Woat Jehowa miene Jebäda beauntwuaten?

1-2. Wuarom kunn wie denkjen, daut Jehowa onse Jebäda nich beauntwuaten deit?

“HAB diene Freid aum HARN; dee woat die jäwen, waut dien Hoat sikj wenscht” (Psa. 37:4). Es daut nich een wundascheenet Vespräakjen? Oba woat Jehowa ons emma fuaz aules jäwen, no waut wie froagen? Dauts eene wichtje Froag, wua wie äwa nodenkjen sellen. See wie mol een poa Biespels: Eene onbefriede Sesta bät, daut see well no de School fa Kjennichrikjsvekjindja enjelot woaren; oba doa vegonen väle Joaren un see woat nich enjelot. Een junga Brooda frajcht Jehowa, daut hee am saul von siene Krankheit jesunt moaken, daut hee wada kaun mea fa de Vesaumlunk doonen; oba hee woat nich jesunt. Elren bäden, daut äare Kjinja sellen enne Woarheit bliewen; oba dee äa Kjint hieet opp met Jehowa deenen.

² Veleicht hast du Jehowa uk om waut jebät, oba du hast daut nich jekjräajen. Veleicht denkjst du, daut Jehowa aundre äare Jebäda beauntwuat, oba diene nich. Ooda du hast daut Jefeel, daut du waut orrajcht jedonen hast. Eene Sesta, waut Janiceb heet, feeld sikj soo. Ar un äaren Maun jankad daut sea, em Betel to schaufen, un doawäajen bäden see Jehowa doarom. See sajcht: “Ekj wia mie secha, daut wie meist fuaz wudden em Betel sennen.” Oba doa vejinjen väle Joaren un dise Lied worden nich enjelot. Janice sajcht: “Ekj feeld mie truarich un derchenaunda. Ekj wundad, waut ekj orrajcht jedonen haud, daut Jehowa nich tofräd wia met mie. Ekj haud Jehowa sea doarom jebät, daut wie nom Betel wullen. Wuarom haft hee nich no mien Jebäd jehorcht?”

3. Waut woa wie en disen Artikjel seenen?

³ Eenjemol wunda wie veleicht, aus Jehowa no onse Jebäda horcht. Mau rajcht eenje true Mana von ieeschtemma jinkj daut soo (Hiob 30:20; Psa. 22:3; Hab. 1:2). Wuarom kaust du die oba secha sennen, daut Jehowa no diene Jebäda horcht? (Psa. 65:3). Om dise Auntwuat to kjrieen, well wie ons ieescht mol dreeatlei unjastonen: (1) Waut woat Jehowa doonen, wan wie bäden? (2) Waut well hee, waut wie doonen sellen? (3) Wuarom wudd wie onse Jebäda veleicht sellen een bät endren?

WAUT WOAT JEHOWA DOONEN, WAN WIE BÄDEN?

4. Waut vesprakjt Jehowa ons no Jeremia 29:12 no?

⁴ Jehowa vesprakjt, hee woat no onse Jebäda horchen (läs Jeremia 29:12). Gott leeft siene true Deena un hee woat emma no dee äare Jebäda horchen (Psa. 10:17; 37:28). Oba daut bediet nich, daut hee ons aules jäwen woat, no waut wie froagen. Fa eenjet, no waut wie froagen, mott wie veleicht wachten bat enne niee Welt.

5. Aun waut denkjt Jehowa, wan hee no onse Jebäda horcht? Laj daut ut.

⁵ Jehowa denkjt aun sien Väanämen, wan hee no onse Jebäda horcht (Jes. 55:8-9). Een Poat von sien Väanämen es, daut de gaunze Ieed saul voll sennen met Menschen, waut am wellich aus äaren Harscha aunnämen. Oba de Fient sajcht, daut de Menschen daut wudd väl bäta gonen, wan dee äwa sikj selfst rejieeden (1. Mo. 3:1-5). Toom bewiesen, daut de Fient een Läajna es, haft Jehowa daut toojeloten, daut de Menschen äwa sikj selfst rejieren kjennen. Un de Menschen äare Rejierunk haft een deel Trubbels veuasoakt, waut wie vondoag dän Dach haben (Liera 8:9, NW). Wie weeten, daut Jehowa aul dise Trubbels nu noch nich wajchnämen woat. Wan hee daut wudd doonen, kunnen eenje denkjen, daut de Menschen äare Rejierunk fein schauft un daut dee emstaund sent, de Trubbels von de Menschheit to leesen.

6. Wuarom mott wie ons doaräwa secha sennen, daut aules, waut Jehowa deit, leeftolich un jerajcht es?

⁶ Jehowa kaun äwareene Jebäda opp veschiedne Wäaj beauntwuaten. Biejlikj aus de Kjennich Hiskia sea krank wort, prachad hee Jehowa doano, am jesunt to moaken. Un Jehowa deed daut (2. Kjen. 20:1-6). Oba aus de Apostel Paulus Jehowa doano fruach, am dän “Stachel en daut Fleesch” wajchtonämen, waut veleicht eene Krankheit wia, deed Jehowa daut nich (2. Kor. 12:7-9). Denkj wie uk mol äwa daut Biespel von de Apostel Jakobus un Petrus no. De Kjennich Herodes wull dee beid loten dootmoaken. De Breeda von de Vesaumlunk bäden sea fa Petrus un secha uk fa Jakobus. Oba Jakobus wort dootjemoakt un Petrus wort derch een Wunda jerat (Apj. 12:1-11). Veleicht wunda wie nu: “Wuarom deed Jehowa Petrus raden, oba Jakobus nich?” De Schreft sajcht daut nich.c Oba wie kjennen ons secha sennen, daut aules, waut Jehowa deit, “kjeenmol ojjerajcht es” (5. Mo. 32:4, NW). Un wie weeten, daut hee Petrus un Jakobus beid leewd (Opb. 21:14). Veleicht kaun daut sennen, daut Jehowa onse Jebäda bieaun nich soo beauntwuat, aus wie ons daut wudden wenschen. Oba wiels wie doaropp vetruen, daut Jehowa emma leeftolich un jerajcht haundelt, woa wie nich doaräwa grunzen, woo hee onse Jebäda beauntwuaten well (Hiob 33:13).

7. Waut well wie nich doonen, un wuarom?

⁷ Wie wellen onse Loag nich met aundre äare vejlikjen. Daut kaun sennen, daut wie Jehowa veleicht no eene jewesse Help froagen, oba wie kjrieen dee nich. Un lota woa wie veleicht en, daut aundre uk no sea soo waut jefroacht haben, un daut späat sikj soo, daut Jehowa äant daut jejäft haft. Eene Sesta, waut Anna heet, haft mol soont beläft. See bäd sea doarom, daut äa Maun, Matthew, waut Kjräft haud, wada kunn jesunt woaren. To deeselwje Tiet wieren doa uk twee elre Sestren, waut Kjräft hauden. Anna bäd sea fa äaren Maun un uk fa dee. De Sestren worden wada jesunt, oba Matthew storf. Ieeschtlich wundad Anna, aus dise Sestren doawäajen jesunt worden, wiels Jehowa äant jeholpen haud. Un wan daut soo wia, wuarom haud hee dan nich no äa Jebäd jehorcht un äaren Maun jeholpen? Wie weeten daut nich krakjt, wuarom dise Sestren wada jesunt worden. Oba waut wie neiw weeten es, daut Jehowa met aul ons Lieden woat een Enj moaken un daut hee een Velangen haft siene Frind, waut jestorwen sent, wada toom Läwen to brinjen (Hiob 14:15).

8. (a) Woo steit Jehowa ons bie no Jesaja 43:2 no? (b) Woo halpt daut Jebäd ons, wan wie derch schwoaret gonen? (See daut Video Bäden halpt ons en schwoare Tieden.)

⁸ Jehowa woat ons emma biestonen. Hee es ons leeftolja Voda un hee jleicht daut nuscht, wan wie lieden motten (Jes. 63:9). Oba hee woat nich aule Trubbels von ons aufhoolen, waut soo sennen kjennen aus Riefasch ooda Fia (läs Jesaja 43:2). Oba hee vesprakjt ons, hee woat ons doa derchhalpen. Un hee woat nich tooloten, daut de Schwierichkjeiten ons bat doa brinjen, daut wie am nich mea deenen kjennen. Jehowa woat ons uk derch sienen heiljen Jeist de Krauft jäwen, daut wie uthoolen kjennen (Luk. 11:13, NW; Filip. 4:13, NW). Wie kjennen doaropp vetruen, daut hee ons emma krakjt daut jäwen woat, waut ons fält, om uttohoolen un am tru to bliewen.d

WAUT WELL JEHOWA, WAUT WIE DOONEN SELLEN?

9. Wuarom mott wie doaropp vetruen, daut Jehowa ons halpen woat, soo aus Jakobus 1:6-7 wiest?

⁹ Jehowa well, daut wie opp am vetruen (Heb. 11:6). Veleicht späat sikj ons daut eenjemol soo, daut onse Trubbels soo sent aus eene Waunt, wua wie nich äwa kjennen. Un wie kunnen mau rajcht doaraun twiewlen, aus Jehowa ons halpen well. Oba de Bibel moakt dietlich, daut Jehowa ons Krauft jeft, “äwa de Waunt [to] sprinjen” (Psa. 18:30). Soo, well wie nich twiewlen. Well wie leewa met Gloowen bäden un doaropp vetruen, daut Jehowa onse Jebäda beauntwuaten woat (läs Jakobus 1:6-7).

10. Jeff een Biespel, woo wie ons Poat doonen kjennen, wan wie om waut bäden.

¹⁰ Jehowa well, daut wie ons Poat doonen, wan wie om waut bäden. Saj wie mol, een Brooda bät to Jehowa, daut hee am halpen saul, een poa Doag von siene Oabeit frietohaben, daut hee nom dreedoagschen Kongress kaun. Woo kunn Jehowa dit Jebäd beauntwuaten? Veleicht jeft hee dän Brooda dän Moot, waut am fält, toom met sienen Wieet räden. Oba de Brooda mott doawäajen noch selfst no sienen Wieet gonen un dän froagen. Veleicht mott dee ieremol met dän räden. Veleicht mott de Brooda uk aunbeeden, enne Städ de Kongress-Doag, aundre Doag to schaufen. Un daut kaun uk sennen, daut de Brooda dän Wieet sajen mott, daut dee am dise Doag nich brukt betolen.

11. Wuarom sell wie wieda om daut bäden, waut ons wichtich es?

¹¹ Jehowa well, daut wie wieda om daut bäden, waut fa ons wichtich es (1. Tess. 5:17). Aun Jesus siene Wieed kjenn wie hieren, daut wie nich emma fuaz aules kjrieen woaren, om waut wie bäden (Luk. 11:9, NW). Jeff aulsoo nich opp! Doo wieda iernstlich bäden (Luk. 18:1-7, NW). Wan wie wieda om eene Sach bäden, dan wies wie Jehowa, daut daut fa ons werkjlich wichtich es. Un wie wiesen uk, daut wie Gloowen doaraun haben, daut hee ons halpen kaun.

WUAROM WUDD WIE ONSE JEBÄDA VELEICHT SELLEN EEN BÄT ENDREN?

12. (a) Äwa waut sell wie nodenkjen, wan daut om onse Jebäda jeit, un wuarom? (b) Woo kjennen onse Jebäda wiesen, daut wie Jehowa respakjten? (See daut Hock “Wiesen miene Jebäda, daut ekj Jehowa respakjt?”)

¹² Wan wie daut nich kjrieen, om waut wie jebät haben, dan kjenn wie äwa dreeatlei nodenkjen. Ieeschtens: “Doo ekj om daut rajchte bäden?” Jeweenlich denkj wie, wie weeten, waut daut baste fa ons es. Oba veleicht froag wie no waut, waut ons enne Lenjd schoden kaun. Ooda biejlikj, wan wie eenen Trubbel haben, dan bäd wie doaräwa. Oba daut kaun sennen, daut et eene bätre Leesunk jeft, aus dee, wua wie no froagen. Un daut kaun uk sennen, daut wie om Sachen bäden, waut nich met Jehowa sienen Wellen tooppaussen (1. Joh. 5:14). See wie daut Biespel von de Elren, wua wie aum Aunfank von räden. Dee bäden to Jehowa, daut hee doano seenen sull, daut äa Kjint enne Woarheit bleef. Daut hieet sikj no waut, wua eena om bäden kaun. Oba Jehowa woat kjeenem bemotten, am to deenen. Hee well, daut jieda eena, mau rajcht de Kjinja, sikj daut selfst wälen (5. Mo. 10:12-13; 30:19-20). Doawäajen sullen de Elren leewa doano froagen, daut Jehowa äant halpt, äa Kjint to Hoaten to räden, soo daut dee Jehowa leeft un sien Frint sennen well (Spr. 22:6; Efs. 6:4).

13. Wanea woat Jehowa ons halpen no Hebräa 4:16 no? Laj daut ut.

¹³ Tweedens: “Es daut fa Jehowa de rajchte Tiet, mie daut to jäwen, wua ekj no froag?” Ons feelt sikj daut veleicht soo, daut Jehowa ons Jebäd fuaz beauntwuaten saul. Oba Jehowa weet emma, wanea de baste Tiet es toom ons halpen (läs Hebräa 4:16). Wan wie daut nich fuaz kjrieen, om waut wie bäden, dan denkj wie veleicht, daut Jehowa ons daut nich jäwen woat. Oba daut kaun sennen, daut hee ons daut bloos lota jäwen well. Denkj wie biejlikj mol aun dän jungen Brooda, waut doarom jebät haud, jesunt to woaren. Wan Jehowa dän derch een Wunda jeheelt haud, dan wudd de Soton sajen, daut dis Brooda Jehowa wieda deent, wiels hee dän jeheelt haud (Hiob 1:9-11; 2:4). Un dan noch, Jehowa haft aul eene Tiet bestemt, wanea hee aule Krankheiten heelen woat (Jes. 33:24; Opb. 21:3-4). Un ea daut bat doa es, kjenn wie nich doamet räakjnen, daut Jehowa ons derch een Wunda jesunt moaken woat. Soo, dis Brooda kaun leewa Jehowa doarom bäden, daut hee am Krauft un ennaliche Fräd jeft toom siene Krankheit uthoolen un Gott wieda tru deenen (Psa. 29:11).

14. Waut lia wie von daut, waut Janice beläwd?

¹⁴ Well wie noch een mol von Janice räden, waut doarom bäden deed, daut äant jankad em Betel deenen. Fief Joa lota kunn see vestonen, woo Jehowa äa Jebäd beauntwuat haud. See sajcht: “Jehowa brukt dise Tiet toom mie lieren un halpen, een bätra Christ to woaren. Mien Vetruen opp am must uk stoakja woaren. Ekj must uk en mien perseeneljet Studium bäta woaren. Un ekj must lieren, woo ekj kunn tofräd sennen, krakjt endoont wua ekj Jehowa deend.” Lota worden Janice un äa Maun enjelot, em Kjreisdeenst to sennen. Janice sajcht: “Jehowa haft miene Jebäda beauntwuat, wan uk nich opp dee Wajch, waut ekj jedocht haud. Daut dieed een Stootje, bat ekj daut vestonen kunn, daut siene Auntwuat een scheenet Jeschenkj wia. Ekj sie soo dankboa, daut ekj Jehowa siene Leew späaren kunn un seenen kunn, woo goot hee to ons es.”

15. Wuarom mott wie nich emma bloos om eenselne Sachen bäden? (See uk de Bilda.)

¹⁵ Dreddens: “Sull ekj om waut aundret bäden?” Dauts goot, wan wie em Jebäd krakjt no eenselne Sachen froagen. Oba bieaun kaun daut uk mol goot sennen, nich soo sea om Eenselheiten to bäden. Opp dee Wajch kjenn wie seenen, waut Jehowa fa ons well. See wie biejlikj mol daut Biespel von de Sesta, waut doarom bäd, daut see wull no de School fa Kjennichrikjsvekjindja enjelot woaren. See wull no dee School, om lota doa to deenen, wua daut aun mea Help fäld. Dauts nich orrajcht, daut see wieda om daut bät. Oba em tweschen kaun see Jehowa veleicht uk doano froagen, daut hee ar halpt to seenen, woo see sest noch mea em Deenst doonen kaun (Apj. 16:9-10). Un dan kaun see uk äa Poat doonen un dän Kjreisoppsechta froagen, aus daut en eene Vesaumlunk en dee Jäajent aun Pionieren fält. Ooda see kaun uk no daut Betel schriewen un froagen, wua daut aun mea Vekjindja fält.e

16. Äwa waut kjenn wie ons secha sennen?

¹⁶ Soo aus wie jelieet haben, kjenn wie ons gaunz doaropp veloten, daut Jehowa onse Jebäda opp eene leeftolje un jerajchte Wajch beauntwuaten woat (Psa. 4:4; Jes. 30:18). Bieaun woa wie veleicht nich dee Auntwuat kjrieen, waut wie ons jedocht haben, oba Jehowa woat emma no onse Jebäda horchen. Hee leeft ons sea un hee woat ons kjeenmol auleen loten (Psa. 9:11). Doawäajen well wie onse “Hopninj emma opp am” saten un wieda ons Hoat em Jebäd ver am utschedden (Psa. 62:9).