Wat Nao Olketa Namba lo Bible Minim? Hao, Numerology Hem Kam From Bible?
Ansa from Bible
Samtaems olketa namba lo Bible savve literal, bat samtaems hem representim samting. Usually context nao bae showim if wanfala namba hem representim samting or hem literal namba. Tingim olketa example hia, blo olketa symbolic mining lo olketa namba lo Bible:
1 Unity. For example, Jesus prea lo God for olketa follower blo hem for “evriwan lo olketa wan nomoa, olsem iu Dadi, iu wan mind witim mi, and mi wan mind witim iu.”—John 17:21; Matthew 19:6.
2 Lo legal setting, tufala witness savve verifyim if wanfala samting hem tru. (Deuteronomy 17:6) Lo sem wei, for talem wanfala vision or statement tu taems, hem confirmim dat datfala samting hem tru and olketa sure lo hem. For example, taem Joseph interpretim dream blo Pharaoh blo Egypt, hem sei: “Wei wea Pharaoh dream tufala taem hem minim datfala tru God hem disaedem finis for duim evri samting hia.” (Genesis 41:32) And tu, lo profesi, “tufala horn” savve representim dual rulership, olsem profet Daniel talem abaotem Medo-Persian Empire.—Daniel 8:20, 21; Revelation 13:11.
3 Lo sem wei wea thrifala witness givim strong pruv dat wanfala samting hem tru, if man repeatim samting thri taems datwan showim hem sure lo wat hem talem and hem tru.—Ezekiel 21:27; Acts 10:9-16; Revelation 4:8; 8:13.
4 Savve representim wanfala samting wea complete, olsem expression “fofala kona blo earth.”—Revelation 7:1; 21:16; Isaiah 11:12.
6 Evritaem namba seven hem representim samting wea complete, namba six stand for samting wea no complete or imperfect or samting wea associate witim olketa enemy blo God.—1 Chronicles 20:6; Daniel 3:1; Revelation 13:18.
7 Staka taem olketa iusim disfala namba for representim samting wea complete. For example, God komandim olketa Israelite for march raonem Jericho for seven days and lo mek-seven day bae olketa march raonem datfala taon seven taems. (Joshua 6:15) Bible garem staka similar example wea iusim namba seven. (Leviticus 4:6; 25:8; 26:18; Psalm 119:164; Revelation 1:20; 13:1; 17:10) Taem Jesus talem Peter dat hem shud forgivim brata blo hem “no sevenfala taem nomoa, bat go kasem 77 taems,” wei wea hem repeatim namba ‘seven’ hem conveyim idea for gohed for forgive.—Matthew 18:21, 22.
10 Disfala namba savve stand for complete samting or samting wea combine.—Exodus 34:28; Luke 19:13; Revelation 2:10.
12 Disfala namba savve minim tu wanfala complete arrangement. For example, datfala vision from heven wea aposol John lukim hem includim tu wanfala taon wea “12-fala ston lo faondeson blo hem, and lo olketa ston hia hem garem 12-fala nem blo 12-fala aposol.” (Revelation 21:14; Genesis 49:28) Evri namba wea hem multiply by 12 hem garem sem mining.—Revelation 4:4; 7:4-8.
40 Samfala judgment or panisment hem join witim namba 40.—Genesis 7:4; Ezekiel 29:11, 12.
Numerology and gematria
Symbolic mining blo olketa namba hia wea Bible story abaotem hem difren from numerology, wea involvim wei for lukaotem occult mining lo olketa namba, combination lo olketa namba, and total namba. For example, Jewish Cabalists analyzim olketa Hebrew Scripture and hem iusim wanfala teknik wea olketa kolem lo gematria, for lukaotem wanfala hidden code lo namba for olketa leta. Numerology hem wanfala form of divination, wea God no laekem.—Deuteronomy 18:10-12.