Iusim Long Gudfala Wei Taem Bilong Iu Long Ministry
1 Staka samting stap yet for iumi duim long ministry, and taem wea stap yet hem short. (John 4:35; 1 Cor. 7:29) Sapos iumi plan gud, iumi savve iusim long gudfala wei taem bilong iumi long ministry.
2 Mas Redi: Bifor iu go long grup for preaching, iu mas garem olketa buk wea iu needim and iu mas savve tu hao for offerim. Taem man hem prea finis long grup for preaching, go stret long territory. Taem iufala duim olsem, iufala bae story witim plande pipol long ministry.
3 Sapos iu nao leadim grup for preaching, iu mas start long barava taem. No storyim staka samting. Story for 10 minute go kasem 15 minute nomoa. Bifor grup go aot long preaching waka, evriwan shud savve finis wea nao territory for duim and hu nao for olketa waka witim.
4 Long Taem Bilong Preaching: Taem grup hem meet finis, no weistim taem, bat go stret long territory. Sapos iu ting for go bak long haos bilong iu taem preaching waka hem gohed, maet iuseleva savve faendem wei for iu go bak mekem olketa narawan long grup savve gohed for preach. Taem iu waka witim wanfala grup, tingim hao olketa maet weitim iu for finisim story wea iu duim long wanfala haos. So sapos iu story witim wanfala man wea laek for raoa, story lelebet nomoa and leavim hem. Sapos narafala man hem barava interest, markem taem for iu go bak.—Matt. 10:11.
5 Taem iu duim olketa return visit, trae for duim evriwan long datfala area bifor iu go long narafala ples. Hem gud for iu savve firstaem sapos olketa wea iu plan for go lukim bae stap or nomoa. (Prov. 21:5) Sapos bae iu story lelebet longtaem long wanfala haos, talem grup for preach klosap nomoa or for duim narafala return visit wea klosap.
6 Iumi stap long taem bilong bigfala spiritual harvest. (Matt. 9:37, 38) Klosap nao disfala waka bae finis. Dastawe, iumi shud iusim long gudfala wei taem bilong iumi long ministry.