Dadi and Mami—Trainim Pikinini Start From Taem Hem Baby Yet
BIBLE sei ‘pikinini hem present from Jehovah and olketa pikinini bilong iu hem wanfala reward.’ (Ps. 127:3) Dastawe olketa Christian dadi and mami savve hapi tumas taem pikinini hem born.
Hem bigfala responsibility tu for garem pikinini. For pikinini healthy taem hem big, hem need for kaikaim healthy kaikai. For pikinini disaed strong for worshipim Jehovah, hem needim spiritual kaikai and for dadi and mami trainim and teachim hem olketa Bible principle. (Prov. 1:8) Wanem taem nao olketa dadi and mami shud start for trainim pikinini, and hao nao olketa shud duim datwan?
PARENTS NEEDIM HELP BILONG GOD
Tingim Manoah wea kam from tribe bilong Dan, wea stap long Zorah wanfala taon long Israel bifor. Angel bilong Jehovah talem waef bilong Manoah, wea no savve garem pikinini bae hem garem wanfala baby boy. (Judg. 13:2, 3) Manoah and waef bilong hem mas barava hapi long datfala nius, bat tufala wari abaotem samfala samting tu. So Manoah prea olsem long Jehovah: “Plis, Jehovah, sendem kam moa datfala wakaman bilong [iu] wea iu sendem kam firstaem, mekem hem talem mifala wanem mifala mas duim long pikinini hia taem hem born.” (Judg. 13:8) Manoah and waef bilong hem laek for lukaftarem and trainim pikinini bilong tufala. Tufala teachim law bilong God long son bilong tufala, Samson, and hem kasem gud samting from datwan. Bible hem sei: “Gogo spirit bilong Jehovah strongim hem taem hem long Mahanehdan midolwan Zorah and Eshtaol.” From datwan, taem Samson hem wanfala judge long Israel hem strong and savve duim staka samting for helpem pipol long Israel.—Judg. 13:25; 14:5, 6; 15:14, 15.
Wanem taem nao dadi and mami shud start for trainim pikinini? “Start kam from taem [Timothy] baby yet” mami bilong hem, Eunice, and granmami bilong hem, Lois, teachim hem “olketa Holy Raeting.” (2 Tim. 1:5; 3:15) So Timothy start for lanem olketa spiritual samting taem hem smol yet.
Hem wise for olketa Christian parents prea long Jehovah for direction and for plan firstaem mekem tufala savve trainim pikinini “start kam from taem [hem] baby yet.” Proverbs 21:5 hem sei: “Man wea plan gud firstaem bae kasem gudfala samting.” Bifor baby hem born, dadi and mami bae storyim olketa samting wea pikinini needim. Hem important tu for tufala planim wanem tufala bae duim for teachim baby bilong olketa abaotem Jehovah. Tufala shud garem goal for trainim pikinini start from taem hem baby yet.
Disfala buk Early Childhood Counts—A Programming Guide on Early Childhood Care for Development hem sei insaed olketa firstfala month bihaen baby hem born, brain bilong hem barava redi for tekem staka information. Hem wise for parents iusim disfala chance for teachim pikinini olketa spiritual samting!
Wanfala mami wea hem regular pioneer sei olsem abaotem smol gele bilong hem: “Mi start for tekem gele bilong mi long preaching waka taem hem wan month nomoa. Nomata hem smol tumas mi lukim datwan helpem hem, bikos taem hem tufala year nomoa hem no fraet for offerim tract long olketa haosholder.”
Gud samting kamaot from wei for trainim pikinini from taem hem baby yet. Bat olketa dadi and mami luksavve samfala taem hem no isi for teachim pikinini olketa spiritual samting.
“IUSIM GUD TAEM”
Samfala taem hem no isi for dadi and mami for teachim smol pikinini from hem no savve sidaon kwaet for longtaem. Diswan hem bikos pikinini interest tumas for savve long staka samting. Wanem nao parents savve duim for helpem pikinini for lanem samting wea olketa laek for teachim hem?
Tingim samting wea Moses talem long Deuteronomy 6:6, 7. Hem sei: “Olketa toktok hia wea mi talem iufala tuday mas stap long heart bilong iufala. Iufala mas evritaem teachim long son bilong iufala and storyim taem iufala sidaon long haos, taem iufala wakabaot long road, taem iufala redi for sleep, and taem iufala wekap.” So dadi and mami mas “evritaem teachim” pikinini. Smol pikinini hem olsem smol plant wea needim samwan for watarem evritaem. Taem iumi herem samting evritaem, datwan helpem iumi for no forgetim olketa important samting. Pikinini tu hem olsem!
For dadi and mami teachim pikinini truth long Bible olketa mas spendem taem witim pikinini. Staka taem hem no isi for dadi and mami duim olsem bikos olketa busy tumas. Bat aposol Paul sei iumi mas “iusim gud taem” for duim olketa important spiritual samting. (Eph. 5:15, 16) Hao nao iumi savve duim datwan? Wanfala dadi wea hem elder hem busy for lukaftarem kongregeson and waka for selen. Waef bilong hem busy tu for pioneer. Nomata olsem, tufala laek for trainim smol gele bilong tufala. Wanem nao tufala duim for markem taem for trainim hem? Dadi hem sei: “Evri morning bifor mi go waka, mitufala waef bilong mi savve readim long hem Bible Story Buk Bilong Mi or Lukluk Long Olketa Scripture Evriday. Long evening, mitufala savve read for hem bifor hem sleep, and taem mifala go preaching, mifala tekem hem witim mifala. Mifala laek for iusim disfala chance for trainim hem taem hem smol yet.”
‘OLKETA SON OLSEM OLKETA ARROW’
Iumi evriwan laekem pikinini for savve hao for lukaftarem hemseleva taem hem growap. Bat main samting wea iumi laekem, hem for olketa lovem God long heart bilong olketa.—Mark 12:28-30.
Psalm 127:4 hem sei: “Olketa son wea man garem taem hem young hem olsem olketa arrow long hand bilong strongfala man.” So mami and dadi mas trainim pikinini for kasem goal wea tufala markem for hem, olsem man hem iusim arrow for sutim target bilong hem. Sapos man iusim arrow for sutim target bat misstim datwan, hem no savve tekem bak arrow bilong hem. Olsem tu, dadi and mami garem lelebet taem nomoa for trainim pikinini. Olketa shud iusim gud datfala taem for teachim pikinini olketa Bible principle mekem hem stap long mind and heart bilong pikinini.
Aposol John sei olsem abaotem olketa spiritual pikinini bilong hem: “Taem mi herem olketa pikinini bilong mi gohed followim olketa tru teaching, diswan mekem mi barava hapi.” (3 John 4) Olketa Christian dadi and mami tu hapi taem olketa lukim pikinini bilong olketa “gohed followim olketa tru teaching.”