Hao, Enitaem Eniwan Lukim God?
Ansa from Bible
No eni human hem literally lukim God. (Exodus 33:20; John 1:18; 1 John 4:12) Bible sei dat “God hem wanfala Spirit,” hem wanfala form blo laef wea man no savve lukim lo eye.—John 4:24; 1 Timothy 1:17.
Bat olketa angel savve lukim God bikos olketa spirit creature. (Matthew 18:10) And tu, samfala man wea dae wea bae laef lo heven witim spirit body, olketa tu bae lukim God.—Philippians 3:20, 21; 1 John 3:2.
Hao for “lukim” God distaem
Staka taem Bible savve iusim datfala idea for lukim lo figurative wei, for representim wat man bae kasem. (Isaiah 6:10; Jeremiah 5:21; John 9:39-41) Lo disfala wei, wanfala person savve lukim God distaem witim “eye blo heart [blo hem],” taem hem garem faith from hem savve lo God and appreciatim olketa quality blo hem. (Ephesians 1:18) Bible storyim olketa step for buildim kaen faith olsem.
Lane abaotem olketa quality blo God olsem love, wei wea hem kaen tumas, wisdom and paoa blo hem, thru lo olketa samting wea hem creatim. (Romans 1:20) Afta God remindim faithful man Job abaotem olketa samting wea hem creatim, Job feel olsem hem lukim God witim eye blo hem.—Job 42:5.
Studyim Bible for savve lo God. Bible sei: “Sapos iu lukaotem [God], iu bae faendem hem.”—1 Chronicles 28:9; Psalm 119:2; John 17:3.
Study abaotem laef blo Jesus for savve lo God. From Jesus showim lo perfect wei olketa personality blo Dadi blo hem, Jehovah God, hem fit for sei: “Eniwan wea lukim mi hem lukim Dadi tu.”—John 14:9.
Duim wat God hapi lo hem, and lukim hao hem helpem iu. Jesus sei: “Olketa wea garem gudfala heart, olketa hapi, bikos olketa bae lukim God.” Olsem iumi storyim finis ontop, God bae resurrectim samfala wea duim wat hem hapi lo hem for laef lo heven, and olketa tu bae “lukim God” lo there.—Matthew 5:8; Psalm 11:7.
Hao Moses, Abraham, and olketa narawan actually lukim God?
Maet samfala story lo Bible showim dat olketa human literally lukim God, bat context hem showim dat angel nao representim God lo dat taem or God hem appear thru lo wanfala vision.
Olketa angel.
Lo taem bifor, God sendem olketa angel for representim hem for go lo olketa man and story lo nem blo hem. (Psalm 103:20) For example, wantaem God story lo Moses from wanfala thornbush tree wea bone, and Bible sei “Moses haedem feis blo hem bikos hem fraet for luk lo datfala tru God.” (Exodus 3:4, 6) Moses no literally lukim God, bikos context showim dat hem actually lukim “angel blo Jehovah.”—Exodus 3:2.
Hem semsem tu olsem taem Bible sei God “story feis tu feis witim Moses,” hem minim God story witim Moses olsem fren blo hem. (Exodus 4:10, 11; 33:11) Moses no lukim feis blo God, bikos information wea hem kasem from God hem thru “lo olketa angel.” (Galatians 3:19; Acts 7:53) Nomata olsem, Moses garem strong faith lo God and Bible sei hem “lukim God wea no eniwan savve lukim.”—Hebrews 11:27.
Lo sem wei wea God story lo Moses, hem story tu witim Abraham thru lo olketa angel. Hem tru, taem man readim Bible maet hem ting dat Abraham hem literally lukim God. (Genesis 18:1, 33) Bat, context showim dat “thrifala man” wea kam lukim Abraham, olketa angel wea God nao sendem olketa. Abraham luksavve olketa representative blo God and hem story lo olketa olsem hem story direct lo Jehovah.—Genesis 18:2, 3, 22, 32; 19:1.
Olketa vision.
God appear tu lo olketa human thru lo olketa vision, or olketa scene wea man lukim lo mind blo hem. For example, taem Bible sei Moses and olketa nara Israelite “lukim God blo Israel,” really olketa “lukim datfala tru God insaed wanfala vision.” (Exodus 24:9-11) Semsem tu, samtaems Bible sei olketa profet “lukim Jehovah.” (Isaiah 6:1; Daniel 7:9; Amos 9:1) Lo each case, context nao showim dat olketa kasem vision blo God, bat olketa no lukim God witim literal eye.—Isaiah 1:1; Daniel 7:2; Amos 1:1.