Woo kaust du soo äwanäment sennen aus Zadok?

1-2. Wäa wia Zadok? (1. Chronik 12:23, 27-29).

STAL die mol väa, doa haben sikj eene groote Häad von äwa 340,000 Mana vesaumelt, om David toom Kjennich to moaken äwa Israel. Dise Mana bliewen dree Doag en de steenane Boaj dicht bie Hebron. Dee lachen, vetalen un sinjen schaftich Leeda toom Jehowa lowen (1. Chr. 12:40). Mank dise groote Häad wia een junga Maun, waut Zadok heet un woomäajlich nich besonda uttieekjnen deed. Oba Jehowa sach doano, daut wie daut weeten sullen, daut Zadok doa wia (läs 1. Chronik 12:23, 27-29). Wäa wia Zadok?

² Zadok wia een Priesta, waut väl met dän Huagen Priesta Abjatar toop schauft. Zadok wia uk een Seena – eena, waut doa weeten kunn, waut Gott sien Wellen wia un uk väl Weisheit jekjräajen haud (2. Sam. 15:27, JHF). Wan de Menschen weisen Rot fäld, dan fruagen dee Zadok doano. Hee wia uk sea äwanäment. En disen Artikjel woa wie doavon räden, woo Zadok daut wees, daut hee äwanäment wia.

3. (a) Wuarom motten Jehowa siene Deena äwanäment sennen? (b) Waut woa wie en disen Artikjel seenen?

³ Nu en de latste Doag prooft de Soton soo sea aus noch kjeenmol ea, ons bat doa to brinjen, daut wie onsen Gloowen aun Jehowa velieren (1. Pet. 5:8). Wie motten äwanäment sennen, daut wie kjennen staunthauft bliewen, bat Jehowa met dän Soton siene schlajchte Welt een Enj moakt (Psa. 31:25). Räd wie mol von dree Wäaj, woo wie kjennen soo äwanäment sennen aus Zadok.

UNJASTETT GOTT SIEN KJENNICHRIKJ

4. Wuarom motten Jehowa siene Deena äwanäment sennen toom Gott sien Kjennichrikj unjastetten? (See uk daut Bilt.)

⁴ Jehowa siene Deena unjastetten Gott sien Kjennichrikj von gaunzen Hoaten, oba doatoo motten dee foaken äwanäment sennen (Mat. 6:33). Biejlikj brucken dee Moot, om en dise schlajchte Welt de goode Norecht von daut Kjennichrikj to prädjen un daut to doonen, waut Jehowa fa rajcht talt (1. Tes. 2:2). Un wiels de Welt emma mea veschiedne Iedeeen äwa de Politikj haft, brucken dee uk Moot, daut dee sikj opp kjeenem siene Sied stalen (Joh. 18:36). Väle von Jehowa siene Deena jeit daut em Tieteljen knaup ooda sent enjestopt ooda vekjielt worden, wäajen dee nich enne Politikj ooda em Millitäadeenst metmoaken.

5. Wuarom must Zadok äwanäment sennen toom David unjastetten?

⁵ Zadok jinkj nich no Hebron, bloos om doa eene scheene Tiet met David toop to haben, wäajen dee nu de Kjennich wia. Hee haud sien Kjrichsjereetschoft metjebrocht un wia reed toom kjamfen (1. Chr. 12:39). Hee wia reed, met David toop em Kjrich to gonen, om de Israeliten fa äare Fiend to beschitzen. Veleicht haud Zadok nich väl Erfoarunk em Kjrich, oba hee wia een äwanämenda Mensch.

6. Wuarom wia David fa Zadok een goodet Biespel en äwanäment sennen? (Psalm 138:3).

⁶ Woo lieed de Priesta Zadok, soo äwanäment to sennen? Hee kjand väl Mana, waut stoakj un äwanäment wieren. Gaunz secha lieed hee von dee. De Kjennich David biejlikj wia äwanäment un jinkj “daut israelitische Häa em Kjrich veropp”, un daut brocht de Israeliten secha bat doa, am en aules to unjastetten (1. Chr. 11:1-2). David veleet sikj emma opp Jehowa, daut hee am halpen wudd, jäajen siene Fiend to kjamfen (Psa. 28:7; läs Psalm 138:3). Zadok lieed uk noch von aundre Mana soo aus Jojada un sien Sän Benaja, waut een Kjrieja wia, un uk von de aundre 22 Volkjsleida, waut opp David siene Sied wieren (1. Chr. 11:22-25; 12:27-29). Dise Mana wieren sikj aula eenich, David toom Kjennich to moaken un am to beschitzen.

7. (a) Waut vonne Biespels hab wie vondoag dän Dach, waut ons halpen kjennen, äwanäment to sennen? (b) Waut kaust du von Brooda Nsilu lieren, waut en daut Video es?

⁷ Wie kjrieen uk Krauft un Moot, wan wie äwa deejanje nodenkjen, waut äwanäment wieren toom Jehowa un sien Kjennichrikj unjastetten. Ons Kjennich, Jesus Christus, säd daut gaunz auf, daut hee nuscht wudd met de Politikj to doonen haben en dän Soton siene Welt (Mat. 4:8-11; Joh. 6:14-15). Hee veleet sikj emma doaropp, daut Jehowa am Krauft jäwen wudd. Daut jeft uk sea väl Erfoarungen von junge Menschen von onse Tiet, waut nich en de Politikj ooda em Millitäadeenst metmuaken. Wuarom läs wie ons dise Erfoarungen nich mol opp jw.org no?a

HALP DIENE GLOOWESBREEDA

8. Wanea motten de Eltestasch veleicht äwanäment sennen, om äare Breeda to halpen?

⁸ Jehowa siene Deena jleichen daut, sikj omzajcht uttohalpen (2. Kor. 8:4). Oba eenjemol motten dee sea äwanäment sennen toom daut doonen. Biejlikj weeten de Eltestasch, daut äare Breeda un Sestren daut aun Moot un Unjastettunk fält, wan doa Kjrich es. Dee fält daut uk aun jeisteljet Äten un aun daut, waut dee em Tieteljen brucken. Ut Leew fa äare Gloowesbreeda jäwen de Eltestasch sikj mau rajcht enne Jefoa, om dee daut Needje to brinjen (Joh. 15:12-13). Opp dise Wajch sent dee soo äwanäment, aus Zadok wia.

9. Waut säd David, waut Zadok doonen must no 2. Samuel 15:27-29 no? (See uk daut Bilt.)

⁹ David sien Läwen wia en Jefoa. Sien Sän Absalom wull am dootmoaken un sikj selfst toom Kjennich moaken (2. Sam. 15:12-13). David must fuaz Jerusalem veloten! Hee säd to siene Deena: “Moakt junt reed toom flichten, wan jie von Absalom wajchkomen wellen” (2. Sam. 15:14). Aus see sikj doa fuatbrochten, foll David daut bie, daut doa wäa en Jerusalem bliewen must, om am to sajen, waut Absalom em Senn haud. Doawäajen schekjt hee Zadok un aundre Priestasch trigj no de Staut, om Absalom uttoforschen (läs 2. Samuel 15:27-29). Dee musten sea väasechtich sennen, wiels dee haud daut kunt äa Läwen kosten. Absalom wia grausom, docht bloos aun sikj selfst un haud mau rajcht sienen ieejnen Voda verot. Denkj mol han, waut Absalom Zadok un de aundre Priestasch wudd jedonen haben, wan hee daut wia enjeworden, daut dee am hinjalestich utforschen deeden toom David beschitzen!

10. Woo holpen Zadok un de aundre met, David to beschitzen?

¹⁰ David fruach Zadok un sienen truen Frint Huschai no Help toom eenen Plon utfieren (2. Sam. 15:32-37). Huschai sull sikj soo doonen, daut hee opp Absalom siene Sied wia un dän Rot jäwen, woo hee David aunjriepen sull. Doaderch wudd David Tiet haben, sikj selfst reedtomoaken toom sikj beschitzen. Huschai vetald Zadok un Abjatar dan, waut hee Absalom jesajcht haud (2. Sam. 17:8-16). Un dise beid leeten David dan weeten, waut Absalom doonen wull (2. Sam. 17:17). Met Jehowa siene Help holpen Zadok un de aundre Priestasch met, David sien Läwen to raden (2. Sam. 17:21-22).

11. Woo kjenn wie soo äwanäment sennen aus Zadok, wan wie onse Breeda uthalpen?

¹¹ Woo kjenn wie soo äwanäment sennen aus Zadok, wan wie onse Breeda uthalpen, waut en Jefoa sent? (1) Recht die no de Aunwiesungen. En soone jefäadelje Loagen es daut wichtich, daut wie veeent bliewen. Komm de Aunwiesungen no, waut daut Betel jeft (Heb. 13:17). De Eltestasch sellen räajelmässich de Aunwiesungen derchgonen, woo de Breeda en äare Jäajent sikj aul ea fa eenen Nootfaul reedmoaken kjennen un waut dee doonen sellen, wan doa een Nootfaul es (1. Kor. 14:33, 40). (2) Sie äwanäment, oba uk väasechtich (Spr. 22:3). Denkj no, ea du waut deist, un brinj die nich onneedich enne Jefoa. (3) Velot die opp Jehowa. Denkj doaraun: Jehowa well, daut die un diene Breeda nuscht woat. Met siene Help, kaust du dee unjastetten, onen die selfst enne Jefoa to brinjen.

12-13. Waut kaust du von daut lieren, waut Viktor un Vitalii beläwden? (See uk daut Bilt.)

¹² Viktor un Vitalii sent twee jeistelje Breeda von de Ukraine. Dee holpen met, äare Gloowesbreeda Wota un Äten to brinjen. Viktor sajcht: “Wie sochten aulawäajen no Ätwoa. Foaken hieed wie daut, daut doa een Enjskje auf von ons jeschoten wort. Eemol leet een Brooda ons von daut Ätwoa, waut hee sikj oppbewoat haud. Derch dise friewelje Gow hauden miere Vekjindja daut, waut dee fäld, om eene jewesse Tiet to äwaläwen. Aus wie de Sachen oppem Foatich opplooden, kjeem doa eene Bomm rauf ojjefäa 20 Meeta auf (66 Schoo) von doa, wua wie wieren, oba dee däwad nich opp. Ekj bäd Jehowa dän Dach äwa doarom, daut hee mie dän Moot jäwen sull, waut mie fäld, om de Breeda wieda to halpen.”

¹³ Vitalii sajcht: “Eena must sea äwanäment sennen. Ekj fua 12 Stund, bat ekj bat de ieeschte Städ wia, un ekj bäd dän Wajch äwa to Jehowa.” Vitalii wia äwanäment, oba uk väasechtich. Hee sajcht wieda: “Ekj fruach Jehowa no Weisheit un daut hee mie holp, mie nich onneedich enne Jefoa to brinjen un de Rejierunk jehuarsom to sennen. Ekj fua bloos opp dee Wäaj, wua de Rejierunk daut nich aufjesajcht haud. Aus ekj sach, woo de Breeda toopschauften, wort mien Gloowen stoakja. Biejlikj deeden dee Sachen von Wajch rauf, daut wie foaren kunnen un dee holden needje Sachen toop, soo aus Ätwoa un Kjleedie, un looden dee selfst opp. Dee sagen uk doano, daut ekj un Viktor fa dise Reis to äten hauden un uk wua to Nacht bliewen kunnen.”

BLIEW JEHOWA TRU

14. Waut kaun daut aun ons doonen, wan doa wäa Jehowa ontru es, dän wie väl räakjnen?

¹⁴ Nich leicht es waut schwanda, aus wan doa wäa von de Famielje ooda een gooda Frint Jehowa velat (Psa. 78:40 NW; Spr. 24:10, NW). Je mea wie dän räakjnen, je schwanda es de Loag uttohoolen. Wan du mol soon Schwoaret beläft hast, kaun Zadok sien Biespel die de Krauft jäwen, tru to bliewen.

15. Wuarom must Zadok äwanäment sennen toom Jehowa tru bliewen? (1. Kjennichs 1:5-8).

¹⁵ Zadok bleef Jehowa tru, aus sien gooda Frint Abjatar ontru wort. Dit wia gaunz opp Enj von David siene Rejierunk. Aus David meist bat aum stoawen wia, proowd David sien Sän Adonija sikj selfst toom Kjennich to moaken, wan Jehowa uk Salomo doatoo utjewält haud (1. Chr. 22:9-10). Abjatar holp Adonija doamet (läs 1. Kjennichs 1:5-8). Doaderch wort Abjatar nich bloos David ontru, oba uk Jehowa! Kaust du die väastalen, woo truarich un mootloos Zadok daut mott jemoakt haben? Fa mea aus 40 Joa hauden hee un Abjatar väl aus Priestasch toop jeschauft (2. Sam. 8:17). Dee hauden sikj toop om “Gott siene Kjist” jekjemmat (2. Sam. 15:29). Beid hauden David aus Kjennich biejestonen un noch väl aundre Sachen em Deenst fa Jehowa jedonen (2. Sam. 19:12-15).

16. Waut haft Zadok veleicht jeholpen, tru to bliewen?

¹⁶ Zadok bleef Jehowa tru, wan Abjatar uk nich deed. David wist, daut hee sikj emma opp Zadok veloten kunn. Aus Adonija sien schlajchta Plon verendach kjeem, veleet David sikj gaunz opp Zadok, Natan un Benaja, daut dee Salomo wudden toom Kjennich moaken (1. Kjen. 1:32-34). Waut jeef Zadok de Krauft un Moot, waut am doatoo fäld? Secha haft am daut jeholpen, met soone true Deena von Jehowa toop to sennen aus Natan un aundre, waut uk opp David siene Sied wieren (1. Kjen. 1:38-39). Aus Salomo de Kjennich wort, “sad [hee] Zadok däm Priesta en Abjatar siene Städ en” (1. Kjen. 2:35).

17. Woo kaust du Jehowa soo tru bliewen aus Zadok, wan een Frint am ontru woat?

¹⁷ Woo kaust du soo sennen aus Zadok? Wan dien een Frint Jehowa ontru woat, dan wies, daut du tru blifst (Jos. 24:15). Jehowa woat die de Krauft un dän Moot jäwen, waut die fält. Bäd to am un hool die aun diene Frind, waut am tru sent. Jehowa räakjent daut sea väl, wan du tru best un woat die doafäa beloonen (2. Sam. 22:26).

18. Waut kaust du von Marco un Sidse äare Erfoarunk lieren?

¹⁸ See wie mol daut Biespel von Marco un siene Fru Sidse, dee äare twee Mejalen de Woarheit veleeten. Marco sajcht: “Von dan, aus de Kjinja jebuaren, hast du eene groote Leew fa dee. Du wurscht aules doonen, daut dee nuscht wort. Doawäajen es daut meist toom toopbräakjen, wan dee Jehowa veloten.” Hee sajcht wieda: “Oba Jehowa wia emma opp onse Sied. Hee sach doano, daut wan ekj nich mea Krauft haud, dan wia miene Fru stoakj, un wan see nich Krauft haud, dan wia ekj stoakj.” Sidse sajcht doatoo: “Wie wudden daut kjeenmol haben kunt uthoolen, wan Jehowa ons nich de Krauft jejäft haud, waut wie brukten. Ekj haud emma daut Jefeel, daut et miene Schult wia un doawäajen säd ekj Jehowa daut, woo ekj mie feeld. Een Stootje lota kjeem eene Sesta no mie, dee ekj aul fa väl Joaren nich jeseenen haud, un foot mie oppe Schulla un kjikjt mie jlikj aun un säd: ‘Denkj doaraun Sidse, dauts nich diene Schult!’ Met Jehowa siene Help hab ekj kunt de Freid em Deenst fa am hoolen.”

19. Waut west du nu doonen?

¹⁹ Jehowa well, daut aul siene Deena soo äwanäment sennen, aus Zadok wia (2. Tim. 1:7). Oba doatoo mott wie ons opp am veloten un nich opp ons selfst. Wan du en eene Loag best, wua die daut aun Moot fält, dan froag Jehowa doano. Du kaust die secha sennen, daut hee die halpen woat, krakjt soo äwanäment to sennen, aus Zadok wia! (1. Pet. 5:10).