Comfort From Stretfala Savve Abaotem God
SAMTING wea Bible talem abaotem love and mercy bilong God mekem samfala kwestin kamap wea mekem samfala pipol feel nogud. Olketa ask olsem: Sapos God want for finisim wicked fasin, and hem savve hao for duim datwan and hem garem paoa for duim, why nao wicked fasin hem go ahed for kamap moa big? Problem wea olketa feisim hem wei wea olketa no luksavve hao thrifala samting hia join tugeta: (1) God garem paoa evribit; (2) God hem love and hem gud; and (3) wei wea olketa nogud samting go ahed for happen. Olketa ting disfala mek-thri point hem barava tru, so wanfala long nara tufala point hem no tru. Long tingting bilong olketa, maet God hem no savve stopem wicked fasin or hem garem fasin for no kea.
Samfala day bihaen World Trade Center long New York hem distroe, wanfala important leader bilong religion long United States hem sei: “Pipol bin askem mi . . . planti handred taem insaed laef bilong mi why nao God letem trabol and wei for safa stap. Mi mas tok tru hao miseleva no really savve long ansa, mi no satisfae long datwan.”
Wanfala professor bilong religion wea herem disfala koment hem raet hao hem tinghae long “gudfala idea” wea datfala leader bilong religion hem preachim. Hem encouragem tu tingting bilong wanfala savveman wea raet olsem: “Wei wea man hard for minim why wei for safa hem stap hem part long wei wea man hard for minim God.” Bat waswe, hem really hard for minim why nao God letem wicked fasin stap?
Start Bilong Wicked Fasin
Long wei wea barava difren from samting olketa leader bilong religion talem, Bible teachim hao wei wea God letem wicked fasin for go ahed hem no hard for minim. Wanfala main point for helpem man minim datfala kwestin abaotem wicked fasin hem for luksavve hao Jehovah hem no creatim wanfala wicked world. Hem creatim first man and woman long perfect wei, tufala no garem sin. Jehovah lukim waka bilong hem and hem lukim hao hem “gud tumas.” (Genesis 1:26, 31) Purpose bilong hem for Adam and Eve hem for olketa mekem disfala Paradaes bilong Eden for kavarem full earth and for fulimap witim hapi pipol wea stap anda long protection bilong loving sovereign rul bilong hem.—Isaiah 45:18.
Wicked fasin hem start taem wanfala spirit wea, nomata hem faithful long God firstaem, gogo hem kavetem wei for kasem worship. (James 1:14, 15) Bighed fasin bilong hem showaot klia long earth taem hem pullim first man and woman for join insaed wei wea hem againstim God. Winim wei for obeyim kliafala instruction for no kaikaim or tasim datfala frut bilong tree bilong savve long gud and wicked samting, Adam and Eve tekem samfala and kaikaim. (Genesis 3:1-6) Taem olketa duim diswan, olketa no disobey long God nomoa bat olketa showimaot hao olketa barava want for independent from hem tu.
Wanfala Kwestin Saed Long Fasin Kamap
Disfala bighed fasin wea kamap long Eden mekem wanfala kwestin saed long fasin kamap, wanfala challenge wea affectim full universe. Olketa man hia wea bighed kwestinim wei wea Jehovah hem rul long stretfala wei ovarem olketa samting wea hem wakem. Waswe, Creator hem garem raet for kasem wei for obey evribit from olketa man? Waswe, maet pipol garem beta laef sapos olketa kamap independent?
Jehovah deal witim disfala wei wea olketa challengem rul bilong hem long wei wea showimaot hem garem perfect balance long love, justice, wisdom, and paoa. Hem savve iusim paoa bilong hem for pisisim datfala bighed fasin kwiktaem. Datwan maet luk olsem hem fitim justice, from hem garem raet for duim datwan. Bat sapos hem duim datwan bae hem no ansarem olketa kwestin saed long fasin wea bin kamap. Long narasaed, God fit for no tinghevi long datfala sin. Long samfala distaem kaen wei olsem maet luk olsem loving wei. Bat, diswan tu bae no ansarem toktok bilong Satan abaotem wei wea man fit for rulim hemseleva. And tu, diswan bae encouragem samfala moa for lusim wei bilong Jehovah. Samting wea bae kamaot from datwan hem bigfala wei for safa.
From hem garem wisdom, Jehovah letem olketa man for go followim wei bilong olketa seleva for lelebet taem. Nomata diswan minim hem mas letem wicked fasin for stap for lelebet taem, olketa man kasem chance for showimaot sapos olketa savve win for rulim olketa seleva long wei wea independent from God, for live followim olketa standard bilong olketa seleva saed long samting wea stret and rong. Wanem nao kamaot from datwan? War, no eni justice, hardfala living, and wei for safa hem part long history bilong olketa man. Wei wea disfala bighed fasin againstim Jehovah hem fail, bae ansarem evribit for olowe olketa kwestin wea kamap long Eden.
Long semtaem, God showimaot love bilong hem long wei wea hem provaedem Son bilong hem, Jesus Christ, wea givim laef bilong hem olsem wanfala ransom sakrifaes. Diswan mekem olketa man wea obey for free from sin and dae wea kamaot from wei wea Adam no obey. Datfala ransom hem openem wei for evriwan wea showimaot faith long Jesus for kasem laef olowe.—John 3:16.
Iumi garem promis bilong Jehovah wea givim iumi comfort hao wei wea man safa hem no for olowe. Man for raetem psalm hem raet olsem: “Lelebet taem nomoa, and wicked wan bae finis. Iu bae lukaotem ples bilong hem, bat hem bae no stap. Bat olketa wea garem kwaet fasin bae kasem earth, and olketa bae kasem nambawan hapi long bigfala peace.”—Psalm 37:10, 11.
Wanfala Sef and Hapi Future
Wei wea olketa Bible profesi fulfill hem showimaot hao taem bilong God for finisim sik, sorre, and dae hem klosap nao. Lukim wanfala nambawan samting wea bae kamap wea aposol John lukim insaed wanfala vision. Hem raet olsem: “Mi lukim wanfala niu heven and wanfala niu earth; bikos heven bilong bifor and earth bilong bifor hem finis nao, and sea hem nomoa tu. . . . And God bae stap witim olketa [man]. And hem bae aotem evri wata from eye bilong olketa, and dae bae nomoa, sorre and krae and pain bae nomoa tu. Evri samting bifor hem finis nao.” Insaed wanfala toktok wea strongim hao iumi fit for trustim olketa promis hia, John herem diswan: “Raetem, from olketa toktok hia hem faithful and tru.”—Revelation 21:1-5.
Waswe long planti billion pipol wea no garem blame wea dae start kam from taem bighed fasin kamap long Eden? Jehovah promis hao hem bae mekem pipol wea sleep long dae for laef bak. Aposol Paul sei: “Mi garem hope long God . . . hao wanfala resurrection bae kamap for olketa wea raeteous and olketa wea no raeteous.” (Acts 24:15) Olketa hia bae garem chance for laef insaed wanfala world wea “raeteous fasin bae stap.”—2 Peter 3:13.
Long sem wei wea wanfala loving dadi hem letem pikinini bilong hem for kasem wanfala operation wea pain from hem savve hao diswan bae helpem hem, Jehovah hem letem olketa man for kasem wicked fasin for lelebet taem long earth. Nomata olsem, planti blessing for olowe hem stap for olketa wea laek for duim will bilong God. Paul explainim olsem: “Creation kamap iusles nao, no from hemseleva wantem bat thru long datwan wea mekem kamap olsem, long faondeson bilong hope mekem creation seleva tu bae kamap free from slave bilong wei for rotten and kasem nambawan freedom olsem olketa pikinini bilong God.”—Romans 8:20, 21.
Tru nao, diswan hem nius—no kaen iumi lukim long television or readim insaed niuspepa bat hem gud nius. Hem barava nambawan nius from “God bilong evri comfort,” wea barava kea for iumi.—2 Corinthians 1:3.
[Olketa Piksa long page 6]
Taem wea go pas hem showaot olketa man kanduit win for rulim olketa seleva long wei wea independent from God
[Olketa Credit Line]
Famili from Somalia: UN PHOTO 159849/M. GRANT; atom bomb: USAF photo; concentration camp: U.S. National Archives photo