Twelvfala Reason Why Iumi Preach

Why nao iumi preachim gud nius and duim olketa Bible study? Waswe, iu tingse main reason hem for helpem pipol wea hambol for kasem laef olowe? (Matt. 7:14) Hem nao firstfala reason long list long daon, bat hem no main reason why iumi preach. Long tingting bilong iu, which wan long 12-fala reason hia nao hem main reason why iumi preach?

1. Preaching waka hem for helpem pipol kasem laef olowe.—John 17:3.

2. Preaching waka hem for warnim wicked pipol.—Ezek. 3:18, 19.

3. Preaching waka wea iumi duim distaem hem wanfala long olketa Bible profesi wea kamap tru.—Matt. 24:14.

4. Preaching waka hem wanfala wei wea God showimaot hem evritaem duim stret samting. No eniwan savve sei Jehovah no givim taem for wicked pipol for repent bifor hem finisim olketa.—Acts 17:30, 31; 1 Tim. 2:3, 4.

5. Wei for duim preaching waka hem samting iumi savve duim for helpem pipol fren witim God bikos hem baem iumi evriwan long blood bilong Jesus.—Rom. 1:14, 15.

6. From iumi duim preaching waka iumi no kasem blame sapos eniwan no sev.—Acts 20:26, 27.

7. Preaching waka hem samting iumi mas duim for kasem laef olowe.—Ezek. 3:19; Rom. 10:9, 10.

8. Taem iumi duim preaching waka iumi showimaot iumi lovem narawan.—Matt. 22:39.

9. Taem iumi duim preaching waka hem showimaot iumi obeyim Jehovah and Son bilong hem.—Matt. 28:19, 20.

10. Preaching waka hem part long worship bilong iumi.—Heb. 13:15.

11. Iumi duim preaching waka for showimaot iumi lovem God.—1 John 5:3.

12. Preaching waka hem wanfala wei for showimaot iumi laekem nem bilong Jehovah for holy.—Isa. 43:10-12; Matt. 6:9.

Samfala nara reason stap tu why iumi duim preaching waka. Olsem example, wei for duim preaching waka strongim faith bilong iumi and hem wanfala privilege for waka tugeta witim God. (1 Cor. 3:9) Bat last reason long list nao hem main reason why iumi duim preaching waka. Nomata sapos pipol lisin or nomoa, disfala preaching waka hem wanfala wei for showimaot iumi laekem nem bilong Jehovah for holy and Jehovah savve givim ansa long datwan wea tok daonem hem. (Prov. 27:11) Evri samting wea iumi storyim showimaot iumi garem olketa gud reason for “gohed for teachim pipol and talemaot gud nius.”—Acts 5:42.