Followim Example Bilong Jesus for Hambol and for Kaen

1. Hao nao wei for followim example bilong Jesus savve helpem iumi for fren gud witim Jehovah?

HEM wei bilong iumi olketa man for laek followim wei bilong samwan wea iumi tinghae long hem. From Jesus Christ nao nambawan man wea winim evri nara man, iumi laek for followim wei bilong hem. Why nao olsem? Jesus sei: “Man wea lukim mi hem lukim Dadi tu.” (John 14:9) Jesus barava showimaot wei bilong Dadi bilong hem, so taem iumi lane abaotem Jesus, iumi lane abaotem Jehovah tu. Taem iumi followim example bilong Jesus, bae iumi fren gud witim Jehovah, wea Hem hae winim evriwan long universe. Datwan hem barava nambawan privilege!

2, 3. (a) Why nao Bible storyim staka samting abaotem laef bilong Jesus, and wanem nao Jehovah laekem iumi for duim? (b) Wanem nao iumi bae storyim long disfala study and long nextfala study?

² Bible storyim staka samting abaotem laef bilong Jesus. Why nao olsem? Bikos Jehovah laekem iumi for savve long Son bilong hem mekem iumi savve followim example bilong Jesus. (Readim 1 Peter 2:21.) Bible sei example bilong Jesus hem olsem olketa footstep for iumi followim. Wanem nao datwan minim? Datwan minim Jehovah laekem iumi for barava followim olketa wei bilong Jesus. Bat hem luksavve iumi no perfect olsem Son bilong hem. Nomata olsem, Jehovah laekem iumi for traem best bilong iumi for followim example bilong Jesus.

³ Iumi bae storyim samfala nambawan wei bilong Jesus. Long disfala study bae iumi storyim wei bilong Jesus for hambol and for kaen. Long nextfala study bae iumi storyim wei bilong hem for no fraet and for garem wei for luksavve. Iumi bae storyim thrifala kwestin abaotem each wan long olketa wei hia: (1) Wanem nao hem minim? (2) Hao nao Jesus showimaot datfala wei? (3) Wanem nao iumi savve duim for followim example bilong Jesus?

JESUS HEM HAMBOL

4. Wanem nao hem minim for hambol?

⁴ Wanem nao hem minim for hambol? Staka pipol wea praod sei wei for hambol hem showimaot man hem wik, fraet, and hem daotem hemseleva. Waswe, datwan hem tru? Nomoa. Wei for hambol showimaot man hem strong and hem no fraet. Wei for hambol hem opposite long wei for praod. For iumi hambol, iumi mas garem stretfala tingting abaotem iumiseleva. Olsem example, wanfala Bible dictionary sei: “Wei for hambol, hem for iumi luksavve iumi smol tumas and God hem hae winim iumi.” And tu, sapos iumi hambol, bae iumi no tingse iumi winim olketa narawan. (Rome 12:3; Phil. 2:3) Hem no isi for iumi olketa man wea no perfect for showimaot disfala wei. Bat sapos iumi ting raonem wei wea Jehovah hem hae winim iumi and followim example bilong Jesus, iumi savve hambol.

5, 6. (a) Hu nao Michael datfala chief angel? (b) Hao nao Michael showimaot hem hambol?

⁵ Wanem nao showimaot Jesus hem hambol? Son bilong God hem evritaem hambol, nomata taem hem wanfala angel wea garem bigfala paoa long heven, and taem hem wanfala perfect man long earth tu. Tingim samfala example.

⁶ Tingting bilong hem. Long Bible buk Jude, iumi read abaotem laef bilong Jesus bifor hem kam long earth. (Readim Jude 9.) Michael, datfala chief angel, wea hem nao Jesus, “hem raoa witim Devil abaotem body bilong Moses.” Bihaen Moses dae, Jehovah berem body bilong Moses long ples wea no eniwan savve. (Deut. 34:5, 6) Maet Devil hem laek for iusim body bilong Moses for mekhae long false worship. Nomata wanem samting nao Devil laek for duim, Michael no fraet for stopem hem for duim datwan. Wanfala buk sei datfala Greek word wea iumi transleitim “raoa” savve minim tu “wanfala kot case.” So maet datwan minim Michael sei “Devil no garem raet for tekem body bilong Moses.” Nomata olsem, datfala chief angel luksavve hem no garem raet for judgem Satan, so hem leavim for Jehovah wea hem Nambawan Judge long universe for judgem Satan. Diswan showimaot Jesus hem barava hambol!

7. Hao nao Jesus showimaot wei for hambol long toktok bilong hem, and long wanem hem duim?

⁷ Taem Jesus stap long earth, toktok bilong hem and wanem hem duim tu showimaot hem hambol. Toktok bilong hem. No enitaem Jesus laekem pipol for mekhae long hem, bat hem laekem pipol for mekhae nomoa long Dadi bilong hem. (Mark 10:17, 18; John 7:16) No enitaem Jesus tok daonem olketa disaepol bilong hem and mekem olketa feel iusles. Hem respectim olketa and showimaot hem trustim olketa taem hem praisem olketa for gudfala wei bilong olketa. (Luke 22:31, 32; John 1:47) Wanem hem duim. Jesus chus for garem simpol laef and for no garem staka material samting. (Matt. 8:20) Hem willing for duim olketa waka wea olketa narawan no laek for duim. (John 13:3-15) Hem barava showimaot hem hambol taem hem obeyim God. (Readim Philippi 2:5-8.) Jesus hem no olsem pipol wea praod wea no laek for obeyim olketa narawan. Hem duim evri samting wea Jehovah talem hem for duim, nomata gogo hem mas dae from datwan. So evri samting hia showimaot klia, Jesus, datfala Son bilong man, hem “hambol.”—Matt. 11:29.

FOLLOWIM EXAMPLE BILONG JESUS FOR HAMBOL

8, 9. Wanem nao showimaot iumi hambol?

⁸ Hao nao iumi savve followim example bilong Jesus for hambol? Tingting bilong iumi. Taem iumi hambol iumi luksavve samfala samting iumi no garem raet for duim. Dastawe, iumi savve iumi no garem raet for judgem nara pipol. Iumi bae no tok spoelem olketa or daotem why olketa duim samting. (Luke 6:37; Jas. 4:12) Wei for hambol hem helpem iumi for ‘no tingse iumiseleva barava raeteous.’ Diswan minim iumi bae no tingse iumi nao gud winim olketa wea no garem savve olsem iumi, or no garem privilege wea iumi garem. (Eccl. 7:16) Olketa elder wea hambol no tingse olketa winim olketa brata and sista long kongregeson. Bat olketa shepherd hia ting long olketa narawan nao important winim olketa.—Phil. 2:3; Luke 9:48.

⁹ Tingim Walter Thorn, wea hem duim circuit waka start long 1894. Bihaen hem duim circuit waka for staka year, hem kasem assignment for go long Kingdom Farm long New York for lukaftarem olketa kokorako. Taem hem start for tingse hem shud no duim kaen waka olsem, hem sei long hemseleva: “Iu dust nomoa. Iu praod for what ia?” (Readim Isaiah 40:12-15.) Diswan showimaot hem barava hambol!

10. Hao nao iumi showimaot wei for hambol long toktok, and long wanem iumi duim?

¹⁰ Toktok bilong iumi. Sapos iumi hambol, hem bae showaot long wei wea iumi story long nara pipol. (Luke 6:45) Taem iumi story, bae iumi no mekhae long olketa privilege wea iumi kasem and olketa samting wea iumi duim. (Prov. 27:2) Bat bae iumi praisem olketa brata and sista bilong iumi for olketa gudfala samting wea olketa duim, and mekhae long olketa gudfala wei bilong olketa. (Prov. 15:23) Wanem iumi duim. Olketa Christian wea hambol bae no trae for kasem bignem long disfala world. Olketa chus for garem simpol laef, and from olketa laek for duim waka bilong Jehovah olketa satisfae nomoa witim olketa samting wea olketa garem. (1 Tim. 6:6, 8) Main samting wea showimaot iumi hambol hem wei wea iumi obey. For obeyim “olketa wea lead” long kongregeson, and for followim direction wea kam from organization bilong Jehovah, iumi mas hambol.—Heb. 13:17.

JESUS HEM KAEN

11. Wanem nao hem minim for kaen?

¹¹ Wanem nao hem minim for kaen? Man wea “kaen” hem tingim narawan. Love nao mekem man for kaen. Bible storyim wei for kaen olsem wei for “sorre” long narawan and for “lovem” narawan. (2 Cor. 1:3; Phil. 1:8) Wanfala research buk abaotem Bible sei for kaen long narawan hem no minim for just feel sorre long olketa wea needim help. Buk hia sei wei for kaen hem minim for “barava tingim pipol wea needim help and duim samting for olketa” mekem laef bilong olketa kamap gud. Man wea kaen bae duim samting for helpem narawan.

12. Wanem nao showimaot Jesus feel sorre long pipol, and wei wea hem kaen mekem hem for duim wanem samting?

¹² Wanem nao showimaot Jesus hem kaen? Feeling bilong hem, and samting wea hem duim. Jesus feel sorre long pipol. Taem hem lukim fren bilong hem Mary and olketa narawan krae bikos Lazarus hem dae, Jesus krae witim olketa tu. (Readim John 11:32-35.) Feeling for sorre wea mekem hem resurrectim son bilong datfala widow woman, hem tu sem feeling wea mekem hem for resurrectim Lazarus. (Luke 7:11-15; John 11:38-44) Disfala samting wea Jesus duim hem mekem Lazarus for garem hope for go long heven. Bifor datwan, Jesus hem “feel sorre” long wanfala big sekson wea kam long hem. Datwan mekem hem for “teachim olketa plande samting.” (Mark 6:34) Taem olketa obeyim olketa teaching bilong hem, datwan barava changem laef bilong olketa! Jesus no feel sorre nomoa long pipol wea needim help, bat from hem kaen, hem duim samting for helpem olketa.—Matt. 15:32-38; 20:29-34; Mark 1:40-42.

13. Wanem nao showimaot Jesus hem tok kaen long pipol? (Lukim piksa long start bilong study.)

¹³ Hem tok kaen. From Jesus feel sorre long pipol wea safa, datwan mekem hem tok kaen long olketa. Aposol Matthew hem talem toktok from profesi bilong Isaiah, wea sei olsem abaotem Jesus: “Bae hem no brekem eni longfala grass wea bend finis, and bae hem no killim dae eni laet wea wick bilong hem no laet gud and wea klosap for dae.” (Isa 42:3; Matt. 12:20) Wanem nao diswan minim? Jesus no tok spoelem pipol and hem no treatim nogud long olketa. Bat toktok bilong hem encouragem olketa. Message wea hem storyim hem givim hope long “pipol wea feel sorre.” (Isa. 61:1) Hem invaetem pipol wea “waka hard and wea karem hevi samting” for kam long hem mekem hem savve “strongim” olketa. (Matt. 11:28-30) Hem talem olketa disaepol bilong hem God hem tingim evriwan wea worshipim Hem, nomata olketa wea nara pipol ting daonem olketa tu.—Matt. 18:12-14; Luke 12: 6, 7.

FOLLOWIM EXAMPLE BILONG JESUS FOR KAEN

14. Hao nao iu savve showimaot iu sorre long nara pipol?

¹⁴ Wanem nao iumi savve duim for followim example bilong Jesus for kaen? Feeling bilong iumi. Bible sei iumi mas traem best for garem disfala wei for “sorre long pipol” nomata datwan hem no wei bilong iumi. Insaed long datfala “niufala wei” wea Jehovah laekem evri Christian for garem hem disfala wei for sorre long pipol. (Readim Colossae 3:9, 10, 12.) Hao nao iu savve showimaot iu sorre long nara pipol? Bible sei: “Iufala mas lovem [narawan].” (2 Cor. 6:11-13) Taem eniwan storyim feeling and samting wea hem wari abaotem long iu, lisin gud long hem. (James 1:19) Hem gud for tingim diswan: ‘Hao nao bae mi feel sapos mi nao hem? Wanem nao bae mi laekem narawan for duim for mi?’—1 Pet. 3:8.

15. Wanem nao iumi savve duim for helpem olketa wea maet sorre and safa?

¹⁵ Samting wea iumi duim. Sapos iumi kaen bae iumi helpem nara pipol, main wan nao olketa wea sorre and safa. Wanem nao iumi savve duim for helpem olketa? Rome 12:15 sei: “Taem pipol krae, iufala mas krae witim olketa tu.” Staka taem pipol needim iumi for comfortim olketa and no for talem olketa wanem for duim. Olketa laekem samwan wea tingim olketa and wea savve herem olketa taem olketa story. Taem dota bilong wanfala sista hem dae, olketa brata and sista comfortim hem. Hem sei: “Taem olketa brata and sista kam and krae witim mi, mi barava tinghae long datwan.” Iumi kaen long pipol tu taem iumi duim samting for helpem olketa. Olsem example, maet wanfala widow sista hem needim samwan for repairim haos bilong hem. Or maet wanfala olo brata or sista hem needim samwan for tekem hem go long olketa meeting, preaching, or long clinic. Nomata wanem iumi duim for helpem samwan hem no big samting, datwan savve barava helpem hem. (1 John 3:17, 18) Main wei wea iumi savve showimaot iumi kaen long nara pipol hem for waka hard for talemaot gud nius long olketa. Diswan hem best samting wea iumi savve duim for helpem pipol wea garem gudfala heart!

16. Wanem nao iumi savve talem for encouragem olketa wea sorre?

¹⁶ Toktok bilong iumi. Wei for kaen bae mekem iumi laek for talem toktok wea “comfortim olketa wea sorre.” (1 Thess. 5:14) Wanem nao iumi savve talem for encouragem olketa? Iumi savve talem olketa iumi barava tingim olketa. Iumi savve talem olketa iumi tinghae long gudfala wei bilong olketa and samting wea olketa duim. Iumi savve talem olketa Jehovah tinghae long olketa, dastawe hem leadim olketa for kam long truth. (John 6:44) Helpem olketa for luksavve Jehovah barava tingim pipol bilong hem wea “safa” or “kasem hard taem.” (Ps. 34:18) Wei for tok kaen savve barava strongim olketa wea needim comfort.—Prov. 16:24.

17, 18. (a) Jehovah laekem olketa elder for lukaftarem olketa sheepsheep bilong hem long wanem wei? (b) Wanem nao bae iumi storyim long nextfala study?

¹⁷ Jehovah laekem iufala olketa elder for kaen long olketa sheepsheep bilong hem. (Acts 20:28, 29) Hem responsibility bilong iufala for teachim, encouragem, and strongim olketa sheepsheep bilong hem. (Isa. 32:1, 2; 1 Pet. 5:2-4) So elder wea kaen bae no trae for putim olketa rul, or mekem olketa brata and sista for feel guilty sapos olketa no duim samfala samting moa long waka bilong Jehovah. Bat elder hia waka hard for helpem olketa brata and sista, and hem savve olketa bae duim best bilong olketa for worshipim Jehovah bikos olketa lovem hem.—Matt. 22:37.

¹⁸ Taem iumi ting raonem wei bilong Jesus for hambol and for kaen, datwan bae encouragem iumi for followim example bilong hem. Long nextfala study, bae iumi storyim wanem iumi savve duim for followim example bilong Jesus for no fraet and for garem wei for luksavve.