Aus Adrián en siene Jugentjoaren wia, deed hee foaken met aundre feiten, om sikj auftorajchnen. Hee sajcht: “Ekj wia foaken doa met en, wan doa jeschoten wort. Un mieremol leeten se mie bloodrich oppe Gauss ligjen, soo aus wan ekj doot wia.”

Aus Adrián 16 Joa wia, funk hee aun, de Bibel to studieren. Hee sajcht: “Je mea ekj de Bibel studieed, je dolla sach ekj en, daut ekj endren must.” Hee must sienen Hauss äwakomen un opphieren met Jewault eewen. Besonda Reema 12:17-19 holp am, sikj nich mea auftorajchnen. Hee sajcht: “Ekj must enwoaren, daut Jehova wudd to siene Tiet un opp siene Wajch met daut ojjerajchte een Enj moaken. Soo bie sacht kunn ekj mie endren.”

Eenen Zeowes wort Adrián von eene Grupp junge Mana aunjejräpen, jäajen dee hee ea kjamfen deed. De Väaschta breld: “Feit du!” Adrián sajcht: “Mie jankad daut sea, trigjtofeiten.” Enne Städ daut hee daut deed, säd hee een kortet Jebäd to Jehova un jinkj doa fuat.

Adrián sajcht wieda: “Dän näakjsten Dach bejäajend ekj dän Väaschten von de Baund auleen. Aus ekj dän sach, must ekj mie sea oajren. Oba ekj bäd wada to Jehova om Help, daut ekj mie wudd kjennen beoabeiden. Ekj kunn daut nich jleewen, waut de junga Maun to mie säd: ‘Hool mie daut togood, waut jistren zeowes passieed. En Werkjlichkjeit wudd ekj uk jleichen, soo to sennen aus du. Ekj well uk de Bibel studieren.’ Ekj wia sea froo, daut ekj mie haud kunt beoabeiden. Un doawäajen kunn ekj aunfangen met dän toop de Bibel to studieren.”