Christian Famili Needim Spiritual Kaikai Evriday
1 “Man mas laef, no from bred nomoa, bat from evri toktok wea kamaot from mouth bilong Jehovah.” (Matt. 4:4) Olketa toktok hia hem tru tumas! Olsem wei wea iumi needim kaikai evriday for body bilong iumi, iumi needim tu spiritual kaikai evriday. For helpem iumi kaikai from Word bilong God evriday, Society hem pablisim LukLuk Long Olketa Scripture Evriday. Waswe, iufala markem taem for story raonem text evriday olsem wanfala Christian famili?
2 Parents Nao Mas Showimaot Example: Taem iumi busy, hem isi tumas for leavim text firstaem and ting for story raonem long narafala taem. Bat sapos olketa parents luksavve long spiritual need bilong famili bilong olketa, bae olketa markem taem each day for full famili stap tugeta for duim datwan. (Matt. 5:3) Olketa parents bae no readim text nomoa witim olketa pikinini, bat olketa bae story tu abaotem koment from Wastaoa and wanem nao olketa savve duim for followim datfala information and kaonsel. Hem tru, for duim olsem evritaem maet hem minim iufala need for waka hard, bat gud samting nao bae iufala kasem from datwan. (Markem Acts 17:11, 12.) So, iufala olketa parents nao mas waka hard for showimaot gudfala example!
3 Markem Taem wea Fitim Evriwan: Wanem taem nao hem gud for full famili duim text tugeta, wea savve helpem iufala for no missim text evriday? For startim day witim wei for story raonem text long Bible hem savve helpem iumi. Long Bethel and olketa missionary hom raonem world, olketa startim day witim morning worship and story raonem text bilong datfala day tu. Diswan helpem olketa brata for startim day bilong olketa witim gud samting, for ting raonem olketa toktok bilong Jehovah evriday.—Ps. 1:1, 2; Phil. 4:8.
4 Olketa Christian famili savve kasem gud samting tu taem olketa story raonem Bible long morning. Olketa pikinini savve kasem help for deal witim olketa nogud samting wea savve spoelem spiritual fasin bilong olketa long skul. Sapos hem no fitim full famili for story raonem text bilong datfala day tugeta, olketa parents savve arrangem narafala wei for duim, mekem olketa no missim disfala important spiritual kaikai. Olsem example, sapos dadi mas go long waka bifor olketa pikinini wekap long morning, maet mami savve markem taem for story raonem text witim olketa pikinini. Bat, samfala famili arrange for story raonem text long evening bikos hem nao taem wea evriwan stap tugeta. Each famili savve markem taem wea barava fitim evriwan.
5 Hem important for wanfala Christian famili for kasem spiritual kaikai evriday. Markem text evriday olsem important samting for famili bilong iu. (Phil. 1:10) For story raonem scripture long Bible evriday bae helpem iumi for strong for followim olketa raeteous principle and law bilong Jehovah. Wei wea full famili waka tugeta bae helpem evriwan kasem gud samting from disfala arrangement.