Waswe, Iu Showim Hao for Duim Study Long Firstaem Iu Meetim Pipol?
Taem iumi askem haosholder for studyim Bible witim iumi, samfala sei olketa no interest or olketa studyim Bible tu long church bilong olketa. Taem olketa ting long Bible study, olketa tingim samting wea olketa duim long church nomoa, datwan mekem olketa no minim hapi wea olketa savve kasem sapos olketa studyim Bible witim iumi. So for tu-thri minute, hem gud for showim long olketa hao for study, winim wei for askem olketa for study! For minim diswan: Sapos iu savve hao for kuki gud, no talem nomoa iu savve kuki and bae iu kam bak witim kaikai, bat letem olketa for testim stretawe wanem iu kukim! Diswan nao wanfala idea long hao for duim diswan insaed tu-thri minute nomoa, and disfala idea stap long page 8 long November 2007 Kingdom Ministry Bilong Iumi:
“Waswe, iu tingse taem bae kam wea disfala scripture bae kamap tru? [Readim Isaiah 33:24, and weit for hem ansa.] Mi laek showim iu wanfala interesting samting abaotem diswan.” Givim wanfala Wanem Bible Teachim buk long haosholder, and showim hem paragraf 22 long page 36. Readim kwestin wea stap long botom page, and askem haosholder for faendem ansa taem iu readim datfala paragraf. Then askem datfala kwestin moa, and herem wanem haosholder talem. Readim nara scripture witim hem. Askem wanfala kwestin for ansarem, and markem taem for kam bak. Taem iu duim olsem, iu startim nao wanfala Bible study!