Olketa Wei for Give wea Mekem Heart Bilong God Hapi
WANFALA queen wea nem bilong hem Athaliah, hem killim dae man and talem olketa laea mekem hem tekova long kingdom bilong Judah. From hem tingse hem killim dae finis evri pikinini bilong king, hem mekem hemseleva kamap queen. Wanfala nara woman, princess Jehosheba, hem barava lovem Jehovah and Law bilong hem. From hem no fraet, hem haedem wanfala pikinini bilong king, wea hem nao datfala baby Jehoash. Jehosheba and hasband bilong hem Hae Priest Jehoiada, haedem disfala pikinini for sixfala year insaed ples wea tufala stap long temple.—2 Kings 11:1-3.
Taem Jehoash hem seven year, Hae Priest Jehoiada redi nao for startim plan bilong hem for aotem datfala queen wea no garem eni right for rulim Judah and wea talem olketa laea mekem hem tekovarem datfala kingdom. Jehoiada tekem kamaot datfala boy from ples wea hem haedem hem and mekem hem kamap king wea garem right for rulim Judah. Then olketa soldia bilong king tekem wicked Queen Athaliah aotsaed from area bilong temple and killim hem dae. Diswan mekem pipol hapi from olketa kamap free from rul bilong datfala queen. Samting wea Jehoiada and Jehosheba duim hem barava help for mekem tru worship kamap moa long Judah. And samting wea moa important, olketa help for protectim famili laen bilong King David, wea bae lead go for Messiah.—2 Kings 11:4-21.
Datfala niu king tu duim wanfala important samting wea mekem heart bilong God hapi. Bigfala need stap for fixim haos bilong Jehovah. From feeling bilong Athaliah for laek rulim Judah hem ova tumas, no eniwan keepim temple and samfala spoelem tu. So Jehoash disaed strong for fixim bak and mekem datfala temple kamap gud moa. Stretawe, hem talem komand for hipimap selen for fixim bak haos bilong Jehovah. Hem sei: “Evri selen for offering wea pipol tekem kam long haos bilong Jehovah, selen wea each wan mas givim, selen wea olketa markem for each wan givim, and selen wea heart bilong each wan muvim olketa for tekem kam long haos bilong Jehovah, olketa priest nao mas tekem diswan from pipol wea stap raonem olketa; and olketa mas repairim evri krak long datfala haos.”—2 Kings 12:4, 5.
Pipol barava willing for give. Bat, olketa priest raverave lelebet saed long datfala responsibility for repairim temple. So, king disaed for hemseleva deal witim datfala samting and hem talem komand for evriwan putim go evri contribution hia insaed wanfala spesol box. Hem markem Jehoiada nao for lukaftarem datfala waka, and Bible sei olsem: “Datfala priest Jehoiada hem tekem wanfala box and mekem hol long lid bilong hem and hem putim klosap long altar long raet saed taem man kam insaed haos bilong Jehovah, and olketa priest, olketa security, putim insaed long hem evri selen wea pipol tekem kam long haos bilong Jehovah. And taem olketa lukim staka selen insaed long datfala box, secretary bilong king and hae priest bae kam, and olketa taemap datwan and kaontem olketa selen wea stap long haos bilong Jehovah. And olketa givim datfala selen wea olketa kaontem finis go long olketa man wea kasem assignment for duim waka long haos bilong Jehovah. Then olketa hia peim olketa wakman wea savve waka witim timba and olketa man wea duim waka for buildim haos bilong Jehovah, and olketa man wea savve hao for waka witim ston and olketa wea katem kam ston, and peim timba and ston wea olketa katem mekem olketa repairim olketa krak long haos bilong Jehovah and for evri samting wea olketa bae needim for repairim datfala haos.”—2 Kings 12:9-12.
Pipol barava give from full heart bilong olketa. Olketa repairim bak haos bilong Jehovah for worship mekem worship for Jehovah hem gohed long wei wea showimaot respect. Olketa iusim long wisefala wei evri selen wea pipol givim. King Jehoash hem mek sure long datwan!
Distaem, organization bilong Jehovah long earth hem lukluk gud for mek sure olketa iusim long wisefala wei evri selen wea pipol givim for sapotim worship bilong Jehovah, and olketa tru Christian olketa duim sem samting olsem olketa Israelite bifor—olketa give from full heart. Maet iu tu givim contribution for helpem Kingdom waka insaed last service year. Iumi lukluk lelebet long samfala wei wea organization hem iusim contribution wea iu givim.
WAKEM OLKETA BUK
Evriwea long world olketa wakem olketa pablikeson hia for iusim for study and for givimaot:
• Buk: 47,490,247
• Buklet: 6,834,740
• Brochure: 167,854,462
• Kalenda: 5,405,955
• Magasin: 1,179,266,348
• Tract: 440,995,740
• Video: 3,168,611
Olketa duim printing long Africa, North, Central, and South America, Asia, Europe, and long olketa island nation long Pacific—total hem 19 kantri.
“Nem bilong mi hem Katelyn May. Mi eit year. Mi garem $28 U.S., and mi laek givim long iufala for help peim olketa printing press. From smol sista bilong iufala, Katelyn.”
“Mifala famili story tugeta abaotem olketa niu printing press. Tufala pikinini bilong mitufala, wea wanfala hem 11 year and narawan hem 9 year, disaed for givim selen wea tufala keepim. So mifala hapi for sendem kam contribution bilong tufala, and tu, contribution bilong mitufala.”
CONSTRUCTION
Diswan hem samfala building project wea gohed distaem for sapotim waka bilong Olketa Jehovah’s Witness:
• Olketa Kingdom Hall for olketa poor kantri: 2,180
• Assembly Hall: 15
• Branch: 10
• International volunteer wea insaed full-taem service: 2,342
“Long disfala weekend hem firstaem for mifala meeting insaed niu Kingdom Hall. Mifala hapi tumas for garem wanfala gudfala ples for praisem Dadi bilong iumi, Jehovah God. Mifala thankiu long Jehovah and iufala for help wea mifala kasem thru long wei for wakem olketa niu Kingdom Hall. Tru nao, Kingdom Hall hia hem nambawan samting insaed community bilong mifala.”—Chile.
“Olketa brata and sista tinghae and thankiu tumas for help wea organization bilong Jehovah givim. Kasem distaem, mifala storyim olowe nambawan taem wea mifala waka witim olketa long construction.”—Moldova.
“No longtaem go nomoa mi and waef bilong mi celebratem mek-35 year wea mitufala marit. Mitufala trae for disaed wanem nao for givim long each other long datfala taem, and gogo mitufala disaed for givim samting go bak long Jehovah and organization bilong hem from sapos hem no helpem mifala, ating marit bilong mifala bae nating win. Mitufala laekem iufala for iusim selen hia wea mifala sendem kam for buildim wanfala Kingdom Hall long wanfala poor kantri.”
“No longtaem go nomoa mi kasem samfala selen from samwan, and from mi no wantem plande samting and no needim eni samting, mi laek for iufala iusim disfala selen wea mi sendem kam for help for buildim olketa Kingdom Hall wea olketa brata needim tumas long plande kantri.”
DISASTER RELIEF
Long olketa last day distaem, olketa disaster savve seknomoa happen. Plande Jehovah’s Witness savve givim extra contribution for helpem olketa brata wea kasem trabol. Remember, olketa contribution for disaster relief hem kamaot from olketa contribution wea man givim for waka raonem world. Diswan hem samfala ples wea Olketa Jehovah’s Witness helpem olketa wea kasem disaster:
• Africa
• Asia
• Area long Caribbean
• Olketa Island long Pacific
“Mi and hasband bilong mi laek for sei thankiu tumas from iufala sendem kam relief supply for disaster wea kamap from olketa cyclone. Diswan helpem mifala for putim niu ruf long haos bilong mifala. Mifala barava tinghae and thankiu long wei wea iufala kwiktaem for help.”
“Nem bilong mi Connor, and mi 11 year. Taem mi lukim samting wea happen long datfala tsunami, mi laek for help. Mi hope diswan bae helpem olketa brata and sista bilong mi.”
OLKETA SPESOL FULL-TAEM SERVANT
Samfala Christian serve full-taem insaed long preaching waka or long olketa Bethel. Samfala long olketa full-taem volunteer kasem sapot thru long olketa contribution. Samfala long olketa nao:
• Missionary: 2,635
• Traveling overseer: 5,325
• Bethelite: 20,092
“From mi no fit for go long Bethel yet [boy wea faev year], mi laek sendem go love bilong mi and disfala contribution. Taem mi big bae mi go waka hard long Bethel.”
Sapotim Bible Education
Jesus Christ komandim olketa follower bilong hem for “mek disaepol long pipol bilong evri nation.” (Matthew 28:19) From Olketa Jehovah’s Witness obeyim datfala komand, olketa busy for preachim and teachim message bilong Bible long 235 kantri. Olketa pablisim and givimaot Bible literature long 413 languis.
Tru nao, best samting wea wanfala Christian savve givim, hem nao taem bilong hem for helpem pipol for lane abaotem God and olketa plan bilong Hem. Olketa Jehovah’s Witness iusim taem and strong bilong olketa for helpem olketa narawan. Olketa evritaem givim olketa contribution saed long selen tu and evri samting wea olketa givim hem help for mekem pipol evriwea long earth for savve long nem bilong Jehovah and olketa plan bilong Hem. Jehovah gohed for blessim olketa wei olsem for helpem olketa narawan for lanem moa samting abaotem hem. (Proverbs 19:17) Willing fasin for give hem mekem heart bilong Jehovah hapi!—Hebrews 13:15, 16.
[Box long page 28-30]
Olketa Wei wea Samfala Chus for Give
CONTRIBUTION FOR WAKA RAONEM WORLD
Plande savve markem haomas olketa bae putim insaed contribution box wea garem toktok, “Contribution for Waka Raonem World—Matthew 24:14.”
Each month olketa kongregeson sendem selen hia long office bilong Olketa Jehovah’s Witness long kantri wea olketa stap long hem. Iu savve sendem donation stret go long Watch Tower Bible and Tract Society of Pennsylvania, Attention Treasurer’s Office, 25 Columbia Heights, Brooklyn, New York 11201-2483, or long branch office bilong Olketa Jehovah’s Witness long kantri bilong iu. Sapos iu sendem eni cheque long address long antap iu shud raetem long nem bilong “Watch Tower.” Man savve donatem tu olketa expensive nekles, ring, or olketa nara samting wea garem hae price. Man mas raetem wanfala shortfala leta for talem hao diswan hem wanfala present and then sendem witim contribution hia.
MEKEM OLKETA PLAN FOR GIVE
Samfala savve markem wanfala area insaed garden for givim olsem wanfala contribution and taem olketa kasem selen from kaikai long disfala part long garden bae olketa putim datwan insaed datfala box “Contribution for Waka Raonem World.” Samfala nara wei stap for duim diswan tu, olsem taem man salem copra, cocoa, fish, or olketa nara samting olsem, hem savve markem wanfala bag or wanfala fish for contribution then putim datfala selen long datfala box long Kingdom Hall for “Contribution for Waka Raonem World.”
CONDITIONAL-DONATION TRUST ARRANGEMENT
Man savve putim selen long wanfala trust witim Watch Tower for olketa iusim datwan evriwea long world. Bat hem savve tekem bak selen bilong hem bihaen sapos hem askem. For moa information, plis raet long Treasurer’s Office long address antap.
CHARITABLE PLANNING
Charitable planning hem wanfala wei for give wea difren from wei for givim stret selen for helpem Kingdom waka raonem world. Samfala long olketa wei hia nao:
Insurance: Man savve putim nem bilong Watch Tower olsem wan wea bae kasem insurance or retirement/pension plan.
Bank Account: Man wea garem bank account, certificates of deposit, or retirement account savve putim long trust for Watch Tower or markem datwan olsem wan wea kasem datfala selen or bihaen olketa dae. Diswan mas fitim arrangement bilong bank long ples wea man stap.
Stocks and Bonds: Man savve givim stocks and bonds long Watch Tower olsem present.
Real Estate: Man savve givim real estate olsem present, or sapos hem wanfala haos, hem savve markem Watch Tower for kasem datwan bihaen hem dae. Story witim branch office long kantri bilong iu bifor iu disaed for givim eni real estate.
Gift Annuity: Wanfala gift annuity hem wanfala arrangement wea man hem givim selen or samting wea olketa kolem securities long wanfala corporation wea olketa Jehovah’s Witness iusim. Then man wea givim datwan or samwan wea hem markem, kasem wanfala annuity payment evri year for full laef bilong hem. Datfala man maet savve kasem wanfala income-tax deduction long year wea datfala gift annuity hem start.
Wills and Trusts: Man savve givim property or selen long Watch Tower thru long wanfala legal will, or hem savve putim nem bilong Watch Tower olsem datwan wea bae kasem wanfala trust agreement.
Wanfala trust for helpem wanfala organization long saed bilong religion maet mekem man kasem samfala gud samting saed long tax.
Olsem disfala toktok “charitable planning” hem showimaot, diskaen wei for give hem minim man mas plan firstaem. Sapos man want for helpem waka bilong Olketa Jehovah’s Witness evriwea long world thru long charitable planning, wanfala brochure hem stap long English and Spanish languis. Title bilong hem Charitable Planning to Benefit Kingdom Service Worldwide. Olketa raetem disfala brochure for storyim olketa difren wei for givim olketa present distaem or for Watch Tower kasem datwan bihaen man hem dae. Bihaen plande readim disfala brochure and followim olketa legal or tax advaes long kantri bilong olketa seleva, olketa fit for sapotim waka bilong Olketa Jehovah’s Witness saed long lotu and for helpem olketa man wea garem need evriwea long world and long semtaem kasem olketa gud samting saed long tax. Sapos iu laek kasem disfala brochure iu savve askem go Charitable Planning Office.
Sapos iu laekem moa information, iu savve story witim Charitable Planning Office, thru long wei for ringim olketa or raet go long address long daon or long branch office bilong Olketa Jehovah’s Witness long kantri bilong iu.
Charitable Planning Office
Watch Tower Bible and Tract Society of Pennsylvania
100 Watchtower Drive
Patterson, New York 12563-9204
Telephone: (845) 306-0707
[Piksa Credit Line long page 27]
Faithful video: Stalin: U.S. Army photo