“Man wea Willing for Givim Samting Bae Kasem Blessing”

FROM bifor kam sakrifaes hem important part long tru worship. Olketa Israelite sakrifaesim olketa animal, and olketa Christian “evritaem praisem God,” wea diswan olsem sakrifaes. Bat, olketa nara sakrifaes stap wea iumi savve givim long God for mekem hem hapi. (Heb. 13:15, 16) Diswan savve mekem iumi hapi tu and kasem blessing. Bae iumi storyim samfala example.

Hannah, hem faithful woman bifor wea barava laek for garem wanfala boy bat hem no savve garem pikinini. Hem prea and promis long Jehovah sapos hem bornem wanfala boy, hem bae ‘givim long Jehovah, mekem hem savve waka for hem for full laef bilong hem.’ (1 Sam. 1:10, 11) Gogo, Hannah babule, and bornem wanfala pikinini boy wea nem bilong hem Samuel. Taem Samuel thri year, Hannah tekem hem go long tabernacle. Jehovah blessim Hannah from hem willing for givim pikinini bilong hem. Gogo hem garem faevfala pikinini moa, and Samuel kamap profet and raetem samfala buk long Bible.—1 Sam. 2:21.

Olsem Hannah and Samuel, olketa Christian distaem garem privilege for iusim laef bilong olketa for duim waka bilong Jehovah. Jesus promisim taem iumi mekem sakrifaes for worshipim Jehovah, iumi bae kasem nambawan blessing.—Mark 10:28-30.

Long first century, Christian woman wea nem bilong hem Dorcas “evritaem helpem pipol and duim gud samting for pipol wea poor.” Wei wea hem duim samting for helpem narawan hem olsem sakrifaes. Sorre samting nao, gogo “hem sik and hem dae.” Kongregeson sorre tumas. Taem olketa disaepol herem Peter bae visit long datfala ples, olketa laekem for hem mas kam kwiktaem long olketa. Olketa barava hapi taem Peter kam and resurrectim Dorcas! Datwan hem firstaem wea Bible sei wanfala aposol duim wanfala resurrection. (Acts 9:36-41) God nating forgetim olketa gud samting wea Dorcas duim. (Heb. 6:10) Story bilong Dorcas abaotem wei wea hem kaen hem stap long Bible olsem wanfala example for iumi distaem.

Aposol Paul tu wanfala nambawan example. Hem busy and willing for iusim taem bilong hem for helpem olketa narawan. Taem Paul raet long olketa long Corinth, hem sei: “Mi hapi for givim evri samting wea mi garem and givim miseleva tu for helpem iufala.” (2 Cor. 12:15) From Paul givim full laef bilong hem for helpem olketa narawan, hem barava hapi and satisfae. Bat samting wea moa important, Jehovah blessim hem and hapi long hem.—Acts 20:24, 35.

So iumi luksavve Jehovah hapi sapos iumi iusim taem and strong bilong iumi for sapotim Kingdom and helpem olketa brata and sista. Bat waswe, eni nara wei iumi savve sapotim waka for preach abaotem Kingdom? Yes! Iumi showimaot iumi tinghae long God tu taem iumi willing for givim donation. Olketa donation hem for sapotim preaching waka wea gohed evriwea long world. Insaed diswan hem wei for sapotim olketa missionary and olketa narawan insaed spesol full-taem service. And tu, olketa iusim olketa donation hia for preparem and transleitim olketa pablikeson and video. And olketa iusim donation for help long taem bilong disaster and for buildim olketa niu Kingdom Hall. Iumi sure “man wea willing for givim samting bae kasem blessing.” Bat taem iumi givim olketa gudfala samting wea iumi garem long Jehovah, hem showimaot iumi tinghae long hem.—Prov. 3:9; 22:9.

Samfala Wei for Givim Contribution For Waka Raonem World

Olsem long taem bilong aposol Paul, staka brata and sista distaem “keepim lelebet selen” for putim long contribution box bilong “Waka Raonem World.” (1 Cor. 16:2) Evri month olketa kongregeson sendem olketa donation hia long branch office bilong Olketa Jehovah’s Witness long kantri wea olketa stap. Iu tu savve sendem eni donation. For savve long raet legal information wea man savve iusim for givim datfala donation, plis contactim branch office long ples iu stap. Address bilong olketa branch office stap tu long www.jw.org/pis. Olketa difren kaen donation wea iu fit for sendem hem depend long kantri wea iu stap. Samfala wei for givim donation hem:

OLKETA DONATION

Iusim electronic bank transfer, debit card, or credit card. Long samfala branch office, iu savve iusim jw.org or nara website wea olketa markem.
Givim selen, jewelry, or nara expensive samting. Raetem short leta for talem hao selen or olketa samting hia hem wanfala donation.

CONDITIONAL DONATION ARRANGEMENT

Donation wea iu givim bat wea iu savve tekem bak sapos iu needim.
Raetem leta for talem hao iu savve tekem bak donation hia sapos iu needim enitaem.

CHARITABLE PLANNING

Man savve givim selen and nara expensive samting for sapotim Kingdom waka raonem world. Bat olketa nara wei tu stap for givim donation, samfala olketa raetem long hia. Maet iu ting for iusim eni idea hia, bat for savve sapos hem fitim or nomoa, plis contactim firstaem branch office long ples iu stap bifor iu duim datwan. From law and tax long evri kantri hem difren, hem important for story witim olketa wea savve long tax and law long kantri bilong iu bifor iu disaed for givim donation olsem.

Insurance and Retirement Plan: Sapos iu garem life insurance or NPF account, iu savve raetem legal nem wea Olketa Jehovah’s Witness iusim long kantri wea iu stap, for olketa tekem datfala selen olsem donation bihaen iu dae or retire.

Bank Account: Iu savve markem Olketa Jehovah’s Witness for kasem selen long bank account olsem donation bihaen iu dae. Iusim legal nem bilong Olketa Jehovah’s Witness long kantri wea iu stap and chek firstaem witim bank wea iu iusim.

Stocks and Bonds: Donatem stocks and bonds long Olketa Jehovah’s Witness olsem present or thru long agreement wea man raetem wea sei bae Olketa Jehovah’s Witness kasem diswan bihaen hem dae.

Real Estate: Donatem land or haos long Olketa Jehovah’s Witness olsem present, or mekem agreement hao nomata man gohed stap long datfala haos, Olketa Jehovah’s Witness bae kasem haos hia bihaen hem dae.

Wills and Trusts: Donatem property or selen thru long legal will, or thru long wei for raet and sei Olketa Jehovah’s Witness bae kasem datfala selen from wanfala trust agreement. Disfala arrangement maet helpem samfala saed long wei for peim tax.

Disfala toktok “charitable planning” helpem iumi for luksavve man mas plan gud bifor hem givim diskaen donation. For helpem man wea laek for givim kaen donation olsem for waka bilong Olketa Jehovah’s Witness raonem world, olketa wakem wanfala brochure long English and Spanish languis, wea garem title, Charitable Planning to Benefit Kingdom Service Worldwide. Datfala brochure garem information long olketa difren wei for givim donation distaem or long future, olsem wei for olketa kasem datfala donation bihaen man hem dae. Disfala brochure maet no fitim kantri wea iu stap bikos long olketa law saed long tax or olketa nara law. Samfala bin iusim charitable planning for sapotim waka bilong Olketa Jehovah’s Witness evriwea long world for preach and helpem pipol long taem bilong disaster, and tu, olketa kasem gud samting from diswan saed long tax. Sapos hem fitim kantri wea iu stap, iu savve kasem copy bilong disfala brochure from secretary long kongregeson.

For moa information, clickim link “Givim Donation Online for Sapotim Waka wea Gohed Raonem World” long botom bilong eni page long jw.org/pis, or contactim branch office.