Famili Schedule—Text Evriday
1 Olketa loving dadi and mami waka hard evriday for redim healthy kaikai for olketa pikinini. Bat for givim olketa pikinini spiritual kaikai from Word bilong God nao hem barava important winim datwan. (Matt. 4:4) Wanfala wei wea iu savve helpem olketa pikinini for mekem grow wei for laekem spiritual kaikai and “grow for kasem salvation” hem for markem taem for famili story raonem text evriday. (1 Pet. 2:2) Wanem taem insaed day nao iu savve markem diswan long famili schedule bilong iu?
2 Long Taem for Kaikai: For startim day witim wei for story raonem text savve helpem famili for tingim Jehovah insaed full day. (Ps. 16:8) Wanfala mami readim and storyim text witim boy bilong hem taem hem kaikai long morning and then hem prea witim hem bifor hem go long skul. Diswan strongim hem for no lusim faith taem hem feisim wei for mekhae long kantri, winim temptation for duim dirty fasin, and no fraet for witness long olketa student and teacher. Nomata hemseleva nomoa only Witness long skul, hem nating feel olsem hem stap seleva.
3 Sapos iu no fit for storyim text long morning, iu savve duim diswan long nara part bilong day olsem famili, maet long taem for kaikai long evening. Long taem hia, samfala savve storyim tu olketa experience long field ministry and olketa naesfala point olketa laekem from Bible reading bilong olketa seleva. Staka ting bak witim hapi long olketa taem olsem wea famili hapi tugeta.
4 Long Naet: For samfala famili gudfala taem for olketa storyim text hem long naet bifor olketa sleep. Diswan hem gudfala taem tu for prea tugeta. Taem olketa pikinini herem iu tok abaotem Jehovah and prea long hem evriday, hem kamap wanfala really person long olketa.
5 Jehovah bae blessim hard waka bilong iu for putim truth insaed olketa pikinini taem iu iusim gud Lukluk Long Olketa Scripture Evriday.