KAVA SUBJECT
Taem Disaster Strike—Wat for Duim for Sevem Laef
“Wanfala big explosion mekem mi klosap foldaon lo floor. Smoke kamaot from olketa air vent, and office blo mifala wea stap lo high-rise building hem bone.”—Joshua.
Earthquake . . . hurricane . . . terrorist attak . . . skul shooting. Olketa toktok hia savve appear lo hedlaen blo nius staka taem. Hem tru, for read abaotem eni disaster hem wanfala samting; bat for experiencem datwan hem nara story. Wat nao iu savve duim bifor, during, and afta wanfala disaster strike mekem iu garem hae chance for survive?
BIFOR—PREPARE!
NO ENIWAN savve misstim disaster. For prepare hem most important key for survive. Bat hao nao samwan savve prepare for disaster?
Prepare mentally. Acceptim dat disaster hia hem happen and iu and olketa loved wans blo iu maet stap lo danger. Hem tu leit for prepare afta disaster hem strike.
Faendaot wat kaen disaster savve happen lo ples wea iu stap. Savve lo ples wea olketa shelter stap. Chekim if haos blo iu and location blo hem, hem sef or nomoa. Removim eniting wea savve kosim fire. Installim smoke detector, and changem battery at least once a year, or tu-thri taem lo year.
Preparem emergency supply. Paoa, wata, phone, and transportation service savve fail. If iu garem vehicle, at least keepim fuel tank haf full, and evritaem redyim kaikai, wata, and wanfala emergency kit lo haos blo iu.—Lukim box “Hao, Iu Redyim Evriting Iu Needim?”
For prepare hem most important key for survive
Garem phone namba blo olketa frens, wea stay klosap lo iu and lo nara ples.
Garem escape plan and practicem. Mas savve lo nearest exit lo building wea iu stap, and emergency plan blo skul wea olketa pikinini blo iu skul lo hem. Markem meeting point wea evriwan lo famili bae go lo hem—olsem lo skul or lo library—wanfala meeting point klosap and narawan farawe from wea iu stap. Olketa authority recommendim dat iu and famili blo iu practice for wakabaot go lo tufala meeting point wea iufala markem.
Plan for helpem others, includim olketa olo and olketa wea sik.
DURING—DUIM SAMTING KWIKTAEM
“Taem fire hem start, staka nating panic—bat olketa delay for react,” hem nao wat Joshua, wea iumi storyim lo start blo article hem talem. “Samfala offem computer or go refillim wata botol. Wanfala man sei, ‘Ating iumi shud just weit.’” Nomata others delay, Joshua shout olsem: “Iumi mas go aot from hia distaem!” Datwan mekem olketa workmate blo hem seke and kwiktaem followim hem go daon lo stairs. “If eniwan foldaon, karem hem and continue go daon,” Joshua gohed singaot. “Bae iumi evriwan olraet!”
Taem blo fire. Bendaon klosap lo floor and kwiktaem go lo nearest exit. Smoke savve mekem hem hard for man lukluk, and staka wea dae hem bikos olketa breathim in smoke. No wari for tekem olketa personal item blo iu. Tu-thri seconds nomoa savve mekem big difference between laef and dae.
Taem blo earthquake. Haed andanit eni strong furniture or standap next lo wanfala wall insaed building. Expectim olketa aftershock, and go aotsaed and go from olketa building as soon as possible. Olketa rescuer wea kasem training maet tek longtaem for arrive, so trae for rescuem others if possible.
Taem blo tsunami. If wata hem kwiktaem go bak and shore hem drae, ranawe kwiktaem lo ples wea hae. Expectim staka moa wave and olketa big wave.
Taem blo tornado or hurricane. Kwiktaem go lo storm shelter.
Taem blo flood. Stay away from olketa building wea flood go insaed. No wakabaot or draev thru lo wata. Floodwata savve garem sewage and dangerous samting, olsem rabis, open manhole, and olketa paoa laen wea foldaon.
Hao, iu savve tu? Tu feet [0.6 m] nomoa blo wata wea ran savve tekem wanfala car. Staka wea dae lo flood hem result blo pipol wea trae for draev thru lo wata wea ran.
If olketa authority givim order for evacuate, stretawe lusim datfala ples! Letem frens blo iu savve wea nao iu, nogud nao olketa riskim laef blo olketa bikos olketa lukaotem iu.
If olketa authority givim order for evacuate, stretawe lusim datfala ples!
Hao, iu savve tu? Text message maet hem moa reliable winim for ring.
If olketa authority givim order for pipol no lusim haos or stay insaed haos, duim datwan. If hem wanfala outdoor chemical, biological, or nuclear accident or attak, stay insaed haos, offem ventilation, and sealim gud evri door and window. If hem wanfala nuclear attak, go lo lowest part blo building wea iu stay for reducem exposure lo radiation. Lisin lo lokol TV or nius lo radio. Stay insaed haos go kasem taem wea olketa authority announcem datfala danger hem finis.
AFTA—KEEP SEF!
For iu no kasem disease and no stap lo danger, tingim olketa recommendation hia:
Stay witim olketa frens, if hem possible, winim for stay lo wanfala camp.
Keepim klin ples wea iu stap.
Iusim protective equipment taem iu klinim rabis. If possible, werem gloves, safety shoe, hard hat, and dust mask. Beware lo olketa electrical wire and tings wea maet bone yet wea hem stap haed.
Gohed followim daily routine as much as possible. Hem gud for olketa pikinini blo iu lukim dat iu no panic and garem tingting dat bae evriting olraet. Duim olketa skul leson, plei, and olketa spiritual activity tugeta. No lukluk tumas lo nius wea storyim datfala disaster, and no aotem wari and kros blo iu lo olketa famili member. Acceptim help, and helpem others.
Bihaen lo disaster, gohed followim daily routine blo iu as much as possible
Acceptim dat disaster savve mekem iu for lusim staka samting. Gavman and olketa nara relief aid savve focus nomoa for helpem pipol for survive, no for replacem evriting wea lus. For survive, iumi needim klin wata, kaikai, kaleko, and ples for stap.—1 Timothy 6:7, 8.
Luksavve dat bae hem affectim emotions blo iu and kasem help. Hao diswan affectim emotions blo iu bae hem showaot bihaen shock blo wat hem happen hem go pas. Samfala symptom nao hem anxiety, depression, and mood swing, and tu for no savve tingting stret, affectim waka, and no sleep gud. Storyim feeling blo iu witim olketa frens wea lovem iu.
Nomata Joshua survivem datfala fire wea happen lo waka ples blo hem, staka wea hem savve lo olketa, olketa dae. Hem kasem help from olketa Christian elder and olketa mental-health professional. Joshua sei: “Olketa talem mi dat olketa sorre emotions wea mi kasem hem part lo natural healing process and gogo bae hem finis. Afta six months, olketa nightmare wea mi kasem hem katdaon. Olketa other symptom hem still stap.”
Taem disaster happen, datwan savve affectim feeling blo iumi for laekem justice. From datwan, samfala pipol mistek for blamem God. Staka narawan, olsem Joshua, experiencem “survivor’s guilt.” Hem sei: “Mi still wonder if mi shud sevem moa pipol. Mi kasem comfort bikos mi bilivim dat klosap nao God bae mekem complete justice kamap lo earth and bae stretem evri rong samting wea happen. Lo distaem, mi appreciatim each day wea mi laef and mi duim wat mi fit for duim for preservem laef blo mi.”—Revelation 21:4, 5.a
a For samfala moa information abaotem olketa promis blo God for future and why hem letem safaring for gohed, lukim buk Wanem Nao Really Samting wea Bible Teachim? Hem available for iu daonlodim lo www.jw.org.