Hao Iumi Showimaot Iumi Lovem God
FOR mekem love for God hem grow, no minim iumi mas garem savve abaotem hem nomoa. Olsem olketa servant bilong God raonem world bae talem, trufala love for God hem grow taem man savve long fasin bilong hem. And hem kamap moa strong taem man savve gud wanem nao God hem lovem, heitim, laekem, and olketa mark bilong hem.
Long loving wei, Jehovah givim iumi Word bilong hem, Bible, wea showim iumi evri samting abaotem hemseleva. Insaed Bible, iumi lanem hao Jehovah deal witim olketa difren samting wea kamap. Long sem wei wea iumi barava hapi taem iumi kasem wanfala leta from samwan iumi lovem, iumi savve hapi tu taem iumi lukim insaed Bible niufala samting hem showimaot saed long fasin bilong Jehovah.
Bat, olsem iumi lukim long pablik ministry bilong iumi, wei for savve abaotem God no evritaem mekem man lovem hem. Jesus talem samfala Jew wea no garem fasin for tinghae: “Iufala lukluk gud long olketa Scripture, from iufala tingse thru long olketa iufala bae kasem laef olowe; . . bat mi savve hao iufala no garem love bilong God long iufala.” (John 5:39, 42) For planti year samfala savve abaotem olketa loving samting wea Jehovah duim bat olketa no garem love for hem. Why nao olsem? Olketa fail for ting raonem mining bilong olketa samting wea olketa lanem. Long narasaed, planti million honest pipol wea iumi studyim Bible witim, love bilong olketa for God go ahed for grow. Why? Bikos, olsem iumiseleva duim, olketa followim example bilong Asaph. Long wanem wei?
Ting Raonem Witim Wei for Tinghae
Asaph disaed strong for mekem grow love for Jehovah long heart bilong hem. Hem raet olsem: “Witim heart bilong mi bae mi tingim . . . Mi bae rememberim olketa samting wea Jah duim; from mi bae rememberim nambawan samting wea iu duim bifor kam. And mi bae ting raonem evri waka bilong iu, and evri samting wea iu duim mi bae interest long hem.” (Psalm 77:6, 11, 12) Olsem man hia wea raetem psalm, love for God bae grow long heart bilong man wea ting raonem wei bilong Jehovah.
And tu, for rememberim olketa samting wea iumi enjoyim taem iumi servem Jehovah bae strongim wei wea iumi fren witim hem. Aposol Paul sei iumi “pipol wea waka” witim God, and wei for fren wea savve grow midolwan long olketa brata hem barava spesol. (1 Corinthians 3:9) Taem iumi showimaot love bilong iumi for Jehovah, hem tinghae long hem and diswan mekem heart bilong hem hapi. (Proverbs 27:11) And tu, taem iumi askem Jehovah for help long samfala problem wea iumi kasem and hem helpem iumi winim, iumi sure hem stap witim iumi, and love bilong iumi for hem kamap moa deep.
Wei for fren midolwan tufala pipol savve grow taem olketa talemaot feeling bilong olketa long narawan. Olsem tu, taem iumi talem Jehovah why iumi loyal long hem, iumi strongim love bilong iumi for hem. Datwan bae mekem iumiseleva ting raonem toktok bilong Jesus: “Iu mas lovem Jehovah, God bilong iu witim full heart bilong iu and witim full soul bilong iu and witim full mind bilong iu and witim full strong bilong iu.” (Mark 12:30) Wanem nao iumi mas duim for mek sure iumi go ahed for lovem Jehovah witim full heart, full soul, full mind, and full strong bilong iumi?
Lovem Jehovah Witim Full Heart Bilong Iumi
Bible story abaotem tokpiksa heart, wea diswan piksarem olketa samting wea iumi laekem, olketa wei and tingting bilong iumi, and feeling bilong iumi. So, for lovem Jehovah witim full heart, hem minim iumi barava laek for mekem hem hapi winim evri nara samting. (Psalm 86:11) Iumi showimaot iumi garem datkaen love, taem iumi mekem fasin bilong iumi kamap fasin wea hem acceptim. Iumi traem best for followim God long wei for ‘heitim wicked samting and hol strong long gud samting.’—Romans 12:9.
Love bilong iumi for God bae affectim feeling bilong iumi long evri samting. Olsem example, iumi maet laekem tumas or interest long waka bilong iumi for selen, bat waswe, datwan nao main samting long heart bilong iumi? Nomoa. From iumi lovem Jehovah witim full heart bilong iumi, wei wea iumi minister bilong hem nao moa important winim evri nara samting. Olsem tu, iumi laek for mekem parents, marit partner and boss bilong iumi hapi, bat iumi pruvim hao iumi lovem Jehovah witim full heart taem iumi tingim wei for mekem hem hapi olsem main important samting. Tru nao, fitim hem nao main samting long heart bilong iumi.—Matthew 6:24; 10:37.
Lovem Jehovah Witim Full Soul Bilong Iumi
Long Bible datfala word “soul” hem really minim full man and laef wea iumi garem. So for lovem Jehovah witim full soul hem minim for iusim laef bilong iumi for praisem hem and for pruvim love bilong iumi for hem.
Bat, iumi maet garem samfala difren interest long laef, olsem for lanem wanfala waka, ranem wanfala bisnis, or for bringim ap famili. Bat nomata olsem, iumi savve pruvim iumi lovem Jehovah witim full soul, long wei for duim samting followim wei bilong hem and no letem eni samting kamap moa important winim wei for servem Jehovah, wea showimaot iumi “luk aotem firstaem kingdom and raeteous fasin bilong hem.” (Matthew 6:33) For worship witim full soul hem minim tu for barava strong long worship. Iumi showimaot long Jehovah hao iumi lovem hem taem iumi strong for preachim message bilong Kingdom, talem olketa koment wea buildimap man long olketa meeting, or helpem olketa Christian brata and sista. Long evri samting, iumi go ahed “duim will bilong God witim full soul.”—Ephesians 6:6.
Jesus showimaot hem lovem God witim full soul long wei wea hem lusim will bilong hemseleva. Hem putim will bilong God firstaem and olketa need bilong hemseleva kam bihaen. Jesus invaetem iumi for followim example bilong hem. Hem sei: “Sapos eniwan want for kam bihaenem mi, hem mas lusim will bilong hemseleva and karem torture stake bilong hem and followim mi olowe.” (Matthew 16:24, 25) For lusim will bilong iumiseleva hem minim for mekem dedication. Hem minim iumi barava lovem God and iumi letem hem nao ownim iumi, olsem long taem bilong Bible wea sapos wanfala Israelite lovem tumas masta bilong hem, hem givim hemseleva for kamap slave bilong hem. (Deuteronomy 15:16, 17) For dedicatem laef bilong iumi long Jehovah hem pruv wea showimaot iumi lovem hem.
Lovem Jehovah Witim Full Mind Bilong Iumi
For lovem Jehovah witim full mind hem minim iumi traem best for savve long fasin bilong Jehovah, olketa purpose bilong hem, and olketa mark bilong hem. (John 17:3; Acts 17:11) Iumi showimaot love for Jehovah taem iumi iusim evribit savve wea iumi garem for helpem pipol lovem Jehovah and for mekem wei bilong iumi for teach kamap moabeta. Aposol Peter encouragem iumi: “Redyim mind bilong iufala for waka.” (1 Peter 1:13) And tu, iumi waka hard for showimaot interest long olketa narawan, especially olketa nara servant bilong God. Iumi luksavve long living bilong olketa and lukim taem wea fitim for givim praise or comfortim olketa.
Iumi showim Jehovah iumi lovem hem witim full mind long wei for garem tingting for stap anda long hem. Iumi trae for tingim olketa samting olsem hem tingim, taem iumi mekem disison, and trustim hao wei bilong hem nao best wan. (Proverbs 3:5, 6; Isaiah 55:9; Philippians 2:3-7) Bat taem iumi go ahed for showimaot love bilong iumi for God, hao nao bae iumi iusim strong bilong iumi?
Lovem Jehovah Witim Full Strong Bilong Iumi
Planti young wan long Christian kongregeson iusim strong bilong olketa for praisem Jehovah. (Proverbs 20:29; Ecclesiastes 12:1) Wanfala wei wea staka young Christian showimaot olketa lovem Jehovah witim full strong bilong olketa, hem long wei wea olketa share insaed pioneer service, full-taem ministry. Planti mami share long disfala ministry taem olketa pikinini go long skul. Olketa faithful elder wea duim shepherding kol and lukaftarem famili bilong olketa seleva showimaot olketa lovem Jehovah witim full strong bilong olketa. (2 Corinthians 12:15) Jehovah givim paoa long olketa wea hope long hem, mekem olketa savve showimaot love bilong olketa long wei for praisem hem, and iusim evri strong wea olketa garem.—Isaiah 40:29; Hebrews 6:11, 12.
Love bae grow sapos iumi lukaftarem gud. Dastawe, iumi mas tek taem for ting raonem samting. Iumi rememberim wanem Jehovah duim for iumi and why hem fit for kasem worship bilong iumi. Olsem olketa laen pikinini bilong Adam wea no perfect, iumi no fit for kasem “olketa samting wea God redyim for olketa wea lovem hem,” bat iumi savve showimaot hao iumi lovem Jehovah witim full soul bilong iumi. Iumi barava laek for go ahed duim olsem!—1 Corinthians 2:9.
[Piksa long page 20]
Iumi showimaot love for God thru long samting wea iumi duim