Hu or Wat Nao Olketa Angel?
Ansa from Bible
Olketa angel garem big paoa and olketa strong winim iumi olketa human. (2 Peter 2:11) Olketa stap lo heven, or lo ples blo olketa spirit, wea barava hae winim physical universe. (1 Kings 8:27; John 6:38) Bible sei olketa angel olketa spirit.—1 Kings 22:21; Psalm 18:10.
Wea nao olketa angel kam from?
God iusim Jesus for creatim olketa angel, dastawe Bible sei “hem firstborn lo evri samting wea God creatim.” For describem hao God iusim Jesus for creatim evri samting, Bible sei: “God iusim [Jesus] for wakem evri nara samting lo heven and lo earth, olketa samting wea iumi lukim and olketa samting wea iumi no savve lukim,” includim tu olketa angel. (Colossians 1:13-17) Olketa angel no marit and no garem pikinini. (Mark 12:25) Bat, each wan hem “olketa son blo tru God” bikos God nao creatim each wan lo olketa.—Job 1:6.
Olketa angel stap longtaem kam finis, bifor earth hem exist. Taem God creatim earth, olketa angel “start for singaot big bikos olketa hapi.”—Job 38:4-7.
Hao many angel nao stap?
Bible no talem exact namba, bat hem showim staka angel nao stap. For example, lo wanfala vision wea aposol John lukim, staka million angel nao stap.—Revelation 5:11.
Hao, each angel garem nem and personality?
Yes. Bible talem nem blo tufala angel, Michael and Gabriel. (Daniel 12:1; Luke 1:26)a Olketa nara angel tu sei olketa garem nem, bat olketa no laek for talem.—Genesis 32:29; Judges 13:17, 18.
Olketa angel garem difren personality. Olketa savve communicate witim each other. (1 Corinthians 13:1) Olketa garem thinking ability and olketa savve talem toktok for praisem God. (Luke 2:13, 14) And olketa garem freedom for chusim wat hem stret and rong, olsem iumi lukim samfala lo olketa wea joinim Satan datfala Devil for rebel againstim God.—Matthew 25:41; 2 Peter 2:4.
Hao, olketa angel garem difren rank?
Yes. Angel wea garem big paoa and hae position hem Michael, datfala archangel. (Jude 9; Revelation 12:7) Olketa seraph olketa angel wea garem hae rank for standap klosap lo throne blo Jehovah. (Isaiah 6:2, 6) Olketa cherub tu olketa hae rank angel wea savve duim olketa spesol waka. For example, olketa cherub nao gaedem entrance blo garden lo Eden, afta Jehovah aotem Adam and Eve.—Genesis 3:23, 24.
Hao, olketa angel savve helpem pipol?
Yes, God iusim olketa faithful angel blo hem for helpem pipol distaem.
God iusim olketa angel for leadim olketa servant blo hem for preachim gud nius abaotem Kingdom blo God. (Revelation 14:6, 7) From datwan, hem helpem olketa wea preach and olketa wea herem gud nius.—Acts 8:26, 27.
Olketa angel help for protectim Christian kongregeson from wicked pipol.—Matthew 13:49.
Olketa angel gaedem and protectim olketa wea faithful lo God.—Psalm 34:7; 91:10, 11; Hebrews 1:7, 14.
Klosap nao, olketa angel bae help for solvem evri problem wea mekem iumi olketa man safa taem olketa helpem Jesus Christ for finisim evri wicked wei.—2 Thessalonians 1:6-8.
Hao, each wan lo iumi garem guardian angel?
Nomata olketa angel lukaftarem olketa servant blo God lo spiritual wei, diswan no minim God assignim wanfala angel olsem personal guardian for each Christian.b (Matthew 18:10) Olketa angel no protectim olketa servant blo God from evri hard taem or temptation. Bible talem dat staka taem God bae ‘mekem iumi fit for deal witim’ wanfala challenge, taem hem givim iumi wisdom and strong for no givap.—1 Corinthians 10:12, 13; James 1:2-5.
Tingting wea no stret abaotem olketa angel
Tingting wea no stret: Evri angel olketa gud.
Tru samting: Bible story abaotem “olketa wicked spirit” and ‘olketa angel wea sin.’ (Ephesians 6:12; 2 Peter 2:4) Olketa wicked angel hia, olketa nao olketa demon wea joinim Satan for rebel againstim God.
Tingting wea no stret: Olketa angel no savve dae.
Tru samting: God bae finisim olketa wicked angel, includim Satan datfala Devil.—Jude 6.
Tingting wea no stret: Taem pipol dae olketa change go lo olketa angel.
Tru samting: God nao creatim olketa angel, olketa no human wea resurrect. (Colossians 1:16) Pipol wea resurrect for go ap lo heven, olketa kasem present from God for laef olowe lo heven. (1 Corinthians 15:53, 54) Olketa bae garem hae position winim olketa angel.—1 Corinthians 6:3.
Tingting wea no stret: Olketa angel stap for waka for iumi olketa man.
Tru samting: Olketa angel obeyim olketa toktok blo God, no iumi olketa man. (Psalm 103:20, 21) Even Jesus tu talem dat hem savve askem God for helpem hem, hem no ask direct lo olketa angel.—Matthew 26:53.
Tingting wea no stret: Iumi savve prea lo olketa angel for helpem iumi.
Tru samting: Prea hem part lo worship blo iumi for God, wea datwan hem for Jehovah God nomoa. (Revelation 19:10) Iumi shud prea lo God nomoa, thru lo Jesus.—John 14:6.
a Lo Isaiah 14:12, samfala Bible transleison iusim disfala term “Lucifer,” wea samfala sei hem nem blo wanfala angel wea kamap Satan datfala Devil. Bat, original Hebrew word wea olketa iusim hem minim “son blo daylaet wea iu shaen.” Lo context hem showim dat term hia hem no minim Satan, bat hem refer for olketa difren king lo Babylon wea God bae mek shame lo olketa bikos olketa praod. (Isaiah 14:4, 13-20) Olketa iusim disfala expression “son blo daylaet wea iu shaen” for mek fani lo olketa king blo Babylon afta olketa nara kantri winim olketa.
b Taem samfala herem story blo Peter dat hem release from prison, olketa tingse Peter garem wanfala guardian angel. (Acts 12:6-16) Bat, taem olketa disaepol storyim “angel blo [Peter],” maet olketa tingse wanfala angel for talem message wea representim Peter nao kam lo olketa, ino real Peter.