20. ARTIKJEL FA DAUT STUDIUM
LEET 7 Jehowa es onse Krauft
Jehowa woat die emma Troost un Moot jäwen
“Jepreist es … de Voda, waut voll Metjefeel es, un de Gott, waut emma treesten deit” (2. KOR. 1:3)
OM WAUT DAUT JEIT
Waut wie doavon lieren kjennen, woo Jehowa de Juden Troost un Moot jeef, waut en Babel faust wieren.
1. Woo jinkj de Juden daut, waut en Babel faust wieren?
WIELS de Juden un äare Väavodasch Jehowa emma wada ojjehuarsom wieren, leet hee daut too, daut de Babelonia äa Launt venichten deeden un äant jefangen no Babel neemen (2. Chr. 36:15-16, 20-21). Wan de Juden en Babel uk faust wieren, kunnen dee doawäajen een jeweeneljet Läwen haben (Jer. 29:4-7). Oba daut wia nich emma leicht un daut wia uk nich doa, wua see wudden haben wult läwen. Woo feelden de Juden sikj, waut en Babel faust wieren? Eena von dee säd: “Wie sauten en Babel aun Riefasch un hielden, wan wie aun Zion dochten” (Psa. 137:1). De Juden fäld daut needich aun Troost un Moot. Oba wäa kunn äant daut jäwen?
2-3. (a) Woo holp Jehowa de Juden, waut en Babel faust wieren? (b) Waut woa wie en disen Artikjel derchgonen?
2 Jehowa es “de Gott, waut emma treesten deit” (2. Kor. 1:3). Hee leeft siene Deena un well dee jieren Troost un Moot jäwen. Jehowa wist, daut eenje Juden, waut en Babel faust wieren, sikj wudden trajchtwiesen loten un am wada deenen (Jes. 59:20). Soo aul mea aus 100 Joa ea de Juden no Babel jenomen worden, jeef Jehowa dän Profeet Jesaja eene Norecht fa dee. Daut es daut Bibelbuak Jesaja. Woo wudd dit Buak äant halpen? Jesaja säd: “Treest mien Volkj, treest dee emol, sajcht jun Gott” (Jes. 40:1). Derch daut Buak Jesaja jeef Jehowa de Juden, waut en Babel faust wieren, dän Troost un Moot, waut äant fäld.
3 Krakjt soo aus de Juden en Babel fält ons daut uk noch mol aun Troost un Moot. En disen Artikjel woa wie dreeatlei seenen, woo Jehowa de Juden en Babel Troost un Moot jeef: (1) Hee vespruak, dee to vejäwen, waut een Leetsennen hauden. (2) Hee jeef siene Deena eene Hopninj. Un (3) hee holp dee, nich soo Angst to haben. Wie woaren uk seenen, woo Jehowa ons vondoag dän Dach opp deeselwje Wajch Troost un Moot jeft.
JEHOWA DEIT ONS VEJÄWEN
4. Woo wees Jehowa, daut hee voll Metjefeel es? (Jesaja 55:7).
4 Jehowa es “voll Metjefeel” (2. Kor. 1:3). Woo wees hee daut? Hee vespruak de Juden, waut en Babel een Leetsennen haben wudden, daut hee äant vejäwen wudd (läs Jesaja 55:7). Hee säd to jieda eenen von dee: “Ekj woa emma leeftolich un jenstich [aulsoo metfeelent] to die sennen” (Jes. 54:8). De Juden wudden fa väle Joaren motten en Babel faust sennen, wäajen dee Jehowa wieren ojjehuarsom jewast. Oba Gott vespruak dee, daut dee doa nich wudden fa emma bliewen motten (Jes. 40:2). Dise Wieed haben de Juden secha Troost un Moot jejäft, waut een Leetsennen hauden!
5. Wuarom kjenn wie ons noch sechra sennen aus de Juden, daut Jehowa ons vejäwen deit?
5 Waut kjenn wie doavon lieren? Jehowa es reed, siene Deena väl to vejäwen. Wie kjennen ons doaräwa noch väl sechra sennen aus de Juden. Wuarom? Wäajen wie krakjt vestonen, waut Jehowa jedonen haft, om onse Sinden to vejäwen. Rom 700 Joa nodäm daut Jesaja von Jehowa siene Vejäwunk räden deed, schekjt Jehowa sienen leewen Sän no de Ieed, om fa aul dee sien Läwen to jäwen, waut een Leetsennen hauden. Derch dit Opfa kaun Jehowa onse Sinden laschen, aulsoo dee gaunz vejäwen (Apj. 3:19; Jes. 1:18; Efs. 1:7). Jehowa es werkjlich reed to vejäwen!
6. Wuarom jeft ons daut Troost un Moot, äwa Jehowa siene Vejäwunk notodenkjen? (See uk daut Bilt.)
6 Soone, waut wäajen de Fäla lieden motten, waut see ea mol jemoakt haben, feelen sikj veleicht emma wada schuldich, wan see uk aul een Leetsennen hauden. Oba de Wieed, waut Jehowa en Jesaja 55:7 oppschriewen leet, kjennen dee Troost un Moot jäwen. Woosoo? Wan wie onse Sinden aul bekjant haben un daut Schlajchte nich mea doonen, dan kjenn wie ons secha sennen, daut Jehowa ons vejäft haft. Un wan Jehowa onse Sinden vejeft, dan deit hee dee uk gaunz vejäten (see uk Jeremia 31:34). Wan Jehowa doa nich wieda aun denkjt, dan sell wie daut uk nich. Waut bie Jehowa talt, es waut wie nu doonen un nich de Fäla, waut wie mol jemoakt haben (Hes. 33:14-16). Ons Voda, waut voll Metjefeel es, woat boolt doafäa oppkomen, daut wie nich lenja wäajen de Fäla lieden motten, waut wie ea mol jemoakt haben.
Waut bie Jehowa talt, es waut wie nu doonen un nich de Fäla, waut wie mol jemoakt haben (See Varsch 6)
7. Waut kaun ons halpen, met de Eltestasch to räden, wan wie eene Sind plietsch jehoolen haben?
7 Waut sell wie doonen, wan wie ons schuldich feelen, wäajen wie mol eene groote Sind begonen haben un daut plietsch jehoolen haben? De Bibel rot ons too, de Eltestasch no Help to froagen (Jak. 5:14-15). Secha woat daut nich leicht sennen, met dee doaräwa to räden. Oba waut kaun ons halpen, dise true Mana auntoräden? Wie motten een Leetsennen haben un doaraun denkjen, daut Jehowa un de Mana, waut hee aunjestalt haft toom ons halpen, ons leeftolich behaundlen un Metleet wiesen woaren. See wie mol, woo Jehowa eenen Brooda Moot un Troost jeef, waut Arthura heet un sikj sea schuldich feeld. Hee sajcht: “Ekj deed fa ojjefäa een Joa Pornografie kjikjen. Oba aus ekj ieescht eene Räd jehieet haud, äwa woo wichtich daut es, een reinet Jewessen to haben, vetald ekj miene Fru un de Eltestasch, waut ekj jedonen haud. Doahinja feeld ekj mie nich mea schuldich, oba ekj wia doawäajen truarich, daut ekj soont jedonen haud. De Eltestasch holpen mie doaraun denkjen, daut Jehowa mie nich tosiedjeschowen haud. Hee wiest ons trajcht, wiels hee ons leeft. Dee äare leeftolje Wieed jinjen mie sea to Hoaten un holpen mie to vestonen, daut Jehowa mie werkjlich vejäft haud.” Arthur es nu Pionia un Deenstaumthelpa. Jeft ons daut nich Moot to weeten, daut Jehowa ons wellich vejäwen deit, wan wie werkjlich een Leetsennen haben?
JEHOWA JEFT ONS HOPNINJ
8. (a) Waut vonne Hopninj jeef Jehowa de Juden, waut en Babel wieren? (b) Woo wudd de Hopninj de Juden halpen, waut een Leetsennen hauden, no Jesaja 40:29-31 no?
8 Fa Menschen to beseenen, wieren de Juden hopninjsloos, waut en Babel faust wieren. De Babelonia leeten äare Jefangne jeweenlich nich frie (Jes. 14:17). Oba Jehowa jeef siene Deena Hopninj. Hee vespruak, daut hee äant wudd friemoaken, un nuscht kunn am doavon aufhoolen (Jes. 44:26; 55:12). Fa Jehowa wieren de Babelonia soo aus een Beskje Stoff (Jes. 40:15). Fa am wia daut krakjt soo leicht, siene Deena frietomoaken, aus een Beskje Stoff wajchtopusten. Woo wudd dise Hopninj de Juden en Babel halpen? Daut wudd dee Troost jäwen. Oba dauts nich aules. Jesaja schreef noch: “Dee waut sikj opp däm HARN veloten, kjrieen fresche Krauft” (läs Jesaja 40:29-31). De Hopninj wudd äant freschen Moot jäwen, “daut see oppflieejen aus opp een Odla siene Flichten”.
9. Wuarom kunnen de Juden sikj secha sennen, daut Jehowa siene Vespräakjungen erfellen wudd?
9 Waut vonne Jrind jeef Jehowa de Juden en Babel, sikj secha to sennen, daut hee siene Vespräakjungen erfellen wudd? See wie mol eenje Profezeiungen, waut sikj aul erfelt hauden. De Juden wisten biejlikj, daut de Assiera daut Nuadkjennichrikj Israel met de Tieen Stam enjenomen hauden un de Menschen jefangen jenomen hauden (Jes. 8:4). Dee hauden uk jeseenen, woo de Babelonia Jerusalem venicht hauden un de Menschen jefangen met no Babel neemen (Jes. 39:5-7). Dee wisten uk, daut de babelonischa Kjennich dän Kjennich Zedekia haud de Uagen utstäakjen loten un am met no Babel jenomen haud (Jer. 39:7; Hes. 12:12-13). Aules, waut Jehowa verutjesajcht haud, kjeem krakjt soo rom (Jes. 42:9; 46:10). Aul dit mott de Juden äaren Gloowen jestoakjt haben, daut Jehowa sien Vespräakjen, äant frie to moaken, uk soo romkomen wudd!
10. Woo kjenn wie onse Hopninj stoakj hoolen en dise latste Doag?
10 Waut kjenn wie doavon lieren? Wan wie ons dol feelen, kaun de Hopninj ons Troost jäwen un ons halpen, wada Krauft to kjrieen. Wie läwen en eene schwoare Tiet un stoakje Fiend schaufen jäajen ons. Oba wie sellen nich mootloos woaren. Jehowa haft ons eene wundascheene Hopninj jejäft – eewjet Läwen em Paradies, wua daut werkjlich Fräd un Sechaheit jäwen woat. Wie motten dise Hopninj emma ver de Uagen hoolen. Sest kaun onse Hopninj soo onkloa sennen, aus wan wie no eene schmocke Jäajent kjikjen derch eene schwiensche Rut. Woo kjenn wie soo to sajen onse Rut reinmoaken, om onse Hopninj stoakj to hoolen? Wie sellen ons räajelmässich Tiet nämen, om doaräwa notodenkjen, woo wundascheen daut Läwen enne niee Welt woat sennen. Wie kjennen uk Artikjels läsen, Videos kjikjen ooda Leeda horchen, wua daut om onse Hopninj jeit. Un wie kjennen Jehowa em Jebäd aules sajen, to waut wie ons em Paradies freien.
11. Waut halpt eene Sesta, fresche Krauft to kjrieen, waut sea krank es?
11 See wie mol, woo de Hopninj eene Sesta Troost un Krauft jeft, waut Joy heet un sea krank es. See sajcht: “Wan ekj äwafoddat sie, dan saj ekj Jehowa krakjt, woo ekj mie feel, un ekj weet, daut hee mie vestonen kaun. En soone Tieden jeft Jehowa mie siene Krauft, waut väl stoakja es aus irjenteene menschelje Krauft.” (2. Kor. 4:7). Joy stalt sikj daut uk väa, woo daut woat sennen, wan see ieescht en de niee Welt läwen woat, wua “kjeena … woat sajen: “Ekj sie nich jesunt”” (Jes. 33:24). Wan wie ons uk to Jehowa utschedden un onse Hopninj ver de Uagen hoolen, dan woa wie de Krauft kjrieen, waut ons fält.
12. Wuarom kjenn wie ons doaropp veloten, daut Jehowa aul siene Vespräakjungen erfellen woat? (See uk daut Bilt.)
12 Krakjt soo aus de Juden, waut en Babel faust wieren, haft Jehowa ons uk väle Jrind jejäft, doaropp to vetruen, daut hee siene Vespräakjungen erfellen woat. Waut vonne Profezeiungen erfellen sikj nu aul? Biejlikj see wie, daut de Weltmacht Enjlaunt un Stäts “toom Deel stoakj, un toom Deel broklich” es (Dan. 2:42-43). Wie seenen uk, daut doa “Ieedbäben sent opp eene Städ no de aundre”, un wie prädjen “aule Sorten Menschen” (Mat. 24:7, 14). Waut deit daut aun ons, wan wie seenen, daut dise un aundre Profezeiungen sikj erfellen? Daut stoakjt onsen Gloowen, daut Jehowa aul siene Vespräakjungen erfellen woat.
De Profezeiungen, waut sikj nu erfellen, stoakjen onsen Gloowen doaraun, daut aules, waut Jehowa vesproaken haft, sikj uk erfellen woat (See Varsch 12)
JEHOWA HALPT ONS, NICH ANGST TO HABEN
13. (a) Waut fa Schwoaret wudden de Juden beläwen, wan de Tiet kjeem, daut see wudden friekomen? (b) Woo treest Jehowa de Juden, waut en Babel wieren, no Jesaja 41:10-13 no?
13 Jehowa jeef de Juden en Babel de wundascheene Hopninj, noch mol frietokomen. Oba hee wist uk, daut et wudd schwanda woaren, wan de Tiet kjeem frietokomen. Hee säd verut, daut een majchtja Kjennich de Velkja rom Babel ennämen wudd un dan jäajen Babel selfst komen wudd (Jes. 41:2-5). Sullen de Juden Angst haben? Nä. Jehowa treest sien Volkj aul väl Joaren em Verut, aus hee säd: “Enjst die nich, wiels ekj sie met die; fercht die nich, wiels ekj sie dien Gott” (läs Jesaja 41:10-13). Waut meend hee doamet, aus hee säd: “Ekj sie dien Gott”? Doamet holp hee de Juden nich denkjen, daut dee am aunbäden sullen, wiels daut wisten dee selfst goot. Hee holp dee denkjen, daut hee noch met äant wia un äant halpen wudd (Psa. 118:6).
14. Woo holp Jehowa de Juden noch, daut dee nich Angst hauden?
14 Jehowa holp de Juden, waut en Babel wieren, aun siene butajeweenelje Krauft to denkjen un uk doaraun, woo väl hee wist. Opp dise Wajch holp hee dee uk, nich Angst to haben. Hee säd de Juden, daut see sullen no de Stierns aum Himmel kjikjen. Hee säd, daut hee dee nich bloos jemoakt haud, oba hee wist uk, woo jieda Stiern heet (Jes. 40:25-28). Wan hee daut wist, wudd hee dan nich weeten, woo jieda eena von siene Deena heeten deed? Wan Jehowa de Krauft haud toom de Stierns moaken, dan haud dee secha uk de Krauft toom siene Deena halpen. De Juden en Babel hauden werkjlich kjeene Uasoak, sikj Sorjen to moaken ooda Angst to haben.
15. Woo muak Gott de Juden en Babel fa daut reed, waut noch komen wudd?
15 Jehowa muak siene Deena fa daut reed, waut noch komen wudd. Biejlikj haud hee sien Volkj aul ea en daut Buak Jesaja jesajcht: “Go en diene Bennastowen un schlut de Däaren hinja die too. Vestäakj die fa een kjlienet Stootje, bat de Oaja vebie es” (Jes. 26:20, NW). De Juden sent dise Aunwiesunk woomäajlich nojekomen, aus de Kjennich Kierus jäajen Babel kjeem. Een ieeschtemmascha griechischa Jeschichts-Schriewa säd, daut aus Kierus en Babel nennkjeem, säd hee to siene Soldoten, daut see aulem dootmoaken sullen, waut nich en äare Hiesa bennen wieren. Kaust du die daut väastalen, woo Angst de Menschen en Babel mott jewast sennen? Oba de Juden bleewen woomäajlich veschoont, wiels dee daut nokjeemen, waut Jehowa äant säd.
16. Wuarom bruck wie nich Angst haben, waut enne groote Liedenstiet passieren woat? (See uk daut Bilt.)
16 Waut kjenn wie doavon lieren? De jratste Liedenstiet, waut et jeemols jejäft haft, woat boolt aunfangen. Dan woaren de Menschen enne Welt derchenaunda sennen un groote Angst haben, oba Jehowa siene Deena nich. Wie weeten, daut Jehowa ons Gott es. Wie woaren brow sennen, wiels wie weeten, daut “[onse] Radunk es dicht bie” (Luk. 21:28). Mau rajcht wan de Lenda, waut sikj toopstonen woaren, jäajen ons komen, woa wie wieda opp Jehowa vetruen. Jehowa woat ons derch siene Enjel beschitzen un Aunwiesungen jäwen, waut ons Läwen raden kjennen. Woo woat hee ons dise Aunwiesungen jäwen? Daut weet wie noch nich. Oba woomäajlich woat hee daut derch de Vesaumlungen doonen. De Vesaumlungen woaren soo to sajen de “Bennastowen” sennen, wua wie woaren en Sechaheit sennen. Woo kjenn wie ons fa daut reedmoaken, waut noch kjemt? Wie sellen jratre Frind woaren met onse Breeda un Sestren un de Aunwiesungen wellich nokomen, waut Jehowa siene Organisazion jeft, un ons uk gaunz secha sennen, daut Jehowa onse Organisazion leiden deit (Heb. 10:24-25; 13:17).
Wan wie äwa Jehowa siene Macht nodenkjen un daut hee emstaund es, ons to raden, dan woa wie nich äwamotich Angst haben enne groote Liedenstiet (See Varsch 16)b
17. Woo kaust du bie Jehowa no Troost un Moot sieekjen?
17 Daut Läwen en Babel wia fa de Juden nich leicht. Oba Jehowa jeef dee dän Troost un Moot, waut äant fäld. Krakjt soo woat hee daut uk met ons doonen. Doawäajen sieekj wieda bie Jehowa no Troost un Moot, endoont waut doa noch kjemt. Twiewel doa nich aun, daut Jehowa siene true Deena opp iernst vejäwen deit. Hool diene Hopninj stoakj. Un hool dit em Denkj: Du brukst kjeene Angst haben, wiels Jehowa es dien Gott.
LEET 3 Ons Gott jeft ons Hopninj un Krauft
a Eenje Nomes hab wie hia jeendat.
b BILTBESCHRIEWUNK: Eene kjliene Grupp Breeda un Sestren sent toop. Dee sent sikj secha, daut Jehowa de Macht haft un emstaund es, siene Deena to raden, endoont wua dee oppe Ieed wonen.