Sapotim Each Other Taem World Hem Gogo for Finis

1, 2. Wanem nao Jehovah laekem for evriwan wea worshipim hem?

WASWE, iu wanfala young wan long kongregeson? Organization bilong Jehovah barava tinghae long iufala olketa young wan. Long staka kantri, staka long olketa wea baptaes hem olketa young wan. Iumi hapi tumas for lukim staka young wan disaed for worshipim Jehovah!

² Waswe, iufala olketa young wan enjoyim wei for kaban witim olketa nara young wan? Maet iu enjoyim datwan. Iumi laek for kaban witim olketa fren wea sem age olsem iumi. Nomata olsem, Jehovah laekem iumi for worshipim hem witim evri brata and sista bilong iumi. Hem laekem pipol bilong hem wea young and olo, and wea garem difren kaen living, for evriwan garem wan mind for worshipim hem tugeta. Aposol Paul sei God “laekem tumas for evri difren kaen man mas sev and for garem stretfala savve abaotem olketa tru teaching.” (1 Tim. 2:3, 4) And Revelation 7:9 sei pipol wea worshipim God olketa kam from “evri kantri and tribe and pipol and languis.”

3, 4. (a) Wanem nao wei bilong staka young pipol long world distaem? (b) Long Ephesus 4:25, Paul sei kongregeson hem olsem wanem?

³ Wei bilong olketa young wan wea worshipim Jehovah hem barava difren from wei bilong olketa young wan wea no worshipim Hem. Staka wea no worshipim Jehovah tingim olketa seleva nomoa and duim nomoa wanem olketa seleva laekem. Samfala savveman sei staka young wan distaem olketa selfish tumas. Toktok and kaleko wea olketa werem showimaot olketa no respectim narawan. And main wan wea olketa no respectim nao hem olketa olo.

⁴ Olketa young wan wea laek for mekem Jehovah hapi mas waka hard for no followim wei bilong young pipol long world. Long first century tu Paul warnim olketa Christian for no garem “tingting bilong pipol long world.” Hem sei datwan hem “garem paoa ovarem olketa wea no obey.” (Readim Ephesus 2:1-3.) Iumi hapi tumas for lukim olketa young wan long kongregeson wea no followim wei bilong pipol long world, bat olketa hapi for worshipim Jehovah witim olketa nara brata and sista. Olketa luksavve kongregeson hem olsem wanfala body wea garem staka difren part wea waka tugeta. Paul hem sei: “Iumi evriwan part long wanfala body nomoa.” (Eph. 4:25) Taem world bilong Satan hem gogo for finis, bae hem barava important for iumi garem wan mind witim olketa brata and sista bilong iumi. Distaem bae iumi storyim samfala Bible example wea bae helpem iumi for tinghae long wei for garem wan mind.

OLKETA SAPOTIM EACH OTHER

5, 6. Wanem nao iumi lanem from samting wea kasem Lot and famili bilong hem?

⁵ Long bifor, samfala pipol bilong Jehovah stap long danger, bat Jehovah protectim olketa taem olketa garem wan mind and sapotim each other. Nomata iumi young or olo, iumi evriwan savve lanem gud samting from olketa example hia. Distaem bae iumi storyim samting wea kasem Lot.

⁶ Lot and famili bilong hem stap long danger bikos Jehovah redi for finisim Sodom, wea hem nao taon wea olketa stap. Jehovah sendem olketa angel for talem Lot for ranawe go long olketa maunten. Olketa angel sei: “Ranawe for sevem laef bilong iufala!” (Gen. 19:12-22) Lot and tufala gele bilong hem obeyim wanem olketa angel talem. Bat, samfala famili member bilong Lot no obey. Taem Lot talem tufala young man wea bae maritim olketa gele bilong hem for olketa mas lusim datfala ples, tufala tingse Lot hem “tok krangge nomoa.” From tufala no bilivim Lot, tufala dae nao taem God distroem datfala taon. (Gen. 19:14) Lot and tufala gele bilong hem nomoa laef bikos olketa obey and sapotim each other.

7. Wanem nao Jehovah duim for olketa Israelite and olketa narawan wea wan mind for lusim Egypt tugeta?

⁷ Tingim tu wanem olketa Israelite duim taem olketa lusim Egypt. Olketa no divaed long olketa smol grup and then each grup go seleva long Promis Land, bat evriwan nao go tugeta. Taem Jehovah divaedem Red Sea, Moses no go seleva or witim samfala Israelite nomoa. Bat datfala full nation nao go witim Moses, and Jehovah protectim olketa. (Ex. 14:21, 22, 29, 30) Staka wea no Israelite tu obeyim warning bilong Jehovah and lusim Egypt witim olketa. Evriwan wan mind for go tugeta and sapotim each other. (Ex. 12:38) Hem bae krangge samting sapos eni smol grup, olsem wanfala grup bilong olketa young wan, go seleva followim tingting bilong olketa. Jehovah bae no protectim eniwan wea garem kaen tingting olsem.—1 Cor. 10:1.

8. Long taem bilong King Jehoshaphat, hao nao pipol bilong God showimaot olketa garem wan mind?

⁸ Long taem bilong King Jehoshaphat, wanfala big army wea strong fogud go for attakim pipol bilong God. (2 Chron. 20:1, 2) Wanem nao olketa Israelite duim taem datfala big army stap raonem olketa? Olketa depend long Jehovah and prea for hem helpem olketa. (Readim 2 Chronicles 20:3, 4.) Taem olketa prea long Jehovah, olketa no stap seleva bat evriwan hipap tugeta for duim datwan. Bible sei: “Long datfala taem evriwan bilong Judah standap front long Jehovah, witim waef bilong olketa, olketa young wan, and olketa pikinini tu.” (2 Chron. 20:13) Evriwan long datfala nation, nomata olketa wea young or olo, trustim Jehovah and duim wanem hem talem olketa for duim. Olketa garem wan mind and Jehovah protectim olketa from datfala enemy. (2 Chron. 20:20-27) Datwan hem gudfala example wea showimaot pipol bilong God shud sapotim each other taem olketa feisim hard taem.

9. Wanem nao iumi savve lanem from example bilong olketa Christian long first century?

⁹ Olketa Christian long first century tu garem wan mind and waka tugeta. Olsem example, bihaen staka Jew and olketa wea no Jew kamap Christian, olketa evriwan followim teaching bilong olketa aposol. “Olketa sharem eni samting wea olketa garem and olketa kaikai and prea tugeta.” (Acts 2:42) And taem olketa Christian kasem persecution, olketa gohed sapotim each other, wea hem nao taem wea olketa barava needim datwan. (Acts 4:23, 24) Taem iumi kasem persecution, iumi tu mas garem wan mind and sapotim each other.

IUMI MAS WAN MIND BIFOR DAY BILONG JEHOVAH KAM

10. Wanem taem nao bae hem barava important for iumi garem wan mind?

¹⁰ Klosap nao disfala world bae kasem barava hard taem winim eni narataem. Profet Joel sei hem bae “wanfala day bilong darkness.” (Joel 2:1, 2; Zeph. 1:14) Long datfala taem pipol bilong God mas barava wan mind. Tingim disfala toktok bilong Jesus: “Sapos pipol long wanfala kantri faet againstim olketa seleva bae datfala kantri hem nogud nao.”—Matt. 12:25.

11. Wanem nao pipol bilong God distaem lanem from Psalm 122:3, 4? (Lukim piksa long start bilong study.)

¹¹ Long taem wea disfala world bae finis, hem bae important for iumi garem wan mind and barava sapotim each other. Iumi savve lanem important samting abaotem diswan from wei wea olketa long Jerusalem bifor wakem haos bilong olketa. From olketa wakem haos bilong olketa barava klosap long narawan, man wea raetem psalm sei datfala taon hem luk olsem “hem join tugeta.” Pipol long there feel sef bikos olketa barava stap klosap long each other, so hem isi for helpem and protectim narawan. And tu, wei wea olketa haos hia stap klosap tugeta maet hem piksarem olketa tribe bilong Israel wea garem wan mind taem olketa hipap for worshipim Jehovah. (Readim Psalm 122:3, 4.) Distaem and long olketa hard taem wea bae kamap long future, hem barava important for pipol bilong Jehovah gohed for garem wan mind.

12. Wanem nao iumi mas duim for God sevem iumi taem Gog attakim pipol bilong Jehovah?

¹² Why nao hem barava important for iumi garem wan mind long future? Profesi long Ezekiel Chapter 38 sei “Gog from land bilong Magog” bae attakim pipol bilong Jehovah. Iumi mas no letem eni samting divaedem iumi long datfala taem. And hem barava no stret for tingse world bilong Satan bae protectim iumi. Bat long datfala taem iumi mas stap klosap long olketa brata and sista bilong iumi. Nomata olsem, bae iumi no laef from iumi insaed long wanfala grup. Iumi wanwan mas trustim Jehovah and obeyim hem. Sapos iumi duim datwan, Jehovah and Jesus bae sevem iumi taem Satan attakim pipol bilong God, and iumi bae laef long niu world. (Joel 2:32; Matt. 28:20) Bat waswe, iu tingse God bae sevem eniwan wea no wan mind witim pipol bilong God and wea followim wei bilong hemseleva?—Mic. 2:12.

13. Wanem nao olketa young wan savve lanem from olketa example wea iumi storyim long disfala study?

¹³ Olketa young wan, waswe, iu luksavve why hem wise for stap klosap long pipol bilong Jehovah? Klosap nao iumi evriwan, nomata iumi young or olo, mas barava sapotim each other winim eni narataem. So iufala young wan mas againstim feeling for laek stap witim olketa wea iufala sem age nomoa, and wei for no laek fren witim olketa narawan. Strongim wei wea iu fren witim olketa brata and sista distaem, and enjoyim wei for worshipim Jehovah witim olketa hia. Wei for garem wan mind witim pipol bilong Jehovah bae sevem laef bilong iu long future!

“IUMI EVRIWAN DEPEND LONG NARAWAN”

14, 15. (a) Why nao Jehovah trainim iumi for garem wan mind distaem? (b) Wanem nao Jehovah talem for encouragem iumi for garem wan mind?

¹⁴ Jehovah helpem iumi for “waka tugeta” witim olketa brata and sista for worshipim hem. (Zeph. 3:8, 9) Hem trainim iumi distaem mekem iumi redi for future taem hem bae “hipimap moa evri samting . . . for stap anda long Christ.” (Readim Ephesus 1:9, 10.) Plan bilong Jehovah hem for evriwan long heven and earth for kamap wanfala famili wea garem wan mind for worshipim hem. Plan bilong hem bae kamap tru. Olketa young wan, iu savve insaed long famili bilong Jehovah for olowe. Waswe, iu luksavve why hem important for waka tugeta witim organization bilong Jehovah?

¹⁵ Jehovah hem trainim iumi for garem wan mind distaem, mekem iumi savve stap gud witim olketa narawan long niu world. Dastawe hem talem iumi for ‘lukaftarem narawan,’ for “lovem olketa narawan wea biliv,” for ‘gohed for talem olketa toktok for comfortim narawan,’ and for “strongim narawan.” (1 Cor. 12:25; Rome 12:10; 1 Thess. 4:18; 5:11) Jehovah savve from iumi no perfect, maet samfala taem hem no isi for stap gud witim narawan. Dastawe hem talem iumi for gohed “forgivim narawan.”—Eph. 4:32.

16, 17. (a) Wanem nao wanfala reason why iumi garem olketa meeting? (b) Wanem nao olketa young wan savve lanem from example bilong Jesus?

¹⁶ Narafala samting wea helpem iumi for garem wan mind hem olketa meeting. Long Hebrew 10:24, 25 hem sei wanfala reason why iumi hipap tugeta hem for encouragem narawan for “showimaot love and duim olketa gudfala samting.” And hem important tumas for iumi gohed attendim olketa meeting taem day bilong Jehovah hem kakam klosap.

¹⁷ Jesus laekem tumas for hipap witim pipol bilong Jehovah, wea datwan hem gudfala example for iumi. Taem hem 12 year, hem go witim parents bilong hem long wanfala big hipap long temple. Taem olketa gogo bak dadi and mami bilong Jesus lukaotem hem bat tufala no faendem hem. Waswe, hem go wakabaot long olketa nara young wan? Nomoa. Tufala faendem Jesus long temple, and hem gohed story witim olketa bigman abaotem olketa Holy Raeting.—Luke 2:45-47.

18. Hao nao olketa prea bilong iumi for olketa brata and sista savve strongim iumi for garem wan mind?

¹⁸ Iumi savve strongim wan mind wea iumi garem taem iumi prea for olketa brata and sista bilong iumi and askem Jehovah for helpem olketa. Taem iumi prea for olketa, datwan bae strongim love wea iumi garem for olketa. Hem important for iumi lovem olketa brata and sista, encouragem olketa long olketa meeting, and prea for olketa. Iufala young wan, waswe, iu trae for duim olketa samting hia mekem iu savve fren gud witim olketa brata and sista insaed kongregeson? For iumi sev taem disfala world hem finis, iumi mas fren gud witim olketa brata and sista bilong iumi, and no disfala world bilong Satan.

SHOWIMAOT “IUMI EVRIWAN DEPEND LONG NARAWAN”

19-21. (a) Hao nao pipol bilong God showimaot olketa sapotim each other? Storyim samfala example. (b) Wei wea olketa brata helpem narawan long taem bilong disaster encouragem iu for duim wanem samting, and why nao olsem?

¹⁹ Pipol bilong Jehovah distaem followim disfala principle wea stap long Rome 12:5 wea sei: “Iumi evriwan depend long narawan.” Taem disaster kasem olketa brata bilong iumi, iumi tingim olketa and laek for helpem olketa. Olsem example, long December 2011 bigfala rain hem kasem Mindanao, wea hem wanfala island long Philippines. Long wanfala naet nomoa, flood hem spoelem winim 40,000 haos. Plande brata and sista bilong iumi tu flood spoelem haos bilong olketa. Branch office long Philippines sei, “olketa brata and sista from olketa nara area givim help firstaem” bifor olketa relief komiti savve sendem eni samting for helpem olketa long Mindanao.

²⁰ Long Japan, plande brata and sista bilong iumi barava safa taem wanfala big earthquake and tsunami kasem east part long kantri. Samfala lusim evri samting. Olsem example, haos bilong Yoshiko hem distroe. Hem stap samting olsem 40 kilometer from Kingdom Hall. Hem sei: “Mifala sapraes taem mifala herem circuit overseer and narafala brata kam lukaotem mifala long day bihaen datfala earthquake.” Hem smile and sei: “Mifala tinghae long wei wea olketa long kongregeson barava lukaftarem mifala long spiritual wei. And tu, olketa givim mifala olketa coat, shoe, basket, and kaleko for sleep.” Wanfala member bilong relief komiti hem sei: “Olketa brata long full Japan waka tugeta for helpem each other. Samfala brata and sista from United States tu kam for helpem mifala. Taem samfala askem olketa why nao olketa willing for kam, olketa sei: ‘Mifala tingim olketa brata and sista bilong mifala long Japan, and laek for helpem olketa.’” Waswe, iu hapi for part long wanfala organization wea pipol insaed barava lovem each other? Masbi Jehovah hapi tumas for lukim pipol bilong hem garem wan mind olsem.

²¹ Sapos iumi lane for sapotim each other distaem, datwan bae trainim iumi for olketa hard taem wea bae kasem iumi long future. Nomata sapos gogo hem hard for iumi kasem sapot from olketa brata bilong iumi long nara kantri, bat bae iumi gohed sapotim each other long ples wea iumi stap. Fumiko, wanfala sista long Japan, wea cyclone kasem ples bilong hem, sei: “End hem barava klosap. Iumi mas gohed helpem olketa brata and sista bilong iumi taem iumi weitim datfala taem wea no eni disaster bae happen.”

22. Hao nao wei wea iumi garem wan mind distaem bae helpem iumi long future?

²² Iumi laek for gohed sapotim olketa brata and sista bilong iumi distaem. Datwan bae helpem iumi for redi for day bilong Jehovah. Taem disfala nogud world bilong Satan hem finis, Jehovah bae sevem pipol bilong hem olsem hem duim long bifor. (Isa. 52:9, 10) Nomata iu young or olo, sapos iu laek for sev iu mas gohed for garem wan mind witim pipol bilong God. Long nextfala study iumi bae storyim why iumi mas tinghae tu long wanem God givim long iumi.