Doo wieda ut Leew prädjen!

1. Waut wort en daut Joarestoopkomen von 2023 aules bekauntjemoakt?

DAUT Joarestoopkomen von 2023a wia sea besonda! Doa worden Sachen ut de Schreft utjelajcht, waut wie nu bäta vestonen kjennen un doa wort uk eenjet bekauntjemoakt, waut nu bie dän Prädichtdeenst aundasch es. Doa lieed wie biejlikj, daut eenje veleicht noch de Jeläajenheit haben woaren, met ons toop Jehowa to deenen, mau rajcht nodäm daut Groote Babel venicht es. Doa säden se uk, daut wie von Nowamba 2023 aun nich mea aules oppschriewen brucken, waut wie em Prädichtdeenst doonen un eenen Berecht doavon aufjäwen. Bediet daut dan, daut de Prädichtdeenst nich mea soo wichtich un drinjent es aus ea? Secha nich!

2. Wuarom woat de Prädichtdeenst jieda Dach emma wichtja? (Markus 13:10).

² De Prädichtdeenst woat jieda Dach emma wichtja. Wuarom? Wäajen de Tiet aufrant. Denkj biejlikj mol doaraun, waut Jesus äwa daut Prädichtwoakj enne latste Doag verutsäd (läs Markus 13:10). No Matäus no säd Jesus noch, daut de goode Norecht wudd oppe gaunze Welt jeprädicht woaren, ea “daut Enj” kjeem (Mat. 24:14). Doamet es daut Enj von dän Soton siene schlajchte Welt jemeent, waut doa woat gaunz venicht woaren. Jehowa haft dän “Dach un de Stund” aul faustjesat, wanea dit passieren woat (Mat. 24:36; 25:13; Apj. 1:7). Jieda Dach sent wie een bät noda (Reem. 13:11). Oba en de Tweschentiet mott wie bloos wieda prädjen.

3. Waut brinjt ons bat doa to prädjen?

³ Hia es eene sea wichtje Froag, wua wie aula äwa nodenkjen sellen: Wuarom doo wie de goode Norecht prädjen? Eefach jesajcht, ut Leew. Wan wie prädjen, dan wies wie, daut wie de goode Norecht leewen, daut wie de Menschen leewen un noch wichtja, daut wie Jehowa un sienen Nomen leewen. Well wie dise Sachen mol eenselwies derchgonen.

WIE PRÄDJEN, WÄAJEN WIE DE GOODE NORECHT LEEWEN

4. Waut doo wie, wan wie waut Goodet to hieren kjrieen?

⁴ Denkjt die daut noch, woo du die feelsd, aus doa waut Butajeweeneljet en dien Läwen passieed? Veleicht wia een Bäbe en diene Famielje jebuaren ooda du hautst eene Oabeit jekjräajen, waut die sea needich fäld. Secha wieescht du sea oppjebrocht un vetalsd daut fuaz to diene Famielje un Frind. Wieescht du krakjt soo oppjebrocht, aus du de baste Norecht hieezhd – de goode Norecht von Gott sien Kjennichrikj?

5. Woo feelsd du die, aus du de Woarheit ut Gott sien Wuat lieezhd? (See uk de Bilda.)

⁵ Denkj mol äwa no, woo du die feelsd, aus du de Woarheit ut Gott sien Wuat lieezhd. Du lieezhd, daut dien himlischa Voda die leeft un daut hee well, daut du to de Famielje von siene Deena jehieescht. Du lieezhd uk, daut hee vesproaken haft, met aul daut Lieden een Enj to moaken un daut du de Hopninj hast, daut diene leewe Aunjehieeje wada woaren vom Doot oppstonen en eene niee Welt – un noch väl aundre Sachen (Mar. 10:​29-30; Joh. 5:​28-29; Reem. 8:​38-39; Opb. 21:​3-4). Dit to lieren, jinkj die sea to Hoaten (Luk. 24:32). Du räakjensd daut sea väl, waut du lieezhd un wust aundre von dit Wieetvolle vetalen! (See uk Jeremia 20:9.)

6. Waut kaust du von Ernest un Rose äare Erfoarunk lieren?

⁶ Well wie mol de Erfoarunk von eenen Brooda seenen, waut Ernestb heet. Hee wia rom tieen Joa, aus sien Voda storf. Ernest sajcht: “Ekj wundad: ‘Es hee em Himmel? Ooda woat hee fa emma doot sennen?ʼ Ekj wia dee Kjinja aufjenstich, waut noch eenen Voda hauden.” Ernest jinkj foaken nom Kjoakjhoff un kjneed sikj ver sienen Voda sien Grauf un bäd: “Gott, ekj well toom Jefaulen weeten, wua mien Voda es.” Aus sien Voda rom 17 Joa doot wia, kjrieech Ernest een Bibelstudium aunjeboden un hee neem daut fuaz aun. Hee wia sea oppjebrocht, aus hee lieed, daut de Doodes nuscht wisten un daut et soo wia, aus wan dee deep schlopen, un daut de Schreft vesprakjt, daut dee wada woaren oppstonen (Liera 9:​5, 10; Apj. 24:15). Entlich wist hee de Auntwuaten opp siene Froagen, waut hee aul lang jehaut haud! Ernest wia sea oppjebrocht äwa daut, waut hee ut de Schreft lieed. Siene Fru Rose funk uk aun, met am toop de Bibel to studieren un see jleicht daut uk sea, waut see lieed. Aune 1978 leeten see sikj deepen. See vetalden äare Famielje, Frind un uk aundre gaunz oppjebrocht von daut, waut see jelieet hauden. Waut kjeem doabie rut? Ernest un Rose kunnen mea aus 70 Menschen halpen, Jehowa kjanen to lieren un sikj deepen to loten.

7. Waut doo wie, wan wie de Woarheit ut de Schreft leewen? (Lukas 6:45).

⁷ Wan wie daut leewen, waut wie ut de Schreft lieren, dan kjenn wie nich aundasch, aus aundre von daut vetalen (läs Lukas 6:45). Wie feelen ons krakjt soo aus Jesus siene Jinja, waut säden: “Wie oba kjennen nich opphieren, doavon to räden, waut wie jeseenen un jehieet haben” (Apj. 4:20). Wie leewen de Woarheit soo sea, daut wie wellen soo väl Menschen aus mäajlich von dee vetalen.

WIE PRÄDJEN, WÄAJEN WIE DE MENSCHEN LEEWEN

8. Waut brinjt ons bat doa, aundre de goode Norecht to prädjen? (See daut Hock “Leew de Menschen – moak dee to Jinja”.) (See uk daut Bilt.)

⁸ Wie leewen de Menschen krakjt soo, aus Jehowa un sien Sän doonen (Spr. 8:31; Joh. 3:16). Wie haben grootet Metjefeel fa dee, waut “onen Gott” sent un “nuscht to hopen” haben (Efs. 2:12). Dee gonen en äare Trubbels meist unja, un wie haben de Wast, waut dee daut Läwen raden kaun – aulsoo de goode Norecht von Gott sien Kjennichrikj. Onse Leew un Metjefeel fa dee brinjt ons bat doa, soo väl to doonen aus mäajlich toom dee de goode Norecht brinjen. Dise wieetvolle Norecht kaun de Menschen wada Hopninj jäwen un dee halpen, nu aul een bätret Läwen to haben. Daut jeft dee uk de Mäajlichkjeit, “daut woare Läwen”, aulsoo daut eewje Läwen, en Gott siene niee Welt to kjrieen (1. Tim. 6:19).

9. (a) Fa waut doo wie de Menschen woarnen? (b) Wuarom doo wie dee woarnen? (Hesekiel 33:​7-8).

⁹ Onse Leew fa de Menschen brinjt ons bat doa, dee to woarnen, daut daut Enj von dise schlajchte Welt dicht bie es (läs Hesekiel 33:​7-8). Wie haben Metjefeel met onse Famielje un aundre, waut noch nich Jehowa deenen. Een deel Menschen läwen bloos, onen daut dee weeten, daut doa woat “soone groote Liedenstiet sennen, aus daut noch niemols ea jejäft haft, von dan aus de Welt aunfunk bat nu, un uk niemols mea jäwen woat” (Mat. 24:21). Wie wellen, daut de Menschen daut weeten, waut en dee Jerechtstiet komen woat: Ieescht woaren aule faulsche Gloowes oppjeriemt woaren un doahinja woat dän Soton siene Welt gaunz venicht woaren en Harmagedon (Opb. 16:​14, 16; 17:​16-17; 19:​11, 19-20). Wie bäden, daut soo väl Menschen aus mäajlich noch no dise Woarnunk horchen un nu aunfangen, met ons toop Jehowa to deenen. Oba waut es met dee, waut nich no dise Woarnunk horchen, wua veleicht uk onse Famielje met en es?

10. Wuarom es daut drinjent, daut wie de Menschen fa daut woarnen, waut noch kjemt?

¹⁰ Soo aus wie en dän väajen Artikjel jeseenen haben, es daut veleicht Jehowa sien Wellen, soone to raden, waut Gloowen wiesen, wan dee seenen, daut daut Groote Babel gaunz venicht es. Wan daut soo es, dan es daut nu soo drinjent aus noch kjeenmol ea, daut wie de Menschen wieda woarnen. Denkj mol han: Waut wie dee nu sajen, es veleicht waut, wua dee lota aun denkjen woaren (see uk Hesekiel 33:33). Veleicht denkjen dee aun de Woarnunk, waut wie dee jesajcht haben un daut brinjt dee veleicht bat doa, daut dee met ons toop wellen Jehowa deenen, ea daut too lot es. Krakjt soo aus de Jefenkjnis-Aunjestalda en Filippi Gloowen wees, nodäm daut “daut een grootet Ieedbäben” jeef, woaren eenje, waut nu veleicht nich no ons horchen, dan Gloowen wiesen, wan daut Groote Babel woat gaunz venicht sennen (Apj. 16:​25-34).

WIE PRÄDJEN, WÄAJEN WIE JEHOWA UN SIENEN NOMEN LEEWEN

11. Woo kjenn wie Jehowa Harlichkjeit, Iea un Krauft jäwen? (Openboarunk 4:11). (See uk de Bilda.)

¹¹ De wichtichste Uasoak, wuarom wie de goode Norecht prädjen es, wäajen wie Jehowa un sienen heiljen Nomen leewen. Wie seenen dän Prädichtdeenst aus eene Jeläajenheit aun, dän Gott to lowen, waut wie leewen (läs Openboarunk 4:11). Wie stemmen gaunz met dit met: “Du best daut wieet, oo Har, Harlichkjeit un Iea un Krauft to nämen”. Wie jäwen Jehowa Harlichkjeit un Iea, wan wie aundre kloaren Bewies doafäa jäwen, daut hee “aules jemoakt” haft un daut wie läwen kjennen, wiels hee ons aum Läwen helt. Wie jäwen am uk onse Krauft, Tiet un waut wie sest noch haben, om soo väl aus mäajlich, em Deenst to doonen (Mat. 6:33; Luk. 13:24; Kol. 3:23). Eefach jesajcht, jleich wie daut, von dän Gott to räden, waut wie leewen. Ons jankat daut bloos, aundre von dän sienen Nomen to vetalen un waut hee fa een Gott es. Wuarom?

12. Woo kjenn wie Jehowa sienen Nomen heilich hoolen derch dän Prädichtdeenst?

¹² Onse Leew fa Jehowa brinjt ons bat doa, sienen Nomen heilich to hoolen (Mat. 6:9). Wie wellen ons Poat doatoo doonen, daut dän sien Nomen kaun von aule Läajes reinjemoakt woaren, waut de Soton opp dän jebrocht haft (1. Mo. 3:​1-5; Hiob 2:4; Joh. 8:44). Wan wie em Deenst sent, well wie jieren fa Gott sienen Nomen enstonen un deejanje de Woarheit von Gott vetalen, waut doano horchen wellen. Wie wellen aulem sajen, daut de Leew Jehowa siene jratste Ieejenschoft es, daut hee de basta Harscha es un daut sien Kjennichrikj boolt woat met aulet Lieden een Enj moaken un doano seenen, daut aule Menschen Fräd haben un schaftich sent (Psa. 37:​10-11, 29; 1. Joh. 4:​8, NW). Wan wie de Menschen aul dit von Jehowa sajen, dan hool wie sienen Nomen heilich. Wie sent uk schaftich, wiels wie doaderch daut nokomen, waut wie aus Jehowa siene Zeijen doonen sellen. Waut meent daut krakjt?

13. Wuarom es daut eene groote Iea, daut wie Jehowa siene Zeijen jenant woaren? (Jesaja 43:​10-12).

¹³ Jehowa haft ons jewält, siene “Zeijen” to sennen (läs Jesaja 43:​10-12, NW). Eenje Joaren trigj säd daut en eenen Breef vom Väastaunt: “Daut wie Jehowa siene Zeijen jenant woaren, es de jratste Iea, waut eena haben kaun.”c Wuarom saj wie daut? Doatoo mol een Jlikjnis. Saj wie mol, die woat beschulcht, daut du waut Schlajchtet jedonen hast. Die fält daut nu aun wäm, waut aundre daut sajcht, daut et nich soo es, waut äwa die jesajcht woat un daut du een gooda Mensch best, waut kjeenmol soon Schlajchtet doonen wudd. Wäm wurscht du die doatoo wälen? Secha wäm, dän du kjanst un vetruen deist, un dän aundre uk jleewen wudden, wäajen dee selfst eenen gooden Nomen haft. Daut Jehowa sikj ons aus siene Zeijen jewält haft wiest, daut hee ons goot kjant un ons vetrut, aundre daut to sajen, daut hee de eensich woara Gott es. Dauts werkjlich eene groote Iea, daut wie kjennen siene Zeijen sennen. Doawäajen näm wie jieda Jeläajenheit woa, aundre von sienen Nomen to vetalen un to bewiesen, daut aul daut Schlajchte nich soo es, waut äwa am vetalt woat. Opp dise Wajch kom wie daut no, waut ons Nomen bediet: Wie jäwen Zeichnis von Jehowa! (Psa. 83:18, NW; Reem. 10:13-15).

WIE WOAREN WIEDA PRÄDJEN BAT AUM ENJ

14. Waut fa Besondret woat boolt passieren?

¹⁴ Wie freien ons aul sea fa daut, waut boolt komen woat! Wie hopen, daut met Jehowa sienen Säajen noch väl mea Menschen de goode Norecht aunnämen, ea de groote Liedenstiet aunfangt. Wie sent uk oppjebrocht, daut mau rajcht en de groote Liedenstiet – de schlemste Tiet, waut daut jeemols jäwen woat – Menschen veleicht noch von Soton siene schlajchte Welt veloten woaren un met ons toop Jehowa lowen! (Apj. 13:48).

15-16. Waut well wie wieda doonen, un bat wanea?

¹⁵ Nu en de Tweschentiet hab wie eene wichtje Oabeit to doonen. Wie haben de Iea, de goode Norecht von daut Kjennichrikj äwa de gaunze Welt to prädjen. Dit Woakj woat bloos een Mol derchjefieet woaren. To deeselwje Tiet mott wie uk de Menschen wieda fa daut woarnen, waut noch komen woat. Menschen motten daut weeten, daut daut Enj von dise schlajchte Welt bosich noda kjemt. Wan de Tiet toom rechten ieescht kjemt, dan woaren dee weeten, daut de Norecht, waut wie prädjen deeden, von Jehowa kjeem (Hes. 38:23).

¹⁶ To waut sent wie ons eenich? Ut leew fa de goode Norecht, ut Leew fa de Menschen un daut Wichtichste, ut Leew fa Jehowa Gott un sienen Nomen, well wie wieda jieren un drinjent prädjen un flietich sennen, bat Jehowa sajcht: “Dauts jenuach!”