Hao, Hell Hem Real? Wat Nao Bible Talem Abaotem Hell?

Ansa from Bible

Olketa difren old English Bible transleison, olsem King James Version, iusim word “hell” insaed samfala verse. (Psalm 16:10; Acts 2:27 a) Piksa lo disfala article wea iu lukim hem base lo olketa religious teaching, staka pipol bilivim dat hell hem ples blo eternal fire for panisim olketa wicked pipol. Bat hao, hem nao wat Bible teachim?

Lo disfala article

Hao, hell hem ples blo eternal safaring?

Nomoa. Lo samfala old Bible transleison, datfala original word wea olketa transleitim for “hell” (Hebrew, “Sheol”; Greek, “Hades”) hem refer lo “Grev,” wea hem grev blo olketa man. Bible showim dat pipol wea stap lo “Grev” olketa no exist moa.

Olketa wea dae no savve lo eni samting and no feelim eni pain tu. “No eni waka, plan, wisdom, knowledge, lo hell.” (Ecclesiastes 9:10, Douay-Rheims Version) Hell hem no garem saond blo pipol wea singaot bikos olketa safa. Bat, Bible sei: “Letem olketa wea wicked nao for mas shame, and letem olketa stap kwaet lo grev [hell, Douay-Rheims].”—Psalm 31:17; King James Version (30:18, Douay-Rheims); Psalm 115:17.
God talem dat dae nao panis blo sin, no for man safa lo hell fire. God talem lo first man, Adam, dat panis for man wea brekem law blo God hem dae. (Genesis 2:17) Hem nating talem eni samting abaotem eternal safaring lo hell. Gogo, afta Adam hem sin, God talem panisment blo hem, hem sei: “Iu dust nomoa and bae iu go bak moa lo dust.” (Genesis 3:19) Adam bae no exist nao. If God sendem Adam lo hell fire, for sure hem bae mentionim tu. God no changem panisment for olketa wea disobeyim law blo hem. Longtaem afta Adam hem sin, God iusim wanfala Bible raeta for sei: “Wages blo sin hem dae.” (Romans 6:23) No eni nara panisment moa, bikos “man wea dae hem free nao from olketa sin blo hem.”—Romans 6:7.
God barava heitim datfala idea blo eternal safaring. (Jeremiah 32:35) Dat kaen idea hem no in laen nao witim teaching lo Bible wea sei “God hem love.” (1 John 4:8) Hem laekem iumi for worshipim hem bikos iumi lovem hem, no bikos iumi fraet lo eternal safaring lo hell fire.—Matthew 22:36-38.
Gud pipol go lo hell. Olketa Bible wea iusim word “hell” storyim dat olketa faithful man, olsem Jacob and Job, olketa go lo hell. (Genesis 37:35; Job 14:13) Even Jesus Christ hem stap lo hell taem hem dae kasem taem hem resurrect. (Acts 2:31, 32) So hem klia, dat taem olketa Bible hia iusim word “hell” hem just refer nomoa lo Grev.b

Wat nao mining blo parabol blo Jesus abaotem rich man and Lazarus?

Disfala parabol Jesus nao storyim and hem stap lo Luke 16:19-31. Olketa parabol hem olketa illustration wea teachim iumi olketa important truth and hao God ting lo samting. So parabol abaotem rich man and Lazarus hem no real laef story. (Matthew 13:34) For lane moa abaotem disfala parabol, lukim article “Who Were the Rich Man and Lazarus?”

Hao, hell representim separation from God?

Nomoa. Datfala doctrine wea sei man wea dae hem savve dat hem separate from God hem againstim Bible, bikos Bible teachim dat man wea dae hem no savve lo eni samting.—Psalm 146:3, 4; Ecclesiastes 9:5.

Hao, eniwan bin release from hell?

Yes. Bible garem story abaotem naenfala pipol wea go lo Grev (wea samfala Bible transleitim for “hell”) and olketa resurrect and laef bak.c If olketa savve dat olketa stap lo hell, bae olketa savve storyim wat olketa experiencem lo there. Hem very interesting, hao no eniwan lo naenfala hia mentionim olketa safa lo hell or experiencem eni nara samting. Wat nao reason? Olsem Bible teachim, olketa no savve lo eni samting, hem olsem olketa deepim “sleep” nomoa.—John 11:11-14; 1 Corinthians 15:3-6.

a Staka modern English transleison no iusim datfala word “hell” lo Acts 2:27. Bat, samfala iusim olketa expression olsem “grev,” (New Century Version); “ples blo olketa man wea dae,” (New International Version); “olketa wea dae” (The Passion Translation). Samfala nara Bible just iusim nomoa datfala Greek word “Hades.”—Holman Christian Standard Bible, NET Bible, New American Standard Bible, English Standard Version.

b Lukim box “Olketa Word lo Original Languis wea Bible Iusim.”

c Lukim 1 Kings 17:17-24; 2 Kings 4:32-37; 13:20, 21; Matthew 28:5, 6; Luke 7:11-17; 8:40-56; John 11:38-44; Acts 9:36-42; Acts 20:7-12.

Olketa Bible verse wea story abaotem hell, or Grev

Job 14:13: “Plis iu haedem mi insaed lo Grev, [“hell,” Douay-Rheims Version] . . . iu markem taem for mi and then rememberim mi!”

Mining: Datfala faithful man Job savve dat hell (Grev) bae mekem hem relief from pain and hao God savve mekem hem laef bak from hell, wea hem nao Grev.

Psalm 145:20: “Jehovah protectim evriwan wea lovem hem, bat evri wicked pipol bae hem finisim olketa.”

Mining: God bae finisim, or permanently distroem, wicked pipol. Hem bae no keepim olketa for gohed laef lo hell and mek safa lo olketa.

Ecclesiastes 9:10: “No eni waka or plan or knowledge or wisdom lo Grev [“hell,” Douay-Rheims Version], ples wea bae iu go lo hem.”

Mining: Olketa wea stap lo Grev, or hell, no savve lo eni samting, so olketa no safa. So hem klia dat olketa wea datfala Bible raeta storyim hem includim tu gud pipol.

Acts 2:31: “Hem savve finis and story abaotem resurrection blo Christ, dat soul blo hem bae no stap lo hell.”—King James Version.

Mining: Jesus Christ go lo hell (Grev) taem hem dae.

Romans 6:23: “Wages blo sin hem dae.”

Mining: Dae nao hem full panisment for sin, ino safaring lo hell.

Revelation 20:13: “Dae and hell givim kam bak olketa wea dae lo hem.”—King James Version.

Mining: Olketa wea dae nao stap lo hell. Olketa bae resurrect and laef bak.

Revelation 20:14: “Hem torowem dae and hell insaed lake blo fire.”—King James Version.

Mining: Afta olketa man resurrect, hell (Grev) bae distroe for olowe, olsem olketa putim insaed fire. Then afta, dae wea hem result from Adam hem sin bae nomoa nao.—Romans 5:12.

Olketa word lo original languis wea Bible iusim

Olsem list lo daon showim, olketa Bible transleita mekem olketa reader for konfius taem olketa iusim word “hell” for olketa original languis word witim difren mining. Samtaems, maet olketa laek for promotim idea dat olketa wicked pipol bae no finis, bat bae safa lo hellfire.

Sheol (Hebrew שְׁאוֹל), Hades (Greek ᾅδης))

Mining: Grev blo olketa man.—Psalm 16:10; Acts 2:31

Transleitim lo: Grev, hell, pit (King James Version); ples blo man wea dae (New International Version)
Gehenna (Greek γέεννα)

Mining: Finis for olowe.—Matthew 5:30

Transleitim lo: Gehenna; hell (King James Version, New International Version)
Tartarus (Greek ταρταρόω)

Mining: Condition blo olketa demon wea lusim hae position blo olketa, wea olketa wicked spirit creature.—2 Peter 2:4

Transleitim lo: Tartarus; hell (King James Version, New International Version); lower hell (Douay-Rheims Version)
Apoleia (Greek ἀπώλεια)

Mining: Dae.—Matthew 7:13

Transleitim lo: Dae; hell (Good News Bible)
Pyr (Greek πῦρ)

Mining: Fire, literal or figurative.—Luke 17:29; Jude 23

Transleitim lo: Fire; hell fire (God’s Word Translation)

History blo hellfire

Heathen origin: Olketa ancient Egyptian biliv lo hell fire. Wanfala buk abaotem olketa funeral, Book Ȧm-Ṭuat (Amduat), wea olketa historian sei olketa raetem lo 16th century B.C.E., describem olketa wea “bae go daon insaed hol blo fire; and . . . Olketa bae no fit for ranawe from datfala fire.”—The Egyptian Heaven and Hell.

Olketa early Christian no teachim datwan: “Hem klia dat lo N[iu] T[estament] iumi no lukim dat hell fire hem part lo teaching wea olketa [early Christian] preachim.”—A Dictionary of Christian Theology.

Greek philosophy start for influencim religious biliv: “From midol blo 2nd century [C.E.] olketa Christian wea kasem training lo Greek philosophy start for combinem philosophy witim religion blo olketa . . . Philosophy wea olketa laekem tumas hem Platonism [teaching blo Plato].” (Encyclopædia Britannica) Datfala teaching hem includim biliv abaotem man safa lo fire afta hem dae. “Aot of evri Greek philosopher, man wea influencim tumas tingting blo pipol abaotem Hell hem Plato.”—Histoire des enfers (The History of Hell).

Olketa iusim teaching blo hellfire olsem excuse for torturem man: During taem wea olketa kolem lo Spanish Inquisition, olketa panisim olketa wea no agree lo teaching blo church and hangem olketa lo post and bornem olketa lo fire. Olketa sei “datwan hem sampol nomoa lo wat olketa bae experiencem lo hellfire,” maet datwan bae mekem olketa hia for repent bifor olketa dae. (The Spanish Inquisition, by Jean Plaidy) Sem samting tu Queen Mary I blo England duim lo abaot 300 Protestant, hem sei “from soul blo olketa man wea no agree lo teaching blo church bae bone olowe lo hellfire, hem stret for bonem man lo fire lo earth, for imitatim God lo hao hem panisim wicked pipol.”—Universal History, by Alexander Tytler.

Modern change: Samfala denomination no strong tumas abaotem teaching blo hell, hem no bikos olketa luksavve dat hem false teaching bat olketa laek for church member blo olketa for hapi. (2 Timothy 4:3) “Pipol laekem wanfala God wea kaen, approachable, and tingim olketa . . . Hem no common distaem for story abaotem sin and guilty wea man kasem from datwan.”—Professor Jackson W. Carroll.