Woo kjenn wie weeten, woont de Woarheit es un waut Läajes sent?

1. Woo seenen Jehowa siene Deena de Woarheit?

WIE aus Jehowa siene Deena leewen de Woarheit, waut en Gott sien Wuat to finjen es. Doaropp stett wie onsen Gloowen (Reem. 10:17). Wie sent ons secha, daut Jehowa de Christenvesaumlunk enjerecht haft, “wuaropp de Woarheit steit un uk jestett woat” (1. Tim. 3:15). Un wie sent uk wellich dee Jehuarsom, “dee mank ons de Leidunk haben”. Daut sent dee, waut ons de Woarheit ut de Schreft utlajen un ons Aunwiesungen jäwen, waut ons halpen, Gott sienen Wellen to doonen (Heb. 13:17, NW).

2. Waut kunn no Jakobus 5:19 no passieren, wan wie de Woarheit uk aul aunjenomen haben?

² Wan wie de Woarheit uk aul aunjenomen haben un ons doaräwa em Kloaren sent, daut wie motten de Aunwiesungen von Gott siene Organisazion nokomen, kjenn wie doawäajen noch veleit woaren (läs Jakobus 5:19). Daut jeft nuscht, waut de Soton wudd dolla jleichen, aus wan wie wudden opphieren opp de Schreft un opp de Aunwiesungen to vetruen, waut Gott siene Organisazion ons jeft (Efs. 4:14).

3. Wuarom mott wie ons gaunz faust aun de Woarheit hoolen? (Efeesa 6:13-14).

³ Läs Efeesa 6:13-14. Boolt woat de Soton hinjalestje Läajes brucken, om Lenda proowen, bat doa to brinjen, daut dee sikj jäajen Jehowa stalen (Opb. 16:13-14). Wie weeten uk, daut de Soton noch dolla proowen woat, Jehowa siene Deena to veleiden (Opb. 12:9). Doawäajen es daut wichtich, daut wie ons selfst lieren, dän Unjascheet tweschen de Woarheit un de Läajes to seenen, un ons dan aun de Woarheit hoolen (Reem. 6:17; 1. Pet. 1:22). Dits needich, daut wie de groote Liedenstiet äwaläwen kjennen!

4. Waut woa wie en disen Artikjel lieren?

⁴ En disen Artikjel woa wie äwa twee Ieejenschoften räden, waut wie haben motten, daut wie seenen kjennen, woont de Woarheit ut de Schreft es un daut wie de Aunwiesungen von Gott siene Organisazion nokomen. Dan woa wie uk noch von dreeatlei räden, waut wie doonen motten, om ons wieda faust aun de Woarheit to hoolen.

TOOM WEETEN, WOONT DE WOARHEIT ES, BRUCK WIE TWEE IEEJENSCHOFTEN

5. Woo kaun de Forcht fa Jehowa ons halpen to weeten, woont de Woarheit es?

⁵ Forcht fa Jehowa. Daut bediet, daut wie am soo sea leewen, daut wie kjeenmol wudden wellen waut doonen, waut hee nich jleicht. Wie wellen jieren dän Unjascheet weeten tweschen rajcht un orrajcht un tweschen de Woarheit un de Läajes, daut wie daut doonen kjennen, waut Jehowa jleicht (Spr. 2:3-6; Heb. 5:14). Wie motten kjeenmol tooloten, daut de Menschenforcht jrata woat aus onse Leew fa Jehowa; wiels waut de Menschen jleichen, jleicht Jehowa foaken nich.

6. Waut deeden de tieen Spionen ut Forcht fa de Menschen?

⁶ Wan wie mea Forcht haben fa de Menschen aus fa Gott, dan kjenn wie von de Woarheit aufkomen. See wie daut Biespel von de 12 Volkjsleida, waut daut Launt utspionen sullen, waut Jehowa de Israeliten vesproaken haud. Tieen von dise Spionen hauden eene jratre Angst fa de Kanaanita, aus äare Leew fa Jehowa wia. Dee säden to de aundre Israeliten: “Wie sent nich stoakj jenuach jäajen dit Volkj to gonen, wiels daut es too stoakj fa ons!” (4. Mo. 13:27-31). Fa Menschen to beseenen, wieren de Kanaanita uk stoakja aus de Israeliten. Oba jieda Israelit, waut doa jleewd, daut dee äare Fiend nich wudden ennämen kjennen, haud von Jehowa vejäten. De tieen Spionen hauden daut sult em Denkj hoolen, waut Jehowa wull, waut de Israeliten doonen sullen. Dee hauden doa uk sult aun denkjen, waut Jehowa korz fa äant jedonen haud. Dan wudden dee jeseenen haben, daut de stoakje Kanaanita nuscht wieren jäajen Jehowa, dee aule Macht haft. Bie Josua un Kaleb wia daut krakjt aundasch aus bie de tieen Spionen, waut nich Gloowen weesen. Dee wullen daut doonen, waut Jehowa haben wull. Doawäajen säden dee to de Menschen: “Wan de HAR ons jnädich es, dan woat hee ons en daut Launt brinjen un ons daut jäwen” (4. Mo. 14:6-9).

7. Woo kaun onse Forcht fa Jehowa noch jrata woaren? (See uk daut Bilt.)

⁷ Daut onse Forcht fa Jehowa noch kaun jrata woaren, mott wie doaräwa nodenkjen, waut Jehowa jleichen wudd, jiedatsmol wan wie eene Entscheidunk moaken (Psa. 16:8). Wan du eene biblische Jeschicht läst, dan denkj mol doaräwa no: “Waut wudd ekj en dise Loag jedonen haben?” Denkj mol han, du wieescht doa jewast un hautst de tieen Spionen toojehorcht, aus dee to de Israeliten säden, daut see Kanaan nich wudden ennämen kjennen. Wurscht du dee daut jejleeft haben un wurscht Menschenforcht jekjräajen haben ooda wudd diene Leew fa Jehowa un dien Wunsch, am to jefaulen, jrata jewast sennen aus diene Angst? Jehowa leet daut nich too, daut de Israeliten, waut nich doaraun jleewden, waut Josua un Kaleb säden, en daut vesproakne Launt nennkunnen (4. Mo. 14:10, 22-23).

8. Waut vonne Ieejenschoft mott wie onbedinjt haben, un wuarom?

⁸ Deemoot. Jehowa lat bloos deejanje de Woarheit vestonen, waut deemootich sent (Mat. 11:25). Wie neemen deemootich Help aun, daut wie de Woarheit lieren kunnen (Apj. 8:30-31). Oba wie motten uk wieda oppaussen, daut wie nich stolt woaren. Stolt kaun ons bat doa brinjen to denkjen, daut onse ieejne Iedeeen krakjt soo rajcht sent aus de Gruntsauzen ut de Schreft ooda de Aunwiesungen von Jehowa siene Organisazion.

9. Woo kjenn wie deemootich bliewen?

⁹ Daut wie kjennen deemootich bliewen, mott wie daut em Denkj hoolen, woo kjlien wie em Vejlikj met Jehowa sent (Psa. 8:4-5). Wie kjennen Jehowa doarom bäden, daut hee ons halpt, deemootich to sennen un reed to sennen, waut to lieren. Hee woat ons halpen, daut wie siene Iedeeen, waut hee ons derch sien Wuat un siene Organisazion jeft, mea räakjnen aus onse ieejne. Wan du de Bibel läsen deist, dan kjikj doano, aun waut daut to seenen es, daut Jehowa Deemoot jleicht un soo waut haust, aus Stolt sennen, sikj groot doonen un sikj fa hecha talen aus aundre. Un kjikj uk besonda doano, daut du deemootich blifst, wan du een Väarajcht kjrichst, wuaderch du dan aunjeseenen woascht.

WOO KJENN WIE AUN DE WOARHEIT FAUSTHOOLEN?

10. Wäm haft Jehowa jebrukt, om siene Deena to leiden un dee Aunwiesungen to jäwen?

¹⁰ Vetru wieda opp de Aunwiesunk von Jehowa siene Organisazion. En daut ieeschtemmasche Israel brukt Jehowa Moses un lota uk Josua, om siene Deena Aunwiesungen to jäwen (Jos. 1:16-17). Dise Mana wieren dän siene Veträda – Bie de Israeliten rand aules fein, wan see sikj doaräwa em Kloaren wieren. Aus de Christenvesaumlunk hundade Joaren lota oppjestalt wort, jeewen de 12 Apostel Aunwiesungen (Apj. 8:14-15). Lota worden aundre Eltestasch en Jerusalem uk Poat von de Grupp, waut de Leidunk haud. Wäajen de Vesaumlungen sikj no daut rechten, waut dise true Mana äant säden, “worden dee doa wieda em Gloowen jestoakjt un neemen jieda Dach too” (Apj. 16:4-5). En onse Tiet säajent Jehowa ons uk, wan wie de Aunwiesungen nokomen, waut siene Organisazion ons jeft. Oba woo wudd Jehowa daut seenen, wan wie nich wullen met deejanje toopschaufen, waut hee aunjestalt haft? Om dise Froag to beauntwuaten, woa wie nu seenen, waut doa passieed, aus de Israeliten oppem Wajch no daut vesproakne Launt wieren.

11. Waut passieed met deejanje, waut sikj jäajen Moses stalden, dän Jehowa aus äa Leida utjewält haud? (See uk daut Bilt.)

¹¹ Eemol, aus de Israeliten oppem Wajch no daut vesproakne Launt wieren, stalden waut aunjeseene Mana sikj jäajen Moses un wullen dän nich mea aus äaren Leida haben. Dee säden: “De Israeliten … sent aula heilich [nich bloos Moses], un de HAR es mank an” (4. Mo. 16:1-3). Wan Jehowa daut gaunze Volkj uk fa heilich tald, haud hee oba Moses utjewält, om de Leidunk mank siene Deena to äwanämen (4. Mo. 16:28). De Mana, waut sikj jäajen Moses stalden un schlajcht von am räden, räden en Werkjlichkjeit schlajcht äwa Jehowa. Dee kjikjten nich doano, waut Jehowa haben wull, oba waut äant selfst jankad – dee wullen mea Macht un Aunseenen haben. Gott muak dee Mana doot, waut doamet aunjefongen hauden, un Dusende, waut doa met envestonen wieren (4. Mo. 16:30-35; 17:6, 14). Wie sent ons secha, daut et vondoag dän Dach noch soo es: Jehowa wiest deejanje auf, waut de Aunwiesungen von siene Organisazion nich Respakjt wiesen.

12. Wuarom kjenn wie wieda opp Jehowa siene Organisazion vetruen?

¹² Wie kjennen wieda opp Jehowa siene Organisazion vetruen. Wuarom? De Breeda vom Väastaunt sent fuaz reed, waut to endren, wan daut kloa woat, daut de Endrunk needich es. Daut kaun waut von onsen Deenst fa Jehowa sennen ooda eene biblische Lia (Spr. 4:18). Dee doonen daut, wiels dee nuscht soo sea jankat, aus Jehowa to jefaulen. Dee strenjen sikj uk sea aun, daut äare Entscheidungen sikj opp Gott sien Wuat stetten. En Werkjlichkjeit saul jieda Deena von Jehowa dautselwje doonen.

13. Waut sent “de heelsome Wieed”, un waut sell wie doamet doonen?

¹³ “Hool die aun de heelsome Wieed” (2. Tim. 1:13). Met “de heelsome Wieed” sent de christelje Lieren jemeent, waut wie enne Bibel finjen (Joh. 17:17). Aules, waut wie jleewen, stett sikj opp dise Lieren. Jehowa siene Organisazion haft ons jelieet, aun dise Lieren fausttohoolen. Un soo lang, aus wie daut doonen, woa wie em Jeisteljen beschizt sennen.

14. Aun waut wia daut to seenen, daut eenje Christen nich mea aun de “de heelsome Wieed” fausthilden?

¹⁴ Woo kaun daut utkomen, wan wie nich mea aun “de heelsome Wieed” fausthoolen? Doatoo mol een Biespel. Daut sitt soo, daut doa to de Aposteltiet manke Christen vetalt wort, daut Jehowa sien Dach aul jekomen wia. Veleicht wia doa een Breef, waut de Apostel Paulus minkj sull jeschräwen haben, waut soont säd. Eenje Christen von Tessalonich jleewden daut un vetalden daut uk wieda, onen sikj daut to unjastonen, aus daut soo wia. Wan dee daut hauden em Denkj jehoolen, waut Paulus äant säd, aus hee noch doa bie äant wia, wudden se äant nich veleit haben (2. Tes. 2:1-5). Paulus rod de Breeda too, nich aules fuaz to jleewen. Om dee to halpen, daut dee daut nich wada soo jinkj, schreef hee opp Enj von sienen tweeden Breef aun de Tessalonicha dit: “Ekj, Paulus, hab disen Gruss met miene ieejne Haunt jeschräwen. Dit es daut Tieekjen en aul miene Breew, soo schriew ekj” (2. Tes. 3:17).

15. Woo kjenn wie ons fa soone Läajes beschitzen, wua nom hieren no nuscht met orrajcht es? Jeff een Biespel. (See uk de Bilda.)

¹⁵ Waut kjenn wie von daut lieren, waut Paulus de Breeda en Tessalonich säd? Wan wie waut hieren, waut nich met daut tooppaust, waut wie ut de Schreft jelieet haben ooda wan wie eene butajeweenelje Jeschicht hieren, dan mott wie iernstlich doaräwa nodenkjen, aus daut werkjlich soo es. Biejlikj en de Sowjetunion, waut daut ea jeef, jeewen onse Jäajna de Breeda eenen Breef, waut minkj von de Hauptoffiz kjeem. De Breef rod de Breeda too, eene fresche Organisazion opptostalen, waut nuscht met de Hauptoffiz to doonen haud. Daut leet soo, daut dis Breef werkjlich von de Hauptoffiz kjeem, oba de Breeda, waut tru wieren, leeten sikj nich veleiden. Dee kunnen daut seenen, daut daut, waut en dän Breef stunt, nich met daut tooppaust, waut dee ea jelieet hauden. Bie dise Tiet brucken onse Fiend, waut jäajen de Woarheit sent, eenjemol daut Internet ooda Social Media, om ons derchenaunda un uteneen to brinjen. Oba wie sellen ons “nich soo leicht [loten] en ons denkjen derchenaunda brinjen”. Woo kjenn wie ons fa soone Läajes beschitzen? Wan wie doaräwa nodenkjen, aus daut, waut wie hieren ooda läsen, met de Woarheiten toopstemt, waut wie aul ea jelieet haben (2. Tes. 2:2, NW; 1. Joh. 4:1).

16. Waut sell wie no Reema 16:17-18 no doonen, wan doa wäa soont vebreet, waut jäajen de Woarheit es?

¹⁶ Bliew met soone veeent, waut Jehowa tru sent. Jehowa well, daut wie am met onse Breeda un Sestren toop veeent deenen. Un soo lang aus wie aun de Woarheit fausthoolen, woa wie daut uk kjennen. Wäa doa soont vebreet, waut jäajen de Woarheit es, recht Spoolungen aun enne Vesaumlunk. Doawäajen sajcht Gott: “Von soone Menschen hoolt junt wajch”. Aus wan nich, kunn wie selfst von de Woarheit wajchkomen (läs Reema 16:17-18).

17. Woo kjemt ons daut togood to weeten, woont de Woarheit es un aun dee fausttohoolen?

¹⁷ Wan wie weeten, woont de Woarheit es un aun dee fausthoolen, dan bliew wie dicht bie Jehowa un haben eenen stoakjen Gloowen (Efs. 4:15-16). Wie sent uk von dän Soton siene faulsche Lieren un Läajes beschizt un Jehowa woat ons en de groote Liedenstiet secha hoolen. Hoolt wieda aun de Woarheit faust, “dan woat de Frädens Gott met junt sennen” (Filip. 4:8-9).