Nemm daut aun, daut Jehowa die leeft

1. Wuarom jeefst du die Jehowa han? (See uk daut Bilt.)

DENKJT die daut noch, aus du die Jehowa hanjeefst? Du wortst die to dit eenich, wiels du am hautst kjanen jelieet un am leewsd. Du vespruakst am, daut sien Wellen daut gaunz wichtichste en dien Läwen sennen wudd un daut du am wieda leewen wurscht met dien gaunzet Hoat, Seel, Vestaunt un Krauft (Mar. 12:30). Von dan aun es diene Leew fa am emma jrata jeworden. Waut wurscht du dan sajen, wan die wäa fruach: “Best du die secha, daut du Jehowa leefst?” Onen to twiewlen, wurscht du sajen: “Ekj leew am väl dolla aus irjentwaut ooda irjentwäm!”

2-3. Äwa waut saust du die gaunz secha sennen; un waut woa wie en disen Artikjel seenen? (Jeremia 31:3).

² Oba waut wurscht du sajen, wan die wäa fruach: “Best du die secha, daut Jehowa die leeft?” Veleicht woag wie ons nich, eene Auntwuat to jäwen, wiels wie denkjen, daut wie daut nich wieet sent, daut Jehowa ons leeft. Eene Sesta, waut eene schwoare Kjintheit haud, säd: “Ekj weet, daut ekj Jehowa leew, un ekj twiewel doa uk nich aun. Oba ekj twiewel foaken doaraun, aus Jehowa mie leeft.” Waut kaun die halpen to weeten, woo Jehowa werkjlich äwa die denkjt?

³ Jehowa well, daut du die gaunz secha best, daut hee die leeft (läs Jeremia 31:3). Hee haft je die no sikj jetrocken. Un aus du die am hanjeefst un die deepen leetst, jeef hee die een wieetvollet Jeschenkj – siene truhoatje Leew. Dit meent, daut hee die sea leeft un die kjeenmol veloten woat. Dise Leew brinjt am bat doa, siene true Deena aus een “besondret Volkj” to talen – un doa best du uk met en (1. Pet. 2:9). Jehowa well, daut du die soo secha best aus de Apostel Paulus, daut hee die leeft. Paulus säd: “Ekj sie mie gaunz secha, daut nich de Doot uk nich daut Läwen uk nich Enjel uk nich Rejierungen uk nich de Dinja, waut nu hia sent, uk nich dee, waut komen woaren, uk nich Machten uk nich Huaget uk nich Deepet un uk kjeene aundre Schepfunk ons kaun von Gott siene Leew aufbrinjen” (Reem. 8:​38-39). En disen Artikjel woa wie seenen, wuarom wie ons Vetruen stoakjen motten, daut Jehowa ons leeft, un waut ons doabie halpen kaun.

WUAROM SELL WIE DAUT AUNNÄMEN, DAUT JEHOWA ONS LEEFT?

4. Woo kjenn wie jäajen dän Soton siene hinjalestje Faulen fauststonen?

⁴ Daut wie jäajen dän Soton siene “hinjalestje Faulen” fauststonen kjennen (Efs. 6:11). De Soton woat aules doonen, waut hee kaun, om ons bat doa to brinjen, daut wie opphieren, Jehowa to deenen. Dee prooft biejlikj sea, ons daut entobillen, daut Jehowa ons nich leeft; oba dauts plaut jeloagen. De Bibel vejlikjt dän Soton met eenen Leiw (1. Pet. 5:​8-9). De Leiws jriepen soone Tieren aun, waut schwak sent un sikj nich veteidjen kjennen. Krakjt soo well de Soton ons uk aunjriepen, wan wie schwak, meed ooda truarich sent wäajen daut Schwoare, waut wie mol beläft haben, ooda wäajen de Trubbels, waut wie nu haben, ooda wäajen de Angst, waut veleicht noch komen woat (Spr. 24:​10, NW). De Soton prooft, ons soo schwak to moaken, daut wie opphieren sellen met Jehowa deenen. Oba wan wie aules doonen, waut wie kjennen, om ons daut secha to moaken, daut Jehowa ons leeft, woa wie jäajen dän Soton siene Faulen fauststonen kjennen (Jak. 4:7).

5. Wuarom es daut needich, daut wie ons von Jehowa jeschazt un jeleeft feelen?

⁵ Daut wie Jehowa noda komen kjennen. Jehowa haft je ons soo jemoakt, daut wie aundre leewen motten un daut ons daut fält, von aundre jeleeft to woaren. Wie tolen Leew met Leew trigj. Aulsoo je dolla wie ons von Jehowa jeschazt un jeleeft feelen, je dolla woa wie am leewen (1. Joh. 4:19). Wan onse Leew fa am noch jrata woat, woat siene Leew fa ons uk jrata. De Bibel sajcht gaunz kloa: “Komt Gott noda un hee woat junt uk noda komen” (Jak. 4:8). Soo, woo kjenn wie ons Vetruen dan noch stoakja moaken, daut Jehowa ons leeft?

WAUT KAUN DIE HALPEN, JEHOWA SIENE LEEW AUNTONÄMEN?

6. Waut kaun die halpen, die secha to sennen, daut Jehowa die leeft?

⁶ Bäd emma wada om Help, daut du daut enseenen kaust, wuarom Jehowa die leeft (Luk. 18:1; Reem. 12:12). Froag Jehowa om Help – doaromshaulwen mieremol em Dach –, daut du die selfst soo sitst, aus hee die sitt. Eenjemol es eena veleicht soo mootloos äwa sikj selfst, daut eena daut meist nich jleewen kaun, daut Jehowa eenem leeft. Oba hool em Denkj, daut Jehowa jrata es aus dien Hoat (1. Joh. 3:​19-20). Hee kjant die bäta aus du selfst, un hee sitt daut, waut du selfst nich seenen kaust (1. Sam. 16:7; 2. Chr. 6:30). Hool die doa nich von trigj, am krakjt to sajen, woo du die feelst, un froag am emma wada om Help toom siene Leew aunnämen (Psa. 62:9). Un dan doo dien Poat, doaderch daut du biejlikj soone Sachen deist, wua wie nu von räden woaren.

7-8. Woo vesechren de Psalmen ons daut, daut Jehowa ons leeft?

⁷ Jleew daut, waut Jehowa die sajcht. Jehowa leid de Bibelschriewa derch sienen Jeist. Doawäajen kjenn wie ons gaunz opp daut veloten, waut dee äwa am schreewen. Biejlikj schreef de Psalmenschriewa David mol: “De HAR es aul dee no aun, dee een jebroaknet Hoat haben, un halpt dee, dee een bedrekjten Jeist haben” (Psa. 34:19). Wan du rauf best, dan feelt sikj die daut veleicht soo, daut du auleen best. Oba Jehowa vesprakjt, daut hee en soone Tieden fa die doa es, wiels hee daut seenen kaun, daut die daut needich aun siene Help fält. Opp eene aundre Sauz schreef David: “Saumel miene Tronen en dien Kruckje” (Psa. 56:9). Jehowa sitt daut, wan du Schwoaret beläfst. Hee es sea om die bekjemmat un weet krakjt, woo du die feelst. Krakjt soo wieetvoll aus jieda Lakj Wota en eenen Mensch sien Kruckje es, waut derch eene Wiltnis jeit, krakjt soo väl wieet es fa Jehowa jieda Tron, waut du vejeeten motst. Un hee helt daut jiedatsmol em Denkj, wan du roaren motst. En Psalm 139:3 kjenn wie noch läsen: “[Du Jehowa] best met aul miene Wäaj bekaunt.” Jehowa sitt aules, waut du deist, oba hee acht bloos opp daut Goode (Heb. 6:10). Wuarom? Wiels hee jieda Bietskje väl räakjent, waut du deist, om am to jefaulen.a

⁸ Derch soone Varzhen ut de Bibel sajcht Jehowa soo to sajen to jiedrem eenen: “Ekj well, daut du weetst, woo sea ekj die leew un om die todoonen sie.” Oba soo aus wie aul säden, well de Soton ons enbillen, daut Jehowa ons nich leeft. Soo, wan du doa noch mol aun twiewelst, aus Jehowa die leeft, dan denkj doaräwa no: “Wäm woa ekj jleewen? ‘Dän Voda von de Läajes’ ooda dän ‘Gott von de Woarheit’?” (Joh. 8:44; Psa. 31:​5, NW).

9. Waut vesprakjt Jehowa deejanje, waut am leewen? (2. Mose 20:​5-6).

⁹ Denkj doaräwa no, waut Jehowa deit, wan am wäa leeft. See wie mol, waut Jehowa to Moses un de Israeliten säd (läs 2. Mose 20:​5-6). Jehowa vesprakjt, daut hee deejanje emma woat truhoatje Leew wiesen, waut am leewen. Dise Wieed jäwen ons de Sechaheit, daut ons trua Gott kjeenmol wudd von siene Deena Leew kjrieen, onen daut hee dee wada wudd Leew trigjtolen (Neh. 1:5). Soo, wan du doa noch mol aun twiewelst, aus Jehowa die leeft, dan denkj doaräwa no: “Leew ekj Jehowa?” Un dan denkj aun dit: Wan du am leefst un dien Bastet proofst, om am to jefaulen, dan kaust du de Sechaheit haben, daut hee die uk leeft (Dan. 9:4; 1. Kor. 8:3). Aundasch jesajcht, wan du die gaunz secha best, daut du Jehowa leefst, wuarom wurscht du doa dan aun twiewlen, daut hee die leeft? Hee woat die emma leewen un die kjeenmol veloten.

10-11. Waut well Jehowa haben, daut wie äwa daut Leesjelt em Denkj hoolen sellen? (Galata 2:20).

¹⁰ Denkj äwa daut Leesjelt no. Jesus Christus sien Leesjelt es daut jratste Jeschenkj, waut Jehowa de Menschen jejäft haft (Joh. 3:16). Oba es daut een Jeschenkj fa die perseenlich? Jo! See wie mol dän Apostel Paulus sien Biespel. Soo aus wie weeten, bejinkj hee eenje groote Sinden, ea hee een Christ wort. Un soogoa nodäm, aus hee een Christ wia, must hee wieda jäajen siene Schwakheiten kjamfen (Reem. 7:​24-25; 1. Tim. 1:​12-14). Oba hee neem daut Leesjelt aun aus een perseeneljet Jeschenkj von Jehowa (läs Galata 2:20). Denkj uk doaraun, daut Jehowa Paulus bat doa brocht, dise Wieed enne Bibel nenntoschriewen. Soo hee well, daut wie doa waut von lieren (Reem. 15:4). Paulus siene Wieed moaken dietlich, waut Jehowa sikj von die wenscht – hee well, daut du daut Leesjelt aus een perseeneljet Jeschenkj aunnemst. Wan du daut deist, dan woat dien Vetruen jrata woaren, daut Jehowa die perseenlich leeft.

¹¹ Wie sent Jehowa dankboa doafäa, daut hee Jesus no de Ieed schekjt, fa ons to stoawen. Oba Jesus kjeem uk no de Ieed, om aundre de Woarheit äwa Gott to lieren (Joh. 18:37). Bie dise Woarheit es uk daut met en, woo sea Jehowa siene Deena leeft.

WOO HALPT JESUS ONS, JEHOWA SIENE LEEW AUNTONÄMEN?

12. Wuarom kjenn wie ons secha sennen, daut et soo es, waut Jesus äwa Jehowa säd?

¹² Aus Jesus oppe Ieed wia, lieed hee aundre wellich, woo Jehowa es (Luk. 10:22). Wie haben jenuach Uasoak, doaropp to vetruen, daut et soo es, waut Jesus äwa Jehowa säd. Wuarom? Wiels Jesus wia je aul Millionende Joaren em Himmel met Jehowa toop jewast, ea hee no de Ieed kjeem (Kol. 1:15). Jesus wist, woo väl sien Voda am räakjend, un hee haud uk jeseenen, woo sea sien Voda siene true Deena leewd. Woo halpt Jesus ons, daut auntonämen, daut Jehowa ons leeft?

13. Woo well Jesus, daut wie äwa sienen Voda denkjen?

¹³ Jesus well, daut wie Jehowa soo seenen, aus hee am sitt. En de Evangelien räd Jesus äwa 160 Mol von Jehowa aus een “Voda”. Un wan hee met siene Nofolja vetald, säd hee foaken: “junen Voda” ooda “jun himlischa Voda” (Mat. 5:16; 6:26). De Erkjläarunk toom studieren von Matäus 5:16 sajcht: “Gott siene Deena ieeschtemma brukten foaken soone Tietels aus ‘Aulmajchtja’, ‘Aulahechsta’ ooda ‘Groota Schepfa’, wan see von Jehowa räden. Oba Jesus nand Jehowa foaken ‘Voda’ un daut wiest, daut Jehowa well, daut siene Deena sikj am noaun feelen sellen.” Jesus well, daut wie Jehowa soo seenen, aus hee am sitt – aus een leeftolja Voda, waut siene Kjinja väl räakjent. Well wie mol twee Biespels seenen, wua Jesus Jehowa “Voda” nand.

14. Woo wees Jesus, daut jieda eena wieetvoll es fa onsen himlischen Voda? (Matäus 10:​29-31). (See uk daut Bilt.)

¹⁴ Well wie mol seenen, waut Jesus en Matäus 10:​29-31 säd (läs). De Spoalinja sent kjliene Väajel, waut Jehowa kjeenmol leewen un uk nich deenen woaren. Oba ons Voda räakjent jieda Spoalinkj soo väl, daut hee daut mau rajcht enwoat, wan doa eent no de Ieed felt. Woo väl mea mott hee dan nich om jiedrem eenen bekjemmat sennen, dee am leeft un am tru deent! Waut lia wie von de Wieed: “Mau rajcht june Hoa oppem Kopp sent aula jetalt”? De Erkjläarunk toom studieren fa dän Varsch 30 sajcht: “Wiels Jehowa jieda Eenselheit von ons kjant, kjenn wie ons gaunz secha sennen, daut hee om jiedrem eenen todoonen es, waut Jesus nofolcht.” Jesus well, daut wie daut aunnämen, daut jieda eena sea wieetvoll es fa onsen himlischen Voda.

15. Waut lieescht du von Jesus siene Wieed en Johanes 6:44 äwa dienen himlischen Voda?

¹⁵ Noch een Biespel, wua Jesus Jehowa “Voda” nand, es en Johanes 6:44 (läs). Dien himlischa Voda haft die selfst leeftolich no de Woarheit jetrocken. Wuarom deed hee daut? Wiels hee sach en dien Hoat, daut du rajcht enjestalt wieescht (Apj. 13:48). De Erkjläarunk toom studieren fa Johanes 6:44 wiest, daut Jesus veleicht dee Wieed brukt, waut Jeremia en dän Teemavarsch fa disen Artikjel säd: “Doawäajen kroag ekj die met truhoatje Leew” (Jer. 31:3; vejlikj uk Hosea 11:4). Waut bediet daut? Ons leeftolja himlischa Voda kjikjt emma no diene goode Sieden, waut du veleicht selfst nich mol sitst.

16. (a) Waut sajcht Jesus soo to sajen to ons; un wuarom sell wie opp am vetruen? (b) Woo kaust du dien Vetruen stoakjen, daut Jehowa de basta Voda es? (See daut Hock “De Voda, dän wie ons aula wenschen”.)

¹⁶ Doaderch daut Jesus Jehowa ons “Voda” nant, sajcht hee soo to sajen: “Jehowa es nich bloos mien Voda, oba hee es uk dien Voda. Un ekj vesecha die, daut hee die leeft un sea om die perseenlich bekjemmat es.” Soo, wan du die eenjemol onsecha feelst, aus Jehowa die werkjlich leeft, dan denkj äwa dit no: “Wuarom wudd ekj nich opp Jesus siene Wieed vetruen, waut onsen Voda daut baste kjant un emma de Woarheit sajcht?” (1. Pet. 2:22).

DOO WIEDA DIEN VETRUEN STOAKJEN

17. Wuarom mott wie wieda ons Vetruen stoakjen, daut Jehowa ons leeft?

¹⁷ Wie motten wieda ons Vetruen stoakjen, daut Jehowa ons leeft. Well wie nich vejäten, daut de Soton aules deit, waut dee kaun, daut wie opphieren sellen met Jehowa deenen. Om ons schwak to moaken, woat de Soton wieda proowen, ons bat doa to brinjen, doaraun to twiewlen, aus Gott ons werkjlich leeft. Oba wie motten dän Soton nich jewennen loten! (Hiob 27:​5, NW).

18. Woo kaust du die gaunz secha sennen, daut Jehowa die leeft?

¹⁸ Daut du die kaust gaunz secha sennen, daut Jehowa die leeft, doo wieda om siene Help bäden, daut du die selfst soo seenen kaust, aus hee die sitt. Denkj äwa soone Bibelvarzhen no, waut doa wiesen, daut Jehowa sikj leeftolich om siene Deena kjemmat. Un denkj uk doaräwa no, waut hee deit, wan am wäa leeft – Hee woat kjeenmol Leew kjrieen, onen daut hee daut met Leew trigjtolen woat. Vejät uk kjeenmol, daut daut Leesjelt een perseeneljet Jeschenkj es fa die. Un vetru doaropp, daut Jehowa dien himlischa Voda es, krakjt soo aus Jesus daut säd. Wan die dan mol wäa froagen wudd: “Best du die secha, daut Jehowa die leeft?”, woascht du voll Vetruen sajen kjennen: “Jo, hee deit! Un ekj doo jieda Dach mien Bastet, om am miene Leew to wiesen!”