Woo kjenn wie soo sennen aus de true Enjel?

1-2. (a) En waut fa Stekjen sent wie aundasch aus de Enjel? (b) Waut hab wie äwareen met de Enjel?

AUS Jehowa die no de Woarheit trock, wortst du Poat von eene leewe Famielje, waut am deent. Doa sent onse Breeda un Sestren äware gaunze Welt un uk millionende Enjel met en (Dan. 7:9; 7:​10, JHF). Wan wie äwa de Enjel nodenkjen, dan denkj wie veleicht doaraun, daut dee gaunz aundasch sent aus wie. Biejlikj worden de Enjel aul väl ea jemoakt aus de Menschen (Hiob 38:​4, 7). Dee haben uk väl mea Krauft un sent heilja un jerajchta aus wie, wiels wie onvolkomen sent (Luk. 9:26).

² Oba wan wie uk aundasch sent aus de Enjel, hab wie doawäajen veschiednet äwareen. Biejlikj waut? Krakjt soo aus dee kjenn wie Jehowa siene Ieejenschoften nodoonen. Wie haben uk eenen frieen Wellen un eenen Nomen un veschiedne Oppgowen en Jehowa sienen Deenst. De Enjel haben daut nich aula äwareen un wie uk nich. Un krakjt soo aus dee es ons daut uk en, onsen Schepfa to deenen (1. Pet. 1:12).

3. Waut kjenn wie von de Enjel lieren?

³ Wiels wie välet äwareen haben met de Enjel, kaun dee äa goodet Biespel ons Moot jäwen un väl Goodet lieren. De Enjel sent deemootich, dee leewen de Menschen, dee sent staunthauft un dee sent doarom todoonen, daut de Vesaumlunk rein blift. En disen Artikjel woa wie seenen, woo wie dee nodoonen kjennen.

DE ENJEL SENT DEEMOOTICH

4. (a) Woo wiesen de Enjel, daut see deemootich sent? (b) Wuarom sent de Enjel deemootich? (Psalm 89:8).

⁴ De true Enjel sent deemootich. Wan dee uk väl Erfoarunk, Macht un Weisheit haben, komen dee doawäajen aules no, waut Jehowa äant sajcht (Psa. 103:20). Dee puchen nich, wan dee äare Oppgowen derchfieren, un brucken uk nich äare Krauft toom wiesen, waut see aules kjennen. Dee komen aules wellich no, waut Gott äant sajcht, mau rajcht wan kjeena weet, woo dee heeten (1. Mo. 32:​25, 30; 2. Kjen. 19:35).a Dee nämen uk kjeene Iea aun, waut Jehowa traft. Wuarom sent de Enjel soo deemootich? Wiels dee leewen Jehowa un haben Ieaforcht fa am (läs Psalm 89:8).

5. Woo wees een Enjel Deemoot, aus dee dän Apostel Johanes trajchtwees? (See uk daut Bilt.)

⁵ See wie mol een Biespel, waut wiest, daut de Enjel deemootich sent. Rom daut Joa 96 n. Chr. wees een Enjel, dän sienen Nomen wie nich weeten, dän Apostel Johanes eene butajeweenelje Wision (Opb. 1:1). Waut deed Johanes, aus hee dise Wision sach? Hee wull dän Enjel aunbäden. Oba de Enjel säd am daut fuaz auf. Dee säd: “See doano, daut du daut nich doonen woascht! Ekj sie dien Metkjnajcht, eena von diene Breeda. … Bäd Gott aun!” (Opb. 19:10). Dis Enjel wia werkjlich deemootich! Hee wull nich jeieet ooda bewundat woaren. Doawäajen säd hee Johanes fuaz, daut dee Jehowa Gott aunbäden sull. Oba dis Enjel kjikjt uk nich opp Johanes rauf. Wan de Enjel Jehowa uk aul lenja jedeent haud un uk väl kjraftja wia aus Johanes, bleef hee deemootich un nand dän Apostel sien Metkjnajcht. Un wan hee Johanes uk trajchtwiesen must, räd hee nich kort, oba leeftolich to am. Hee kunn woomäajlich vestonen, daut Johanes gaunz vewundat wia wäajen de Wision, waut dee jeseenen haud.

6. Woo kjenn wie soo deemootich sennen aus de Enjel?

⁶ Woo kjenn wie soo deemootich sennen aus de Enjel? Wie sellen schwoa em Deenst fa Jehowa schaufen, oba wie sellen nich puchen ooda ons soo doonen, daut wie wunda wäa sent (1. Kor. 4:7). Wie sellen ons uk nich fa hecha talen aus aundre, wäajen wie Jehowa veleicht aul lenja jedeent haben ooda mea Veauntwuatunk haben aus aundre. Daut sull krakjt aundasch sennen. Je mea wie em Deenst fa Jehowa doonen kjennen, je deemootja sell wie sennen (Luk. 9:48). Krakjt soo aus de Enjel well wie aundre deenen un dee opp kjeene Wajch daut Jefeel jäwen, daut wie bäta sent.

7. Woo kjenn wie Deemoot wiesen, wan wie wäm eenen Rot jäwen ooda trajchtwiesen motten?

⁷ Wie kjennen uk Deemoot wiesen, wan wie wäm eenen Rot jäwen ooda trajchtwiesen motten. Daut kaun een Gloowesbrooda sennen ooda eenem sien Kjint. Wan wie Rot jäwen, dan mott wie eenjemol jlikjtoo sennen. Oba wie wellen soo sennen aus de Enjel, waut Johanes leeftolich trajchtwees. Wan wie uk jlikjtoo Rot jäwen motten, well wie daut oba soo doonen, daut deejanja nich mootloos woat. Wan wie ons nich fa hecha talen, dan woa wie kjennen respakjtvoll un leeftolich sennen, wan wie wäm Rot ut de Schreft jäwen (Kol. 4:6).

DE ENJEL LEEWEN DE MENSCHEN

8. (a) Woo wiesen de Enjel no Lukas 15:10 no, daut dee de Menschen leewen? (b) Woo halpen de Enjel ons biem Prädjen? (See uk daut Bilt.)

⁸ De Enjel sent nich endoontich äwa de Menschen, oba dee leewen dee. Dee freien sikj, wan een Sinda een Leetsennen haft ooda wan doa wäa trigj no Jehowa kjemt, waut am veloten haud. Dee freien sikj uk, wan doa wäa Jehowa kjanen lieet un sien Läwen endat, om am to deenen (läs Lukas 15:10). De Enjel unjastetten ons uk biem Prädjen (Opb. 14:6). Dee doonen je nich selfst prädjen, oba dee kjennen ons no soone Menschen leiden, waut Jehowa kjanen lieren wellen. Wie kjennen nich fa neiw sajen, daut de Enjel ons no wäm jeleit haben, wiels Jehowa haft je noch aundre Wäaj toom siene Deena aunleiden un toom deejanje halpen, waut am wellen kjanen lieren – biejlikj derch sienen heiljen Jeist (Apj. 16:​6-7). Oba wie weeten, daut de Enjel ons biem Prädjen sea halpen. Wan wie de goode Norecht prädjen, dan kjenn wie ons gaunz secha sennen, daut de Enjel met ons toopschaufen. (See daut Hock “Dee äare Jebäda worden beauntwuat”.b)

9. Woo kjenn wie soone Leew fa de Menschen haben aus de Enjel?

⁹ Woo kjenn wie soone Leew fa de Menschen haben aus de Enjel? Wan doa bekauntjejäft woat, daut wäa wada biejenomen es, dan sell wie ons freien krakjt soo aus de Enjel. Wie sellen dänjanjen daut wiesen, daut wie am leewen un daut wie schaftich sent, daut hee wada Jehowa deent (Luk. 15:​4-7; 2. Kor. 2:​6-8). Krakjt soo aus de Enjel kjenn wie uk ons Bastet doonen em Prädichtdeenst (Liera 11:6). De Enjel unjastetten ons, wan wie de goode Norecht prädjen. Krakjt soo kjenn wie uk no Mäajlichkjeiten sieekjen, onse Breeda un Sestren em Deenst to unjastetten. Wurscht du biejlikj kjennen met eenen Vekjindja toop prädjen, waut nich väl Erfoarunk haft? Ooda wurscht du deejanje, waut aul ella ooda schaubich sent, halpen kjennen, daut dee uk kjennen em Deenst sennen?

10. Waut kjenn wie von Sara lieren?

¹⁰ Waut, wan wie wäajen onse Omstend nich soo väl doonen kjennen, aus wie wudden jleichen? Wie kjennen ons gaunz secha sennen, daut de Enjel ons doawäajen halpen woaren biem Prädjen. See wie mol, waut eene Sesta en Indien beläwd, waut Sarac heet. See wia aul rom 20 Joa Pionia jewast, aus see krank wort un gaunz em Bad nennkjeem. Dit brocht ar sea rauf. Oba met de Tiet kunn see dan wada schaftja woaren, wäajen de Breeda un Sestren von äare Vesaumlunk ar holpen un wäajen see emma pinkjlich enne Schreft läsen deed. Secha must see eene aundre Wajch finjen, woo see prädjen kunn. Wäajen see nich mol setten un Breef schriewen kunn, must see äwa Fon prädjen. See fond äare Wadabesuchs un dee vetalden ar von aundre, waut daut veleicht intressieren wudd, de Schreft to studieren. Woo kjeem daut ut? No een poa Moonat haud Sara aul 70 Bibelstudiums. See must mau rajcht eenje Breeda un Sestren enne Vesaumlunk waut von dee äwaloten, wäajen see daut nich aules auleen kunn. Väle von dee Bibelschiela komen nu no onse Toopkomes. De Enjel sent secha sea schaftich, daut dee met soone Breeda un Sestren aus Sara toopschaufen kjennen, waut äa Bastet doonen biem Prädjen!

DE ENJEL SENT STAUNTHAUFT

11. Woo haben de true Enjel kloa jewäsen, daut see staunthauft sent?

¹¹ De true Enjel sent een goodet Biespel en staunthauft sennen. Dee haben aul fa miere Dusent Joa met Ojjerajchtichkjeit un Schlajchtet must foadich woaren. Dee sagen, woo de Soton un väle Enjel, waut ea met äant toop Jehowa deenden, sikj jäajen am stalden (1. Mo. 3:1; 6:1; 6:​2, NW; Jud. 6). De Bibel rät doavon, daut een Enjel doagenlank met eenen schlajchten Jeist kjamfen must (Dan. 10:13). De Enjel haben uk noch emma jeseenen, daut de mieeschte Menschen Gott nich deenen. Oba see deenen am doawäajen iewrich un met Freid. Dee weeten, daut Jehowa to de rajchte Tiet met aule Ojjerajchtichkjeit een Enj moaken woat.

12. Waut kaun ons halpen, staunthauft to bliewen?

¹² Woo kjenn wie soo staunthauft sennen aus de Enjel? Krakjt soo aus de Enjel mott wie veleicht Ojjerajchtichkjeit seenen. Oba soo aus dee sent wie ons uk gaunz secha, daut Gott to de rajchte Tiet met aul daut Schlajchte een Enj moaken woat. Doawäajen hia wie nich opp, Goodet to doonen soo aus de true Enjel (Gal. 6:9). Un Gott vesprakjt, daut hee ons halpen woat, staunthauft to bliewen (1. Kor. 10:13). Wie kjennen Jehowa om sienen Jeist bäden, waut ons halpt, jeduldich to bliewen un Freid to haben (Gal. 5:22; Kol. 1:11). Ooda waut es, wan du Jäajenstaunt hast? Vetru gaunz opp Jehowa un hab nich Angst. Hee woat die emma biestonen un Krauft jäwen (Heb. 13:6).

DE ENJEL HALPEN MET, DAUT DE VESAUMLUNK REIN BLIFT

13. Waut vonne besondre Oabeit haben de Enjel en de latste Doag? (Matäus 13:​47-49).

¹³ Nu en de latste Doag haft Jehowa de Enjel eene besondre Oabeit oppjejäft (läs Matäus 13:​47-49). Millionende Menschen oppe gaunze Welt wellen mea von de goode Norecht weeten. Eenje von dee endren äa Läwen un deenen Jehowa soo, aus hee daut haben well, oba aundre nich. De Enjel sent aunjestalt, “de Schlajchte von de Jerajchte uteneentodeelen”. Daut bediet, daut dee doano seenen motten, daut de Vesaumlunk rein blift. Oba daut bediet nich, daut deejanje, waut sikj von de Vesaumlunk trigjtrakjen, nich mea kjennen trigjkomen. Doamet es uk nich jesajcht, daut et enne Vesaumlungen kjeenmol Trubbels jäwen woat. Oba wie kjennen ons doawäajen gaunz secha sennen, daut de Enjel sikj sea aunstrenjen, daut de Vesaumlungen rein bliewen.

14-15. Woo kjenn wie soo aus de Enjel doano seenen, daut de Vesaumlunk rein blift? (See uk de Bilda.)

¹⁴ Woo kjenn wie soo aus de Enjel doano seenen, daut de Vesaumlunk rein blift? Wie motten aules doonen, waut wie kjennen, om selfst met Jehowa Frind to bliewen. Doatoo mott wie soone Frind haben, waut am uk leewen, un soone Sachen gaunz tochloten, waut ons von am aufbrinjen kjennen. Opp dise Wajch halp wie met, daut onse Vesaumlunk rein blift (Psa. 101:​3, NW). Wie kjennen uk onse Breeda un Sestren halpen, daut dee Jehowa tru bliewen kjennen. Waut sell wie biejlikj doonen, wan wie enwoaren, daut doa wäa von de Vesaumlunk eene groote Sind begonen haft? Wäajen wie dänjanjen leewen, woa wie dän sajen, daut hee met de Eltestasch doaräwa räden mott. Wan deejanja daut nich selfst deit, dan woa wie de Eltestasch de Sach vetalen. Wie wellen je, daut ons Brooda, waut em Jeisteljen schwak es, soo schwind aus mäajlich de Help kjricht, waut am fält! (Jak. 5:​14-15).

¹⁵ Dauts schod, daut eenje, waut groote Sinden begonen, ut de Vesaumlunk rutjesat motten. Wan daut soo wiet kjemt, hia wie opp, “met soone Menschen Jemeenschoft to haben” (1. Kor. 5:​9-13).d Dit halpt met, daut de Vesaumlunk rein bliewen kaun. Wie kjennen dänjanjen uk Leew wiesen, waut rutjesat wort, wan wie nich mea met dän Jemeenschoft haben. Doaderch, daut wie Jehowa en disen Stekj jehuarsom sent, sitt deejanja daut veleicht en, daut dee trigj no Gott komen mott. Un wan dee daut deit, frei wie ons met Jehowa un de Enjel toop (Luk. 15:7).

16. En waut vonne Stekjen west du soo sennen aus de Enjel?

¹⁶ Es daut nich eene groote Iea, daut Jehowa ons lat väl äwa de Enjel weeten un met dee toop schaufen? Well wie soo sennen aus dee. Well wie deemootich sennen, de Menschen leewen, staunthauft bliewen un doarom todoonen sennen, daut de Vesaumlunk en aule Stekjen rein blift. Wan wie soo sent aus de true Enjel, woa wie fa emma kjennen to de Famielje von Jehowa siene Deena jehieren.