DEAL WITIM WEI WEA PRICE BLO EVRITING GO AP
Lane for Satisfae
Pipol wea satisfae olketa hapi nomoa lo wat olketa garem. And taem situation blo olketa hem change, olketa adjustim laefstael blo olketa for fitim income blo olketa.
WHY DATWAN IMPORTANT
Jessica Koehler wea hem wanfala psychologist storyim dat staka taem pipol wea satisfae garem positive tingting. Hem storyim tu dat pipol olsem no savve jealous lo narawan. Dastawe, pipol wea satisfae olketa evritaem hapi and no stress tumas. Really, samfala happiest pipol hem olketa wea no garem staka material samting. Datwan hem tru, especially for olketa wea tinghae lo olketa important samting lo laef wea selen no savve baem, olsem hapi wea kam from wei for spendem taem witim famili and frens.
WAT IU SAVVE DUIM
Avoidim wei for comparem iu witim narawan. If iu comparem simpol laef blo iu witim samwan wea iu tingse hem garem staka material samting, iu bae no savve satisfae and jealous tu. And, wat iu tingim maet hem no tru. Really, samfala wea garem staka material samting olketa garem big kaon. Nicole, wea stap lo Senegal, sei: “Mi no needim staka samting for mekem mi hapi. If mi satisfae, mi savve hapi nomoa nomata olketa narawan garem staka samting winim mi.”
Traem diswan: Avoidim wei for lukluk lo olketa advertisement or social media post wea mekhae lo wei for rich or expensive laefstael blo olketa narawan.
Garem wei for tinghae. Pipol wea tinghae olketa savve satisfae nomoa lo wat olketa garem and no feel olsem olketa shud kasem moa samting. Roberton, from Haiti, sei: “Mi ting raonem olketa kaenfala samting wea olketa narawan duim for mi and famili blo mi. Then mi talem olketa mi barava tinghae lo wat olketa duim. Mi teachim tu eit-year-old son blo mi for sei thankiu taem hem kasem samting from narawan.”
Traem diswan: Each day, iu savve raetem daon wat iu tinghae lo hem, for example, maet gud health wea iu garem, wei wea iu garem naes famili, tru frens, or wanfala beautiful sunset.
Samfala taem, iumi stragol for satisfae witim wat iumi garem. Bat sapos iumi satisfae bae iumi kasem gud samting! Taem iumi chus for satisfae witim wat iumi garem, iumi chusim tu happiness, wea hem nara quality wea selen no savve baem.