Diswan Hem Ples Bilong Iumi for Worship

1, 2. (a) Long bifor, wea nao pipol bilong Jehovah savve go for worshipim hem? (b) Hao nao tingting bilong Jesus abaotem temple bilong Jehovah long Jerusalem? (c) Wanem nao bae iumi storyim long disfala study?

PIPOL bilong God long bifor and long distaem garem ples wea olketa savve go for worshipim God. Olsem example, maet Abel wakem wanfala altar for hem savve iusim taem hem givim olketa sakrifaes long Jehovah. (Gen. 4:3, 4) Noah, Abraham, Isaac, Jacob, and Moses tu wakem olketa altar. (Gen. 8:20; 12:7; 26:25; 35:1; Ex. 17:15) Jehovah talem olketa Israelite for wakem wanfala tabernacle. (Ex. 25:8) Bihaen, hem talem olketa for wakem wanfala temple. (1 Ki. 8:27, 29) Bihaen pipol bilong God kamap free from Babylon, olketa evritaem hipap tugeta long olketa sinagog. (Mark 6:2; John 18:20; Acts 15:21) And olketa Christian long first century hipap tugeta long haos bilong olketa nara Christian. (Acts 12:12; 1 Cor. 16:19) Distaem pipol bilong Jehovah evriwea long world hipap tugeta long staka thousand Kingdom Hall for lane abaotem Jehovah and worshipim hem.

² Jesus barava respectim temple bilong Jehovah long Jerusalem. Wei wea Jesus tinghae long temple hia, hem mekem olketa disaepol bilong hem for tingim toktok bilong man wea raetem psalm, wea sei: “Mi laekem tumas haos bilong iu and mi tingim evritaem.” (Ps. 69:9; John 2:17) Long bifor, olketa kolem datfala temple long Jerusalem “haos bilong Jehovah,” bat distaem iumi no iusim datfala toktok for olketa Kingdom Hall bilong iumi. (2 Chron. 5:13; 33:4) Nomata olsem, iumi shud respectim olketa ples wea iumi hipap for worshipim God. Long disfala study, bae iumi storyim samfala Bible principle wea teachim iumi for respectim olketa Kingdom Hall bilong iumi, for lukaftarem Kingdom Hall bilong iumi, and for sapotim waka for buildim olketa niu Kingdom Hall.a

SHOWIMAOT RESPECT LONG TAEM BILONG OLKETA MEETING

3-5. Why nao iumi hipap long Kingdom Hall, and hao nao datwan affectim tingting bilong iumi abaotem olketa meeting?

³ Kingdom Hall hem main ples wea pipol long community savve hipap tugeta for worshipim Jehovah. Olketa meeting wea iumi garem evri week hem wanfala long olketa samting wea God givim for strongim wei wea iumi fren witim hem. Iumi kasem instruction and encouragement wea iumi needim from organization bilong God. Hem nambawan privilege for Jehovah and Jesus invaetem iumi for kaikai long “tebol bilong Jehovah” evri week. (1 Cor. 10:21) Iumi mas evritaem tinghae long olketa meeting.

⁴ Jehovah talem klia long iumi hem laekem iumi for attendim olketa meeting for worshipim hem and for encouragem olketa narawan. (Readim Hebrew 10:24, 25.) From iumi respectim Jehovah, bae iumi traem best for no misstim eni meeting. Iumi showimaot iumi tinghae long olketa meeting, taem iumi prepare for olketa meeting and traem best for givim koment.—Ps. 22:22.

⁵ Wei bilong iumi, samting iumi duim long taem bilong olketa meeting, and hao iumi lukaftarem Kingdom Hall bilong iumi shud showimaot respect long Jehovah. Olketa samting wea iumi duim long taem bilong olketa meeting shud mekhae long nem bilong Jehovah, wea staka taem olketa raetem nem hia long saen bilong olketa Kingdom Hall bilong iumi.—Comparem 1 Kings 8:17.

6. Wanem nao samfala talem abaotem olketa Kingdom Hall and olketa brata and sista wea attendim olketa meeting? (Lukim piksa long start bilong study.)

⁶ Taem iumi showimaot respect for olketa Kingdom Hall bilong iumi, pipol luksavve long diswan. Olsem example, wanfala man long Turkey hem sei: “Mi tinghae long wei wea Kingdom Hall hem klin and evri samting organize gud. Pipol long Kingdom Hall werem gud kaleko, olketa smile and kam welkamim mi. Mi tinghae tumas long datwan.” Gogo man hia kam long evri meeting and no longtaem bihaen, hem baptaes. Long wanfala taon long Indonesia, olketa brata invaetem olketa neiba, mayor long datfala taon, and olketa nara bigman for visitim and lukim niu Kingdom Hall bilong olketa. Datfala mayor hem laekem hao olketa wakem gud datfala Kingdom Hall, design bilong hem, and naes garden wea olketa plantim raonem datfala building. Hem sei: “Wei wea disfala hall hem barava klin showimaot faith bilong iufala hem barava strong.”

7, 8. Taem iumi attendim olketa meeting, hao nao iumi savve showimaot iumi respectim Jehovah?

⁷ From Jehovah nao invaetem iumi long olketa meeting, evri samting iumi duim, lukluk bilong iumi, and kaleko bilong iumi shud showimaot respect long hem. Bat iumi mas balance. Iumi no strict tumas long wanem pipol shud duim and no duim long Kingdom Hall, and long narasaed, iumi no enihao tu long Kingdom Hall. Hem tru, Jehovah laekem iumi and pipol wea iumi invaetem for kam long Kingdom Hall for enjoyim olketa meeting. Bat iumi shud no duim eni samting wea no showimaot respect for olketa meeting. Dastawe kaleko wea iumi werem mas fitim, iumi no sendem text message, storystory, or kaikai long taem bilong meeting. Dadi and mami shud lanem pikinini bilong olketa for no ranran or plei insaed long Kingdom Hall.—Eccl. 3:1.

⁸ Taem Jesus lukim pipol salem olketa samting insaed long temple, hem kros fogud and raosem olketa from temple. (John 2:13-17) Kingdom Hall hem ples wea iumi lane abaotem Jehovah and worshipim hem. So hem no stret tu for duim bisnis long Kingdom Hall.—Comparem Nehemiah 13:7, 8.

SAPOTIM WAKA FOR BUILDIM OLKETA KINGDOM HALL

9, 10. (a) Hao nao organization bilong Jehovah savve buildim olketa niu Kingdom Hall raonem world, and wanem nao kamaot from datwan? (b) Hao nao organization bilong Jehovah helpem olketa kongregeson wea no garem inaf selen for buildim Kingdom Hall bilong olketa seleva?

⁹ Pipol bilong Jehovah long staka ples raonem world waka hard for buildim olketa niu Kingdom Hall. Olketa wea volunteer nao designim, buildim, and repairim olketa Kingdom Hall. Insaed long 15 year wea go pas, organization bilong Jehovah wakem winim 28,000 niu Kingdom Hall raonem world, wea datwan hem samting olsem faevfala Kingdom Hall evriday.

¹⁰ Organization bilong Jehovah iusim olketa volunteer and olketa contribution for buildim Kingdom Hall for olketa kongregeson raonem world wea needim datwan. Iumi followim Bible principle wea sei olketa wea garem plande samting savve helpem olketa wea needim samting. (Readim 2 Corinth 8:13-15.) Wanem nao kamaot from datwan? Organization bilong Jehovah buildim staka Kingdom Hall for olketa kongregeson wea no garem inaf selen for buildim Kingdom Hall bilong olketa seleva.

11. Wanem nao samfala brata talem abaotem niu Kingdom Hall bilong olketa, and hao nao tingting bilong iu abaotem datwan?

¹¹ Olketa brata long wanfala kongregeson long Costa Rica wea garem niu Kingdom Hall sei olsem: “Taem mifala lukim Kingdom Hall bilong mifala, mifala hapi tumas! Mifala hard for bilivim hao olketa wakem naesfala Kingdom Hall bilong mifala insaed eitfala day nomoa! Mifala garem disfala Kingdom Hall bikos long help bilong organization bilong Jehovah, sapot bilong olketa brata and sista, and Jehovah blessim disfala waka. Disfala ples bilong mifala for worship hem wanfala spesol present from Jehovah. Mifala hapi fogud.” Iumi tu hapi taem iumi herem olketa brata and sista bilong iumi talem thankiu long Jehovah for wanem hem duim for olketa. And iumi hapi tumas olketa brata and sista raonem world savve garem Kingdom Hall bilong olketa seleva. Iumi luksavve Jehovah blessim disfala waka for buildim olketa Kingdom Hall, bikos bihaen olketa buildim wanfala Kingdom Hall finis, staka pipol moa start for attendim olketa meeting for lane abaotem Jehovah.—Ps. 127:1.

12. Hao nao iu savve sapotim waka for buildim olketa niu Kingdom Hall?

¹² Hao nao iu savve sapotim waka for buildim olketa niu Kingdom Hall? Maet iu savve joinim construction waka. And iumi evriwan savve givim contribution wea organization savve iusim for buildim olketa niu Kingdom Hall. Taem iumi duim best bilong iumi for sapotim disfala waka datwan mekem iumi hapi and, main samting nao, iumi mekem Jehovah kasem praise. Iumi followim example bilong pipol bilong God long bifor, wea willing for sapotim waka for buildim olketa ples for worship.—Ex. 25:2; 2 Cor. 9:7.

KLINIM KINGDOM HALL BILONG IUMI

13, 14. Wanem nao samfala Bible principle wea encouragem iumi for evritaem klinim Kingdom Hall bilong iumi?

¹³ Jehovah hem God wea holy and klin, and hem God wea organize gud. Dastawe iumi mas evritaem klinim Kingdom Hall bilong iumi. (Readim 1 Corinth 14:33, 40.) Sapos iumi laek for holy and klin olsem Jehovah, worship, tingting, and samting iumi duim mas klin. And tu, body bilong iumi mas klin.—Rev. 19:8.

¹⁴ Sapos Kingdom Hall bilong iumi hem klin and evri samting hem stret, bae iumi no hol bak for invaetem pipol for kam long olketa meeting. Iumi preach abaotem wanfala niu world wea hem klin, and sapos Kingdom Hall bilong iumi klin, pipol bae luksavve iumi followim wanem iumi preach abaotem. Olketa bae luksavve God wea iumi worshipim hem holy and klin, and hem bae mekem disfala earth kamap wanfala paradaes.—Isa. 6:1-3; Rev. 11:18.

15, 16. (a) Why nao iumi mas evritaem klinim Kingdom Hall, and wanem nao maet mekem datwan no isi long samfala ples? (b) Wanem nao olketa arrangement for klinim Kingdom Hall bilong iu, and wanem privilege nao iumi wanwan garem?

¹⁵ Pipol garem difren tingting abaotem wei for duim klining. Why nao olsem? Maet hem bikos long ples wea olketa growap long hem. Samfala pipol stap long ples wea garem staka dust, or long ples wea road hem nogud and garem staka mud. Olketa narawan ples bilong olketa no garem inaf wata or soap for duim klining. Nomata wea iumi stap and nomata wanem nao tingting bilong pipol long ples bilong iumi abaotem wei for duim klining, iumi mas evritaem klinim Kingdom Hall bilong iumi. Hem ples wea iumi worshipim Jehovah.—Deut. 23:14.

¹⁶ Sapos iumi laekem Kingdom Hall bilong iumi for barava klin, iumi mas organize gud. Olketa elder shud mekem schedule for kongregeson duim klining, and mek sure kongregeson garem evri samting wea olketa needim for klinim gud Kingdom Hall. Olketa elder bae helpem olketa brata and sista organize gud for duim datfala klining waka. Samfala samting olketa savve klinim bihaen long each meeting, bat olketa nara samting maet olketa savve klinim wantaem evri month nomoa. Iumi evriwan nao garem privilege for klinim Kingdom Hall bilong iumi.

LUKAFTAREM KINGDOM HALL BILONG IUMI

17, 18. (a) Wanem nao iumi savve lanem from wei wea pipol bilong Jehovah bifor lukaftarem temple? (b) Why nao iumi mas lukaftarem gud Kingdom Hall bilong iumi?

¹⁷ Wanfala samting wea iumi savve duim for lukaftarem Kingdom Hall bilong iumi hem for repairim eni samting wea start for nogud. Pipol bilong Jehovah bifor duim sem samting tu. Olsem example, taem King Jehoash rul long Judah, pipol givim contribution for temple. King talem olketa priest for iusim selen hia for repairim eni samting wea nogud long datfala temple. (2 Ki. 12:4, 5) Winim 200 year bihaen, King Josiah tu iusim olketa contribution for repairim temple.—Readim 2 Chronicles 34:9-11.

¹⁸ Samfala Branch Komiti sei hem no wei bilong pipol long kantri bilong olketa for keepim gud olketa building. Maet diswan hem bikos staka pipol long olketa kantri hia no savve hao for duim datfala waka. Or maet hem bikos olketa no garem selen for fixim eni samting wea nogud. Bat sapos iumi no repairim olketa samting wea nogud long Kingdom Hall, bae gogo Kingdom Hall no luk gud and diswan savve spoelem nem bilong Jehovah. Taem iumi duim best bilong iumi for lukaftarem gud Kingdom Hall, iumi praisem Jehovah and iumi no weistim olketa contribution wea olketa brata and sista givim.

19. Wanem nao iu laek for duim for showimaot iu respectim ples wea iu worshipim Jehovah?

¹⁹ Kingdom Hall hem building wea iumi dedicatem long Jehovah. No eniwan or eni kongregeson hem ownim Kingdom Hall. Olsem iumi storyim finis long disfala study, olketa Bible principle savve helpem iumi for garem stretfala tingting abaotem ples wea iumi worshipim God. From iumi respectim Jehovah, iumi showimaot respect taem olketa meeting bilong iumi gohed, and tu, iumi respectim Kingdom Hall. Iumi hapi for givim contribution for sapotim waka for buildim olketa niu Kingdom Hall, and iumi waka hard for klinim and lukaftarem Kingdom Hall bilong iumi. Iumi followim example bilong Jesus taem iumi barava tinghae long ples wea iumi worshipim Jehovah.—John 2:17.