Kamap Gud Long Ministry —Iusim Wanem Bible Teachim Buk for Showim Man Hao Iumi Duim Bible Study

Why Hem Important: Maet staka pipol no savve wanem nao iumi minim taem iumi askem olketa sapos olketa laek for studyim Bible. Maet olketa tingse olketa bae joinim wanfala grup for study tugeta or for duim seleva wanfala course. Hem bae gud for showim long man hao iumi duim wanfala Bible study, and no askem hem nomoa sapos hem laek for studyim Bible. Insaed tu-thri minute, iumi savve showim hem hao wei for studyim Bible hem isi nomoa and bae hem savve lanem staka samting.

Wanem for Duim:

Talem hello then askem haosholder sapos hem wari abaotem future.
Talem hem staka pipol garem sem tingting olsem hem, and showim hem list bilong olketa chapter insaed Wanem Bible Teachim buk. Explainim long hem datfala buk hem garem olketa leson wea hem isi for minim wea storyim wanem Bible talem abaotem future and olketa nara subject. Then askem hem wanem chapter nao hem interest long hem.
Givim wanfala buk for hem, and talem hem for lukluk long chapter wea hem chusim. Explainim hao ansa for olketa kwestin wea stap anda long heding hem insaed long olketa paragraf.
Askem haosholder sapos hem willing for readim first paragraf. Then readim kwestin long datfala paragraf and helpem hem for faendem ansa. Readim and story raonem olketa scripture wea sapotim datfala ansa. Showim buk bilong iu long hem wea iu andalaenem finis datfala ansa.
Readim mek-tu paragraf, and askem kwestin. Askem haosholder for trae ansarem kwestin long toktok bilong hemseleva.
Praisem hem, and arrange for go bak and finisim datfala chapter.
Sapos hem fitim, showim or storyim datfala video long jw.org wea garem title, Hao Nao Mifala Conductim Wanfala Bible Study?

Samting for Duim Long Disfala Month:

Prea long Jehovah for blessim hard waka bilong iu for startim wanfala niu Bible study.—Phil. 2:13.
Taem iu duim ministry trae for iusim Wanem Bible Teachim buk for showim man hao iumi duim Bible study, or showim datfala video Hao Nao Mifala Conductim Wanfala Bible Study?