Taem Iumi Fraet lo God Bae Iumi Gohed Kasem Gud Samting

1-2. Olsem Lot, wanem challenge nao olketa Christian feisim distaem?

TAEM iumi lukim barava nogud wei blo pipol lo world, iumi garem sem feeling olsem raeteous man Lot. Hem “barava feel nogud long wei bilong pipol wea nating shame for duim rong samting,” bikos hem savve Dadi blo iumi lo heven barava heitim datwan. (2 Pet. 2:7, 8) From Lot fraet lo God and lovem hem, Lot barava heitim rabis wei blo pipol wea stap raonem hem. Iumi distaem tu stap between pipol wea no respectim or ting nating lo olketa standard blo Jehovah. Nomata olsem, iumi savve keepim wei blo iumi klin if iumi gohed lovem God and garem stretfala wei for fraet lo hem.​—Prov. 14:2.

² Iumi savve duim olsem bikos Jehovah provaedem buk blo Proverbs wea encouragem and strongim iumi. Evri Christian, olketa man and woman, young and olo, savve kasem barava gud samting taem olketa followim wise kaonsel lo Proverbs.

TAEM IUMI FRAET LO GOD HEM PROTECTIM IUMI

3. Olsem Provebs 17:3 (SIPB) storyim, why nao hem important for protectim heart blo iumi? (Lukim tu piksa.)

³ Hem important for protectim tokpiksa heart blo iumi bikos Jehovah lukluk gud lo datwan. Hem savve lo really wei blo iumi and no just wat pipol lukim. (Readim Provebs 17:3, SIPB.) Hem bae lovem iumi if iumi fillimap mind witim wisdom blo hem wea givim laef olowe. (John 4:14) Taem olsem, nogud wei blo pipol wea followim Satan and olketa laea blo hem bae no spoelem iumi. (1 John 5:18, 19) Taem iumi klos fren witim Jehovah, bae iumi barava lovem and respectim hem. From iumi no laek mekem Dadi blo iumi feel nogud, iumi bae no even tingting for duim sin. Taem iumi kasem temptation, tingim diswan, ‘Why nao bae mi min for duim samting wea bae mekem Jehovah wea lovem mi tumas for feel nogud?’​—1 John 4:9, 10.

4. From wanfala sista fraet lo Jehovah, hao nao datwan protectim hem for no foldaon lo temptation?

⁴ Marta, wanfala sista lo Croatia kasem temptation for durong. Hem sei: “Mi faendem hard for tingting stret and for faet againstim feeling for laek duim sin wea mekem man hapi for lelebet taem nomoa. Bat from mi fraet lo Jehovah datwan protectim mi.”b Hao nao olsem? Marta ting raonem olketa nogud samting wea bae happen if hem duim sin. Iumi tu laek followim example blo Marta. Worse samting nao, bae iumi mekem Jehovah sorre and no worshipim hem for olowe.​—Gen. 6:5, 6.

5. Wat nao iu lanem from experience blo Leo?

⁵ Taem iumi fraet lo Jehovah, iumi mas careful for no frens witim olketa wea garem nogud wei. Leo, wea stap lo Congo lanem important leson from datwan. Fofala year bihaen hem baptaes, hem associate witim nogud frens. Hem tingse if hem no duim eni sin againstim Jehovah, hem olraet nomoa for associate olsem. Bat gogo, olketa frens hia influencim hem for drinkim alcohol and for durong. Then hem tingim samting wea parents blo hem teachim hem and hao hem hapi taem hem worshipim Jehovah. Wat nao result? Hem garem moa stretfala tingting. Olketa elder helpem hem for kam bak lo Jehovah and distaem hem elder and spesol pioneer.

6. Hu nao tufala tokpiksa woman wea iumi bae storyim?

⁶ Distaem bae iumi storyim Proverbs chapter 9 wea storyim tufala tokpiksa woman. Wanfala representim wisdom and narawan representim stupid. (Comparem Rome 5:14; Galatia 4:24.) Taem iumi storyim, tingim hao world blo Satan barava laekem tumas sex and pornography. (Eph. 4:19) So hem important for gohed fraet lo God and heitim nogud samting. (Prov. 16:6) Dastawe chapter hia bae helpem iumi evriwan, nomata iumi man or woman. Each wan lo tufala woman hia invaetem olketa wea no garem experience, wea minim olketa wea “no garem gudfala tingting.” Hem olsem each wan sei, ‘Iufala kam lo haos blo mi and iumi kaikai.’ (Prov. 9:1, 5, 6, 13, 16, 17, SIPB) Bat wat hem happen lo olketa wea acceptim invitation blo tufala woman hia, hem barava difren.

REJECTIM INVITATION BLO STUPID WOMAN

7. Olsem Provebs 9:13-18 (SIPB) storyim, wat nao happen lo olketa wea acceptim invitation blo stupid woman? (Lukim tu piksa.)

⁷ Bae iumi storyim invitation blo datfala “stupid woman.” (Readim Proverbs 9:13c; Provebs 9:14-18, SIPB.) Hem no shame for kolem olketa wea no garem gudfala tingting and sei: “Yufala kam” iumi kaikai. Wat nao result? “Dae blong olketa hemi insaet long haos ya.” Iumi savve lukim semkaen tokpiksa lo Proverbs chapter 2 and 5. Bible warnim iumi abaotem wanfala “nogud woman.” Hem sei: “Haos blong woman ya hemi ples fo dae.” (Provebs 2:11-19, SIPB) Lo Provebs 5:3-10 hem storyim nara ‘woman wea laek fo durong’ wea ‘lidim man go lo ples fo dae.’

8. Wanem disison nao iumi mas mekem?

⁸ Olketa wea herem datfala “stupid woman” mas disaed if bae olketa acceptim or rejectim invitation blo hem. Maet iumi tu feisim semkaen disison. Wat nao bae iumi duim if samwan switim iumi for durong or seknomoa iumi lukim pornography kamap lo social media and lo Internet?

9-10. Wat nao samfala reason why iumi mas avoidim wei for durong?

⁹ Samfala gud reason stap why iumi mas avoidim wei for durong. Bible storyim hao datfala “stupid woman” sei: ‘Wata wea olketa stilim, hem suit!’ Wat nao datwan minim? Bible comparem sex between hasband and waef witim fresh wata. (Provebs 5:15-18, SIPB) Man and woman wea marit blo tufala hem legal nomoa savve enjoyim sex. Bat datfala ‘wata wea olketa stilim’ no olsem. Hem savve minim wei for durong. Staka taem pipol savve durong haed, olsem man for steal hem stealim samting haed. Maet datfala ‘wata wea olketa stilim’ hem swit, if olketa wea duim datwan tingse no eniwan bae faendaot lo wat olketa duim. Bat olketa laea lo olketa seleva, bikos Jehovah lukim evri samting! Worse samting wea savve happen lo iumi, hem taem Jehovah no hapi lo iumi, so datwan hem nating “suit.” (1 Cor. 6:9, 10) Bat samfala nara nogud samting tu savve happen.

¹⁰ For durong savve kosim wei for shame, feel iusles, babule nating, and famili brek daon. Tru nao, hem wise for rejectim invitation for go lo “haos” blo datfala stupid woman and kaikai. Staka wea durong dae lo spiritual wei and kasem tu nogud sik wea killim olketa dae kwiktaem. (Prov. 7:23, 26) Provebs 9:18 sei: ‘Olketa wea go insaet haos blo hem godaon finis insaet long grev.’ Why nao staka savve nomoa bae olketa kasem nogud samting, bat olketa acceptim invitation blo datfala stupid woman?​—Prov. 9:13; Provebs 9:14-18, SIPB.

11. Taem man lukluk lo pornography, why nao datwan savve barava spoelem hem?

¹¹ Wanfala trap nao hem pornography. Samfala tingse for lukluk lo pornography no savve spoelem man. Bat pornography savve spoelem man, mekem man no respectim hemseleva and olketa narawan, and man savve addict lo hem tu. Nomata man lukim for lelebet taem nomoa, hard for hem savve aotem from mind. And tu, pornography no savve killim dae feeling for durong, bat hem just strongim go moa datfala feeling. (Col. 3:5; Jas. 1:14, 15) Tru nao, staka wea lukluk lo pornography gogo olketa durong.

12. Wat nao iumi savve duim for avoidim olketa piksa wea savve mekem iumi garem feeling for laek durong?

¹² Wat nao iumi shud duim if seknomoa pornography piksa appear lo electronic device blo iumi? Lo semtaem, iumi shud stop for luk lo datfala piksa. Iumi savve duim datwan if iumi barava tinghae lo frenship blo iumi witim Jehovah. Samfala taem olketa piksa wea iumi tingse hem no pornography maet mekem iumi garem feeling for laek durong. Why nao iumi shud avoidim olketa piksa olsem? Bikos iumi no even laek for duim eniting wea bae mekem iumi duim adultery lo heart blo iumi. (Matt. 5:28, 29) David, wanfala elder lo Thailand sei: “Mi askem miseleva: ‘Nomata olketa piksa hia no pornography, hao, Jehovah bae hapi lo mi if mi gohed lukluk lo olketa piksa hia?’ Taem mi ting olsem, hem helpem mi for duim wise samting.”

13. Wat nao savve helpem iumi for duim wise samting?

¹³ Taem iumi fraet for duim samting wea bae mekem Jehovah no hapi, datwan bae helpem iumi for duim wise samting. For fraet lo God hem “stat” or faondeson “blong waes.” (Provebs 9:10, SIPB) Iumi minim klia diswan taem iumi readim first part blo Proverbs chapter 9, wea storyim hao nara woman hem representim wisdom.

ACCEPTIM INVITATION BLO WISE WOMAN

14. Wat nao nara invitation wea Provebs 9:1-6 storyim?

¹⁴ Readim Provebs 9:1-6, SIPB. Diswan hem invitation from Jehovah, Creator blo iumi wea hem nao Source and Faondeson blo tru wisdom. (Prov. 2:6; Rome 16:27) Lo hia iumi read abaot wanfala big haos wea garem sevenfala post. Diswan piksarem hao Jehovah kaen tumas and welkamim olketa wea laek followim wisdom blo hem.

15. Wat nao God invaetem iumi for duim?

¹⁵ Jehovah kaen tumas and provaedem staka gud samting. Proverbs chapter 9 storyim hao datfala woman wea representim wisdom showimaot tufala wei hia. Lo datfala story, woman hia preparem meat, wine, and arrangem gud tebol lo haos blo hem. (Provebs 9:2, SIPB) Then lo verse 4 and 5, woman hia sei: ‘Yufala wea no garem gudfala tingting, yufala kam kaikai.’ Why nao iumi shud go lo haos blo hem and kaikaim kaikai wea hem preparem? Jehovah laekem olketa pikinini blo hem for wise and sef. Hem no laekem iumi for duim olketa mistek wea bae mekem iumi for regret. Dastawe “hemi helpem stret pipol fo kamap waes.” (Provebs 2:7, SIPB) Taem iumi fraet lo Jehovah, bae iumi laek for mekem hem hapi. Iumi herem olketa kaonsel blo hem and hapi for followim.​—Jas. 1:25.

16. Taem Alain fraet lo God, hao nao datwan helpem hem for mekem wise disison, and wat nao result?

¹⁶ Tingim hao wei for fraet lo God helpem Alain for mekem wise disison. Alain wea hem wanfala elder and skul teacher sei: “Staka lo olketa colleague blo mi ting, olketa pornography movie savve teachim man abaotem sex.” Bat Alain luksavve datwan no tru. Hem sei: “From mi fraet lo God, mi barava les for lukim olketa movie hia. Mi explainim lo olketa colleague blo mi why mi duim olsem.” Alain followim advaes blo datfala wise woman taem hem followim road blo understanding. (Prov. 9:6) Samfala lo olketa teacher hia tinghae lo disison blo Alain and distaem olketa studyim Bible and attendim meeting.

17-18. Olketa wea acceptim invitation blo datfala wise woman enjoyim wanem blessing, and wat nao olketa luk forward for hem? (Lukim tu piksa.)

¹⁷ Jehovah iusim tufala tokpiksa woman hia for showim hao for iumi garem hapi future. Hem swit lo olketa wea acceptim invitation blo datfala “stupid woman” taem olketa duim haed olketa nogud samting. Olketa laekem tumas for duim nomoa samting wea mekem olketa for hapi distaem and no tingim future. Result blo datwan, olketa bae go daon insaed grev.​—Prov. 9:13, 17, 18.

¹⁸ Future blo olketa wea acceptim invitation blo datfala wise woman hem barava difren! Olketa enjoyim staka naes spiritual kaikai lo datfala tebol wea hem barava arrangem gud. (Isa. 65:13) Jehovah iusim profet Isaiah for sei: “Lisin gud kam, and kaikaim gudfala kaikai, and iufala bae satisfae lo samting wea barava gud.” (Isa. 55:1, 2) Iumi lane for lovem wat Jehovah lovem and heitim wat hem heitim. (Ps. 97:10) And iumi hapi bikos iumi invaetem olketa narawan for lane from datfala tru wisdom. Hem olsem iumi “stanap long hae ples long taon an kolaot go long evriwan olsem, ‘!Yufala hu i no garem save, yufala kam!’” Iumi and olketa wea lisin lo iumi bae kasem gud samting distaem and for olowe. Iumi bae kasem “laef” olowe taem iumi gohed followim road blo understanding.​—Provebs 9:3, 4, 6, SIPB.

19. Olsem Ecclesiastes 12:13, 14 storyim, wat nao iumi disaed strong for duim? (Lukim tu box “Gud Samting From Wei for Fraet lo God.”)

¹⁹ Readim Ecclesiastes 12:13, 14.d Lo olketa last day wea barava nogud, taem iumi fraet lo God datwan bae gohed protectim heart blo iumi and helpem iumi for keepim wei blo iumi klin and gohed fren klos witim Jehovah. Datfala stretfala wei for fraet lo God bae gohed mekem iumi for invaetem olketa narawan for lukaotem tru wisdom and kasem gud samting from datwan.