Gudfala Wei Bilong Iumi Mekhae Long God
1. Why nao hem isi for pipol luksavve long Olketa Jehovah’s Witness taem olketa attendim convention?
1 Pipol savve lukim wanem iumi duim long taem bilong olketa convention bilong iumi. Staka taem pipol savve herem long nius iumi bae garem convention. Pipol wea stap long ples wea convention kamap lukim staka pipol werem convention badge. Bae iumi storyim samfala samting wea bae helpem iumi for showimaot gudfala wei and for mekhae long God long taem bilong convention.—1 Pet. 2:12.
2. Why nao hem important for werem kaleko wea showimaot respect?
2 Kaleko wea Showimaot Respect: Taem iumi werem kaleko wea showimaot respect long convention datwan savve mekem pipol tinghae long iumi olketa Witness. Bat iumi mas tingim, pipol bae tinghae long iumi tu sapos iumi werem kaleko wea fitim bifor and bihaen long program. Pipol shud luksavve iumi difren from pipol long world. (Rom. 12:2) Taem iumi werem convention badge, datwan bae mekhae long convention and givim chance for iumi witness long nara pipol.
3. Hao nao iumi savve showimaot iumi patient and tingim narawan?
3 Patient and Tingim Narawan: Hem gud tumas taem pipol lukim iumi patient and tingim narawan nomata staka pipol long world distaem tingim olketa seleva nomoa and no savve tinghae long narawan. (2 Tim. 3:1-5) Taem iumi keepim ples for sidaon or taem iumi laen ap for tekem olketa niu release, iumi mas no tingim iumiseleva nomoa bat iumi mas tingim nara pipol tu. (1 Cor. 10: 23, 24) Wanfala man wea interest kam long convention and bihaen hem sei: “Mi no savve tingim olketa samting wea olketa storyim long olketa tok long datfala day, bat olketa gudfala samting wea olketa Witness duim nao mi no savve forgetim.”
4. Why nao iumi laek for volunteer long taem bilong convention sapos hem fitim?
4 Willing for Volunteer: Olketa tru Christian willing for volunteer. (Ps. 110:3) Waswe, iu willing for volunteer long taem bilong convention? Long wanfala ples for hipap for convention, samting olsem 600 brata and sista volunteer for duim klining bifor convention. Pipol wea waka long datfala ples barava tinghae long datwan and sapraes for savve pipol hia olketa volunteer nomoa. Iumi barava luk forward for lisin and lanem staka samting long 2013 distrik convention, and for iumi iusim datfala chance for mekhae long God.
[Box long page 3-6]
Olketa Reminder for 2013 Distrik Convention
◼ Taem wea Program Hem Start and Finis: Iumi savve kam long Assembly Hall start long 8:00 a.m. Long thrifala day evriwan, music for startim program bae start long 9:20 a.m. Long datfala taem, hem gud for iumi evriwan sidaon, mekem iumi redi taem program hem start. Long Friday and Saturday last song and prea bae kamap long 4:50 p.m, and long Sunday long 3:35 p.m.
◼ Markem Ples for Sidaon: Iu savve keepim nomoa ples for famili bilong iu, olketa wea kam witim iu or Bible study bilong iu.—1 Cor. 13:5.
◼ Kaikai for Lunch: Plis tekem kam kaikai mekem iu no go aot from convention for peim kaikai long taem for spel. Putim basket kaikai long ples wea bae no disturbim eniwan. Tekem smol basket kaikai wea fitim nomoa and no tekem kam glass container.
◼ Donation: Iumi savve showimaot iumi tinghae long convention taem iumi willing for givim donation for waka evriwea long world long taem bilong convention. Sapos eniwan laek givim cheque, hem mas raetem “Jehovah’s Witnesses of the Solomon Islands Trust Board.”
◼ Accident and Emergency: Long convention, sapos eniwan needim help saed long medical, plis lukim wanfala attendant wea bae stretawe talem First Aid Department, mekem olketa wea savve saed long diswan chekim man wea sik and givim help wea fitim. Sapos man needim ambulance then First Aid Department savve ringim olketa.
◼ Medicine: Sapos iu needim spesol medicine for sik bilong iu hem gud for iu holem kam datfala medicine.
◼ Plis Go Lukim Man Hia (S-43-SP) Form: Sapos long taem bilong convention, iu witness long wanfala man and hem interest, then iu savve fulimap disfala form, Plis Go Lukim Man Hia. Iu savve givim olketa form wea iu fulimap long brata wea waka long bukrum or secretary long kongregeson.
◼ Volunteer: Sapos eniwan laek volunteer for waka, hem savve go lukim Volunteer Service Department long convention. Olketa pikinini wea no kasem 16 year yet savve help sapos olketa waka witim mami, dadi or olketa nara mature pablisa.