Wat Nao Olketa Key for Understandim Bible?

Ansa from Bible

Bible storyim olketa key for understandim Bible. Nomata wat nao baekgraon blo iu, message blo God insaed Bible “hem no hard tumas for iufala and hem no farawe from iufala.”—Deuteronomy 30:11.

Olketa key for understandim Bible

1. Garem raet attitude. Acceptim dat Bible hem Word blo God. Mas hambol bikos God againstim olketa wea praod. (1 Thessalonians 2:13; James 4:6) Bat, avoidim wei for bilivim eni samting nomoa, bikos God laekem iu for iusim “wei for ting raonem samting.”—Romans 12:1, 2.

2. Prea for wisdom. Bible sei lo Proverbs 3:5, “No depend lo savve blo iuseleva.” Instead, “gohed askem God” for wisdom mekem iu understandim Bible.—James 1:5.

3. Mas consistent. Iu bae kasem staka gud samting sapos iu studyim Bible evritaem winim for studyim Bible wantaem nomoa.—Joshua 1:8.

4. Study followim topic. Sapos iu study followim topic, bae iu savve lo wat Bible talem abaotem wanfala particular topic or subject, wea datwan bae helpem iu for lanem wat nao Bible teachim. Start witim “olketa main leson” firstaem, then bihaen “studyim olketa deep teaching.” (Hebrews 6:1, 2, Easy-to-Read Version) Iu bae lukim dat iu savve comparem wanfala scripture witim nara scripture and lanem hao olketa difren part lo Bible agree witim each other, even olketa part wea hem “hard for man minim gud.”—2 Peter 3:16.

5. Askem help from olketa narawan. Bible encouragem iumi for acceptim help from olketa narawan wea understandim gud Bible. (Acts 8:30, 31) Olketa Jehovah’s Witness offerim free Bible study program. Olsem olketa Christian lo first century, olketa iusim olketa nara scripture for helpem olketa narawan lanem wat nao really samting wea Bible teachim.—Acts 17:2, 3.

Tings iu no needim

1. Garem big savve or education. Twelvfala aposol blo Jesus understandim olketa Scripture and teachim lo olketa narawan, nomata samfala pipol ting dat olketa aposol ‘no skul gud and man nating nomoa.’—Acts 4:13.

2. Selen. Hem free nomoa for iu lanem wat Bible teachim. Jesus talem olketa disaepol blo hem: “Iufala kasem free, givim free nomoa.”—Matthew 10:8.