Near-Death Experience​—Wat Hem No Minim

Ansa from Bible

Staka pipol wea olketa klosap dae sei, olketa tingim olketa separate from body blo olketa or lukim wanfala braet laet or lukim wanfala ples wea luk naes tumas. Datfala buk Recollections of Death sei, ‘samfala pipol talem dat olketa garem chance for lukim nara ples.’ Nomata Bible no mentionim eni near-death experience, hem garem important truth wea showim no eni vision stap abaotem laef lo nara ples.

Olketa wea dae olketa unconscious.

Bible sei olketa wea dae “no savve lo eni samting.” (Ecclesiastes 9:5) So taem iumi dae, iumi no go lo eni ples or tingting abaotem eni ples, bat iumi no exist nao. Datfala teaching wea sei soul blo iumi go laef samwea afta iumi dae, hem no stap lo Bible. (Ezekiel 18:4) Dastawe, eniwan wea klosap dae no savve sei hem lukim heven, hell, or eni ples for laef afta man dae.

Wat nao Lazarus talem abaotem taem hem dae?

Story blo Lazarus wea stap lo Bible hem describem tru experience blo dae: Jesus nao resurrectim hem afta hem dae for fofala day finis. (John 11:38-​44) If hem tru Lazarus go stap lo wanfala naes ples afta hem dae, hem no mek sense for Jesus mekem hem laek bak lo earth. And tu, Bible no recordim eni koment blo Lazarus abaotem wat hem experiencem afta hem dae. If Lazarus go enjoyim laef samwea afta hem dae, for sure bae hem storyim datwan. Interesting samting, Jesus describem dae blo Lazarus olsem man wea sleep nomoa, wea showim taem man hem dae, hem barava no savve lo eni samting.​—John 11:11-​14.