Iufala Olketa Young Wan, Chus for Servem Jehovah
“Chusim tuday hu nao bae iufala servem.”—JOSHUA 24:15.
1, 2. Wanem kaen wei for baptaes wea no stret nao samfala religion wea sei olketa Christian duim?
“OLKETA [pikinini] mas savve long Christ firstaem bifor olketa fit for kamap Christian.” Diswan hem toktok wea Tertullian raetem klosap long end bilong mek-tu century. Hem tok againstim wei for baptaesim olketa baby bikos datwan hem samting wea olketa apostate Christian start for duim long datfala taem. Bat Church Father Augustine hem no agree witim Tertullian and Bible. Hem talem hao wei for baptaes hem aotem mark bilong sin and sapos olketa baby no baptaes bae olketa go long hellfire taem olketa dae. From pipol bilivim datfala teaching, olketa baptaesim olketa baby kwiktaem nomoa bihaen olketa born.
2 Plande long olketa religion wea sei olketa Christian gohed yet for followim disfala teaching for baptaesim baby wea just born. And tu, history showimaot hao olketa bigman bilong religion and ruler bilong olketa nation wea sei olketa Christian, olketa forcem “olketa heathen” for baptaes. Bat wei for baptaesim olketa baby and wei for forcem olketa full-grown man for baptaes, hem no teaching wea kam from Bible.
Distaem Man Wanwan Chus for Baptaes
3, 4. Wanem nao savve helpem olketa pikinini wea garem parents wea dedicate finis for chus seleva for dedicate long God?
3 Bible showimaot God tingim olketa young pikinini olsem olketa holy nomata sapos dadi or mami nomoa hem wanfala faithful Christian. (1 Corinthians 7:14) Waswe, diswan minim olketa pikinini hia dedicate finis for servem Jehovah? Nomoa. Bat, olketa pikinini wea garem parents wea dedicate long Jehovah savve kasem training wea savve helpem olketa for disaed seleva for dedicate long God. Wise King Solomon sei olsem: “O son bilong mi, obeyim komandment bilong dadi bilong iu, and no lusim law bilong mami bilong iu. . . . Taem iu wakabaot, hem bae leadim iu; taem iu leidaon, hem bae protectim iu; and taem iu wekap, hem bae lukaftarem iu. From komandment hia hem wanfala lamp, and law hia hem wanfala laet, and olketa repruv bilong discipline nao road wea lead go long laef.”—Proverbs 6:20-23.
4 Advaes bilong Christian parents savve protectim olketa young wan sapos olketa willing for followim. Solomon sei olsem tu: “Wanfala wise son hem mekem dadi bilong hem hapi, and wanfala stupid son hem mekem mami bilong hem sorre fogud.” “O son bilong mi, lisin and kamap wise, and leadim heart bilong iu for followim datfala wei.” (Proverbs 10:1; 23:19) Tru nao, sapos iufala young wan laek for kasem gud samting from training wea parents givim long iufala, iufala mas willing for acceptim advaes, kaonsel, and discipline. Taem iufala born iufala no wise, bat iufala savve “kamap wise” and chus for followim “road wea lead go long laef.”
Wei for Stretem Tingting Hem Minim Wanem?
5. Wanem kaonsel nao Paul givim long olketa dadi and pikinini?
5 Aposol Paul hem sei: “Olketa pikinini, iufala wan mind witim Lord long wei for obeyim parents bilong iufala, from diswan hem raeteous fasin: ‘Honorim dadi and mami bilong iu’; wea hem nao firstfala komand wea garem promis wea sei: ‘For mekem evri samting gohed gud for iu and for mekem iu savve stap longfala taem long disfala earth.’ And iufala dadi, no mekem olketa pikinini bilong iufala feel nogud, bat gohed for trainim olketa long discipline and wei for stretem tingting wea kam from Jehovah.”—Ephesians 6:1-4.
6, 7. Wanem nao insaed wei wea parents trainim olketa pikinini long ‘tingting wea kam from Jehovah,’ and why nao diswan no minim parents forcem olketa?
6 Taem Christian parents trainim olketa pikinini “long discipline and wei for stretem tingting wea kam from Jehovah,” waswe, diswan minim olketa forcem pikinini bilong olketa for followim God? Nomoa. No eniwan fit for tok againstim wei wea parents trae for teachim pikinini bilong olketa abaotem samting wea olketa bilivim hem stret and no stret. Olketa man wea no biliv long God savve teachim pikinini bilong olketa hao God hem no stap. Olketa Roman Catholic tingse hem important for teachim pikinini bilong olketa for followim teaching bilong Catholic church. Plande taem pipol no tok againstim olketa from olketa duim datwan. Long sem wei tu, taem Olketa Jehovah’s Witness trainim olketa pikinini bilong olketa for garem sem tingting olsem Jehovah abaotem olketa main truth and principle saed long fasin, pipol no fit for sei olketa kontrolem mind bilong pikinini bilong olketa.
7 Long datfala buk Theological Dictionary of the New Testament, Greek word wea olketa transleitim for minim “stretem tingting” long Ephesians 6:4 hem minim wanfala wei for “stretem mind, stretem samting wea rong, for mekem spiritual tingting kamap gud.” Waswe sapos wanfala young wan les for acceptim training from parents bilong hem bikos olketa nara young wan putim hevi long hem, or bikos hem laek for duim samting wea olketa nara young wan duim? Really hu nao forcem pikinini, parents or olketa nara young wan? Sapos olketa nara young wan putim hevi long pikinini for iusim drug, drinkim tumas alcohol, or for duim dirty fasin, waswe, hem stret nomoa for pipol tok againstim wei wea parents trae for stretem tingting bilong pikinini bilong olketa and helpem olketa for luksavve long nogud samting wea savve kamap from wei for duim kaen danger samting olsem?
8. Wanem nao insaed long wei for ‘muvim Timothy for biliv’?
8 Aposol Paul sei olsem long young man Timothy: “Gohed for hol strong long olketa samting wea iu lanem finis and wea olketa muvim iu for bilivim, from iu savve gud long olketa wea teachim iu, and start kam from taem iu baby yet iu savve long olketa holy raeting, wea hem savve mekem iu kamap wise for kasem salvation thru long faith long Christ Jesus.” (2 Timothy 3:14, 15) Start from taem wea Timothy hem baby yet, mami and granmami bilong hem iusim Bible for teachim hem, wea mekem hem garem strongfala faith long God. (Acts 16:1; 2 Timothy 1:5) Bihaen tufala kamap Christian, tufala no forcem Timothy bat iusim gudfala wei for story from Bible wea datwan nao “muvim” hem for kamap wanfala Christian.
Jehovah Laekem Iu for Chus
9. (a) Hao nao Jehovah showimaot honor long iumi olketa man wea hem wakem, and why nao hem duim datwan? (b) Hao nao firstborn Son bilong God iusim wei wea hem free for chus?
9 Jehovah savve wakem iumi olsem olketa animal long wei wea olketa no savve chus seleva. Bat hem no duim datwan. Hem showimaot honor long iumi thru long wei wea iumi free for chus for duim will bilong hem. God bilong iumi laekem iumi for willing for stap anda long hem. Hem hapi tumas taem hem lukim olketa young wan and olketa olo servem hem from olketa lovem hem. Firstborn Son bilong Jehovah nao showimaot nambawan example long wei for willing for stap anda long God. Jehovah sei olsem abaotem hem: “Diswan nao Son bilong mi, wea mi lovem, wea mi appruvim.” (Matthew 3:17) Disfala firstborn Son sei olsem long Dadi bilong hem: “Mi barava hapi tumas for duim will bilong iu, O God bilong mi, and law bilong iu hem stap deep insaed long mi.”—Psalm 40:8; Hebrews 10:9, 10.
10. For Jehovah acceptim worship bilong iumi, wanem nao mas muvim iumi?
10 Jehovah expectim olketa wea servem hem anda long direction bilong Son bilong hem for showimaot olketa willing for stap anda long will bilong Hem tu. Man wea raetem psalm hem talem disfala profesi: “Pipol bilong iu bae willing for givim olketa seleva long day bilong iu for faet. Long nambawan holy fasin, from taem hem klosap daylaet, iu garem olketa young man bilong iu wea olsem olketa dew drop.” (Psalm 110:3) Love and wei wea olketa willing for stap anda long will bilong God nao mekem organization bilong Jehovah long heven and long earth savve waka tugeta.
11. Wanem nao olketa young wan wea garem parents wea dedicate finis need for disaedem?
11 So iufala olketa young wan shud luksavve hao parents bilong iu and olketa Christian elder long kongregeson bae no forcem iu for baptaes. Iuseleva nao mas chus for servem Jehovah. Joshua hem sei olsem long olketa Israelite: “Servem [Jehovah] witim stretfala fasin and truth . . . Chusim tuday hu nao bae iufala servem.” (Joshua 24:14-22) Long sem wei tu, iuseleva nao mas chus for dedicate long Jehovah and for givim laef bilong iu for duim will bilong hem.
Acceptim Responsibility Bilong Iu
12. (a) Nomata parents savve trainim pikinini bilong olketa, wanem nao olketa no fit for duim for olketa? (b) Wanem taem nao wanfala young wan mas ansa long Jehovah for olketa samting wea hem chusim?
12 Bae gogo hem kasem taem wea iufala olketa young wan no fit for kasem protection from faithful fasin bilong parents bilong iu. (1 Corinthians 7:14) Disaepol James hem sei olsem: “Sapos man savve hao for duim stretfala samting bat hem no duim, datwan hem wanfala sin for hem.” (James 4:17) Parents hard for servem God for pikinini bilong olketa and olketa pikinini hard for servem God for parents bilong olketa. (Ezekiel 18:20) Waswe, iu lane abaotem Jehovah and olketa plan bilong hem? Waswe, iu kasem age wea iu savve minim samting and iuseleva start for fren witim hem? Sapos olsem, God hem tingim iu olsem iu fit for disaed seleva for servem hem.
13. Olketa wanem kwestin nao olketa young wan wea no baptaes yet shud askem olketa seleva?
13 Waswe, parents bilong iu gohed trainim iu for worshipim God olsem olketa bat iu no baptaes yet? Waswe, iu attendim olketa Christian meeting, and tu, share for preachim gud nius abaotem Kingdom? Sapos olsem, askem olketa kwestin hia long iuseleva and ting raonem long honest wei: ‘Why nao mi duim diswan? Waswe, mi go long olketa meeting and share long preaching waka bikos parents bilong mi laekem mi for duim datwan, or waswe, mi go bikos mi laek mekem Jehovah hapi?’ Waswe, iu pruvim long iuseleva finis wanem nao “gudfala and stretfala and perfect will bilong God”?—Romans 12:2.
Wanem Nao Stopem Iu for Baptaes?
14. Wanem nao samfala example long Bible wea showimaot man no need for delay for baptaes?
14 “Waswe, eni samting stopem mi for baptaes?” Wanfala man from Ethiopia askem datfala kwestin long Philip bihaen hem lanem hao Jesus nao datfala Messiah. Savve wea hem garem long Bible mekem hem luksavve hao hem shud no delay for talemaot hao start long datfala taem hem bae servem Jehovah witim Christian kongregeson. Datwan mekem hem barava hapi tumas. (Acts 8:26-39) Wanfala woman wea nem bilong hem Lydia duim sem samting tu. ‘God openem heart bilong hem for lisin long olketa samting wea Paul talem,’ and kwiktaem bihaen datwan hem and famili bilong hem “baptaes.” (Acts 16:14, 15) And tu, datfala man wea lukaftarem prison long Philippi hem lisin long Paul and Silas taem olketa “tok abaotem word bilong Jehovah long hem,” and “stretawe hem and famili bilong hem baptaes.” (Acts 16:25-34) Dastawe, sapos iu savve finis long olketa main teaching bilong Jehovah and olketa plan bilong hem, iu laek for duim will bilong hem, and iu garem gud nem insaed kongregeson, faithful for attendim olketa meeting evritaem, and join insaed waka for preachim gud nius abaotem Kingdom, wanem nao stopem iu for baptaes?—Matthew 28:19, 20.
15, 16. (a) Wanem tingting wea no stret nao samfala young wan maet garem wea stopem olketa for baptaes? (b) Long wanem wei nao dedication and baptism savve protectim olketa young wan?
15 Waswe, iu hol bak for duim disfala barava important samting bikos iu fraet nogud iu duim eni nogud samting wea bae mekem iu givim ansa long Jehovah? Sapos olsem, tingim diswan: Waswe, bae iu les for lane for draevem trak bikos iu fraet nogud iu maet accident? Tru nao, bae iu no les! Datwan hem semsem witim wei for hol bak for baptaes nomata iu fit for duim. Tru nao, sapos iu dedicate long Jehovah and agree for duim will bilong hem diswan bae barava strongim iu for no duim olketa samting wea rong. (Philippians 4:13) Iufala olketa young wan, no tingse iu bae no need for givim ansa long God sapos iu no baptaes. Taem iu kasem finis age wea iu luksavve long responsibility, iu mas givim ansa long Jehovah for samting wea iu duim nomata iu baptaes or nomoa.—Romans 14:11, 12.
16 Long tingting bilong plande Witness raonem world, olketa tingim hao disison bilong olketa for baptaes taem olketa young hem barava helpem olketa. Tingim example bilong wanfala Witness long Western Europe wea hem 23 year. Hem talem hao wei wea hem baptaes taem hem 13 year strongim hem for no letem “olketa samting wea young pipol wantem” for pullim hem tu. (2 Timothy 2:22) Taem hem young hem markem goal for kamap wanfala full-taem minister. Distaem, hem hapi for serve long wanfala branch office bilong Olketa Jehovah’s Witness. Plande blessing stap for olketa young wan wea chus for servem Jehovah, iu tu insaed diswan.
17. Saed long olketa wanem samting nao hem important for iumi gohed for luksavve wanem nao “will bilong Jehovah”?
17 Dedication and baptism hem start bilong wei for followim evribit will bilong Jehovah long laef bilong iumi. For fulfillim dedication man mas ‘baem bak taem wea hem iusim for duim nara samting.’ Hao nao iumi savve duim datwan? Thru long wei for iusim taem wea iumi iusim long olketa iusles samting bifor for studyim Bible, attendim olketa meeting evritaem, and share evribit long waka for preachim “gud nius bilong kingdom.” (Ephesians 5:15, 16; Matthew 24:14) Dedication bilong iumi long Jehovah and wei wea iumi laek for duim will bilong hem bae barava helpem iumi long evri samting wea iumi duim, wea insaed diswan hem wei wea iumi iusim free taem bilong iumi, fasin bilong iumi saed long hao iumi kaikai and drink, and music wea iumi lisin long hem. Hem gud for chusim kaen hapitaem wea savve mekem iu hapi for olowe. Plande thousand hapi young Witness bae talem iu hao plande gudfala hapitaem hem stap wea no go againstim “will bilong Jehovah.”—Ephesians 5:17-19.
“Mifala Bae Go Witim Iufala”
18. Wanem kwestin nao olketa young wan shud askem olketa seleva?
18 From 1513 B.C.E. go kasem Pentecost 33 C.E., Jehovah garem pipol bilong hem wea organize long earth wea hem chusim for worshipim hem and for kamap olketa witness bilong hem. (Isaiah 43:12) Olketa young Israelite born insaed datfala nation. Start long Pentecost, Jehovah hem garem wanfala niu “nation” long earth, hem nao spiritual Israel, “wanfala pipol for nem bilong hem.” (1 Peter 2:9, 10; Acts 15:14; Galatians 6:16) Aposol Paul hem sei Christ hem klinim “wanfala pipol for hemseleva wea strong for duim olketa gudfala waka.” (Titus 2:14) Iufala olketa young pipol free for disaedem seleva hu nao pipol hia. Distaem, hu nao “datfala raeteous nation wea followim faithful fasin,” live followim olketa Bible principle, duim waka olsem olketa faithful Witness bilong Jehovah, and talemaot hao Kingdom bilong hem nao only hope for olketa man? (Isaiah 26:2-4) Lukluk gud long olketa samting wea olketa religion duim, and markem fasin bilong olketa witim samting wea Bible sei olketa trufala servant bilong God shud duim.
19. Wanem nao plande million pipol evriwea long earth bilivim?
19 Plande million pipol evriwea long world, insaed diswan hem plande young wan, bilivim hao anointed remnant bilong Olketa Jehovah’s Witness nao datfala “raeteous nation.” Olketa sei olsem long olketa spiritual Israelite hia: “Mifala bae go witim iufala pipol, from mifala herem finis hao God hem stap witim iufala pipol.” (Zechariah 8:23) Mifala barava hope and prea for iufala olketa young wan bae disaed for stap midolwan long pipol bilong God, wea minim iufala “chusim laef”—laef olowe insaed niu world bilong Jehovah.—Deuteronomy 30:15-20; 2 Peter 3:11-13.
Review
• Wanem nao insaed wei for stretem tingting?
• Wanem kaen wei for worship nao Jehovah acceptim?
• Wanem nao evri young wan wea garem parents wea dedicate finis need for disaedem?
• Why nao man shud no delay for baptaes?
[Piksa long page 27]
Hu nao bae iu lisin long hem?
[Piksa long page 29]
Hao nao dedication and baptism savve protectim iu?
[Piksa long page 30]
Wanem nao stopem iu for baptaes?