Waut Läsa weeten wellen
Woo es Psalm 12:8 to vestonen?
En eenje Biblen jeft Psalm 12:8 auntovestonen, daut Gott sien Wuat secha hoolen woat. Oba de Varzhen doaver wiesen, daut hee de Menschen secha hoolen woat, waut unjadrekjt woaren.
En Psalm 12:2-5 kjenn wie läsen, daut de “opprechtje Menschen … emma weinja” woaren. Un en Psalm 12:6-8 sajcht daut noch:
“Wiels de schwake unjadrekjt woaren un de oame stänen,
woa ekj mie äwahäa moaken, sajcht de HAR,
un an en äa velangen no Sechaheit, Help veschaufen.
Waut de HAR jerät haft,
es soo rein aus Selwa daut säwen mol derch däm Leemtieejel Owen jeschekjt es.
Oo HAR, du woascht ons secha hoolen un emma fa soon Volkj bewoaren!”
Varsch 6 rät doavon, daut Gott dee halpen, ooda raden woat, waut unjadrekjt woaren.
Varsch 7 sajcht: Daut, “waut de HAR jerät haft, es soo rein aus Selwa”. Doa stemmen aule Christen gaunz met en (Psa. 18:31, JHF; 119:140).
En eenje Biblen jeft Psalm 12:8 auntovestonen, daut Gott nich siene Deena secha hoolen woat, oba sien Wuat. Dee denkjen soont, wiels daut en dän Varsch doaver om daut jeit, “waut de HAR jerät haft”. Un wie weeten, daut Gott de Bibel secha jehoolen haft, aus de Jäajna dee vebeeden ooda utroden wullen (Jes. 40:8; 1. Pet. 1:25).
Oba Jehowa haft uk de Menschen secha jehoolen, wua daut em Varsch 6 von rät. Hee haft noch emma un woat uk wieda soone halpen, waut “unjadrekjt woaren un … stänen” (Hiob 36:15 JHF; Psa. 6:5; 31:2-3; 54:9; 145:20).
Soo, waut deit Jehowa “secha hoolen”, soo aus daut em Varsch 8 sajcht, de Menschen ooda sien Wuat?
Wan wie ons disen Psalm neiwa unjastonen, woa wie en, daut et doa von de Menschen rät.
En Psalm 12:2-3 räd David doavon, daut de Menschen ontru un onopprechtich wieren, un daut Gott siene Deena sea doarunja lieden musten. Em Varsch 4 sajcht daut, daut Jehowa met soone een Enj moaken woat, waut Schlajchtet räden. Dis Psalm jeft ons de Sechaheit, daut wie doaropp vetruen kjennen, daut Gott siene Deena halpen woat, wiels siene Wieed sent “rein”, daut bediet, opp to veloten.
Soo, daut, waut Jehowa secha hoolen woat, soo aus Varsch 8 sajcht, sent de Menschen – dee, waut von de Schlajchte unjadrekjt woaren.
Wuarom jeft Psalm 12:8 en eenje Biblen auntovestonen, daut Gott nich siene Deena secha hoolen woat, oba sien Wuat? Soone Äwasatunk stett sikj opp eenje Schreftrollen von de Hebräische Schreften, waut opp to veloten sent. Oba en de griechische Septuaginta (de Septuaginta es de ieeschte Äwasatunk von de Hebräische Schreften no Griechisch) es dis Varsch soo äwasat: “Hee woat ons secha hoolen” un “hee woat ons bewoaren”. Doa motten de true Deena met jemeent sennen, waut unjadrekjt woaren un stänen. Dee woat Jehowa “fa soon Volkj bewoaren”, waut Schlajchtet deit (Psa. 12:8-9). En eene aramäische Äwasatunk von de Hebräische Schreften sajcht daut en disen Varsch: “Du, oh HAR, woascht de Jerajchte secha hoolen, du woascht dee fa dit schlajchte Volkj bewoaren.” Dise Äwasatungen sent uk een Bewies doafäa, daut et en Psalm 12:8 nich von Gott sien Wuat rät.
Dis Bibelvarsch jeft Gott siene Deena de Sechaheit, daut hee äant halpen woat.