“Redi Evritaem”
“Iumi kam klosap nao long taem wea evri samting bae finis. Dastawe iumi mas . . . redi evritaem for prea.”—1 PET. 4:7.
1. Wanem nao main samting wea Jesus teachim long pipol?
KINGDOM bilong God nao main samting wea Jesus Christ teachim long pipol taem hem stap long earth. Jehovah bae iusim Kingdom for showimaot hem nomoa fit for rulim olketa man and for mekem nem bilong hem stap holy. Dastawe Jesus lanem olketa disaepol for prea olsem long God: “Mifala laekem kingdom bilong iu for kam. Duim samting wea iu plan for duim long earth, long sem wei wea iu duim datwan long heven.” (Matt. 4:17; 6:9, 10) Barava klosap nao gavman bilong God bae finisim world bilong Satan and bae mekem plan bilong God for earth kamap tru. Olsem Daniel talem finis, Kingdom bilong God “bae smasem and finisim evri kingdom hia [olketa gavman wea stap distaem], and hem nomoa bae stap olowe.”—Dan. 2:44.
2. (a) Wanem nao mekem olketa wea followim Jesus luksavve hem rul finis long heven? (b) Datfala saen showimaot wanem samting moa?
2 Olketa disaepol bilong Jesus laek tumas for savve long taem wea Kingdom bilong God bae kam, dastawe olketa askem Jesus: “Wanem nao saen wea bae showimaot iu stap and world hem gogo for finis?” (Matt. 24:3) Nomata iumi long earth no lukim Christ hem rul long Kingdom, iumi bae lukim saen wea showimaot hem stap. Bible storyim olketa difren samting wea bae happen wea part bilong datfala saen. Dastawe taem olketa difren samting hia happen, olketa wea followim Jesus bae luksavve hem rul finis long heven. Olketa bae luksavve tu “olketa last day” bilong disfala nogud world wea Bible storyim hem start.—2 Tim. 3:1-5, 13; Matt. 24:7-14.
Gohed for Lukaot From Iumi Stap Long Olketa Last Day
3. Why nao olketa Christian mas lukaot?
3 Aposol Peter hem sei: “Iumi kam klosap nao long taem wea evri samting bae finis. Dastawe iumi mas garem gudfala tingting and redi evritaem for prea.” (1 Pet. 4:7) Olketa wea followim Jesus mas gohed lukaot. Olketa mas luksavve long olketa samting wea happen long world wea showimaot Jesus hem rul finis long heven. And olketa mas barava lukaot gud taem disfala world hem gogo for finis. Jesus talem olketa disaepol: “Gohed for lukaot, bikos iufala no savve long wanem taem nao masta bilong haos bae kam [for finisim world bilong Satan].”—Mark 13:35, 36.
4. Taem olketa samting happen long world, hao nao tingting bilong pipol long world hem difren from tingting bilong olketa wea worshipim Jehovah? (Storyim box tu.)
4 From Satan rulim world, pipol no luksavve why nao olketa samting long world hem happen. Olketa no luksavve Christ hem rul finis long heven. Bat olketa wea followim Christ gohed for lukaot. Olketa luksavve why nao olketa samting wea kamap insaed 100 year wea go finis hem happen. Start kam long 1925, Olketa Jehovah’s Witness luksavve hao World War I and olketa samting wea happen bihaen datwan, showimaot klia Christ start for rul long heven long 1914. So long datfala taem nao olketa last day bilong nogud world bilong Satan hem start. Nomata staka pipol no luksavve long diswan, olketa luksavve laef bilong pipol bifor World War I hem barava difren from laef bilong pipol bihaen datfala war.—Lukim box “Taem Bilong Trabol Hem Start.”
5. Why nao iumi mas gohed for lukaot?
5 Olketa barava nogud samting wea happen insaed klosap 100 year wea go finis showimaot iumi stap long olketa last day. Klosap nao Jehovah bae talem Jesus for leadim olketa angel for attakim world bilong Satan. (Rev. 19:11-21) Olketa tru Christian mas gohed for lukaot. So iumi mas gohed lukaot taem iumi weitim world for finis. (Matt. 24:42) Bat iumi mas duim wanfala waka tu long full world wea Christ nao leadim.
Waka wea Gohed Long Full World
6, 7. Long wanem wei nao preaching waka gohed long olketa last day?
6 Waka wea pipol bilong Jehovah mas duim hem wanfala part long datfala saen wea showimaot iumi stap long olketa last day. Jesus storyim disfala waka taem hem listim olketa difren samting wea bae happen long taem bilong end. Hem sei: “Olketa bae talemaot disfala gud nius abaotem kingdom long evri ples long world mekem pipol long evri kantri mas herem. Bihaen datwan nao, world bae finis.”—Matt. 24:14.
7 Tingim samfala samting wea showimaot datfala profesi hem kamap tru. Taem olketa last day start long 1914, pipol wea preachim gud nius no staka nomoa. Bat distaem olketa staka narawe. Winim 7 million Witness nao duim preaching waka long world, and winim 100 thousand kongregeson hem stap. And long 2008, samting olsem 10 million pipol kam hipap witim Olketa Jehovah’s Witness long Memorial. Staka pipol moa kam long Memorial long 2008 winim year bifor.
8. Why nao preaching waka hem gohed gud nomoa?
8 Tingim hao iumi preach abaotem Kingdom long evri kantri distaem! Datfala waka gohed nomata Satan hem “god bilong disfala world.” (2 Cor. 4:4) Satan iusim olketa gavman, religion, and bisnis for talem olketa laea story abaotem iumi. So hao nao preaching waka gohed gud nomoa? Hem bikos Jehovah nao bihaenem disfala waka. Dastawe preaching waka hem gohed nomata Satan trae hard for stopem datwan.
9. From pipol bilong God gohed kamap staka and olketa lanem plande samting abaotem hem, why nao diswan hem olsem wanfala mirakol?
9 From pipol bilong Jehovah gohed kamap staka and olketa lanem plande samting abaotem hem and plan bilong hem, diswan hem olsem wanfala mirakol. Sapos God no leadim and protectim pipol bilong hem, disfala preaching waka bae nating gohed nomoa. (Readim Matthew 19:26.) From holy spirit bilong God helpem pipol bilong hem, iumi savve disfala gud nius bae kasem evri kantri and “bihaen datwan nao, world bae finis.” Datfala taem hem klosap tumas nao.
“Bigfala Trabol”
10. Jesus hem sei datfala big trabol bae hao?
10 Disfala nogud world bae finis long taem bilong “bigfala trabol.” (Rev. 7:14) Bible no talem hao long nao bigfala trabol hia bae gohed, bat Jesus hem sei: “Bae bigfala trabol kamap wea hem winim eni trabol wea happen start kam long taem world hem start, kam kasem distaem, and no eni trabol wea kam bihaen bae nogud olsem.” (Matt. 24:21) Taem iumi tingim trabol wea kasem world finis, olsem taem World War II happen and samting olsem 50 go kasem 60 million pipol dae, datwan hem nating big nomoa taem iumi markem witim bigfala trabol wea bae kam. Last samting long datfala big trabol nao hem Armageddon. Long datfala taem nao Jehovah bae talem Jesus for leadim olketa angel for finisim world bilong Satan.—Rev. 16:14, 16.
11, 12. Wanem nao bae startim bigfala trabol?
11 Bible talem iumi firstfala samting wea bae startim datfala big trabol, bat hem no talem wanem taem nao datwan bae happen. Samting wea startim bigfala trabol nao hem taem olketa gavman finisim evri giaman religion. Olketa profesi wea stap long Revelation chapter 17 and 18, storyim olketa giaman religion olsem wanfala jury woman wea durong witim olketa gavman long earth. Revelation 17:16 storyim hao klosap nao olketa gavman hia “bae heitim datfala jury woman and bae spoelem hem and mekem hem naked. And olketa bae kaikaim body bilong hem and bae bonem hem long fire.”
12 Long taem wea God laekem datwan for happen, hem bae “putim tingting hia long mind bilong olketa [bigman bilong gavman] mekem olketa duim wanem hem laekem.” Hem nao for finisim evri giaman religion. (Rev. 17:17) So God nao finisim olketa. Hem nao judgem olketa giaman religion wea teachim olketa laea samting and wea spoelem pipol bilong Jehovah. Pipol long world no luksavve God bae finisim olketa giaman religion. Bat pipol bilong hem wea faithful, olketa savve diswan bae happen. Dastawe olketa gohed storyim diswan long pipol long olketa last day distaem.
13. Wanem nao showimaot olketa giaman religion bae finis kwiktaem nomoa?
13 Pipol bae seke tumas taem olketa lukim olketa giaman religion finis. Bible talem finis hao samfala “king long earth” tu bae sei olsem abaotem datwan: “Maewat! Sorre tumas long iu, . . . bikos insaed wanfala hour nomoa iu kasem panis bilong iu nao!” (Rev. 18:9, 10, 16, 19) Taem Bible talem disfala toktok “wan hour nomoa,” diswan showimaot evri samting hia bae happen kwiktaem tumas.
14. Taem olketa enemy attakim pipol bilong God, wanem nao God bae duim?
14 Iumi savve bihaen olketa giaman religion finis, Satan and olketa wea saedem hem bae attakim pipol bilong Jehovah wea talemaot olketa judgment message bilong hem. Bat iumi no savve wanem taem nao diswan bae happen. (Ezek. 38:14-16) Taem olketa start for attakim iumi, olketa bae feisim Jehovah nao, wea hem promis for protectim pipol bilong hem wea faithful. Jehovah tok olsem: “From mi barava kros fogud, mi mas toktok nao. . . . And olketa mas savve mi nao Jehovah.” (Readim Ezekiel 38:18-23.) God talem finis: “Man wea spoelem iufala [pipol bilong hem wea faithful] hem pokem eye bilong mi.” (Zech. 2:8) So taem olketa enemy start for attakim pipol bilong Jehovah, Jehovah bae duim samting nao. Armageddon bae start nao, wea hem lastfala samting wea bae happen long datfala big trabol. Christ bae leadim olketa strongfala angel for finisim world bilong Satan.
Wanem Nao Iumi Mas Duim?
15. From iumi savve disfala world hem klosap finis, wanem nao iumi mas duim?
15 From iumi savve disfala world hem klosap finis, wanem nao iumi mas duim? Aposol Peter hem sei: “From evri samting hia bae finis, iufala mas tingting gud abaotem laef bilong iufala. Iufala mas stap holy and gohed duim olketa stretfala samting wea God hem laekem!” (2 Pet. 3:11) Samting wea Peter talem showimaot iumi mas lukluk gud long laef bilong iumi. Iumi mas garem olketa wei wea God laekem and duim olketa samting wea showimaot iumi lovem Jehovah. Wanfala samting wea iumi savve duim nao hem for waka hard for preachim gud nius abaotem Kingdom bifor end hem kam. Peter sei tu: “Iumi kam klosap nao long taem wea evri samting bae finis. Dastawe iumi mas . . . redi evritaem for prea.” (1 Pet. 4:7) Taem iumi prea evritaem long Jehovah and askem hem for givim holy spirit for leadim iumi and kongregeson bilong hem long full world, datwan helpem iumi for fren gud witim hem and showimaot iumi lovem hem.
16. Why nao iumi mas barava followim toktok bilong God?
16 From world hem nogud tumas distaem, iumi mas followim disfala toktok long Bible: “Lukluk gud long wei bilong iufala. No duim olketa samting wea showimaot iufala krangge bat duim olketa samting wea showimaot iufala wise. Iufala mas iusim gud evri lelebet taem wea iufala garem, bikos iumi stap long taem wea hem nogud tumas.” (Eph. 5:15, 16) Pipol duim staka rabis samting distaem winim enitaem bifor. Satan iusim staka samting for trae stopem pipol for no duim wanem Jehovah laekem or for mekem olketa no tingim hem. Bat iumi savve long wei bilong Satan and iumi no laek duim eni samting wea bae mekem iumi no faithful long God. Iumi savve tu long olketa samting wea klosap for happen, and iumi trustim Jehovah and savve olketa plan bilong hem bae kamap tru.—Readim 1 John 2:15-17.
17. Taem God mekem pipol laef bak moa, olketa wea no dae long Armageddon bae ting hao long datwan?
17 Samting wea God promisim bae kamap tru. Hem bae mekem olketa wea dae finis for laef bak, bikos Bible hem sei: “Olketa man wea gud and olketa man wea nogud bae laef bak moa.” (Acts 24:15) Iumi savve diswan bae kamap tru bikos Bible talem stret: ‘Olketa bae laef bak moa’! Iumi savve Jehovah bae duim wanem hem talem! Isaiah 26:19 promis olsem: “Olketa bilong iumi wea dae finis bae laef bak moa. . . . Iufala wea stap long grev bae wekap and singaot from iufala hapi! . . . Earth bae aotem kam olketa wea dae long hem.” Long firstaem wea datfala promis kamap tru, hem taem wea God mekem pipol bilong hem go bak long Jerusalem. Hem olsem God mekem olketa laef bak moa. From Jehovah duim datwan, datwan strongim iumi hao hem bae mekem olketa wea dae laef bak moa long niu world. Iumi bae hapi tumas taem olketa wea laef bak stap moa witim famili bilong olketa! Tru tumas, world bilong Satan klosap finis nao, and niu world bilong God hem klosap for kam. Dastawe iumi mas redi evritaem!
Waswe, Iu Tingim Yet?
• Wanem nao main samting wea Jesus teachim long pipol?
• Hao nao preaching waka gohed distaem?
• Why nao iumi mas gohed for lukaot?
• Taem iu readim Acts 24:15, hao nao tingting bilong iu?
[Box long page 16]
TAEM BILONG TRABOL HEM START
The Age of Turbulence: Adventures in a New World hem title bilong buk wea Alan Greenspan raetem long 2007. Alan Greenspan hem chairman bilong United States Federal Reserve Board for klosap 20 year. Datfala Board hem lukaftarem evri samting saed long selen long America. Alan Greenspan storyim hao living bilong pipol bifor 1914 hem barava difren tumas from wanem hem happen bihaen datfala year. Hem sei:
“Evri samting wea olketa report talem abaotem living bilong pipol bifor 1914 hem showimaot pipol and olketa kantri barava respectim narawan. Pipol start for wakem staka niu samting and wei bilong pipol gohed kamap gud tu. From living bilong pipol barava gud tumas, hem luk olsem living bilong olketa savve kamap perfect nao. Long mek-19 century, olketa finisim nao wei for baem and salem olketa slave. Barava raf samting wea pipol savve duim long olketa narawan bifor hem luk olsem hem gogo for finis nao. . . . Long mek-19 century, olketa wakem staka niu samting. Olketa wakem road for olketa train go long hem, wakem telephone, electric laet, olketa movie, car, and olketa nara samting for man iusim long haos. From pipol lanem olketa niu samting long medicine, kaikaim healthy kaikai, and pipol garem klin wata for drinkim, datwan mekem pipol savve laef longtaem winim bifor . . . Evriwan tingse living bilong olketa bae gohed kamap gud moa.”
Batawea . . . “World War I spoelem living bilong olketa man winim World War II wea spoelem staka samting . . . Mi no savve forgetim living bilong pipol bifor World War I. Hem luk olsem olketa man bae gohed lanem staka samting and no eni samting bae stopem datwan. Distaem tingting bilong iumi abaotem future hem barava difren from pipol wea stap 100 year go finis. Bat hao iumi ting long future hem fitim samting wea happen distaem. From staka terrorist stap, earth hem hot go moa, and pipol garem moa paoa, waswe, bae diswan barava spoelem pipol distaem olsem World War I spoelem pipol bifor? No eniwan savve.”
Alan Greenspan tingim yet samting wea hem lanem from wanfala teacher bilong hem long university. Benjamin Anderson (wea born long 1886 and dae long 1949) hem sei: “Olketa wea big finis and tingim yet living wea olketa garem bifor World War I, tingim gudfala living wea olketa garem long datfala taem. Pipol stap gud long datfala taem, bat kam kasem distaem, hem no olsem nao.”—Economics and the Public Welfare.
Disfala buk A World Undone, wea Gerald Meyer raetem long 2006, hem talem sem samting. Buk hem sei: “Olketa samting wea happen bifor ‘barava changem evri samting nao.’ Hem nao samting wea happen long World War I [1914-1918]. Datfala war barava changem evri samting. Datfala war no changem nomoa olketa spialaen bilong olketa kantri, and olketa gavman and samting wea kasem olketa kantri, bat hem changem tu hao pipol ting long world and olketa seleva. Datfala war hem mekem living bilong pipol distaem barava difren from living bilong pipol bifor datfala war.”
[Piksa long page 18]
Long Armageddon, Jehovah iusim olketa angel for finisim world bilong Satan