19. ARTIKJEL FA DAUT STUDIUM
LEET 22 Daut Kjennichrikj es reed – lot daut komen!
Waut weet wie doaräwa, woo Jehowa de Menschen boolt rechten woat?
“[Jehowa] well … daut kjeena veloaren jeit” (2. PET. 3:9)
OM WAUT DAUT JEIT
Wie kjennen ons gaunz secha sennen, daut Jehowa de Menschen boolt rajcht rechten woat.
1. Wuarom kjenn wie sajen, daut wie en gaunz besondre Tieden läwen?
WIE läwen en gaunz besondre Tieden! Jieda Dach see wie ver ons, woo sikj biblische Profezeiungen erfellen. Biejlikj see wie, woo “de Kjennich vom Nuaden” un “de Kjennich vom Sieden” unja sikj strieden, wäajen dee beid äwa de Welt rejieren wellen (Dan. 11:40). Wie seenen uk, daut de goode Norecht von Gott sien Kjennichrikj äwa de gaunze Welt jeprädicht woat un daut millionende Menschen sikj eenich woaren, Jehowa to deenen (Jes. 60:22; Mat. 24:14). Wie kjrieen uk äwajenuach jeisteljet Äten “to de rajchte Tiet” (Mat. 24:45-47).
2. (a) Äwa waut kjenn wie ons gaunz secha sennen? (b) Waut mott wie oba vestonen?
2 Jehowa halpt ons wieda, eenje wichtje Sachen bäta to vestonen, waut meist fuaz passieren woaren (Spr. 4:18; Dan. 2:28). Wie kjennen ons secha sennen, daut wan de groote Liedenstiet aunfangen woat, woa wie aules weeten, waut ons fält to weeten, daut wie en dise schwoare Tiet tru uthoolen kjennen un veeent bliewen. Oba wie motten vestonen, daut et eenje wichtje Sachen jeft, waut wie eefach bloos nich weeten, waut boolt passieren woaren. En disen Artikjel woa wie Ieeschtens doavon räden, wuarom wie eenjet jeendat haben, waut wie ea äwa dee wichtje Sachen säden. Dan woa wie doavon räden, waut wie aul weeten, waut boolt komen woat un waut ons himlischa Voda doonen woat.
WAUT WIE NICH WEETEN
3. (a) Waut docht wie ea, waut met dee wudd sennen, waut nich eenen Gloowen hauden, wan de groote Liedenstiet ieescht aunjefongen haud? (b) Wuarom docht wie soont?
3 Ea hab wie jesajcht, daut wan de groote Liedenstiet ieescht aunjefongen haud, wudd kjeena mea wiesen kjennen, daut dee Gloowen aun Jehowa haft un Harmagedon äwaläwen. Wie säden soont, wiels wie dochten, daut aules, waut bie de Sintflut passieed, waut väastald, waut lota noch passieren wudd. Biejlikj docht wie, daut krakjt soo aus doa kjeena mea en de Arche nennkunn, aus Jehowa de Däa ieescht toojemoakt haud, wudd uk kjeena mea wiesen kjennen, daut dee Gloowen aun Gott haud, wan de groote Liedenstiet ieescht aunjefongen haud (Mat. 24:37-39).
4. Wuarom saj wie nu nich, daut aules, waut bie de Sintflut passieed, waut väastalt, waut lota passieren wudd?
4 Es daut rajcht to sajen, daut aules, waut bie de Sintflut passieed, waut väastalt, waut lota noch passieren wudd? Nä. Wuarom nich? Wiels de Schreft nich soont sajcht.a Daut stemt, Jesus säd, daut “krakjt soo aus daut en No̱ah siene Tiet wia, soo woat daut en dee Tiet sennen, wan de Menschensän woat doa sennen.” Oba Jesus säd nich, daut aules, waut en Noah siene Tiet passieed, waut väastalt, waut lota passieren wudd, soo aus, daut Jehowa de Däa von de Arche toomuak. Oba daut bediet uk nich, daut wie nuscht lieren kjennen von de Jeschicht von Noah un de Sintflut.
5. (a) Waut deed Noah, ea de Sintflut kjeem? (Hebräa 11:7; 1. Petrus 3:20). (b) Waut es äwareen en onse Tiet un en Noah siene Tiet, wan daut om daut Prädjen jeit?
5 Aus Noah daut enwort, waut Jehowa doonen wudd, wees dee, daut dee Gloowen haud un bud de Arche (läs Hebräa 11:7; 1. Petrus 3:20). De Menschen, waut nu de goode Norecht von Gott sien Kjennichrikj hieren, motten uk wiesen, daut see Gloowen haben un daut nokomen, waut see lieren (Apj. 3:17-20). Petrus säd, daut Noah “Jerajchtichkjeit prädijd” (2. Pet. 2:5). Oba soo aus wie en dän väajen Artikjel sagen, weet wie daut nich neiw, aus Noah to jieda Mensch proowd to prädjen, ea de Sintflut kjeem. Bie dise Tiet proow wie aulem to prädjen un sent flietich doabie. Oba endoont woo sea wie ons aunstrenjen, wie kjennen nich jieda Mensch prädjen, ea daut Enj kjemt. Wuarom nich?
6-7. Woo weet wie, daut wie nich woaren to jieda Mensch prädjen kjennen, ea daut Enj kjemt?
6 Denkj doaraun, waut Jesus äwa daut Prädichtwoakj säd. Dee säd verut, daut de goode Norecht wudd “oppe gaunze Welt jeprädicht woaren, waut fa aule Sorten Menschen woat een Zeichnis sennen” (Mat. 24:14). Dise Profezeiunk erfelt sikj nu soo aus noch kjeenmol ea. De goode Norecht von daut Kjennichrikj woat opp äwa 1,000 Sproaken bekauntjemoakt, un derch onse Websied kjennen de mieeschte Menschen oppe Welt doavon lieren.
7 Jesus säd noch to siene Nofolja, daut see nich wudden en “aule Stauten un Darpa”, aulsoo to jieda Mensch, jeprädicht haben, ea hee komen wudd (Mat. 10:23; 25:31-33). Daut, waut Jesus don säd, woat en onse Tiet krakjt soo sennen. Millionende Menschen läwen en Jäajenden, wua ons Woakj nich en aule Stekjen frie es. Doa woaren uk jieda Minut hundade Bäbes jebuaren. Doawäajen woa wie nich kjennen to jieda Mensch oppe Welt prädjen, ea daut Enj kjemt, wan wie uk ons Bastet doonen toom “aule Menschen von aule Velkja, Raussen, Stam un Sproaken” de goode Norecht prädjen (Opb. 14:6).
8. Äwa waut wunda wie veleicht, woo Jehowa de Menschen lota rechten woat? (See uk de Bilda.)
8 Woomäajlich wunda wie nu: “Waut es met soone, waut veleicht nich de Jeläajenheit haben, de goode Norecht to hieren, ea de groote Liedenstiet aunfangt? Woo woaren Jehowa un sien Sän, dän hee daut Rechten äwajäft haft, met dee omgonen?” (Joh. 5:19, 22, 27; Apj. 17:31). De Teemavarsch fa disen Artikjel sajcht, daut Jehowa “well, daut aulemaun sikj oppmoaken saul, un daut kjeena veloaren jeit” (2. Pet. 3:9; 1. Tim. 2:4). Wan wie dit uk weeten, haft Jehowa ons oba nich jesajcht, woo hee deejanje rechten woat, waut nich de Jeläajenheit kjrieen, de goode Norecht to hieren. Un wie weeten uk, daut hee ons nich bruck sajen, waut hee aul jedonen haft ooda noch doonen woat.
Woo woat Jehowa dee rechten, waut nich de Jeläajenheit haben, no de goode Norecht to horchen, ea de groote Liedenstiet aunfangt? (See Varsch 8)c
9. Waut haft Jehowa ons derch de Bibel weeten jeloten?
9 Derch sien Wuat lat Jehowa ons eenjet weeten, waut hee noch doonen woat. Biejlikj sajcht de Bibel, daut Jehowa de “ojjerajchte” Menschen wada oppwakjen woat, waut nich de Jeläajenheit hauden, äwa de goode Norecht to lieren un sikj to endren (Apj. 24:15; Luk. 23:42-43). Derch dit komen aundre wichtje Froagen opp.
10. Äwa waut vonne Froagen wunda wie veleicht?
10 Woaren aule, waut en de groote Liedenstiet stoawen, fa emma doot bliewen, onen de Hopninj wada toom Läwen to komen? De Bibel wiest kloa, daut Jehowa un siene Armeeen deejanje en Harmagedon venichten woaren, waut gaunz jäajen am schaufen. Dise Menschen woaren nich wada oppstonen (2. Tes. 1:6-10). Oba woo es daut met soone, waut en de groote Liedenstiet stoawen, wäajen dee biejlikj krank ooda oolt sent, derch een Ekjsident ooda wäajen aundre äant dootmoaken? (Liera 9:11; Sach. 14:13). Kunnen eenje von dise Menschen mank de “Ojjerajchte” sennen, waut enne niee Welt wada oppstonen woaren? Wie weeten daut eefach nich.
WAUT WIE WEETEN
11. No waut woaren de Menschen en Harmagedon jerecht woaren?
11 Wie weeten von veschiednet, waut lota passieren woat. Biejlikj weet wie, daut de Menschen en Harmagedon doano jerecht woaren, waut dee fa Christus siene Breeda jedonen haben (Mat. 25:40). Dee, waut Christus un de Jesaulwde unjastetten, woat hee aus Schop talen. Wie weeten uk, daut eenje Jesaulwde noch woaren oppe Ieed sennen, nodäm de groote Liedenstiet aunjefongen haft. Dee woaren nom Himmel jenomen woaren, een Stootje ea Harmagedon aunfangt. Soo lang aus doa noch Jesaulwde oppe Ieed sent, woaren opprechtje Menschen woomäajlich de Jeläajenheit haben, dee to unjastetten un uk daut Woakj, waut dee derchfieren (Mat. 25:31-32; Opb. 12:17). Wuarom es aul dit soo wichtich fa ons?
12-13. Waut woaren eenje doonen, wan dee seenen, daut “daut groote Babel” venicht es? (See uk de Bilda.)
12 Mau rajcht nodäm de groote Liedenstiet aunjefongen haft, kaun daut sennen, daut eenje, waut daut seenen, daut “daut groote Babel” venicht es, doaraun denkjen, daut Jehowa siene Zeijen aul fa väl Joaren doavon jerät hauden. Woaren eenje noch wiesen, daut dee aun Jehowa jleewen, wan dee dit seenen? (Opb. 17:5; Hes. 33:33).
13 Wan daut soont jeft, dan wudd daut soo sennen aus daut, waut en Ägipten en Moses siene Tiet passieed. De Schreft sajcht, daut “väle, dee nich Israeliten wieren, jinjen met an met,” aus de Israeliten von Ägipten veleeten. Eenje fungen veleicht aun, aun Jehowa to jleewen, aus dee sagen, daut de Tieen Ploagen krakjt soo passieeden, aus Moses äant jesajcht haud (2. Mo. 12:38). Waut, wan soo waut passieet, wan daut Groote Babel ieescht venicht es? Woat ons daut dan schod sennen, daut eenje Menschen noch woaren met ons toop Jehowa deenen kjennen jroz ver Harmagedon? Secha nich! Wie wellen onsen himlischen Voda nodoonen, waut doa “metliedent, voll Jnod, nich leicht doll, un sea leeftolich un truhoatich” es (2. Mo. 34:6).b
Eenje, waut daut seenen, daut “daut groote Babel” venicht es, woaren doaraun denkjen, daut Jehowa siene Zeijen aul fa väl Joaren doavon jerät hauden (See Varsch 12-13)d
14-15. Henjt eenen Mensch siene Hopninj, eewich to läwen, doavon auf, wua dee läft un wanea dee stoaft? (Psalm 33:4-5).
14 Wie hieren eenje sajen: “Daut wudd bäta sennen, wan mien Frintschoft, waut nich enne Woarheit es, noch ver de groote Liedenstiet storf, soo daut dee eene Hopninj hauden, wada opptostonen.” Dee sajen daut secha nich utem schlajchten Senn. Oba eenen Mensch siene Hopninj, fa emma to läwen, henjt nich doavon auf, wanea dee stoaft. Jehowa es de volkomna Rechta un dee woat emma daut doonen, waut rajcht es (läs Psalm 33:4-5). Wie kjennen ons gaunz secha sennen, daut “de Rechta fa de gaunze Ieed woat . . . rajcht haundlen” (1. Mo. 18:25).
15 Wie haben Uasoak to sajen, daut eenen Mensch siene Hopninj, fa emma to läwen, nich doavon aufhenjt, wua dee läft. Dauts ommäajlich, daut Jehowa de millionende Menschen wudd aus “Kosen” talen, waut en soone Lenda läwden, wua dee kjeenmol äwa Gott sien Kjennichrikj lieren kunnen (Mat. 25:46). De jerajchta Rechta äwa de gaunze Ieed es noch väl dolla om jiedrem eenen von dee bekjemmat, aus wie jeemols woaren kjennen. Wie weeten nich krakjt, waut Jehowa en de groote Liedenstiet aules doonen woat. Oba daut, waut dee en de groote Liedenstiet seenen woaren, woat eenje veleicht bat doa brinjen, daut dee aun Jehowa jleewen, wan hee sienen Nomen ver aulem heilicht (Hes. 38:16).
Woaren eenje noch wiesen, daut dee aun Jehowa jleewen, … nodäm de groote Liedenstiet aunjefongen haft?
16. Waut weet wie äwa Jehowa? (See uk daut Bilt.)
16 Doaderch daut wie de Bibel studieet haben, weet wie, daut de Menschen väl wieet bie Jehowa sent. Hee jeef sienen Sän, soo daut wie aula de Jeläajenheit haben, fa emma to läwen (Joh. 3:16). Wie haben aula mol Jehowa siene Leew jespäat (Jes. 49:15). Hee kjant jiedrem eenen von ons biem Nomen. Mau rajcht wan wie stoawen, kaun hee ons wada oppwakjen, wiels hee ons soo goot kjant un jieda Eenselheit von ons weet un uk aules, waut wie beläft haben! (Mat. 10:29-31). Wie kjennen ons gaunz secha sennen, daut ons himlischa Voda jiedrem eenen volkomen rechten woat, wiels hee weis, jerajcht un metliedent es (Jak. 2:13).
Wie kjennen ons secha sennen, daut Jehowa jiedrem eenen volkomen rechten woat, wiels dee weis, jerajcht un metliedent es (See Varsch 16)
17. Waut woa wie en dän näakjsten Artikjel seenen?
17 Nu daut wie dit bäta vestonen kjennen, see wie, daut daut Prädjen noch wichtja es aus jeemols ea. Wuarom kjenn wie daut sajen? Waut brinjt ons bat doa, wieda flietich de goode Norecht to prädjen? En dän näakjsten Artikjel woa wie ons noch mea Eenselheiten doaräwa unjastonen.
LEET 76 Prädjen jeft groote Freid
a Wan du noch mea weeten west, wuarom dise Endrunk jemoakt wort, dan see dän Artikjel “Diese Art zu lehren gefiel Jehova” em Woaktorm vom 15. Moaz 2015, S. 7-11.
b Nodäm daut daut Groote Babel venicht es, woaren Jehowa siene Deena aunjejräpen woaren, wan Gog von Magog jäajen dee kjemt. Jieda eena, waut doa aunfangt met ons toop Jehowa to deenen, woat uk aunjejräpen woaren, nodäm daut daut Groote Babel venicht es.
c BILTBESCHRIEWUNGEN: Dree Bilda, waut doa wiesen, wuarom wie nich jiedrem eenen oppe Welt prädjen kjennen: (1) Eene Fru wont en een Launt, wua daut nich secha es to prädjen, wäajen de mieeschte Menschen nich aun Gott jleewen. (2) Eene Lied wonen en een Launt, wua ons Woakj von de Rejierunk veboden es un doawäajen jefäadlich es to prädjen. (3) Een Maun wont wiet auf, wua schwoa hantokomen es.
d BILTBESCHRIEWUNK: Eene junge Fru, waut de Woarheit veloten haft, denkjt doaraun, waut dee äwa de Venichtunk von “daut groote Babel” jelieet haud. See wiest, daut see wada Gloowen aun Jehowa haft un kjemt trigj no äare Elren, waut Jehowa deenen. Wan daut soont jeft, dan well wie onsen himlischen Voda sien Metleet un sien Metjefeel nodoonen un ons freien, daut een Sinda trigjjekomen es.