Worshipim God Witim “Sem Tingting”
OLKETA Jew and pipol from olketa nara kantri wea followim worship bilong olketa Jew hipap raonem olketa disaepol bilong Jesus Christ. Long datfala taem hem celebration bilong Pentecost, and olketa hia wea kam long Jerusalem stap kam long olketa farawe ples olsem Rome and Parthia. Evriwan garem languis bilong hemseleva. Bat olketa disaepol bilong Jesus wea story witim olketa kam from Galilee. Samfala long olketa pipol hia wea kam barava sapraes long datwan and ask: “Hao nao pipol hia from difren ples savve story long languis bilong iumi.”—Acts 2:8.
Aposol Peter hem standap and explainim why nao olketa lukim disfala mirakol wea pipol story long difren languis. Long semtaem nomoa pipol hia acceptim message wea olketa herem. Plande thousand olketa baptaes! (Acts 2:41) Nomata datfala niu kongregeson hem kwiktaem kamap big tumas, bat Luke hem sei: “Evriwan long olketa hia wea biliv barava garem sem tingting.”—Acts 4:32.
Staka thousand pipol hia wea baptaes long datfala celebration bilong Pentecost long 33 C.E. olketa laek gohed stap long Jerusalem for lelebet taem mekem olketa savve lanem moa samting abaotem niu biliv bilong olketa. Bat problem nao, long firstaem, olketa no ting for stap longtaem long Jerusalem, so olketa no tekem kam inaf kaikai and olketa nara samting wea bae olketa needim for gohed stap long there. So olketa announcem for eniwan wea savve help for savve givim lelebet selen for helpem olketa pipol hia wea interest. Samfala brata and sista salem samting wea olketa garem and givim selen hia long olketa aposol wea arrangem for pipol wea garem need savve kasem datwan. (Acts 2:42-47) Olketa hia barava tingim and showimaot love long olketa!
Start long taem bifor kam olketa tru Christian garem wei olsem for tingim and lovem olketa narawan. Distaem tu, Christian kongregeson gohed for worshipim God witim “sem tingting.” Olketa brata and sista wanwan givim taem, strong, and selen bilong olketa for preachim gud nius and sapotim Kingdom waka.—Lukim box “Olketa Wei wea Samfala Chus for Givim Samting.”
[Box long page 6, 7]
OLKETA WEI WEA SAMFALA CHUS FOR GIVIM SAMTING
DONATION FOR WAKA WEA GOHED LONG FULL WORLD
Plande brata and sista mekem plan for putim selen long contribution box wea garem toktok, “Waka Raonem World.” Wanfala wei wea savve helpem iu for givim donation hem for markem samfala selen wea iu kasem taem iu salem kaikai wea iu growim long garden bilong iu and putim long contribution box. Or iu savve putim samfala selen wea iu kasem taem iu salem wanfala bag copra, cocoa, or fish long contribution box. Iu savve salem tu eni nara samting wea iu ownim, olsem red money and putim selen bilong datwan long contribution box.
Evri month olketa kongregeson sendem selen hia long branch office bilong Olketa Jehovah’s Witness long kantri wea olketa stap. Iuseleva savve sendem eni donation tu go long Jehovah’s Witnesses of the Solomon Islands Trust Board, Inc., Attention Accounts Department, P O Box 166, Honiara, Solomon Islands. Sapos iu sendem eni cheque long address antap, iu mas raetem nem “Jehovah’s Witnesses of the Solomon Islands Trust Board, Inc.” Man savve givim tu olketa nekles, ring, or olketa nara samting wea lelebet expensive. Man mas raetem shortfala leta for talem hao diswan hem wanfala present and then sendem leta hia witim datfala donation.
OLKETA DIFREN WEI FOR GIVE
Olketa nara difren wei tu hem stap for helpem Kingdom waka wea gohed long full world. Samfala long olketa wei hia nao hem:
Bank Account: Sapos iu garem bank account, savings account, or NPF account iu savve saenem pepa for talem hao sapos iu dae, selen hia bae go long Jehovah’s Witnesses of the Solomon Islands Trust Board, Inc.
Shareholder: Sapos iu shareholder long wanfala company iu savve givim share bilong iu olsem present long Jehovah’s Witnesses of the Solomon Islands Trust Board, Inc.
Land or Haos: Iu savve givim land or haos olsem present, or iu savve givim, bat gohed iusim datfala property go kasem taem iu dae. Story witim branch office long kantri bilong iu bifor iu disaed for givim olsem present eni land or haos.
Olketa Will: Sapos iu mekem wanfala legal will, iu savve raetem nem: Jehovah’s Witnesses of the Solomon Islands Trust Board, Inc., olsem wanfala sekson wea bae kasem samfala samting wea iu ownim taem iu dae.
Olketa difren wei for give wea iumi storyim showimaot hao wei for give hem minim man mas plan firstaem. Iu savve helpem waka bilong Olketa Jehovah’s Witness evriwea long world taem iu mekem olketa plan olsem.
Sapos iu laek for savve long samfala samting moa, iu savve story witim branch office bilong Olketa Jehovah’s Witness, or raet go long Jehovah’s Witnesses of the Solomon Islands Trust Board Inc., PO Box 166, Honiara, Solomon Islands, Telephone: 22241.