Helpem Pipol for Kasem Gud Samting From Ransom
Celebration for Memorial Bilong Dae Bilong Christ bae Kamap Long April 12
1. Wanem nao wanfala wei wea pipol bilong God savve showimaot thankiu for datfala ransom?
1 “Thankiu long God nao for free present bilong hem wea winim evri samting.” (2 Cor. 9:15) Disfala toktok hem barava showimaot feeling bilong iumi abaotem gudfala fasin and kaenfala fasin wea God showimaot long pipol bilong hem thru long Son bilong hem, Jesus Christ. Wei for tinghae olsem bae showaot taem iumi hipap tugeta long April 12 for celebratem Memorial bilong dae bilong Christ.
2. Hu nao olketa wea attendim Memorial witim olketa servant bilong Jehovah, and wanem nao olketa need for duim mekem olketa kasem gud samting from datfala ransom?
2 Evri year, samting olsem ten million nara pipol attendim Memorial witim olketa servant bilong Jehovah. Wei wea olketa duim datwan showimaot olketa thankiu for sakrifaes bilong Christ. Bat, for kasem gud samting from datfala ransom, olketa need for showimaot faith long datwan. (John 3:16, 36) Hao nao iumi savve helpem olketa for garem faith olsem? Long disfala taem wea iumi luk forward for Memorial and bihaen long datwan, iumi savve encouragem olketa for acceptim wanfala Bible study and for attendim olketa meeting bilong kongregeson evri week. Tingim olketa idea hia.
3. Hao nao maet iumi savve startim Bible study witim pipol wea iumi invaetem for kam long Memorial?
3 Bible Study: Taem iu invaetem olketa wea interest for kam long Memorial, iu savve iusim Kasem brochure for trae startim Bible study witim olketa. Iu savve iusim leson 6 long brochure for storyim witim student why Christ hem kam long earth and givim laef bilong hem olsem ransom for evriwan. Iu savve storyim datfala information long wanfala taem wea iu visit or maet haf long first visit and then nara haf long narataem. Taem iu finisim leson 6, hem maet willing for iutufala start long leson 1 long mek-thri taem wea iu visitim hem.
4. Hu nao iumi savve startim Bible study witim olketa long disfala taem wea iumi luk forward long Memorial and bihaen?
4 Hu nao iumi savve iusim idea hia for startim Bible study witim olketa? Maet samfala long olketa wakfren, skulfren, or olketa neiba bilong iu bae laek for duim study olsem. Maet olketa brata savve visitim olketa hasband wea no biliv bilong olketa sista long kongregeson. And no forgetim tu olketa relative bilong iu wea no Witness. And tu, iumi need for barava trae hard for invaetem olketa wea bifor olketa strong and kaban witim kongregeson, bat distaem olketa no duim datwan. (Luke 15:3-7) Iumi mas helpem olketa wea olsem for kasem gud samting from datfala ransom.
5. Hao nao iumi savve encouragem olketa Bible student and olketa narawan wea interest for attendim olketa kongregeson meeting wea kamap evri week?
5 Olketa Kongregeson Meeting: Memorial nao hem firstfala meeting wea plande Bible student and olketa narawan wea interest attendim. Bat hao nao iumi savve helpem olketa for kasem gud samting from olketa nara kongregeson meeting bilong iumi? April 2005 Kingdom Ministry Bilong Iumi, long page 8, hem garem olketa idea hia: “Talem title bilong next pablik tok. Showim information wea bae iumi studyim long Wastaoa Study and Kongregeson Buk Study. Explainim long hem wanem nao Theocratic Ministry Skul and Service Meeting. Taem iu kasem wanfala assignment long datfala skul, maet iu savve practicem datwan witim hem. Sharem olketa interesting point wea kamap long olketa meeting. Iusim olketa piksa insaed olketa pablikeson bilong iumi for helpem olketa lukim wanem nao happen long olketa meeting. Start from firstaem wea iufala start for study, invaetem olketa for kam long meeting.”
6. Wanem nao tufala wei wea iumi savve helpem olketa wea garem honest heart for kasem gud samting from ransom?
6 Olketa wea garem honest heart savve muv ahed kwiktaem long spiritual wei, taem Bible study bilong olketa no savve miss and olketa kam long kongregeson meeting evritaem. So, iumi mas encouragem olketa narawan for kasem gud samting from olketa spiritual samting hia and for kasem gud samting from datfala nambawan present bilong God—datfala ransom.