“Datfala Waka Hem Big Tumas”

KING DAVID kolem kam evri prince bilong hem, olketa bigman long Israel, and olketa bigman long army bilong hem for kam long Jerusalem for wanfala important meeting. Olketa barava hapi for herem wanfala spesol announcement. King David talem olketa Jehovah markem son bilong hem Solomon for buildim wanfala temple wea pipol bae iusim for worshipim tru God. Jehovah givim King David wea hem olo datfala plan wea olketa bae followim for buildim datfala temple, and David givim finis plan hia long Solomon. David sei: “Datfala waka hem big tumas, bikos datwan hem no temple bilong olketa man bat hem bilong Jehovah God.”—1 Chron. 28:1, 2, 6, 11, 12; 29:1.

Then David askem olketa olsem: “So distaem hu long iufala nao willing for givim present long Jehovah?” (1 Chron. 29:5) Sapos iu stap long datfala taem, wanem nao bae iu duim? Waswe, bae iu laek for duim samting for sapotim datfala waka wea big tumas? Taem David askem olketa Israelite, semtaem nomoa olketa duim samting for sapotim datfala waka. Tru nao, olketa “hapi tumas bikos olketa givim olketa contribution. Olketa contribution hia olketa givim long Jehovah witim full heart.”—1 Chron. 29:9.

Staka handred year bihaen, Jehovah startim wanfala samting wea winim datfala temple. Hem startim datfala spiritual temple, wea hem nao arrangement for olketa man savve worshipim hem, and sakrifaes bilong Jesus nao mekem disfala arrangement kamap. (Heb. 9:11, 12) Wanem nao Jehovah duim for helpem pipol for fren witim hem distaem? Waka wea iumi duim for teachim pipol for kamap disaepol hem helpem pipol for fren witim Jehovah. (Matt. 28:19, 20) Samting wea kamaot from disfala waka nao, evri year staka million pipol studyim Bible, staka thousand niu wan olketa baptaes, and staka handred niu kongregeson olketa start.

From diswan, need hem stap for printim staka moa Bible literature, buildim and lukaftarem olketa Kingdom Hall, and for peim land for buildim olketa hall for olketa assembly and convention. Tru nao, waka wea iumi duim for talemaot gud nius hem big waka tumas bat hem waka wea iumi hapi for duim!—Matt. 24:14.

From iumi lovem God and nara pipol, and iumi luksavve hem barava important for duim preaching waka, datwan muvim iumi for “willing for givim present long Jehovah,” wea hem nao olketa contribution bilong iumi. Iumi hapi tumas for “iusim olketa gudfala samting wea iumi garem for praisem Jehovah” and lukim olketa contribution wea iumi givim hem sapotim disfala barava important waka long history!—Prov. 3:9.

Hao For Givim Contribution For Waka Raonem Full World

Staka brata and sista distaem “keepim lelebet selen” for putim long contribution box wea garem disfala toktok, “Waka Raonem World.” (1 Cor. 16:2) Wanfala samting wea iu savve duim mekem iu fit for givim donation hem for markem samfala selen wea iu kasem taem iu salem kaikai wea iu plantim long garden, and putim datfala selen long contribution box. Taem iu salem bag copra, cocoa, or fish, maet iu savve putim samfala selen wea iu kasem long contribution box. Iu savve salem tu eni nara samting wea iu ownim, olsem red money and putim selen long contribution box.

Evri month olketa kongregeson sendem selen hia long branch office bilong Olketa Jehovah’s Witness long kantri wea olketa stap. Iuseleva tu savve tekem kam eni donation long branch office, or sendem eni donation long Jehovah’s Witnesses of the Solomon Islands Trust Board Incorporated, PO Box 166, Honiara, Solomon Islands. Sapos iu laek sendem eni cheque for givim donation, iu mas raetem “Jehovah’s Witnesses of the Solomon Islands Trust Board Incorporated” long datfala cheque. And tu, iu savve iusim electronic bank transfer, debit card, or credit card for sendem donation bilong iu. Long samfala kantri olketa pablisa savve iusim jw.org or narafala Web site wea branch markem for duim datwan. Olketa nara samting wea iu savve givim olsem donation tu hem olketa nekles, ring, or olketa nara samting olsem. Sapos iu duim datwan, iu mas raetem shortfala leta for talem hao diswan hem wanfala present and sendem leta hia witim datfala samting wea iu sendem.

SAMFALA NARA WEI FOR GIVE

Olketa nara wei tu hem stap for helpem Kingdom waka wea gohed long full world. Samfala long olketa wei hia nao hem:

Bank Account: Sapos iu garem bank account, savings account, or NPF account, iu savve saenem pepa for talem hao sapos iu dae, selen hia bae go long Jehovah’s Witnesses of the Solomon Islands Trust Board Incorporated.

Shareholder: Sapos iu shareholder long wanfala company, iu savve givim share bilong iu olsem present long Jehovah’s Witnesses of the Solomon Islands Trust Board Incorporated.

Land or Haos: Iu savve givim land or haos olsem present, or iu savve givim bat gohed iusim datfala property go kasem taem iu dae. Story witim branch office long kantri wea iu stap bifor iu disaed for givim eni land or haos olsem present.

Olketa Will: Sapos iu mekem wanfala legal will, iu savve raetem nem “Jehovah’s Witnesses of the Solomon Islands Trust Board Incorporated,” olsem wanfala long olketa wea bae kasem samfala samting wea iu ownim taem iu dae.

Sapos iu laek for duim eniwan long olketa samting hia for helpem Kingdom waka, iu bae need for plan gud firstaem. Iu savve helpem waka bilong Olketa Jehovah’s Witness evriwea long world taem iu mekem olketa plan olsem.

Sapos iu laek for savve long samfala samting moa, clickim datfala link “Givim Donation Online for Sapotim Waka wea Gohed Raonem World” wea stap long botom long home page long jw.org/pis. Or iu savve story witim branch office bilong Olketa Jehovah’s Witness, or raet go long Jehovah’s Witnesses of the Solomon Islands Trust Board Incorporated, PO Box 166, Honiara, Solomon Islands. Telephone: 22241