21. ARTIKJEL FA DAUT STUDIUM
Woo Jehova onse Jebäda beauntwuat
“Wan wie om waut froagen, dan weet wie uk, daut wie daut haben, om waut wie bäden” (1. JOH. 5:15)
LEET 41 Hia mien Jebäd
WAUT WIE SEENEN WOARENa
1-2. Äwa waut wunda wie veleicht, wan wie bäden?
HAST du mol doaräwa nojedocht, aus Jehova diene Jebäda beauntwuaten deit? Een deel Breeda un Sestren haft daut aul mol soo aus dit jegonen, besonda wan dee jroz waut schwoaret derchmuaken. Wan wie Trubbels haben, dan es daut veleicht schwanda to seenen, woo krakjt Jehova onse Jebäda beauntwuat.
2 Well wie nu mol seenen, wuarom wie ons gaunz secha sennen kjennen, daut Jehova de Jebäda von siene true Deena beauntwuat (1. Joh. 5:15). Wie woaren uk äwa dise twee Froagen räden: Wuarom kunn daut eenje Mol soo loten, daut Jehova onse Jebäda nich beauntwuat? Woo beauntwuat Jehova onse Jebäda dan vondoag dän Dach?
DE AUNTWUAT OPP ONSE JEBÄDA ES VELEICHT NICH SOO, AUS WIE JEDOCHT HABEN
3. Wuarom well Jehova, daut wie to am bäden?
3 Wie weeten von de Schreft, daut Jehova ons sea leeft un daut wie bie am väl wieet sent (Hag. 2:7; 1. Joh. 4:10). Doawäajen well hee haben, daut wie am no Help froagen (1. Pet. 5:6-7). Hee well ons halpen, daut wie dicht bie am bliewen kjennen un daut wie met irjent Schwierichkjeiten foadich woaren kjennen.
Jehova beauntwuad David siene Jebäda un rad am von siene Jäajna. (See Varsch 4)
4. Wuarom weet wie, daut Jehova de Jebäda von siene true Deena beauntwuaten deit? (See uk daut Bilt.)
4 En de Bibel kjenn wie foaken doavon läsen, daut Jehova Jebäda beauntwuad. Veleicht denkjst du uk fuaz aun dän Kjennich David. Hee must en sien Läwen met väl stoakje Jäajna foadich woaren. Hee deed foaken to Jehova bäden un fruach am no Help. Opp eene Sauz fruach hee am: “Oo HAR, hia mien Jebäd; horch, woo ekj om Jnod bäd. Wiels du woarhauftich un jerajcht best, auntwuat mie!” (Psa. 143:1). Un Jehova deed David sien Jebäd beauntwuaten (1. Sam. 19:10, 18-20; 2. Sam. 5:17-25). David kunn voll Vetruen sajen: “De HAR es aul dee noaun, dee am aunroopen,” un wie kjennen ons doaräwa uk gaunz secha sennen (Psa. 145:18).
Jehova beauntwuad Paulus siene Jebäda un jeef am de needje Krauft toom uthoolen (See Varsch 5)
5. Haft Jehova de Jebäda von siene Deena emma krakjt soo beauntwuat, aus dee daut jedocht hauden? Jeff een Biespel. (See uk daut Bilt.)
5 Daut kaun oba sennen, daut Jehova onse Jebäda nich soo beauntwuat, aus wie ons daut wudden wenschen. Soo wia daut bie dän Apostel Paulus, waut eenen “Stachel en daut Fleesch” haud. Hee fruach Gott doano, am disen Trubbel wajchtonämen. Paulus deed dree Mol krakjt wäajen daut bäden. Haft Jehova dise Jebäda beauntwuat? Jo, oba nich soo, aus Paulus sikj daut jedocht haud. Jehova haft am disen Trubbel nich wajchjenomen, oba hee jeef am de Krauft, waut am fäld, om tru to bliewen (2. Kor. 12:7-10).
6. Wuarom kunn daut eenje Mol soo loten, daut Jehova onse Jebäda nich beauntwuaten deit?
6 Ons kaun daut bieaun uk soo gonen, daut wie eene aundre Auntwuat kjrieen, aus wie jedocht hauden. Oba wie kjennen gaunz doaropp vetruen, daut Jehova daut baste weet, woo hee ons halpen kaun. Hee kaun “väl mea en ons doonen . . ., aus wie ons denkjen ooda vestonen kjennen” (Efs. 3:20). Krakjt doawäajen kjennen de Auntwuaten opp onse Jebäda eenje Mol to soone Tiet ooda opp soone Wajch sennen, waut wie nich jedocht hauden.
7. Wuarom mott wie daut eenje Mol aunpaussen, om waut wie bäden? Jeff een Biespel.
7 Eenje Mol mott wie daut endren, no waut wie froagen, wan wie daut bäta vestonen kjennen, waut Jehova sien Wellen es. Soo jinkj daut biejlikj Brooda Martin Pötzinger. Aus hee mau korz befriet wia, wort hee von de Nazis en een Loaga fa Faustjenomne enjestopt. Ieeschtlich fruach hee Jehova doano, daut hee wada kunn friekomen, om fa siene Fru to sorjen un wieda to prädjen. Oba no twee Wäakj leet daut noch emma nich doano, aus wudd Jehova waut doonen, daut hee kunn friekomen. Doawäajen funk hee aun to bäden: “Jehova, halp mie doch to seenen, waut du von mie haben west.” Dan funk hee aun, doaräwa notodenkjen, waut de aundre Breeda em Loaga derchmuaken. Väle von dee wieren uk befriet un dee hauden Kjinja un wieren besorcht om dee. Dan deed Brooda Pötzinger bäden: “Jehova, dankscheen fa miene niee Oppgow hia. Halp mie, daut ekj miene Breeda un Sestren Krauft un Moot jäwen kaun.” Un krakjt daut deed hee fa de näakjste näajen Joa, waut hee enjestopt wia!
8. Aun waut mott wie onbedinjt denkjen, wan wie bäden?
8 Wie motten uk em Denkj hoolen, daut Jehova sikj waut väajenomen haft un daut hee eene Tiet faustjesat haft, wanea hee daut volbrinjen woat. Jehova woat derch sien Kjennichrikj fa emma een Enj moaken met aul de Trubbels, waut vondoag dän Dach soo väl Lieden veuasoaken – Trubbels soo aus groote Owwadasch, Krankheiten ooda de Doot (Dan. 2:44; Opb. 21:3-4). Oba bat daut bat doa es, lat Jehova daut too, daut de Soton äwa dise Welt harscht (Joh. 12:31; Opb. 12:9).b Wan Jehova nu aul de Trubbels von de Menschheit leesen wudd, dan kunn daut soo loten, aus wan de Soton goanich soon schlajchta Harscha wia. Soo, wan wie nu uk noch een bät luaren motten, bat Jehova siene Vespräakjungen erfelt, meent daut oba nich, daut hee ons em Stäakj lat. See wie nu mol, woo Jehova ons halpt.
WOO JEHOVA ONSE JEBÄDA BEAUNTWUAT
9. Woo halpt Jehova ons, wan wie eene Entscheidunk moaken motten? Jeff een Biespel.
9 Hee jeft ons Weisheit. Jehova vesprakjt ons, daut hee ons de Weisheit jeft, waut ons fält, om goode Entscheidungen to moaken. Besonda bie soone Entscheidungen, waut sea väl aun ons Läwen doonen, biejlikj aus eena onbefriet blift ooda sikj befrieen well, fält ons daut aun Gott siene Weisheit (Jak. 1:5). See wie mol, woo Mariac daut jinkj, eene onbefriede Sesta. See wia sea tofräd aus Pionia un dan lieed see eenen Brooda kjanen. See vetalt: “Aus wie emma jratre Frind worden, jleicht wie ons uk emma dolla. Ekj wist, ekj must eene Entscheidunk trafen. Doawäajen deed ekj sea väl bäden. Mie fäld daut aun Jehova sienen Rot, oba ekj wist uk, daut Jehova nich wudd fa mie eene Entscheidunk trafen.” Ar späad sikj daut soo, daut Jehova ar de Weisheit jeef, wua see no fruach. Woo deed hee daut krakjt? See kunn en onse Bieekja soone Artikjels finjen, waut krakjt fa äare Froagen paussent wieren. Un see horcht uk no dän gooden Rot, waut äare Mame ar jeef. Dis Rot holp Maria, daut see äare Jefeelen bäta vestonen kunn un eene weise Entscheidunk moaken kunn.
Woo jeft Jehova ons de Krauft toom uthoolen? (See Varsch 10)
10. Woo woat Jehova siene Deena no Filippa 4:13 (NW) no halpen? Jeff een Biespel. (See uk daut Bilt.)
10 Hee jeft ons de Krauft toom uthoolen. Jehova woat ons de Krauft jäwen, waut ons fält, om en Schwierichkjeiten uttohoolen, krakjt soo aus hee daut uk fa dän Apostel Paulus deed (läs Filippa 4:13, NW). Krakjt daut haft Benjamin beläft. Jehova holp am, en schwoare Tieden uttohoolen. Aus hee oppwoss, must hee met siene Famielje fa Joaren opp soone Städen en Afrika wonen, waut fa Flichtlinja wieren. Benjamin sajcht: “Ekj hieed kjeen Mol opp, to Jehova to bäden, un fruach am emma, daut hee mie de Krauft jeef, daut to doonen, waut am jefelt. Un Jehova haft miene Jebäda beauntwuat, wiels hee jeef mie ennalich Fräd, hee holp mie, äwanäment to prädjen, un hee jeef mie uk emma Bieekja, daut ekj em jeisteljen stoakj bliewen kunn.” Un dan sajcht hee noch: “Mie haft daut sea jeholpen, Erfoarungen von Breeda un Sestren to läsen un to seenen, woo Jehova an holp. Daut jeef mie Krauft un holp mie, daut ekj tru bliewen kunn.”
Hast du mol kunt späaren, woo Jehova die derch de Gloowesbreeda holp? (See Varsch 11-12)d
11-12. Woo kaun Jehova onse jeistelje Famielje brucken, om onse Jebäda to beauntwuaten? (See uk daut Bilt.)
11 Hee halpt ons derch onse jeistelje Famielje. De Nacht, ea Jesus storf, deed hee sea bäden. Hee prachad Jehova doarom, daut aundre am nich aus eenen Gotteslastra veachten sullen. Oba enne Städ daut aufhoolen, schekjt Jehova eent von Jesus siene Breeda, eenen Enjel, om am to stoakjen (Luk. 22:42-43). Krakjt soo kaun Jehova uk onse Breeda un Sestren brucken, daut dee ons biejlikj fonen ooda besieekjen toom ons Moot moaken. Wie aula kjennen doano seenen, daut jieda eent von onse Gloowesbreeda “jetreest woat” (Spr. 12:25).
12 See wie mol, waut eene Sesta, waut Miriam heet, beläwd. Äa Maun wia een poa Wäakj ea jestorwen un Miriam wia auleen tus un wia sea truarich un doljeschloagen. See kunn nich mea opphieren met roaren un ar fäld daut, met wäm to räden. Oba see sajcht: “Ekj haud nich de Krauft, irjentwäm to fonen, doawäajen deed ekj eefach bäden. Aus ekj noch road un bäd, fond mie met eenst wäa. Daut wia een Eltesta, waut uk een gooda Frint wia.” Dis Eltesta un siene Fru haben Miriam sea kunt treesten. Fa ar es daut gaunz dietlich, daut Jehova disen Brooda bat doa brocht, ar to fonen.
Woo kaun Jehova ons derch aundre biestonen? (See Varsch 13-14)
13. Vetal, woo Jehova soone brucken kaun, waut am nich deenen, om onse Jebäda to beauntwuaten.
13 Hee kaun ons derch Menschen halpen, waut am nich deenen (Spr. 21:1). Bieaun deit Jehova Jebäda derch soone Menschen beauntwuaten, waut am nich mol deenen. Hee brocht biejlikj dän Kjennich Artahsasta bat doa, Nehemia de Frieheit to jäwen, trigj no Jerusalem to reisen un doa mettohalpen, de Staut wada opptobuen (Neh. 2:3-6). Bie dise Tiet kaun Jehova uk mau rajcht soone brucken, waut am nich deenen, daut dee ons halpen.
14. Woo haft die Sesta Soo Hing äare Erfoarunk Moot jemoakt? (See uk daut Bilt.)
14 Eene Sesta, waut Soo Hing heet, beläwd, woo Jehova ar derch äaren Dokta holp. De Sesta äa Jung es sea narfenkrank. Aus hee dan noch een grootet Ojjlekj haud, leeten see un äa Maun äare Oabeit toch, daut see sikj om am kjemren kunnen. Oba doaderch jinkj dee daut dan knaup. Sesta Soo Hing sajcht, daut ar sikj daut soo späad, aus wan see eefach nich mea wieda kunn. See schedd sikj to Jehova ut un fruach am no Help. De Dokta proowd an dan to unjastetten un doawäajen kjrieejen dee Help von de Rejierunk un waut biljeret toom wonen. Lota säd Sesta Soo Hing: “Derch dit kunn wie seenen, woo Jehova ons biestunt. Daut stemt werkjlich, wan daut sajcht: ‘Du hieescht onse Jebäda’” (Psa. 65:3).
DAUT BRUKT GLOOWEN, JEHOVA SIENE AUNTWUATEN TO SEENEN UN AUNTONÄMEN
15. Woo kunn eene Sesta daut bäta seenen, woo Jehova äare Jebäda beauntwuad?
15 Jehova deit onse Jebäda jeweenlich nich opp eene butajeweenelje Wajch beauntwuaten. Oba hee deit dee beauntwuaten. Un hee jeft ons krakjt daut, waut ons fält, daut wie am kjennen tru bliewen. Proow doawäajen emma to seenen, woo Jehova diene Jebäda beauntwuat. Eene Sesta, waut Yoko heet, docht soo, daut Jehova äare Jebäda nich beauntwuaten deed. Oba dan funk see aun, sikj daut opptoschriewen, no waut see Jehova fruach. No een Stootje deed see sikj daut dan wada derchläsen un dan wort see en, daut Jehova de mieeschte von äare Jebäda beauntwuat haud, mau rajcht soone, wua see aul von vejäten haud. Wie motten uk to Tieden doaräwa nodenkjen, woo Jehova onse Jebäda beauntwuat (Psa. 66:19-20).
16. Woo kjenn wie Gloowen wiesen, wan wie bäden? (Hebräa 11:6).
16 Wie wiesen Gloowen, wan wie bäden. Oba ons fält uk Gloowen, daut wie daut kjennen aunnämen, woo Jehova onse Jebäda beauntwuat, endoont woo hee daut deit (läs Hebräa 11:6). See wie mol, woo Mike un siene Fru Chrissy daut jinkj. Dee hauden sikj väajenomen, em Betel to deenen. Mike sajcht: “Wie haben ons fa väl Joaren aus Lied aunjejäft toom em Betel deenen un wie haben uk emma wada doaräwa jebät. Oba wie worden kjeen Mol enjelot.” Mike un Chrissy vetruden wieda doaropp, daut Jehova daut baste wist, woo hee an brucken kunn. See deeden aules, waut see kunnen: See wieren opp soone Städ Pionia, wua daut aun Help fäld, un see deeden uk bie Buwoakjs methalpen. Nu sent dee em Kjreisdeenst. Mike sajcht: “Jehova haft onse Jebäda lang nich emma soo beauntwuat, aus wie ons daut jedocht hauden, oba hee haft dee beauntwuat. Un hee deed daut opp soone Wäaj, daut daut noch väl bäta wia, aus wie ons daut jeemols väajestalt hauden.”
17-18. Opp waut kjenn wie vetruen, soo aus Psalm 86:6-7 sajcht?
17 Läs Psalm 86:6-7. De Psalmenschriewa David wia sikj gaunz secha, daut Jehova siene Jebäda hieed un beauntwuad. Du kaust krakjt soon Vetruen haben. En disen Artikjel hab wie miere Biespels jeseenen, waut ons wiesen, daut Jehova ons de Weisheit un de Krauft jeft, waut ons fält, om uttohoolen. Hee kaun uk onse jeistelje Famielje brucken un mau rajcht soone, waut am nich deenen, om ons to halpen.
18 Jehova woat onse Jebäda nich emma soo beauntwuaten, aus wie ons daut denkjen, oba hee woat dee gaunz secha beauntwuaten. Hee woat ons krakjt daut jäwen, waut ons fält, un hee woat daut to de baste Tiet doonen. Hia kjeen Mol opp to bäden un doaraun to jleewen, daut Jehova die hieet. Vetru doaropp, daut Jehova nu aul fa die sorjen woat un daut hee die enne niee Welt aules “jäwen [woat], waut dien Hoat sikj wenscht” (Psa. 37:4).
LEET 46 Wie sajen die dankscheen, Jehova
a Jehova vesprakjt, daut hee onse Jebäda beauntwuat, wan dee met sienen Wellen toopstemmen. Wan wie schwoaret derchmoaken, dan kjenn wie ons gaunz secha sennen, daut hee ons halpen woat, am tru to bliewen. See wie nu, woo Jehova onse Jebäda beauntwuat.
b Du kaust noch mea doaräwa finjen, wuarom Jehova daut toolat, daut de Soton äwa dise Welt harscht, en dän Artikjel “Verliere die große Streitfrage nicht aus den Augen” em Wachtturm von Juni 2017.
c Eenje Nomes hab wie hia jeendat.
d BILTBESCHRIEWUNK: Eene Mame un äa Mejalkje komen no een framdet Launt un dee sent Flichtlinja. Gloowesbreeda heeten dee welkom un halpen an.