“Biliv lo Jesus”—Hao, for Biliv lo Jesus Hem Inaf for Kasem Salvation?
Ansa from Bible
Olketa Christian biliv dat Jesus dae for sin blo olketa man. (1 Peter 3:18) Bat, for kasem salvation man need for duim moa samting winim for biliv nomoa lo Jesus olsem Savior. Olketa demon savve dat Jesus hem “Son blo God,” bat bae olketa distroe, olketa no kasem salvation.—Luke 4:41; Jude 6.
Wat nao mi mas duim mekem mi sev?
Iu mas biliv dat Jesus sakrifaesim laef blo hem for sin blo iumi. (Acts 16:30, 31; 1 John 2:2) Diswan includim for biliv dat Jesus hem real person and evri samting wea Bible storyim abaotem Jesus hem accurate.
Lane abaotem wat Bible really teachim. (2 Timothy 3:15) Bible hem sei dat Paul and Silas talem datfala gard: “Iu mas biliv lo Lord Jesus, and iu bae sev.” Then, afta datwan, olketa start for teachim “word blo Jehovah”a lo datfala gard. (Acts 16:31, 32) Diswan showim dat if gard hia no kasem basic understanding abaotem Word blo God, bae hard for hem biliv lo Jesus. Hem need for lanem accurate knowledge wea base lo olketa Scripture.—1 Timothy 2:3, 4.
Repent. (Acts 3:19) Iu mas repent tu, or feel sorre from olketa rong attitude or samting wea iu duim bifor. Pipol bae lukim dat iu repent bikos iu stop for duim samting wea God no hapi lo hem and iu duim ‘olketa samting wea showimaot iu repent.’—Acts 26:20.
Baptaes. (Matthew 28:19) Jesus sei olketa wea kamap disaepol blo hem mas baptaes. Prison gard wea iumi storyim finis hem baptaes. (Acts 16:33) Semsem tu, afta aposol Peter teachim truth abaotem Jesus lo wanfala big grup, “olketa wea hapi for acceptim toktok blo hem olketa baptaes.”—Acts 2:40, 41.
Obeyim toktok blo Jesus. (Hebrews 5:9) Pipol wea “followim evri samting” wea Jesus komandim olketa for duim, showim lo laef blo olketa dat olketa follower blo hem. (Matthew 28:20) Olketa “followim toktok blo God, no herem nomoa.”—James 1:22.
No givap kasem end. (Mark 13:13) Olketa disaepol blo Jesus need for “no givap” in order for olketa sev. (Hebrews 10:36) For example, aposol Paul maintainim wei wea hem obeyim olketa teaching blo Jesus and loyal lo God, and hem no givap start lo taem hem kamap Christian go kasem taem hem dae.—1 Corinthians 9:27.
Hao nao datfala “Sinner’s Prea”?
Lo samfala religion, pipol savve repeatim olketa prea olsem “Sinner’s Prea” and “Salvation Prea.” Olketa wea talem olketa prea hia luksavve olketa sin and olketa biliv dat Jesus hem dae for sin blo olketa. Olketa ask tu for Jesus kam insaed heart or laef blo olketa. Bat Bible no storyim prea olsem “Sinner’s Prea” or for repeatim datfala prea.
Samfala pipol ting afta olketa repeatim olketa toktok lo “Sinner’s Prea,” olketa bae kasem eternal salvation. Bat hem no minim prea savve sevem man. From iumi imperfect, iumi savve continue for mekem mistek. (1 John 1:8) Dastawe, Jesus teachim olketa follower blo hem for prea evritaem for forgiveness for sin blo olketa. (Luke 11:2, 4) And tu, samfala Christian wea garem chance for kasem laef olowe olketa lusim datfala blessing bikos olketa stop for worshipim God.—Hebrews 6:4-6; 2 Peter 2:20, 21.
Wea nao datfala “Sinner’s Prea” kam from?
Olketa historian no agree witim origin blo datfala “Sinner’s Prea.” Samfala talem dat prea hia hem start during Protestant Reformation. Others biliv dat pipol start for talem “Sinner’s Prea” during olketa religious movement lo 18th and 19th century. Nomata olsem, datfala practice Bible no storyim, and really hem conflict witim olketa Bible teaching.
a Bible talem Jehovah hem nem blo God.