Woo kjenn wie onse Leew unjarenaunda stoakj hoolen?

1-2. (a) Wuarom kunn de Apostel Paulus sajen, daut de Leew de “jratste” Ieejenschoft es? (b) Waut vonne Froagen woa wie nu derchgonen?

AUS de Apostel Paulus von dän Gloowen, de Hopninj un de Leew räd, säd hee: “Daut jratste von dise es de Leew” (1. Kor. 13:13). Wuarom säd Paulus dit? Wäajen en de Tookunft woa wie nich mea motten Gloowen haben aun Gott sien Vespräakjen von de niee Welt, uk nich de Hopninj, daut dit Vespräakjen sikj eenen Dach erfellen woat, wiels dan woat sikj daut aul erfelt haben. Oba de Menschen un Jehowa woa wie doawäajen noch emma leewen motten. Onse Leew fa dee woat enne Werkjlichkjeit emma jrata woaren.

² Wäajen wie fa emma woaren Leew brucken, well wie ons mol dree Froagen unjastonen. Ieeschtens: Wuarom sell wie ons unjarenaunda leewen? Tweedens: Woo kjenn wie ons unjarenaunda Leew wiesen? Dreddens: Woo kjenn wie onse Leew unjarenaunda stoakj hoolen?

WUAROM SELL WIE ONS UNJARENAUNDA LEEWEN?

3. Wuarom sell wie ons unjarenaunda leewen?

³ Wuarom sell wie ons unjarenaunda Leew wiesen? Wäajens doaderch wies wie, daut wie de woare Christen sent. Jesus säd to siene Apostel: “Wan jie Leew unjarenaunda haben, dan woaren aule weeten, daut jie miene Jinja sent” (Joh. 13:35, NW). Un wan wie Leew unjarenaunda haben, dan kjenn wie uk veeent bliewen. De Apostel Paulus säd, daut wan wie Leew hauden, dan wudd aules to eene “volkomne Eenichkjeit vebungen” woaren (Kol. 3:14). Oba daut jeft noch eene wichtje Uasoak, wuarom wie sellen unjarenaunda Leew haben. De Apostel Johanes säd to siene Breeda un Sestren: “Wäa Gott goot es, woat uk sienen Brooda goot sennen” (1. Joh. 4:21). Wan wie ons unjarenaunda Leew wiesen, dan wies wie, daut wie Gott leewen.

4-5. Woo henjt onse Leew fa Gott met onse Leew fa de Breeda toop? Woo kaust du daut vejlikjen?

⁴ Woo henjt onse Leew fa Gott met de Leew fa de Breeda un Sestren toop? Well wie daut mol vejlikjen: Daut Hoat schauft met aundre Poats vom Kjarpa toop. Wan een Dokta ons dän Puls aune Haunt unjasieekjen deit (daut meent, woo ons Hoat jeit), dan kaun dee uk weeten, aus ons Hoat fein schauft ooda nich. Waut lieet ons dit Jlikjnis äwa Leew?

⁵ Krakjt soo aus een Dokta waut äwa daut Hoat weeten kaun, wan dee ons dän Puls unjasieekjt, krakjt soo kjenn wie weeten, aus onse Leew fa Gott stoakj es, wan wie onse Leew fa de Breeda un Sestren unjasieekjen. Wan wie enwoaren, daut onse Leew fa de Breeda un Sestren nich mea soo stoakj es aus ea, dan wiest ons daut veleicht, daut onse Leew fa Gott schwaka woat. Oba wan wie de Breeda foaken Leew wiesen, dan weet wie, daut onse Leew fa Gott uk stoakj es.

6. Wuarom sull ons daut Sorjen moaken, wan onse Leew fa de Breeda un Sestren schwaka woat? (1. Johanes 4:7-9, 11).

⁶ Wuarom sell wie ons sorjen, wan wie enwoaren, daut onse Leew fa de Breeda schwaka woat? Wäajen daut wudd bedieden, daut ons Frind sennen met Jehowa en Jefoa es. De Apostel Johanes muak daut sea dietlich, aus hee säd: “Wäa sienen Brooda nich goot es, dän hee sitt, dee kaun Gott nich goot sennen, dän hee nich sitt” (1. Joh. 4:20). Waut kjenn wie doarut lieren? Jehowa woat mau dan met ons tofräd sennen, wan wie “ons unjarenaunda goot” sent (läs 1. Johanes 4:7-9, 11).

WOO KJENN WIE ONS UNJARENAUNDA LEEW WIESEN?

7-8. Woo kjenn wie onse Leew eena fa dän aundren wiesen?

⁷ En Gott sien Wuat finj wie emma wada daut Jeboot, daut wie ons sellen “unjarenaunda leewen” (Joh. 15:12, 17, NW; Reem. 13:8; 1. Tess. 4:9; 1. Pet. 1:22; 1. Joh. 4:11). Oba de Leew es een Jefeel, waut wie deep en ons Hoat haben; dee kaun kjeena seenen. Woo kjennen aundre dan weeten, daut wie äant leewen? Derch daut, waut wie sajen un doonen.

⁸ Wie kjennen onse Breeda un Sestren opp veschiedne Wäaj wiesen, daut wie äant leewen. Hia sent eenje Mäajlichkjeiten: “Jie sellen unja eenaunda de Woarheit sajen” (Sach. 8:16). “Hoolt Fräd unjarenaunda” (Mar. 9:50, NW). “Siet de ieeschte, aundre to ieren” (Reem. 12:10, NW). “Nämt junt unjarenaunda . . . opp” (Reem. 15:7). “Vejäft junt unjarenaunda” (Kol. 3:13). “Halpt eena däm aundren siene Laust droagen” (Gal. 6:2). “Treest junt unjarenaunda” (1. Tess. 4:18). “But junt unjarenaunda opp” (1. Tess. 5:11). “Bät eena fa dän aundren” (Jak. 5:16).

9. Wuarom wiest daut onse Leew, wan wie aundre treesten? (See uk daut Bilt.)

⁹ Well wie nu mol von eene Wajch räden, woo wie aundre Leew wiesen kjennen. Soo aus wie ea aul sagen, säd Paulus: “Treest junt unjarenaunda”. Wuarom es aundre treesten soone goode Wajch, dee Leew to wiesen? No een Buak toom nosieekjen no meent daut Wuat, waut Paulus fa “treesten” brukt, “biesied wäm stonen un dän Moot moaken, wan dee derch schwoaret jeit”. Soo, wan wie eenen Brooda ooda eene Sesta treesten, waut derch schwoaret jeit, dan halp wie dee, Jehowa wieda tru to deenen. Jiedatsmol, wan wie dee opp dise Wajch treesten, wies wie äant onse Leew (2. Kor. 7:6-7, 13).

10. Waut haft Metjefeel met aundre treesten to doonen?

¹⁰ Wäm to treesten, haft sea väl met Metjefeel to doonen. Oba woo krakjt? Wäa Metjefeel haft, well aundre treesten un aules doonen toom dee daut leichta moaken, wan dee lieden. Soo, ieescht haft eena Metjefeel un dan deit eena treesten. Paulus wees, daut daut bie Jehowa uk soo es. Hee säd, Jehowa “es een Voda, dee sikj erboarmt, un een Gott, dee onen Enj treesten deit” (2. Kor. 1:3). Daut Wuat, waut Paulus brukt fa “sikj erboarmt” bediet, daut eena met aundre metfeelt. Soo, wan daut sajcht, daut Jehowa “een Voda [es], dee sikj erboarmt”, meent daut, daut hee grootet Metjefeel haft, un daut brinjt am bat doa, ons “en aul onse Trubbels” to treesten (2. Kor. 1:4). Wan Jehowa wäm treesten deit, waut derch schwoaret jeit, dan kjricht deejanja fresch Krauft; een bät soo, aus wan eenem darscht un eena reinet, freschet Wota drinkjt. Woo kjenn wie Jehowa nodoonen un Metjefeel haben un aundre treesten? Wie motten aun soone Ieejenschoften schaufen, waut ons halpen woaren, daut to doonen. Waut sent daut biejlikj fa Ieejenschoften?

11. Woone Ieejenschoften woaren ons noch halpen, aundre to leewen un to treesten? (Kolossa 3:12; 1. Petrus 3:8).

¹¹ Daut wie de Leew bewoaren kjennen, waut ons halpt, ons unjarenaunda wieda to treesten, mott wie biejlikj doaraun schaufen, Metleet to haben, ons unjarenaunda goot to sennen un leeftolich to sennen (läs Kolossa 3:12; 1. Petrus 3:8). Woo woaren ons dise Ieejenschoften halpen? Wan wie soo met onse Breeda un Sestren metfeelen un werkjlich om dee bekjemmat sent, dan woa wie nich aundasch kjennen, aus daut wie dee treesten wellen, wan dee derch schwoaret gonen. Dauts krakjt soo, aus Jesus säd: “Von waut daut Hoat voll es, rät daut Mul. De gooda Mensch holt von daut goode, waut hee sikj oppbewoat haft, goode Sachen rut” (Mat. 12:34-35, NW). Onse Breeda un Sestren to treesten es werkjlich eene sea goode Wajch, dee onse Leew to wiesen.

WOO KJENN WIE ONSE LEEW UNJARENAUNDA STOAKJ HOOLEN?

12. (a) Fa waut mott wie oppaussen? (b) Waut vonne Froag woa wie ons nu unjastonen?

¹² Wie aula wellen “ons [wieda] unjarenaunda goot sennen” (1. Joh. 4:7). Oba wie wellen em Denkj hoolen, daut Jesus säd, daut “de Leew von de Mierheit kolt woaren” wudd (Mat. 24:12, NW). Jesus säd nich, daut de mieeschte von siene Nofolja nich mea wudden Leew unjarenaunda haben. Oba wäajen wie en eene Welt läwen, wua de Mieeschte nich Leew unjarenaunda haben, mott wie oppaussen, daut daut nuscht aun ons deit. Well wie doatoo mol äwa dise Froag nodenkjen: Woo kjenn wie weeten, aus onse Leew fa onse Breeda un Sestren stoakj es?

13. Waut kaun onse Leew oppe Proow stalen?

¹³ Doano, waut wie en eene Loag doonen, wiest daut eenjemol, woo stoakj onse Leew es (2. Kor. 8:8, JHF). De Apostel Petrus räd biejlikj von eene Loag, wua sikj daut utwiest. Hee säd: “Äwa aules, habt groote Leew eena fa dän aundren, wiels Leew dakjt een deel Sinden too” (1. Pet. 4:8, NW). De Schwakheiten un Onvolkomenheiten von aundre kjennen onse Leew eenjemol oppe Proow stalen.

14. Waut vonne Sort Leew mott wie haben, no 1. Petrus 4:8 no? Met waut jeit daut to vejlikjen?

¹⁴ Well wie ons Petrus siene Wieed noch een bät neiwa unjastonen. Daut ieeschte Poat von Varsch 8 beschrift de Leew, waut wie brucken, un daut es de “groote Leew”. Petrus sien Wuat fa “groote” meent werkjlich “utjerakjt”. Wie kjennen ons daut mol een bät soo aus dit väastalen: Wie nämen dise Leew en beid Henj, soo aus wan wie wudden een Biet Zeich haben, waut rakjt. Wie rakjen de Leew emma wieda ut, soo daut wie nich mau bloos een poa, oba “een deel Sinden” doamet toodakjen kjennen. Daut tweede Poat von dän Varsch beschrift een bät, waut dise Leew deit. Dee dakjt onse Breeda äare Sinden too. Toodakjen meent vejäwen. Krakjt soo aus eena irjenteene Plak met een Biet Zeich toodakjt, krakjt soo dakj wie de Schwakheiten un Onvolkomenheiten von aundre met Leew too.

15. Waut woa wie doonen, wan onse Leew fa onse Breeda un Sestren stoakj jenuach es? (Kolossa 3:13).

¹⁵ Onse Leew saul soo stoakj sennen, daut wie onse Breeda un Sestren äare Onvolkomenheiten vejäwen kjennen; mau rajcht, wan daut eenjemol uk sea schwoa es (läs Kolossa 3:13). Oba wan wie aundre vejäwen, dan wies wie, daut onse Leew stoakj es un daut wie Jehowa jefaulen wellen. Waut kaun ons noch halpen, aundre äare Fäla to vejäwen un nich soo leicht äwa daut doll to woaren, waut dee doonen?

16-17. Waut kaun ons noch halpen, kjliene Fäla von aundre to vejäwen? Vejlikj daut. (See uk daut Bilt.)

¹⁶ Kjikj no diene Breeda un Sestren äare goode Sieden un nich no de schlajchte. Doatoo mol een Biespel: Stal die väa, du best opp een Fast met Breeda un Sestren toop. Jie haben eene sea scheene Tiet, un ea jie veloten, moakst du schwind een Bilt von junt aula toop. Oba du moakst noch twee mea, wäajen du nich neiw weetst, aus daut ieeschte woat jejlekjt haben. Soo nu hast du dree Bilda. Oba dan woascht du en, daut een Brooda opp een Bilt nich schaftich kjikjt. Waut deist du met daut Bilt? Du deist daut laschen, wiels du noch twee Bilda hast, wua aule schaftich kjikjen.

¹⁷ De Bilda, waut wie oppbewoaren, kjenn wie met daut vejlikjen, waut wie em Denkj hoolen. Jeweenlich hool wie de scheene Tieden em Denkj, waut wie met onse Breeda un Sestren toop hauden. Oba saj wie mol, daut een Brooda ooda eene Sesta opp eene Sauz waut sajcht ooda deit, waut nich leeftolich es. Waut sell wie dan doonen? Wie sellen proowen, daut to vejäten, krakjt soo aus wie eent von de Bilda eefach laschen wudden (Spr. 19:11; Efs. 4:32). Wie kjennen dän kjlienen Fäla von onsen Brooda ooda onse Sesta vejäten, wiels wie jenuach scheene Tieden met dän toop hauden. Dise scheene Tieden well wie em Denkj hoolen.

WUAROM DE LEEW NU BESONDA NEEDICH ES

18. Waut hab wie en disen Artikjel äwa de Leew jelieet?

¹⁸ Wuarom well wie onse Leew unjarenaunda stoakj hoolen? Soo aus wie jeseenen haben, wies wie, daut wie Jehowa leewen, wan wie onse Breeda un Sestren leewen. Woo kjenn wie dee onse Leew wiesen? Eene Wajch es doaderch, daut wie dee treesten. Wie woaren ons unjarenaunda wieda treesten kjennen, wan wie Metjefeel haben. Woo kjenn wie onse Leew unjarenaunda stoakj hoolen? Doaderch, daut wie ons sea aunstrenjen, de aundre äare Fäla to vejäwen.

19. Wuarom es daut nu besonda needich, ons unjarenaunda Leew to wiesen?

¹⁹ Wuarom es daut nu besonda needich, ons unjarenaunda Leew to wiesen? Petrus säd doatoo: “De Tiet es boolt hia, daut aules een Enj haft. Doawäajen . . . habt groote Leew eena fa dän aundren” (1. Pet. 4:7; 4:8, NW). Met waut mott wie räakjnen, nu, daut daut Enj von dise schlajchte Welt emma noda kjemt? Jesus säd verut: “Wäajen jie miene Nofolja sent, woaren aule Sorten Menschen junt haussen” (Mat. 24:9, NW). Daut wie jäajen disen Hauss kjamfen kjennen, mott wie veeent bliewen. De Soton prooft, ons uteneentorieten, oba hee woat daut nich kjennen, wiels de Leew woat ons toophoolen; wiels derch de Leew “aules to eene volkomne Eenichkjeit vebungen woat” (Kol. 3:14; Filip. 2:1-2).