‘Iumi Laek Givim Present Long Jehovah’
TAEM samwan kaen long iu, wanem nao iu duim for showimaot iu tinghae long datwan? Tingim wanem olketa bigman long army bilong Israel duim for showimaot olketa tinghae long God bihaen olketa faetem pipol long Midian. Disfala faet kamap bihaen olketa Israelite sin taem olketa worshipim Baal long Peor. God mekem pipol bilong hem for winim datfala faet and olketa divaedem evri samting wea olketa tekem from Midian long 12,000 soldia and evri narawan long Israel. Olketa soldia followim wanem Jehovah talem and olketa givim samfala samting long olketa priest and olketa nara Israelite givim samfala samting long olketa Levite.—Num. 31:1-5, 25-30.
Bat olketa bigman long army laek for givim samfala samting moa. Olketa sei long Moses: “Mifala olketa wakaman bilong iu, mifala kaontem olketa soldia bilong mifala and no eniwan long olketa hem lus.” So olketa laek for givim gold and olketa nara gold samting long Jehovah. Evri gold samting wea olketa givim hem winim 190 kilo.—Num. 31:49-54.
Plande pipol distaem laek givim samting for showimaot olketa tinghae long wanem Jehovah duim for olketa. And hem no olketa wea dedicate long Jehovah nomoa wea laek duim datwan. Long international convention wea kamap long Bologna, Italy, long 2009, wanfala man wea draevem bas hem lusim and pikimap olketa brata and sista long ples wea olketa garem datfala convention. Olketa wea go long bas raetem card for sei thankiu long hem bikos hem barava draev gud. Olketa givim lelebet selen tu and datfala buk Wanem Nao Really Samting wea Bible Teachim? Man hia sei: “Mi hapi for iufala givim disfala card and buk long mi, bat mi givim bak disfala selen bikos mi laek for donatem mekem iufala savve gohed duim waka bilong iufala. Nomata mi no Jehovah’s Witness, mi laek for donatem selen hia bikos iufala lovem pipol and duim gud samting for olketa.”
Wanfala samting wea iu savve duim for showimaot iu tinghae long wanem Jehovah duim, hem for givim olketa donation for sapotim waka wea Olketa Jehovah’s Witness duim long full world. (Matt. 24:14) Box hem storyim samfala difren wei wea iu savve give.
[Piksa long page 20]
Olketa Wei wea Samfala Chus for Givim Samting
DONATION FOR WAKA WEA GOHED LONG FULL WORLD
Staka brata and sista mekem plan for putim selen long contribution box wea garem toktok, “Waka Raonem World.” Wanfala wei for helpem iu givim donation hem for markem samfala selen wea iu kasem taem iu salem kaikai wea iu plantim long garden and putim long contribution box. Or iu savve putim samfala selen wea iu kasem taem iu salem wanfala bag copra, cocoa, or fish long contribution box. Iu savve salem tu eni nara samting wea iu ownim, olsem red money and putim selen long contribution box.
Evri month olketa kongregeson sendem selen hia long branch office bilong Olketa Jehovah’s Witness long kantri wea olketa stap. Iuseleva savve sendem eni donation tu long Jehovah’s Witnesses of the Solomon Islands Trust Board, Inc., PO Box 166, Honiara, Solomon Islands. Sapos iu sendem eni cheque long address antap, iu mas raetem nem “Jehovah’s Witnesses of the Solomon Islands Trust Board, Inc.” Man savve givim tu olketa nekles, ring, or olketa nara samting olsem. Man mas raetem shortfala leta for talem hao diswan hem wanfala present and sendem leta hia witim datfala donation.
OLKETA DIFREN WEI FOR GIVE
Olketa nara difren wei tu hem stap for helpem Kingdom waka wea gohed long full world. Samfala long olketa wei hia nao hem:
Bank Account: Sapos iu garem bank account, savings account, or NPF account, iu savve saenem pepa for talem hao sapos iu dae, selen hia bae go long Jehovah’s Witnesses of the Solomon Islands Trust Board, Inc.
Shareholder: Sapos iu shareholder long wanfala company, iu savve givim share bilong iu olsem present long Jehovah’s Witnesses of the Solomon Islands Trust Board, Inc.
Land or Haos: Iu savve givim land or haos olsem present, or iu savve givim bat gohed iusim datfala property go kasem taem iu dae. Story witim branch office long kantri wea iu stap bifor iu disaed for givim olsem present eni land or haos.
Olketa Will: Sapos iu mekem wanfala legal will, iu savve raetem nem: Jehovah’s Witnesses of the Solomon Islands Trust Board, Inc., olsem wanfala sekson wea bae kasem samfala samting wea iu ownim taem iu dae.
Olketa difren wei for give wea iumi storyim showimaot hao wei for give hem minim man mas plan firstaem. Iu savve helpem waka bilong Olketa Jehovah’s Witness evriwea long world taem iu mekem olketa plan olsem.
Sapos iu laek for savve long samfala samting moa, iu savve story witim branch office bilong Olketa Jehovah’s Witness, or raet go long Jehovah’s Witnesses of the Solomon Islands Trust Board, Inc., PO Box 166, Honiara, Solomon Islands, Telephone: 22241.