Olketa Young Wan—Aftarem Olketa Goal wea Honorim God

“Trainim iuseleva witim fasin for lovem God olsem goal bilong iu.”—1 TIMOTHY 4:7.

1, 2. (a) Why nao Paul praisem Timothy? (b) Long wanem wei nao olketa young wan distaem ‘trainim olketa seleva witim fasin for lovem God olsem goal bilong olketa’?

“M I NO garem eni narawan wea garem fasin olsem hem, wea bae barava lukaftarem olketa samting saed long iufala. . . . Hem waka hard witim mi for mekem gud nius gohed, olsem wanfala pikinini witim dadi bilong hem.” (Philippians 2:20, 22) Aposol Paul hem raetem disfala toktok bilong praise long leta bilong hem for olketa Christian long Philippi long first-century. Hu nao hem story abaotem? Hem story abaotem Timothy, wanfala young wan wea travel witim hem. Tingim hao masbi hem barava encouragem Timothy for herem wei wea Paul talemaot hem trustim and lovem hem!

² Olketa young wan wea olsem Timothy wea strong long spiritual wei, olketa kamap blessing midolwan long pipol bilong Jehovah. (Psalm 110:3) Long organization bilong God distaem, plande young wan stap wea serve olsem olketa pioneer, missionary, olketa volunteer long construction, and olketa Bethelite. Olketa narawan wea fit for kasem praise tu, hem olketa wea strong for duim olketa waka long kongregeson and long semtaem lukaftarem olketa nara responsibility. Olketa young wan wea duim olsem barava satisfae bikos olketa aftarem olketa goal wea honorim Dadi bilong iumi long heven, Jehovah. Olketa barava ‘trainim olketa seleva witim fasin for lovem God olsem goal bilong olketa.’—1 Timothy 4:7, 8.

3. Wanem nao olketa kwestin wea bae iumi storyim long disfala article?

³ Sapos iu wanfala young wan, waswe, iu trae for kasem samfala spiritual goal? Wea nao iu savve kasem help and encouragement for duim olsem? Wanem nao iu savve duim for againstim olketa hevi bilong disfala world wea mekhae long olketa material samting nomoa? Wanem nao olketa blessing wea bae iu kasem sapos iu aftarem olketa goal wea honorim God? For kasem ansa long olketa kwestin hia, iumi bae lukluk long laef bilong Timothy and samting wea hem duim.

Laef Bilong Timothy Bifor

4. Storyim olketa samting wea Timothy duim long laef bilong hem olsem wanfala Christian.

⁴ Timothy hem growap long Lystra, wanfala smol taon long Galatia long wanfala province bilong Rome. Taem Paul hem preach long Lystra long samting olsem 47 C.E, luk olsem long datfala taem nao Timothy wea hem teenager nomoa, hem start for lanem Christian Wei. Olketa Christian brata barava tinghae long Timothy. Taem Paul hem go bak long Lystra tufala year bihaen and lukim Timothy hem barava muv ahed long spiritual wei, hem chusim Timothy for waka witim hem long missionary waka. (Acts 14:5-20; 16:1-3) Taem Timothy kamap mature long spiritual wei, hem kasem olketa responsibility wea moa big, insaed diswan hem wei for strongim olketa brata. Taem Paul stap long Rome olsem prisoner long samting olsem 65 C.E., hem raet go long Timothy wea long datfala taem Timothy hem serve olsem wanfala Christian elder long Ephesus.

5. Olsem 2 Timothy 3:14, 15 storyim, wanem nao tufala samting wea helpem Timothy for chus for aftarem olketa spiritual samting?

⁵ Hem barava klia hao Timothy hem chus for aftarem olketa spiritual goal. Bat wanem nao muvim hem for duim olsem? Long mek-tu leta wea Paul raetem for Timothy, hem talem tufala samting wea muvim Timothy. Hem raet olsem: “Gohed for hol strong long olketa samting wea iu lanem finis and wea olketa muvim iu for bilivim, from iu savve gud long olketa wea teachim iu, and start kam from taem iu baby yet iu savve long olketa holy raeting.” (2 Timothy 3:14, 15) Firstaem bae iumi lukluk long samting wea olketa nara Christian duim wea helpem Timothy for mekem olketa disison long laef bilong hem.

Kasem Gud Samting From Olketa wea Tinghae Long Spiritual Samting

6. Wanem training nao Timothy kasem, and waswe, hem followim datfala training?

⁶ Timothy hem growap insaed famili wea divaed saed long religion. Dadi bilong hem, hem wanfala man from Greece, and mami bilong hem, Eunice, and granmami bilong hem Lois, tufala Jew. (Acts 16:1) Start long taem hem baby yet, Eunice and Lois teachim Timothy truth wea stap insaed long olketa Hebrew Scripture. Bihaen tufala kamap Christian, tufala barava muvim Timothy for bilivim Christian teaching. Tru nao, Timothy hem kasem staka gud samting from disfala nambawan training. Paul hem sei: “Mi tingim faith bilong iu wea no hypocrite, wea firstaem granmami bilong iu Lois and mami bilong iu Eunice nao garem, and mi barava sure iu tu iu garem.”—2 Timothy 1:5.

7. Wanem blessing nao plande young wan garem, and wanem gud samting nao olketa kasem from diswan?

⁷ Plande young wan distaem garem parents and olketa grani wea fraet long God, olsem Lois and Eunice wea luksavve hao olketa spiritual goal hem barava important. Olsem example, Samira hem tingim yet hao taem hem teenager, plande taem hem savve sidaon witim mami and dadi bilong hem and olketa savve story for longfala taem. Hem sei olsem: “Mami and Dadi teachim mi for garem tingting bilong Jehovah abaotem olketa samting, and for tingim preaching waka olsem main important samting long laef. Evritaem tufala encouragem mi for aftarem full-taem service.” Samira hem followim encouragement bilong parents bilong hem, and distaem hem kasem spesol chance for kamap member bilong Bethel famili long kantri bilong hem. Sapos parents bilong iu encouragem iu for aftarem olketa spiritual goal, ting raonem gud advaes bilong olketa. Olketa laekem iu for duim samting long laef wea mekem iu hapi.—Proverbs 1:5.

8. Wanem gud samting nao Timothy kasem from wei wea hem fren gud witim olketa Christian wea encouragem hem?

⁸ Hem important tu for kaban witim olketa Christian brata and sista wea bae encouragem iu. Olketa Christian elder long kongregeson bilong Timothy, and olketa long Iconium wea stap samting olsem 30 kilometer awe, olketa savve gud long Timothy. (Acts 16:1, 2) Hem barava fren gud witim Paul, man wea barava strong for duim olketa waka. (Philippians 3:14 ) Olketa leta bilong Paul showimaot hao Timothy hem hapi for kasem advaes and hem no hol bak for followim example bilong olketa wea showimaot faith. (1 Corinthians 4:17; 1 Timothy 4:6, 12-16) Paul hem sei olsem: “Iu barava followim teaching bilong mi, laef bilong mi, goal bilong mi, faith bilong mi, long-safaring bilong mi, love bilong mi, and wei wea mi stand strong.” (2 Timothy 3:10) Tru nao, Timothy barava followim example bilong Paul. Olsem tu, sapos iu fren gud witim olketa brata and sista long kongregeson wea strong long spiritual wei, datwan bae helpem iu for garem olketa gudfala spiritual goal.—2 Timothy 2:20–22.

Studyim “Olketa Holy Raeting”

9. Witim wei for chusim hu nao for kaban witim, wanem nao iu mas duim for ‘trainim iuseleva witim fasin for lovem God olsem goal bilong iu’?

⁹ For kasem olketa spiritual goal, waswe, hem depend nomoa long wei for chusim gudfala pipol for fren witim olketa? Nomoa. Iu need for barava lukluk gud long “olketa holy raeting” olsem Timothy. Maet wei for duim study hem no isi for iu, bat tingim hao Timothy mas ‘trainim hemseleva witim fasin for lovem God olsem goal bilong hem.’ Olketa man for pleim sport evritaem train hard for plande month mekem olketa kasem goal bilong olketa. Olsem tu, for kasem olketa spiritual goal iumi need for barava waka hard and for sakrifaesim samfala samting. (1 Timothy 4:7, 8, 10,) Maet iu ask, ‘Bat hao nao wei for studyim Bible savve helpem mi for kasem olketa goal bilong mi?’ Iumi bae lukluk long thrifala wei.

10, 11. Why nao savve wea iu kasem long Bible bae muvim iu for aftarem olketa spiritual goal? Talem wanfala example.

¹⁰ First samting, information wea stap long Bible bae muvim iu. Bible hem showim iumi nambawan fasin bilong Dadi bilong iumi long heven, bigfala samting wea hem duim wea showimaot love for iumi, and plande gudfala blessing wea olketa faithful servant bilong hem bae kasem. (Amos 3:7; John 3:16; Romans 15:4) Taem savve bilong iu abaotem Jehovah hem kamap moa big, bae iu barava lovem hem and laek for dedicate long hem.

¹¹ Plande young Christian sei main samting wea helpem olketa disaed for followim truth, hem nao wei for studyim Bible evritaem. Olsem example, Adele hem growap long wanfala Christian famili bat hem nating markem eni spiritual goal. Hem sei: “Parents bilong mi, olketa tekem mi go long Kingdom Hall, bat mi no savve study seleva or lisin long olketa meeting.” Adele start for tingting strong abaotem truth bihaen big sista bilong hem baptaes. Hem sei: “Mi start for readim full Bible. Mi readim lelebet part and then mi raetem samting wea mi just read abaotem. Mi keepim yet evri note bilong mi. Mi readim full Bible insaed wan year.” Datwan muvim Adele for dedicate long Jehovah. Nomata hem disable, main waka bilong hem distaem nao hem for talemaot gud nius olsem wanfala pioneer.

12, 13. (a) Wei for studyim Bible bae helpem wanfala young wan for changem wanem samting, and hao nao hem savve duim datwan? (b) Talem samfala example bilong wisdom wea insaed long Word bilong God.

¹² Mek-tu samting, Bible bae helpem iu for changem samfala fasin wea iu need for changem. Paul talem Timothy hao “olketa holy raeting,” olketa “gud for teachim man, for givim kaonsel, for stretem evri samting, and for givim discipline long raeteous wei, mekem man bilong God hem fit evribit, barava redi for duim evri gudfala waka.” (2 Timothy 3:16, 17) Taem iu ting raonem Word bilong God evritaem and followim olketa principle long Bible, spirit bilong God bae helpem iu for changem olketa fasin bilong iu. Datfala spirit bae helpem iu for garem olketa gudfala fasin olsem hambol fasin, wei for no givap, strong for waka, and love for olketa nara Christian. (1 Timothy 4:15) Timothy hem garem olketa fasin olsem, and datwan mekem hem kamap wanfala blessing long Paul and for olketa kongregeson wea hem serve long hem.—Philippians 2:20-22.

¹³ Mek-thri samting, Word bilong God hem stoahaos wea fulap witim wisdom wea savve helpem iumi. (Psalm 1:1-3; 19:7; 2 Timothy 2:7; 3:15) Hem bae helpem iu for deal witim enikaen hardfala samting, and for chusim olketa fren bilong iu and hapitaem long wisefala wei. (Genesis 34:1, 2; Psalm 119:37; 1 Corinthians 7:36) For kasem olketa spiritual goal bilong iu, iu mas mekem olketa wisefala disison distaem.

“Faetem Nambawan Faet Bilong Faith”

14. Why nao wei for aftarem olketa spiritual goal hem no isi?

¹⁴ Barava wise samting for duim hem for markem olketa goal wea honorim Jehovah olsem main samting long laef bilong iumi. Bat datwan hem no isi samting for duim. Olsem example, taem iu mas chusim waka for selen, maet iu kasem hevi from olketa relative, fren, and olketa teacher wea trae for helpem iu, from olketa tingse wei for kasem bigfala education and for garem big waka, hem nao samting wea bae mekem iu kasem trufala hapi and for garem gudfala laef. (Romans 12:2) Olsem Timothy, bae iu need for “faetem nambawan faet bilong faith” mekem iu “hol strong long laef olowe” wea Jehovah laek givim long iu.—1 Timothy 6:12; 2 Timothy 3:12.

15. Wanem test nao maet Timothy hem feisim?

¹⁵ Taem olketa long famili bilong iu wea no biliv no agree witim samting wea iu chusim, datfala test savve kamap barava hard. Maet Timothy deal witim olketa kaen test olsem tu. Wanfala buk hem storyim hao luk olsem famili bilong Timothy olketa “rich and olketa wea kasem hae education.” Maet dadi bilong hem expectim hem for kasem hae education and for ranem famili bisnis.a Tingim feeling bilong dadi bilong hem taem Timothy chus for duim missionary waka witim Paul wea maet minim hem bae kasem hard taem saed long selen and feisim samfala danger!

16. Wanem nao wanfala young wan duim for deal witim wei wea dadi bilong hem againstim hem?

¹⁶ Olketa young Christian distaem tu feisim olketa sem samting. Matthew, wea distaem hem serve long wanfala branch office bilong Olketa Jehovah’s Witness, hem sei olsem: “Taem mi start for pioneer, dadi bilong mi barava feel nogud tumas. Hem tingim wei wea mi duim klining waka for sapotim mi long ministry, hem olsem mi weistim education wea mi kasem. Hem tok spoelem mi, and talem mi haomas selen mi savve tekem sapos mi duim full-taem waka.” Wanem nao Matthew duim for deal witim datfala test? Hem sei: “Mi strong for followim wanfala Bible reading schedule and mi prea evritaem, especially long olketa taem wea mi start for feel kros.” Matthew kasem gud samting from wei wea hem stand strong. Gogo wei wea hem fren witim dadi bilong hem kamap moabeta. And tu, Matthew hem fren gud go moa witim Jehovah. Hem sei olsem: “Mi lukim hao Jehovah hem provaedem olketa samting wea mi needim, encouragem mi, and helpem mi for mekem olketa disison long wisefala wei. Bae mi no kasem olketa samting hia sapos mi no aftarem olketa spiritual goal.”

Tingim Olketa Spiritual Goal Evritaem

17. Nomata olketa no min for duim, hao nao maet samfala no encouragem olketa wea plan for duim full-taem service? (Matthew 16:22)

¹⁷ Nomata olketa brata and sista no min for duim, maet olketa talem samfala samting wea no encouragem iu taem iu trae for aftarem olketa spiritual goal. Samfala maet askem iu, ‘why nao iu laek pioneer?’ ‘Iu savve duim olketa sem samting wea olketa narawan duim and long semtaem iu savve duim preaching waka tu. Go waka, mekem iu savve kasem gudfala pei and then bae iu garem selen for helpem iu long laef.’ Nomata datwan maet here olsem gudfala advaes, waswe, bae iu really trainim iuseleva witim fasin for lovem God olsem goal bilong iu, sapos iu followim datfala advaes?

18, 19. (a) Wanem nao iu savve duim for gohed for tingim olketa spiritual goal evritaem? (b) Olketa young wan, wanem nao samfala sakrifaes wea iufala mekem for saed bilong Kingdom?

¹⁸ Luk olsem samfala Christian long taem bilong Timothy garem olketa sem tingting. (1 Timothy 6:17) Paul helpem Timothy for tingim olketa spiritual goal evritaem, taem hem encouragem hem olsem: “No eni man wea hem soldia savve duim eni narafala waka, mekem datfala man wea mekem hem for kamap wanfala soldia savve hapi long hem.” (2 Timothy 2:4) Wanfala soldia bae no letem nara samting for pullim mind bilong hem go difren. Laef bilong hemseleva and laef bilong nara pipol hem depend long wei wea hem evritaem redi for duim samting followim komanda bilong hem. Iu wea iu olsem soldia bilong Christ, iu mas garem semkaen tingting and no busy long olketa material samting wea no important, wea bae stopem iu for duim evribit ministry bilong iu wea savve sevem laef bilong pipol.—Matthew 6:24; 1 Timothy 4:16; 2 Timothy 4:2, 5.

¹⁹ Winim wei for aftarem wanfala isi laef nomoa, iu need for garem spirit for sakrifaesim seleva. “Olsem wanfala soldia bilong Christ Jesus, iu mas willing for no garem olketa samting wea savve mekem iu garem isi living.” (2 Timothy 2:3, The English Bible in Basic English) Taem Timothy waka witim Paul, hem lane for satisfae nomata hem feisim olketa hardfala samting. (Philippians 4:11, 12; 1 Timothy 6:6-8) Iu savve duim sem samting. Waswe, iu willing for mekem olketa sakrifaes for saed bilong Kingdom?

Olketa Blessing Distaem and Long Future

20, 21. (a) Wanem nao samfala blessing wea man savve kasem from wei for aftarem olketa spiritual goal? (b) Wanem nao iu disaed strong for duim?

²⁰ Timothy hem waka witim Paul for samting olsem 15 year. Timothy hem stap taem olketa niu kongregeson hem start taem gud nius hem go kasem klosap evri part long area long north bilong Mediterranean. Hem barava hapi and satisfae long laef bilong hem. Hem bae no feel olsem sapos hem chus for garem laef olsem nara pipol. Taem iu aftarem olketa spiritual goal, iu tu bae kasem olketa nambawan spiritual blessing. Bae iu fren gud witim Jehovah, and olketa nara Christian brata and sista bae lovem and respectim iu. Winim wei for kasem pain and wei for no satisfae wea man savve kasem from wei for aftarem material samting, bae iu kasem trufala hapi wea kam from wei for givim samting. Winim evri samting, bae iu “hol strong long datfala really laef,” hem nao laef olowe long wanfala paradaes long earth.—1 Timothy 6:9, 10, 17-19; Acts 20:35.

²¹ Sapos iu no duim diswan yet, mifala encouragem iu for start distaem for trainim iuseleva witim fasin for lovem God olsem goal bilong iu. Fren gud witim olketa long kongregeson wea savve helpem iu for kasem olketa spiritual goal, and askem advaes bilong olketa. Mekem wei for studyim Word bilong God kamap main samting long laef bilong iu. Disaed strong for againstim spirit bilong disfala world for aftarem material samting. And tingim evritaem hao God “wea givim iumi evri samting for mekem iumi hapi” hem promisim iu hao iu savve kasem olketa nambawan blessing distaem and long future sapos iu chusim olketa goal wea honorim hem.—1 Timothy 6:17.

[Footnote]

Waswe, Iu Remember?

• Wea nao olketa young wan savve kasem help for kasem olketa spiritual goal?

• Why nao hem barava important for studyim gud Bible?

• Wanem nao olketa young wan savve duim for againstim wei bilong disfala world for aftarem material samting?

• Wanem nao olketa blessing wea iu savve kasem from wei for aftarem olketa spiritual goal?

[Piksa long page 24]

Timothy hem aftarem olketa gudfala goal

[Olketa Piksa long page 25]

Hu nao olketa wea helpem Timothy?

[Olketa Piksa long page 26]

Waswe, iu trae hard for kasem samfala spiritual goal?