Hao, Jesus Hem Marit? Hao, Hem Garem Olketa Sibling?
Ansa from Bible
Nomata Bible no story specific abaotem maritial status blo Jesus, hem talem klia dat Jesus hem no marit.a Tingim olketa point hia.
Staka taem Bible story abaotem famili blo Jesus, olketa woman wea savve go tugeta witim hem taem hem duim ministry blo hem and olketa wea stap witim hem taem olketa killim hem dae, bat no enitaem hem mentionim dat Jesus hem garem waef. (Matthew 12:46, 47; Mark 3:31, 32; 15:40; Luke 8:2, 3, 19, 20; John 19:25) Why Bible no story abaotem diswan hem bikos Jesus hem no marit.
Jesus talem olketa disaepol blo hem dat samfala disaed for no marit mekem olketa savve duim moa samting lo service blo God, hem sei: “Sapos man hapi for stap olsem [singol] hem gud nomoa.” (Matthew 19:10-12) Hem showim example for olketa wea chus for no marit in order for duim moa samting for God.—John 13:15; 1 Corinthians 7:32-38.
Just bifor Jesus dae, hem arrange for samwan lukaftarem mami blo hem. (John 19:25-27) If Jesus marit or garem olketa pikinini, hem bae mek sure for samwan stap for provaedem need blo olketa hia tu.
Bible iusim Jesus olsem example for olketa hasband, bat hem no refer for wei wea Jesus treatim gud wanfala woman wea hem maritim. Instead, Bible sei: “Iufala olketa hasband mas gohed for lovem waef blo iufala, olsem Christ tu hem lovem kongregeson and givim laef blo hem for datwan.” (Ephesians 5:25) If Jesus hem marit taem hem lo earth, bae disfala verse talem stret dat Jesus hem perfect example for olketa hasband lo hao hem treatim waef blo hem.
Hao, Jesus garem olketa sibling?
Yes, Jesus garem sixfala sibling. Diswan includim brata blo hem James, Joseph, Simon, and Judas and tufala sista tu. (Matthew 13:54-56; Mark 6:3) Olketa hia hem olketa pikinini blo mami blo Jesus, Mary, witim hasband blo hem, Joseph. (Matthew 1:25) Bible kolem Jesus “firstborn” blo Mary, wea minim Mary garem samfala nara pikinini moa bihaen.—Luke 2:7.
Tingting wea no stret abaotem olketa brata blo Jesus
Samfala pipol applyim difren mining lo datfala term “olketa brata,” in order for sapotim idea wea sei Mary hem virgin for full laef blo hem. For example, samfala ting dat olketa brata blo Jesus, really hem olketa son blo Joseph lo marit blo hem bifor. Bat, Bible showim dat Jesus garem legal raet for rul olsem God promisim lo David. (2 Samuel 7:12, 13; Luke 1:32) If Joseph garem olketa son wea older than Jesus, then older wan lo olketa son hia nao bae garem legal raet for rul.
Hao, datfala toktok refer for olketa disaepol blo Jesus, or olketa spiritual brata blo hem? Disfala idea hem conflict witim wat Bible talem, bikos Bible sei wan taem “olketa brata blo Jesus no showimaot faith lo hem.” (John 7:5) Bible talem dat olketa brata blo Jesus difren from olketa disaepol blo hem.—John 2:12.
According lo nara theory, hem sei olketa brata blo Jesus hem olketa kasin blo hem. Bat, lo olketa Greek Scripture hem iusim olketa difren word for “brata,” “relative,” and “kasin.” (Luke 21:16; Colossians 4:10) Staka Bible scholar acknowledgim dat olketa brata and sista blo Jesus olketa real sibling blo hem. For example, The Expositor’s Bible Commentary sei: “Most natural wei for understandim ‘olketa brata’ . . . datfala term hem refer lo olketa son blo Mary and Joseph and hem olketa brata blo Jesus wea mami blo hem bornem.”b
a Bible refer lo Christ olsem wanfala bridegroom, bat context mekem klia dat diswan hem symbolic nomoa.—John 3:28, 29; 2 Corinthians 11:2.
b Lukim tu The Gospel According to St. Mark, Second Edition, by Vincent Taylor, page 249, and A Marginal Jew—Rethinking the Historical Jesus, by John P. Meier, Volume 1, page 331-332.