Tinghae Long Wei wea Jehovah Givim Staka Samting

JEHOVAH hem God wea givim iumi staka samting. (Jas. 1:17) Evri samting wea Jehovah wakem long full universe and long earth showimaot hem kaen tumas.—Ps. 65:12, 13; 147:7, 8; 148:3, 4.

Man wea raetem psalm barava tinghae long olketa samting wea Jehovah wakem, so hem raetem wanfala song for praisem Jehovah. Taem iumi readim Psalm 104, iumi bae garem sem feeling olsem datfala man. Hem sei: “Long full laef bilong mi bae mi singsing long Jehovah. Bae mi singsing for praisem God bilong mi for olowe.” (Ps. 104:33) Waswe, iu tu laek for duim olsem?

JEHOVAH GIVIM IUMI STAKA SAMTING

Jehovah laekem iumi for willing for givim samting. Bible storyim why iumi shud duim diswan. Aposol Paul sei: “Talem olketa wea rich distaem for no praod and for no barava trustim riches bilong olketa wea savve lus enitaem, bat for olketa mas hope long God wea givim iumi evri samting for iumi hapi. Talem olketa tu for duim plande gudfala samting and willing for givim samting and for sharem wanem olketa garem witim nara pipol. Sapos olketa duim datwan, olketa hipimap richfala samting for olketa seleva wea bae no lus, wea hem nao gudfala faondeson for future bilong olketa, mekem olketa savve hol strong long datfala tru laef.”—1 Tim. 6:17-19.

Taem Paul raetem mek-tu leta bilong hem for kongregeson long Corinth, hem sei olketa shud hapi taem olketa givim samting. Paul sei: “Evri man mas givim samting followim wanem hemseleva tingim, nogud hem givim samting bat hem no hapi nomoa for givim datwan, or eniwan forcem hem. God hem lovem man wea hapi for givim samting.” (2 Cor. 9:7) Then Paul storyim olketa wea kasem gud samting from wei for give. Olketa wea willing for givim samting kasem blessing. And olketa wea kasem wanem olketa needim, olketa hapi tu.—2 Cor. 9:11-14.

Long last verse long 2 Corinth chapter 9, Paul storyim samting wea showimaot wei wea Jehovah barava kaen long iumi. Paul sei: “Iumi thankiu long God for nambawan present wea hem givim.” (2 Cor. 9:15) Datfala present wea God givim hem evri gud samting wea iumi kasem from Jehovah bikos long Jesus Christ. Present hia hem barava nambawan.

Hao nao iumi savve showimaot iumi tinghae long evri samting wea iumi kasem finis from Jehovah and Son bilong hem, and wea bae iumi kasem long future? Wanfala samting wea iumi savve duim, hem for iusim taem, strong, and olketa samting wea iumi garem for sapotim trufala worship, nomata sapos iumi duim smol samting or bigfala samting.—1 Chron. 22:14; 29:3-5; Luke 21:1-4.

Hao For Givim Contribution For Waka Raonem Full World

Olsem long taem bilong aposol Paul, staka brata and sista distaem tu “keepim lelebet selen” for putim long contribution box wea garem disfala toktok, “Waka Raonem World.” (1 Cor. 16:2) Wanfala samting wea iu savve duim mekem iu fit for givim donation hem for markem samfala selen wea iu kasem taem iu salem kaikai wea iu plantim long garden, and putim datfala selen long contribution box. Taem iu salem bag copra, cocoa, or fish, maet iu savve putim samfala selen wea iu kasem long contribution box. Iu savve salem tu eni nara samting wea iu ownim, olsem red money and putim selen long contribution box.

Evri month olketa kongregeson sendem selen hia long branch office bilong Olketa Jehovah’s Witness long kantri wea olketa stap. Iuseleva tu savve tekem kam eni donation long branch office, or sendem eni donation long Jehovah’s Witnesses of the Solomon Islands Trust Board Incorporated, PO Box 166, Honiara, Solomon Islands. Sapos iu laek sendem eni cheque for givim donation, iu mas raetem “Jehovah’s Witnesses of the Solomon Islands Trust Board Incorporated” long datfala cheque. And tu, iu savve iusim electronic bank transfer, debit card, or credit card for sendem donation bilong iu. Long samfala kantri olketa pablisa savve iusim jw.org or narafala Web site wea branch markem for duim datwan. Olketa nara samting wea iu savve givim olsem donation tu hem olketa nekles, ring, or olketa nara samting olsem. Sapos iu duim datwan, iu mas raetem shortfala leta for talem hao diswan hem wanfala present and sendem leta hia witim datfala samting wea iu sendem.

SAMFALA NARA WEI FOR GIVE

Olketa nara wei tu hem stap for helpem Kingdom waka wea gohed long full world. Samfala long olketa wei hia nao hem:

Bank Account: Sapos iu garem bank account, savings account, or NPF account, iu savve saenem pepa for talem hao sapos iu dae, selen hia bae go long Jehovah’s Witnesses of the Solomon Islands Trust Board Incorporated.

Shareholder: Sapos iu shareholder long wanfala company, iu savve givim share bilong iu olsem present long Jehovah’s Witnesses of the Solomon Islands Trust Board Incorporated.

Land or Haos: Iu savve givim land or haos olsem present, or iu savve givim bat gohed iusim datfala property go kasem taem iu dae. Story witim branch office long kantri wea iu stap bifor iu disaed for givim eni land or haos olsem present.

Olketa Will: Sapos iu mekem wanfala legal will, iu savve raetem nem “Jehovah’s Witnesses of the Solomon Islands Trust Board Incorporated,” olsem wanfala long olketa wea bae kasem samfala samting wea iu ownim taem iu dae.

Sapos iu laek for duim eniwan long olketa samting hia for helpem Kingdom waka, iu bae need for plan gud firstaem. Iu savve helpem waka bilong Olketa Jehovah’s Witness evriwea long world taem iu mekem olketa plan olsem.

Sapos iu laek for savve long samfala samting moa, iu savve story witim the branch office bilong Olketa Jehovah’s Witness, or raet go long Jehovah’s Witnesses of the Solomon Islands Trust Board Incorporated, PO Box 166, Honiara, Solomon Islands. Telephone: 22241.