Word Bilong Jehovah Hem Laef

Olketa Main Point From Buk Bilong First Chronicles

SAMTING olsem 77 year go pas finis from taem wea olketa Jew go bak long homland bilong olketa bihaen olketa stap olsem prisoner long Babylon. Temple wea Governor Zerubbabel buildim bak hem stap for 55 year finis. Main reason for olketa Jew go bak hem for mekem tru worship kamap moa long Jerusalem. Nomata olsem, olketa pipol hia no strong for worship bilong Jehovah. Olketa barava needim samwan for encouragem olketa, and datwan nao samting wea Bible buk bilong First Chronicles hem duim.

First Chronicles hem storyim olketa famili laen, and tu, samting wea happen insaed long 40 year from taem wea King Saul hem dae go kasem taem wea King David hem dae. Datfala priest Ezra nao hem raetem disfala buk long year 460 B.C.E. Iumi interest long First Chronicles bikos hem mekem iumi minim gud worship wea olketa duim long temple, and hem givim iumi information abaotem famili laen bilong Messiah. From hem part long Word Bilong God, message bilong hem strongim faith bilong iumi and mekem savve bilong iumi abaotem Bible kamap moa big.—Hebrews 4:12.

RECORD BILONG OLKETA NEM WEA IMPORTANT

(1 Chronicles 1:1–9:44)

List bilong olketa nem wea Ezra raetem hem important for thrifala reason: for mek sure olketa man wea fit nomoa duim waka olsem priest, for luksavve long olketa tribe and samting wea olketa fit for kasem, and for protectim record bilong famili laen bilong Messiah. Diswan showimaot history bilong olketa Jew go bak kasem firstfala man. From Adam go kasem Noah hem tenfala genereson, and from Noah go kasem Abraham hem nara tenfala genereson. Bihaen Ezra listim nem bilong olketa son bilong Ishmael, olketa son bilong Keturah, wea hem concubine bilong Abraham, and olketa son bilong Esau, hem storyim laen bilong 12-fala son bilong Israel.—1 Chronicles 2:1.

Ezra hem storyim staka samting abaotem laen bilong Judah bikos olketa king wea go kasem King David, olketa kam from datfala laen. From Abraham go kasem David hem 14-fala genereson, and from David go kasem taem wea olketa Jew go prisoner long Babylon hem nara 14-fala genereson. (1 Chronicles 1:27, 34; 2:1-15; 3:1-17; Matthew 1:17) Then Ezra listim olketa wea insaed olketa tribe wea stap long east saed bilong Jordan, witim famili laen bilong olketa son bilong Levi. (1 Chronicles 5:1-24; 6:1) Then Ezra givim staka information abaotem olketa nara tribe long west saed bilong Jordan River and laen bilong Benjamin. (1 Chronicles 8:1) Nem bilong olketa first wan for stap long Jerusalem bihaen olketa kamap free from Babylon hem stap tu.—1 Chronicles 9:1-16.

Ansa for Olketa Bible Kwestin:

1:18—Hu nao dadi bilong Shelah—Cainan or Arpachshad? (Luke 3:35, 36) Arpachshad nao hem dadi bilong Shelah. (Genesis 10:24; 11:12) Maet datfala word “Cainan” long Luke 3:36 hem rong wei for talem word “Chaldeans.” Sapos olsem, firstfala raeting maet sei olsem: “Arpachshad, son bilong datfala Chaldean.” Or maet Cainan and Arpachshad, tufala hia nem bilong sem man nomoa. Nara important samting tu hem hao disfala toktok “son bilong Cainan” hem no stap long samfala manuscript.—Luke 3:36, footnote.

2:15—Waswe, David hem mek-seven son bilong Jesse? Nomoa. Jesse garem eitfala son, and David nao lastborn. (1 Samuel 16:10, 11; 17:12) Luk olsem wanfala son bilong Jesse hem dae and no garem eni pikinini. From hem no important for nem bilong datfala son for stap long datfala list, Ezra aotem nem bilong hem.

3:17—Why nao Luke 3:27 sei Shealtiel, son bilong Jeconiah, hem son bilong Neri? Jeconiah hem dadi bilong Shealtiel. Bat luk olsem Neri givim dota bilong hem for kamap waef bilong Shealtiel. Taem Luke storyim son-in-law bilong Neri, wea hem Shealtiel, hem kolem hem son bilong Neri, long sem wei wea hem kolem Joseph son bilong Heli, wea hem dadi bilong Mary.—Luke 3:23.

3:17-19—Zerubbabel hem wanem bilong Pedaiah, and Shealtiel? Zerubbabel hem son bilong Pedaiah, and Pedaiah hem brata bilong Shealtiel. Nomata olsem, samfala taem Bible sei Zerubbabel hem son bilong Shealtiel. (Matthew 1:12; Luke 3:27) Maet diswan olsem bikos Pedaiah hem dae and Shealtiel nao keepim Zerubbabel. Or maet from Shealtiel dae and no garem pikinini, Pedaiah maritim waef bilong Shealtiel, and Zerubbabel nao hem firstborn bilong tufala.—Deuteronomy 25:5-10.

5:1, 2—Wei wea Joseph kasem right olsem firstborn hem minim wanem? Diswan minim Joseph kasem dabol bilong wanem hem shud kasem. (Deuteronomy 21:17) So hem kamap dadi bilong tufala tribe—Ephraim and Manasseh. Olketa nara son bilong Israel kamap dadi bilong wanfala tribe nomoa.

Olketa Leson for Iumi:

1:1–9:44. Famili laen bilong pipol wea really laef pruvim hao full arrangement bilong tru worship hem no garem faondeson long kastom story bat long tru samting.

4:9, 10. Jehovah ansarem datfala strongfala prea wea Jabez talem for kasem moa land long wei bilong peace mekem plande moa pipol wea fraet long God savve stap long there. Iumi tu need for talem prea wea kam from heart for moa pipol kamap worshiper bilong God taem iumi strong for share insaed waka for mek disaepol.

5:10, 18-22. Long taem bilong King Saul, olketa tribe long east bilong Jordan win long faet againstim olketa Hagrite nomata namba bilong olketa Hagrite hem tu taems moa big winim namba bilong olketa tribe hia. Diswan happen bikos olketa strongfala man bilong olketa tribe hia trust long Jehovah and askem hem for help. Iumi tu mas garem full trust long Jehovah taem iumi gohed insaed spiritual faet nomata olketa enemy staka winim iumi.—Ephesians 6:10-17.

9:26, 27. Olketa Levite wea lukaftarem olketa gate kasem wanfala bigfala responsibility. Olketa kasem key for gate bilong olketa holy area bilong temple. Olketa nating miss for openem olketa gate each day. Iumi kasem responsibility for faendem pipol insaed territory bilong iumi and helpem olketa for worshipim Jehovah. Fitim iumi for showimaot hao Jehovah savve trustim and depend long iumi olsem olketa Levite wea lukaftarem olketa gate!

DAVID HEM RUL OLSEM KING

(1 Chronicles 10:1–29:30)

Story hem start witim taem wea King Saul and thrifala son bilong hem dae long faet againstim olketa Philistine long Mount Gilboa. David, son bilong Jesse, hem kamap king ovarem tribe bilong Judah. Olketa man wea faet long war from evri tribe kam long Hebron and mekem hem king ovarem full Israel. (1 Chronicles 11:1-3) No longtaem bihaen datwan hem tekovarem Jerusalem. Bihaen, olketa Israelite tekem kam ark bilong covenant long Jerusalem “and olketa singaot witim hapi and blowim olketa horn and . . . olketa ringim olketa music instrument wea iusim string and harp.”—1 Chronicles 15:28.

David talemaot hem laek for buildim wanfala haos for tru God. Jehovah talem hao Solomon nao bae kasem datfala privilege bat hem mekem wanfala covenant witim David for wanfala Kingdom. Taem David gohed for faet againstim olketa enemy bilong Israel, Jehovah mekem hem winim staka faet. David duim wanfala census wea againstim law and diswan mekem 70,000 pipol dae. Bihaen David kasem direction from angel for buildim wanfala altar for Jehovah, hem baem wanfala ples from Ornan datfala Jebusite. David start for “redim staka samting” for buildim for Jehovah long datfala ples datfala ‘haos wea barava nambawan and luk naes.’ (1 Chronicles 22:5) Winim eni nara part long Bible, First Chronicles hem storyim wei wea David organizem olketa Levite wea bae serve insaed temple. King and olketa pipol givim bigfala contribution for datfala temple. Bihaen 40 year wea David rul, hem dae “and hem satisfae from hem laef longtaem, and from hem garem riches and glory; and son bilong hem Solomon nao changem hem for rul.”—1 Chronicles 29:28.

Ansa for Olketa Bible Kwestin:

11:11—Why nao namba bilong olketa wea Jashobeam killim dae hem 300 and no 800 olsem namba wea 2 Samuel 23:8 hem talem? Jashobeam, or Josheb-basshebeth hem main wan long thrifala man bilong David wea savve barava faet strong and no fraet. Nara tufala man hia nao Eleazar and Shammah. (2 Samuel 23:8-11) Reason why tufala scripture hia talem difren samting hem maet from disfala sem man hem duim samting long tufala difren taem.

11:20, 21—Waswe, position bilong Abishai hem semsem olsem nara thrifala barava strongfala man bilong David? Abihsai hem no wanfala long thrifala barava strongfala man wea servem David. Nomata olsem, 2 Samuel 23:18, 19 storyim wei wea hem leadim 30-fala man for faet and hem garem bignem winim olketa hia. Nem bilong Abishai hem moa hae winim thrifala maeti wan hia bikos hem duim wanfala maeti samting olsem maeti samting wea Jashobeam duim.

12:8—Long wanem wei nao feis bilong olketa Gadite man for faet hem olsem “feis bilong olketa lion”? Olketa strongfala man hia stap witim David long wilderness. Hair bilong olketa hem grow big and luk olsem longfala hair wea lion garem long hed bilong hem, and diswan mekem olketa luk raf olsem lion.

13:5—Wanem nao “river bilong Egypt”? Samfala tingse disfala toktok hem minim wanfala river wea kamaot from Nile River. Bat staka sei datwan hem minim “valley bilong Egypt”—wanfala deep valley wea hem nao spialaen long southwest saed bilong Promis Land.—Numbers 34:2, 5; Genesis 15:18.

16:30—Wanem nao hem minim for garem “bigfala pain” bikos long Jehovah? Long hia datfala toktok “pain” hem piksarem wei for fraet and garem barava bigfala respect for Jehovah.

16:1, 37-40; 21:29, 30; 22:19—Wanem arrangement for worship nao hem gohed long Israel from taem wea olketa tekem Ark go long Jerusalem go kasem taem olketa buildim temple? Taem David tekem datfala Ark go long Jerusalem and putim insaed tent wea hem wakem, datfala Ark hem no stap insaed tabernacle for staka year finis. Bihaen datwan, datfala Ark hem stap insaed datfala tent long Jerusalem. Datfala tabernacle hem long Gibeon, wea Hae Priest Zadok and olketa brata bilong hem duim olketa sakrifaes wea Law talem. Disfala arrangement hem gohed kasem taem wea temple hem finis long Jerusalem. Taem temple hem finis, olketa tekem tabernacle kam long Jerusalem, and datfala Ark stap insaed Most Holy bilong datfala temple.—1 Kings 8:4, 6.

Olketa Leson for Iumi:

13:11. Iumi no want for feel kros and sei Jehovah nao mekem iumi fail long samting iumi duim, bat iumi mas lukluk gud long samting wea happen and trae for lukim wanem nao mekem iumi fail. For sure, David hem barava duim datwan. Hem lane from mistek wea hem duim and bihaen hem win for tekem datfala Ark go long Jerusalem long stretfala wei.a

14:10, 13-16; 22:17-19. Iumi shud evritaem story witim Jehovah long prea and askem direction bilong hem bifor iumi duim eni samting wea bae affectim iumi long spiritual wei.

16:23-29. Worship bilong Jehovah shud firstfala samting long laef bilong iumi.

18:3. Jehovah hem Man for fulfillim olketa promis bilong hem. Thru long David, hem fulfillim promis bilong hem for givim datfala full land bilong Cannan long seed bilong Abraham, start “from river bilong Egypt go kasem datfala big river, datfala river Euphrates.”—Genesis 15:18; 1 Chronicles 13:5.

21:13-15. Jehovah givim komand long angel for stopem datfala trabol bikos Hem barava feel sorre long bigfala wei for safa wea pipol bilong Hem kasem. Tru tumas, “olketa wei wea hem showimaot mercy hem staka tumas.”b

22:5, 9; 29:3-5, 14-16. Nomata hem no kasem assignment for buildim temple bilong Jehovah, David givim staka samting. Why nao olsem? Bikos hem luksavve evri samting wea hem garem hem from gudfala fasin bilong Jehovah. Datfala sem feeling for tinghae shud muvim iumi for garem fasin for laek givim staka samting tu.

24:7-18. Arrangement bilong 24 sekson bilong priest wea David startim hem gohed yet taem angel bilong Jehovah showaot long Zechariah, dadi bilong John Baptaesa, and talemaot wei wea John bae born. Long datfala taem Zechariah hem waka long temple, and hem taem wea olketa markem for “sekson bilong Abijah” for duim datwan. (Luke 1:5, 8, 9) Tru worship hem join witim olketa really pipol long history, no witim olketa man wea kastom story talem. Iumi bae kasem staka gud samting sapos iumi loyal for waka tugeta witim “datfala faithful and wise slave” witim olketa wea worshipim Jehovah distaem wea barava organize gud.—Matthew 24:45.

Servem Jehovah “Witim Soul wea Hapi”

First Chronicles hem no storyim nomoa olketa famili laen. Hem storyim tu taem wea David tekem datfala ark bilong covenant go long Jerusalem, olketa taem wea hem barava win long faet, taem hem redim olketa samting for buildim temple, and wei for markem olketa sekson bilong Levite for waka olsem priest. For sure, evri samting wea Ezra talem long First Chronicles hem helpem olketa Israelite. Hem helpem olketa for strongim bak worship bilong olketa for Jehovah long temple.

David showimaot nambawan example for putim worship bilong Jehovah olsem first samting long laef bilong hem! David no aftarem wei for garem olketa spesol privilege, bat hem aftarem wei for duim will bilong God. Iumi kasem encouragement for followim advaes bilong hem for servem Jehovah “witim full heart and witim hapi soul.”—1 Chronicles 28:9.

[Olketa Footnote]

[Chart/Olketa Piksa long page 8-11]

(For formatted text, lukim pablikeson)

From Adam go kasem Noah (1,056 years)

4026 B.C.E. Adam

130 year ⇩

130 years ⇩

Seth

105 ⇩

Enosh

90 ⇩

Kenan

70 ⇩

Mahalalel

65 ⇩

Jared

162 ⇩

Enoch

65 ⇩

Methuselah

187 ⇩

Lamech

182 ⇩

From Noah go kasem Abraham (952 years)

2970 B.C.E. Noah

502 years ⇩

Shem

100 ⇩

DATFALA FLOOD 2370 B.C.E.

Arpachshad

35 ⇩

Shelah

30 ⇩

Eber

34 ⇩

Peleg

30 ⇩

Reu

32 ⇩

Serug

30 ⇩

Nahor

29 ⇩

Terah

130 ⇩

2018 B.C.E. ABRAHAM born

From Abraham go kasem David: 14-fala genereson (911 years)

2018 B.C.E. Abraham

100 yrs.

Isaac

60 ⇩

Jacob

c.88 ⇩

Judah

⇩

Perez

⇩

Hezron

⇩

Ram

⇩

Amminadab

⇩

Nahshon

⇩

Salmon

⇩

Boaz

⇩

Obed

⇩

Jesse

⇩

1107 B.C.E. DAVID born