Wanem Nao Iumi Savve Duim for Helpem Narawan?

FRANÇOIS, wea hem elder long wanfala poor kantri hem sei: “Bihaen wanfala election samfala grup olketa faet, and from diswan plande thousand Jehovah’s Witness mas ranawe from ples bilong olketa. Gogo kaikai and medicine hem short, and lelebet wea stap hem expensive tumas. Olketa bank no open and olketa ATM machine no garem selen insaed or no waka nao.”

Olketa brata long branch office kwiktaem givim selen and olketa relief supply long olketa brata hia wea ranawe and hipap long olketa Kingdom Hall raonem kantri. Olketa grup wea faet putim olketa roadblock, bat from olketa savve olketa Witness no join insaed politik, plande taem olketa letem olketa trak bilong branch for go pas nomoa.

François hem sei: “Taem mifala go long wanfala Kingdom Hall, samfala man wea holem gun sutim bas bilong mifala. Bat olketa bullet hia no kasem mifala. Taem mifala lukim wanfala soldia wea holem gun hem ran kam long mifala, semtaem mifala tanem raon bas and kwiktaem draev go bak long branch. Mifala thankiu long Jehovah from mifala laef. Long next day, 130 brata wea hipap long datfala Kingdom Hall kasem sef ples. Samfala kam long branch office and mifala lukaftarem spiritual and physical need bilong olketa go kasem taem problem hia hem finis.”

François sei moa: “Bihaen, branch office kasem staka leta from olketa brata raonem kantri wea talem bigfala thankiu. Taem olketa luksavve brata bilong olketa long nara ples helpem olketa, datwan barava strongim faith bilong olketa long Jehovah.”

Long taem bilong natural disaster or olketa problem wea man kosim, iumi no sei long brata bilong iumi wea safa: “Iu no wari, bae iu garem kaleko and kaikai.” (Jas. 2:15, 16) Bat iumi trae helpem olketa for kasem need bilong olketa. Olketa long first century duim sem samting tu. Bihaen olketa herem warning abaotem bigfala hangre wea bae kamap, “olketa disaepol disaed for sendem relief supply for helpem olketa brata long Judea, fitim wanem man wanwan savve givim.”—Acts 11:28-30.

Iumi pipol bilong Jehovah willing for helpem olketa wea garem need. Bat pipol needim spiritual help tu. (Matt. 5:3) For helpem olketa luksavve long datfala need and for luksavve wanem olketa mas duim, Jesus talem olketa disaepol bilong hem for teachim pipol for kamap disaepol. (Matt. 28:19, 20) Iumi wanwan spendem staka taem, iusim wanem iumi garem, and strong bilong iumi for duim datfala waka. Organization bilong iumi iusim samfala donation for helpem pipol long taem bilong disaster, bat big haf long olketa donation hem for sapotim Kingdom waka and preaching waka. Long olketa wei olsem, iumi showimaot iumi lovem God and nara pipol.—Matt. 22:37-39.

Olketa wea givim donation for sapotim waka bilong Olketa Jehovah’s Witness raonem full world savve sure organization bilong iumi iusim olketa donation hia long stretfala wei. Waswe, iu fit for helpem olketa brata bilong iu wea garem need? Waswe, iu laek for sapotim preaching waka? Sapos olsem, “duim evri samting wea iu fit for duim for olketa wea needim help.”—Prov. 3:27.

Hao For Givim Contribution For Waka Raonem Full World

Olsem long taem bilong aposol Paul, staka brata and sista distaem tu “keepim lelebet selen” for putim long contribution box wea garem disfala toktok, “Waka Raonem World.” (1 Cor. 16:2) Wanfala samting wea iu savve duim mekem iu fit for givim donation hem for markem samfala selen wea iu kasem taem iu salem kaikai wea iu plantim long garden, and putim datfala selen long contribution box. Taem iu salem wanfala bag copra, cocoa, or fish, maet iu savve putim samfala selen wea iu kasem long contribution box. Iu savve salem tu eni nara samting wea iu ownim, olsem red money and putim selen long contribution box.

Evri month olketa kongregeson sendem selen hia long branch office bilong Olketa Jehovah’s Witness long kantri wea olketa stap. Iuseleva tu savve sendem eni donation long Jehovah’s Witnesses of the Solomon Islands Trust Board, Inc., PO Box 166, Honiara, Solomon Islands. Sapos iu laek sendem eni cheque for givim donation, iu mas raetem nem “Jehovah’s Witnesses of the Solomon Islands Trust Board, Inc.” long datfala cheque. Olketa nara samting wea iu savve givim olsem donation tu hem olketa nekles, ring, or olketa nara samting olsem. Sapos iu duim datwan, iu mas raetem shortfala leta for talem hao diswan hem wanfala present and sendem leta hia witim datfala samting wea iu sendem.

SAMFALA NARA WEI FOR GIVE

Olketa nara wei tu hem stap for helpem Kingdom waka wea gohed long full world. Samfala long olketa wei hia nao hem:

Bank Account: Sapos iu garem bank account, savings account, or NPF account, iu savve saenem pepa for talem hao sapos iu dae, selen hia bae go long Jehovah’s Witnesses of the Solomon Islands Trust Board, Inc.

Shareholder: Sapos iu shareholder long wanfala company, iu savve givim share bilong iu olsem present long Jehovah’s Witnesses of the Solomon Islands Trust Board, Inc.

Land or Haos: Iu savve givim land or haos olsem present, or iu savve givim bat gohed iusim datfala property go kasem taem iu dae. Story witim branch office long kantri wea iu stap bifor iu disaed for givim eni land or haos olsem present.

Olketa Will: Sapos iu mekem wanfala legal will, iu savve raetem nem “Jehovah’s Witnesses of the Solomon Islands Trust Board, Inc.,” olsem wanfala long olketa wea bae kasem samfala samting wea iu ownim taem iu dae.

Sapos iu laek for duim eniwan long olketa samting hia for helpem Kingdom waka, iu bae need for plan gud firstaem. Iu savve helpem waka bilong Olketa Jehovah’s Witness evriwea long world taem iu mekem olketa plan olsem.

Sapos iu laek for savve long samfala samting moa, iu savve story witim branch office bilong Olketa Jehovah’s Witness, or raet go long Jehovah’s Witnesses of the Solomon Islands Trust Board, Inc., PO Box 166, Honiara, Solomon Islands, Telephone: 22241. And tu, iu savve contactim:

CHARITABLE PLANNING OFFICE

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Telephone: (845) 306-0707